Nnwẹr s'Osenga 22
22
Nnyina s'iten k'ẹkhaama
1“De ọnạng ufu ẹbhaam, ọbạra ode ọrạkhạmaan, ọfhọ, ọbạra ode bẹ́, okpe chẹ okpe, m'utwuk mmaam nsen k'ẹbhaam jạnẹ, de ode ọrạkhạmaan, m'utwuk annebung k'ọrạkhạmaan wạnọ.
2“De abẹ avạk uriribha s'n'ufu uribh k'irungu bạra abẹ avun-ẹ afhọ, ọnạng kw'ọfh-ẹ ofhoru kw'ẹnạng-fha mọ́tạkha. 3Okhenka, de ọfhẹ-ẹ s'iwu kk'echobha, kk'uttia k'inyina ch'ẹnạngfha.
“Uriribha ọbaan bẹ́, urik ọttọhk fidede pf'ufhu, okhenka, de nạn ọttọhk ọkhaam, ọbaan bẹ́, abẹ akpẹ-ẹ atima atera ọttọhk pf'ufu.
4“De abẹ ase eten ch'ufu k'mbọhk sẹ s'itim irukhu akpen, ode ẹnyạnyaang, ọbạra ode ọrạkhạmaan o, ọbaan bẹ́, utwuk chẹ k'ikpe ifa.
5“De ọnạng utim itirakpo pyẹ bẹ́, ọta ọnạng uchiattọhk, ukwu otte pyẹ ọbọhk, ettena ẹta ichi owonu, ọbạra ode owonu kw'ọnạng kw'vine o, ọbaan bẹ́, utima ekpo ẹkkapyẹ p'ibin kakhẹ k'owonu kw'agrep utwuk.
6“De ọnạng ukhumu erekpa chẹ, ekpon ẹyạma ejekha k'owonu kw'oyok, ẹta ẹkkạmọ ekpo py'utubhu, ọbạra ode py'ọphy-ọphya otobha, ọbạra ode bẹ́, ẹkpa ch'ọnạng nwọ ẹyạm kubungu, ọbaan bẹ́, ọnạng kw'oge ekpon njọ utwuk oyok ekpo pyẹ py'ẹkkạmọ.
7“De ọnạng ọnạngẹ oyok akpokha, ọbạra ode ekpo ẹdwạkh-ọdwạk bẹ́, ochokh-ẹ, abẹ akhebha pyẹ ma ọchọhm kwẹ afu, abẹ avạkha uriribha nwọ, ọbaan bẹ́, uriribha nwọ utwuk pyẹ k'ikpe ifa. 8Okhenka, de abẹ nạn uriribha nwọ násia, ọbaan bẹ́, oyeni-ọchọhm obe k'ititikha Ubinọkpaabyi ọkpaak de k'ekpo py'oyok ufua. 9K'iponga phyi-phyibh s'iten k'uribh f'ẹbhaam ọttạra, f'ẹnyạnyaang, ọttạra f'ọrạkhạmaan, ọttạra f'ivạra, ọbạra ode ọttọhk fidede f'udim-udimi, f'ọnạng obeni bẹ́, “Ọttọhk pfaam vọ ma,” anạng mbọ afa m'atima iponga nnọ akkena Ubinọkpaabyi. Ọnạng kw'iponga ipyibhi, ọbaan bẹ́, utwuk ọttọhk mvọ ikpe ifa ọnạng oyok.
10“De ọnạng utiri oyok ẹnyạnyaang, ọbạra ode ẹbhaam, ọbạra ode ọrạkhạmaan, ọbạra ode utirattọhk fidede, apfẹ ukwu ope, ọbạra ode bẹ́, abẹ amaamẹ pfẹ ọttọhk, ọbạra ode bẹ́, udim-udimi s'ọnạng nạn utum núgia, 11abẹma anạng afa m'achekhi k'ititikha s'Ọvaar Ubinọkpaabyi bẹ́, iponga oyok nípyibha. Ọbaan bẹ́, oyeni ochera oche ngwọ, oyok dạk mútwuk. 12Okhenka, de akwẹ ode bẹ́, abẹ afu utirattọhk mvọ k'oyok k'mbọhk, oyonga m'utwuk pfẹ ọnạng oyeni. 13De ode bẹ́, ẹkpaten njọ ẹvạk utirattọhk mvọ ẹfhọ, ẹyaakhẹ k'akpa-k'akpa, ọbaan bẹ́, ọtạkha akpakpa p'eten njọ p'arikhi ọkhọhkha, dạkhẹ chẹ mútwuk.
14“De ọnạng ọyaamẹ utirattọhk f'oyok, abẹ avun pfẹ asi ọttọhk, ọbạra ode bẹ́, apfẹ opope, s'oyeni nạn ode, ọbaan bẹ́, ọnạng kw'ọyaamẹ pfẹ utwuk ọnạng oyeni. 15Okhenka, de oyeni kw'ọkhaam utirattọhk mvọ uning k'ininga okpe kw'udik ngwọ uyini, ọnạng kw'ọyaamẹ utirattọhk mvọ pfẹ mútwuk. De ọyaamẹ utirattọhk mvọ k'akpokha, akpokha p'utim ọyaam pfẹ m'atera utirattọhk mvọ f'udimi.
Nnyina s'iten k'oche kw'ayokhanạng m'aruk
16“De ujunung ọbọhr uminanwa kw'nạn ujunung tạm nósonga uyima abẹ k'ẹfa, ọbaan bẹ́, usi iminakpo, bạra ode ikwanạng kwẹ. 17De otte kw'uminanwa nwọ ufhumu wowong bẹ́, kẹ-ẹ nnwa kwẹ mọ́nạng k'ọbada, ọbaan bẹ́, ujunung nwọ usi iminakpo ọnạng uminanwa kw'nạn ujunung tạm nósonga.
18“Abạnga ikwanạng kw'n'utima akpakpa-pyibha ọbọhra anạng, ọbọhk kkáte uruk akpen.
19“Ọnạng kwidede kw'uyim eten abẹ, ọbaan bẹ́, abẹ afhẹ-ẹ.
20“Ọnạng kwidede kw'n'ọfọhnọ ẹja ọnạng ọkha fidede, ọyaang Ọvaar Ubinọkpaabyi ọjẹ, ọbaan bẹ́, abẹ afhẹ-ẹ.
21“Abạnga ukhikhennạng igbaan kási, abạnga khẹ irem kánạng, ukwuru bẹ́, wa abạnga agba ade akhikhennạng k'Ijip.
22“Abạnga opokwa ọttạra upfunwa igbaan kási. 23De abạnga asi bẹ igbaan, abẹ agạma ayer-m, k'udik ọkka, amma m'mmaanga ẹmạng chabẹ ọbhaanga. 24M'nkọhkha idwạdwạkhọ saam, mbạra ntima ọkkangkkang-kkro mfhọ bạnga. Ipanạng pabạnga m'ade apokwa, iva pabạnga m'abạra ade apfuva.
25“De abạnga afhoru ọnạng kwidede kw'ode kwaam, kw'ode ukpukpora, kw'uning bạnga abẹ akpokha, abạnga iru káge k'oche kw'anạng p'n'afhor anạng akpokha n'asi. 26De ayaamẹ ivạra s'oyok-ọbaanga kwọ, rik sẹ brasẹ n'ukpir k'ẹchọhkha, 27ukwuru bẹ́, ẹrọ mạnkkeni m'utima ububha ifor sẹ. De nạn sẹ nárikha, mbạng vọ n'abạra ububha uyima o? De ọgạm oyer-m, amma m'mmaang-ẹ ọbhaanga, ukwuru bẹ́, amma nkhaam ikwosi-ttem.
28“Abạnga Ubinọkpaabyi kánnukhu. Abạnga ọnạng kw'ọdạbhẹ anạng pabạnga kásaakhẹ.
29“Abạnga ẹnạnga ch'ọchọhm kw'uchiattọhk fabạnga, ọttạra ch'atwuk pabạnga kávạkha atima.
“Ọbaan bẹ́, abạnga anạng-m achedenva pabạnga p'ade ajunung.
30Oche ngwọ gwọ kw'abạnga m'asi k'mmaam ọttạra arạkhạmaan pabạnga. Tte apyẹ ininga ab'ọkka abẹ k'iwu isenọfa, okhenka, de ottong iwu isenọttaan, atạkha pyẹ akken-m.
31“Abạnga m'ade anạng paam p'awur-uwur. Ma wọ, abạnga eten ch'nten s'ẹkpa ifhọ, iyaakhẹ k'ayaar-kayaar káchi, abạnga abhạrẹ chẹ anạng mpfa.
Currently Selected:
Nnwẹr s'Osenga 22: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
