Nnwẹr s'Osenga 21
21
1Maa wọ ode nnyina s'm'anạng anạng p'Israẹl:
Nnyina s'abira p'aHiburu
2“Ode adebhi ubira kw'ode uHiburu-nạng, m'usi abọ ọtọhm k'icho isajạnẹ. Ottong icho isenọfa, m'ọnnaanga ibira, ọttọhk vạnọ-vạnọ mọ́nạng. 3Ode ukwu mạnkkeni, m'ọkpa nnạm mạnkkeni; okhenka, de ukwu ikwanạng kwẹ abẹ, m'ọbhạna ikwanạng kwẹ abẹ. 4Ode aro kwẹ ọnạng-ẹ ubira kwẹ wạnọ kw'ikwanạng bẹ́, ọtạkha, de ọmaan-ẹ ajunungva, ọbạra ode apanạngva, ikwanạng nwọ ọttạra iva pẹ m'ade p'aro kwẹ, ujunung nwọ mạnkkeni wọ m'ọbhạna.
5“Okhenka, de ubira nwọ ọkpaakhẹ akwẹ ọttaanẹ bẹ́, ‘Amma aro kwaam ọttạra ikwanạng kwaam ọttạra iva paam adaakh-m ọdaak ro, amma khaam nọ́daakha bẹ́, nnaanga ibira e,’ 6aro kwẹ m'utim-ẹ okhebha Ubinọkpaabyi. M'obe-ẹ k'ẹttọhmma, ọbạra ode k'ẹkpọmmachi, utima ijum udwu-ẹ itọhng. Ma wọ, ubira nwọ n'ode kwẹ k'akpen pẹ phyibh.
7“De ọnạng ọtạk ọkwanạng-nwa kwẹ okpe k'ibira, uminanwa nwọ oche kw'adikkobh n'abhạna mọ́bhạna 8De uminanwa nwọ nạn aro kwẹ idik nọ́daakha, m'utti-ẹ ọbọhk abẹ abhekh-ẹ k'ibira. Aro kwẹ ẹfa kọ́khaam bẹ́, ukpẹ-ẹ ọnạng akhikhennạng, ukwuru bẹ́, ẹma aro nwọ kwẹ echekha ch'ọnạngẹ ubira nwọ nóchokha. 9De ọtạk uminanwa nwọ ọnạng ujunungnwa kwẹ, ọbaan bẹ utim-ẹ masẹ ọkwanạng-nwa kwẹ oyeni. 10De ọbạra ọtạkha ikwanạng ọdwạkh-ọdwạk, ọbaan bẹ́, ọnạng ocheden-kwanạng uchiattọhk, ọttạra ekpo py'ifor, ọbạra ọttạr-ẹ iyima. 11De nạn ikwanạng nwọ ekpo mbyọ ẹttaan nọ́nạnga, ikwanạng nwọ ọbaan bẹ́, ọbhạna k'ọphyaam, akpokha mútima obhek ẹnnaanga chẹ.
Nnyina s'avun oyok asi ọttọhk
12“Ọnạng kwidede kw'uvunu oyok ọfhọ, abẹ m'agba afhọ ẹma. 13Okhenka, de nạn khẹ k'ẹyaakha nọ́fha, s'akwẹ ode bẹ́, Ubinọkpaabyi wọ otte kwẹ ọbọhk uyin, tte ọrạbh ọta uttubha k'ibyi s'm'ntekha. 14Okhenka, de ọnạng ọfhọ oyok k'ẹyaakha, abạnga atim-ẹ abina arik ijabyi saam, ata afhẹ-ẹ.
15“Ọnạng kwidede kw'ọfhọ otte, ọbạra ode ọkka, ọbaan bẹ́, abẹ afhẹ-ẹ.
16“Ọnạng kwidede kw'ufu oyokhanạng, ọbạra ode bẹ́, ukpẹ-ẹ okpe, ọbạra ode bẹ́, abẹ akhebh-ẹ ọttạra ọnạng nwọ k'mbọhk, ọbaan bẹ́, abẹ afhẹ-ẹ.
17“Ọnạng kwidede kw'ọsaakhẹ otte, ọbạra ode ọkka, ọbaan bẹ́, abẹ afhẹ-ẹ.
18De anạng afa atta ẹtta, oyok wạnọ ọtọbh oyok ẹta, ọbạra ode bẹ́, uvun-ẹ ibọhkdwuk, oyok núpua, okhenka uyima ọkhạmana, 19ẹma nwọ kw'uvunu oyok ibọhkdwuk abẹ khẹ irem mánạng, de oyok ọnnaang ibọhkdwuk nnọ, ọtạkha uchikwura kwẹ okhonga osenga, ẹma nwọ kw'uvunu oyok m'ọmmạnga akpokha ọnạng oyok k'okpe kw'kk'oyok ukhibha, ọbạra okkerẹ-ẹ tạrr ifor ikpọhkh-ẹ.
20“Ode ọnạng utim ichi uvun ubira-junung, ọbạra ode ubira-kwanạng kwẹ tạrr ope kakhẹ-ẹ k'mbọhk, ọbaan bẹ́, abẹ anạng ọnạng nwọ irem. 21Okhenka, de ubira nwọ ọnnaang nkwur nnọ k'iwu jạnẹ, ọbạra ode k'iwu ifa, ọkhaam-ubira nwọ, abẹ khẹ irem mánạng, ukwuru bẹ́, ubira nwọ ode akpokha pẹ.
22“De ajunung afa arim irima, abẹ apạnnẹ avun ikwanạng kw'utim ifhạr ọttọhk, ifhạr nnọ isenga ma iyin s'okpe kwẹ nạn tạm obenga, ọttọhk ọbạr-ọbạr abẹ námuma, ọnạng kw'ọjẹ udik ngwọ m'utwuk ọttọhk fidede f'udim kw'ikwanạng nwọ ọkpaar, kw'esobh ẹbạra echera ẹnạng-ẹ. 23Okhenka, de abẹ amum ikwanạng nwọ ọttọhk f'ọbạr-ọbạr, m'atima akpen atera akpen, 24de udwu-ẹ ichen, adwu-ẹ ichen, de ọrạbh-ẹ ẹsa, arạbh-ẹ ẹsa, de ọkpaar-ẹ ọbọhk, akpaar-ẹ ọbọhk, de ọkpaar-ẹ ofhok, akpaar-ẹ ofhok, 25de ọkkạm-ẹ ekpon, akkạm-ẹ ekpon, de usi-ẹ ebhena, asi-ẹ ebhena, de obor-ẹ upfhurakpakpa, abor-ẹ upfhurakpakpa.
26“De ọnạng uvunu ubira-junung, ọbạra ode ubira-kwanạng kwẹ ọttọhk udwu-ẹ ichen, ọbaan bẹ́, otte ubira nwọ ọbọhk ọbhạna k'ọphyaam, ukwuru ichen sẹ. 27De ọnạng uvunu ubira-junung, ọbạra ode ubira-kwanạng kwẹ, ọrạbh-ẹ ẹsa, ọbaan bẹ́, otte ubira nwọ ọbọhk ọbhạna k'ọphyaam, ukwuru ẹsa chẹ.
28“De ẹbhaam-dim ikhumu ọnạng abhik tạrr ope, ode ujunung, ọbạra ode ikwanạng, ọbaan bẹ́, abẹ atọbh chẹ ata tạrr achẹ epe, tte ọnạng nạngẹ eten chẹ uchi. Okhenka, oyeni kw'ọkhaam ẹbhaam-dim njọ ofhoru mọ́tạkha. 29Okhenka, de ẹbhaamdim njọ kk'anạng abhik ikhuma-khuma, abẹ atwạr oyeni itọhng, ukuma chẹ vạvạkha tạrr achẹ ẹta ẹfhọ ujunung ọbạra ode ikwanạng, ọbaan bẹ abẹ atọbh chẹ ata tạrr achẹ epe, tte abẹ abạra afhọ oyeni. 30Ma wọ, de abẹ akpaar ntwukha anạng-ẹ, ọbaan bẹ́, utwuk fidede f'abẹ akpaar anạng-ẹ, ọfha utima obhek akpen pẹ. 31Inyina nja ẹbạra ede ukhira ngwọ gwạnọ, de ẹbhaamdim ikhumu ujunungnwa, oseng uminanwa, ẹfhẹ-ẹ. 32De ẹbhaamdim njọ ikhumu ubira-junung ọbạra ode ubira-kwanạng, ọkhaam ẹbhaamdim njọ ọbaan bẹ́, ọnạng ọkhaam-ubira ashẹkẹl ẹrạbh ukuma jọbh p'asilva, ọbaan adạkhẹ bẹ́, abẹ atima ata afhọ ẹbhaamdim njọ.
33“De ọnạng utumu ipekhuma otto eje, ode ẹbhaam, ọbạra ode bẹ́, ẹnyạnyaang jọ etto k'ẹtaanga, 34ọbaan bẹ́, ọnạng kw'utumu ipekhuma nnọ utwuk akpokha ọnạng oyeni kw'ọkhaam ẹnyạnyaang, ẹma bạra ọtạkha ọnyạnyaang-bukhu.
35“De ẹbhaamdim ch'ọnạng isi ẹbhaamdim ch'ọnạng ọdwạkh-ọdwạk ọttọhk, achẹ ikwu epe, abẹma mbọ anạng afa m'akpe ẹbhaamdim ch'ining akpen, akhebh akpokha, abẹ abạra akhebh ẹbhaam-bukhu ngwọ obengana. 36Okhenka, de anạng asong bẹ́, ẹbhaam-dim njọ n'ekhọhng anạng khu-khum, bạra oyeni ukuma chẹ vạvạkha oge k'ọpa, m'utima ẹbhaam otera ẹbhaam, njọ ch'epope n'ede chẹ.
Currently Selected:
Nnwẹr s'Osenga 21: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
