Nnwẹr s'Osenga 20
20
Nnyina jobh s'Ubinọkpaabyi
(Deutẹrọnọmi 5.1-21)
1Ma wọ, Ubinọkpaabyi ọkpaakhẹ idik nna, oben bẹ́:
2“Amma wọ nde Ọvaar Ubinọkpaabyi kw'ode Ubinọkpaabyi kwabạnga, kw'utim bạnga ubina k'Ijip, k'isek s'ibira.
3“Abạnga ọkha ọdwạkh-ọdwạk kákpobha, oyonga amma.
4“Abạnga ọkpata kágwa kw'okheri ọttọhk fidede f'uning k'ẹrạng, ọbạra ode f'uning k'isek, ọttạra f'uning k'asi ẹtaanga. 5Abạnga echo kátwunga anạng akpatava mbọ, abạnga pyẹ kábạra akpobha, ukwuru bẹ́, amma Ọvaar Ubinọkpaabyi kw'nde Ubinọkpaabyi kwabạnga, nde Ubinọkpaabyi kw'ọkhaam ottemma, kw'n'ọnạng iva irem k'mpyibha s'ab'otte, tạrr ukpira mgbọmma nttaan, ọttạra mgbọmma nnebung k'anạng p'awun-m. 6Okhenka, mgbọmma nnọ ibhikh-asong s'ikhaam abamẹ idạdaakha, s'n'ibạra ichok nnyina saam, m'nkhọhkha bẹ idạdaakha.
7“Abạnga eche ch'Ọvaar Ubinọkpaabyi kw'ode Ubinọkpaabyi kwabạnga k'innukhuden kátima, ukwuru bẹ́, ọnạng kw'utim eche chẹ k'innukhuden múbina ọnạng.
8“Ajima Ẹyọhngkwokha-wu, abạnga achok chẹ masẹ awuradawu anạng Ubinọkpaabyi. 9Atima iwu isajạnẹ asi itọhm sabạnga phyibh, 10okhenka, iwu njọ ch'ettong iwu isenọfa, ẹjọ ch'ede ẹyọhngkwokhawu ch'ikpukpobha, ẹnạng Ọvaar Ubinọkpaabyi kw'ode Ubinọkpaabyi kwabạnga. Ma iwu njọ, ọnạng wạnọ-wạnọ, ọbạra ọma wọ, ọbạra ode ujunungnwa kwọ, ode ọkwanạng-nwa kwọ, ode ọtọhmnạng kwọ kw'ujunung, ode kw'ikwanạng, ode itirakpo pyabạnga, ọbạra ode ukhikhennạng kw'urukhu k'ifhon sabạnga, nạ́ngẹ ọtọhm usi. 11Ọvaar Ubinọkpaabyi utim iwu isajạnẹ usi ẹrạng ọttạra isek, ọttạra ẹraangadiden, ọttạra ekpo phyi-phyibh py'ining k'ẹtaanga kwabẹ. Okhenka, okwok oyọhng s'ottong iwu isenọfa. Ma wọ, Ọvaar Ubinọkpaabyi odo Ẹyọhngkwokhawu njọ, ochok chẹ masẹ awuradawu.
12“Akpobha ab'atte ọttạra abakka, ọfha abạnga aruk akpen p'adum-udum k'isisek s'Ọvaar Ubinọkpaabyi kw'ode Ubinọkpaabyi kwabạnga ọnạngẹ bạnga.
13Abạnga ọnạng káfhọ.
14“Abạnga ọtta kátạm.
15“Abạnga uribh káfu.
16“Abạnga nttẹnsẹ kw'afhạra kábe.
17“Abạnga ichọhm s'ayok, ọttạra ipanạng p'ayok, ọbạra ode ọtọhmnạng kwẹ kw'ujunung, ọbạra ode kw'ikwanạng, ode ẹbhaam chẹ, ode ẹnyạnyaang, tạrr oseng k'ọttọhk f'idede f'oyok ọkhaam, k'ẹfa kátạkha.”
18Masẹ anạng mbọ ase s'ẹbhaangkpon n'ẹmạnẹ, ẹbạra ẹtta itum, abẹ abhaanga s'inyisa ege, abẹ abạra ase s'okpecho n'ode isusong-isusong, ojora ọvạkha bẹ, abẹ n'afhạnọ bẹ tikhi-tikhi-tikhi. Ma wọ, abẹ abe eden-ibhir, 19aben Mosẹs bẹ́, “Ọma oyeni ma ifor sọ kpaak udik nạngẹ mạna, khiri m'ankhọhm-ọ itọhng ọkhọmọ. Okhenka, Ubinọkpaabyi ọbọhk kátte ọkpaak mạna udik, deja kk'ampua.”
20Mosẹs oben anạng mbọ bẹ́, “Nạngẹ bạnga ojor. Ubinọkpaabyi kk'ukwua bẹ́, ukwu oyoma bạnga, ọfha abạnga akhaama ojora fẹ, f'm'usi bạnga arạbh arik ipyibha.”
21Anạng mbọ abe eden-ibhir, Mosẹs mạnkkeni osenga ọbaanga ebona ch'ipyi bẹ́ kkạạng, k'ibyi s'Ubinọkpaabyi uning.
Nnyina s'iten k'akpatava ọttạra ijabyi
22Ma wọ Ọvaar Ubinọkpaabyi obeni Mosẹs bẹ́, “Kpaak anạng p'Israẹl bẹ́, ‘Abạnga kk'asia k'abạnga oyeni k'ifor bẹ́, amma kk'nninga k'erạng mkpaak bạnga abẹ. 23Abạnga asilva ọttạra agol kátima agwa akha p'abạnga m'akpobha attạra kakhaam.
24“Abạnga atima adọhngọ asi ijabyi, abạnga afọhnọ nja ikkạmasẹ ma, ọttạra nnạnga s'ẹmẹm, ọttạra s'arạkhạmaan, ọttạra s'mvu, ọttạra s'mmaam s'abạnga m'anạng-m. Ibyi sidede s'nsi bẹ́, ide ikpukpobhabyi s'eche chaam, amma m'nsạkha nkwu nkhebha bạnga ma, mbạra ndo bạnga. 25De m'atima ata asi ijabyi anạng-m, ata p'abẹ ado-odo kátima, ukwuru bẹ́, de atim ata p'abẹ ado-odo, kk'sẹ akhibha. 26Abạnga k'ibyạrẹ-mfhok kásenga avura k'ijabyi saam atena ẹrạng-ẹrạng, ọfha abạnga nạngẹ sẹ irinikhum chabạnga akhọhk.”
Currently Selected:
Nnwẹr s'Osenga 20: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
