Makətūbə̄ ń Pol ndang adə̄ Rom gə̄ ní 10
10
1Ngákó̰ó̰ḿ gə̄, yá̰á̰ ń m̄-ndə̄ngā kemḿ tə́ tām̄ yā *Jipə gə̄ tə́ ō, yá̰á̰ ń m-ā m̄-ndɔ̄ȳ Nə́ɓā tām̄ yādə́ tə́ najə̄n tə́ ō ní i kadə̄ ajən̄. 2O̰o̰də́ tɔdɔ̄ Nə́ɓā ngá̰ý adə̄ mā i de kə́ kum tə́ yādə́ najə̄n tə́. Banī ko̰o̰ ń o̰o̰də́ tɔdɔ̄ Nə́ɓā ní i kanjə̄ ger̄ yá̰a̰. 3Tɔdɔ̄ nin̄-gerə̄n̄ loo rāā ń Nə́ɓā rāań de gə̄ kadə̄ télən̄ de kə́ gōtə́ gə̄ ta kumən tə́ ní alé, adə̄ ḭḭ sāān̄ i loon yādə́ nin̄ kɔ́ gə̄ kə́ sɔɔ̄ dɔdə́. A loo ń noō tə́ ní nin̄-aw̄n̄ gír loo rāā ń Nə́ɓā rāań de gə̄ kadə̄ télən̄ de kə́ gōtə́ gə̄ ta kumən tə́ ní alé. 4Tɔdɔ̄ loo ń *ndū najə̄ a aw̄ kə de gēé kə̄ tū tə́ ní i *Kərist, yā kadə̄ deē malang ń taā kemən ní, kɔ́ɔ̄ téləń de kə́ gōtə́ ta kum Nə́ɓā tə́.
Deē malang ń taā kem Kɔ́ɔ̄ɓē ní a ajə
5Moijə nəkɔ́ ɔr̄ najə̄ kə́ sɔɔ̄ dɔ loo rāā ń *ndū najə̄ a rāā de gə̄ kadə̄ télən̄ de kə́ gōtə́ gə̄ ta kum Nə́ɓā tə́ ní. Moijə ndang na
deē ń rāā yá̰a̰ gə̄ ń ndū najə̄ ɔjə ní a ndi kə kumneé kə ta kūl̄ ndū najá.
6Ba á̰a̰ī najə̄ ń ədan̄ dɔ loo téĺ ń de gə̄ a télən̄ de kə́ gōtə́ gə̄ ta kum Nə́ɓā tə́ tām̄ taā kem yādə́ tə́ ní. Ədan̄ na kə ī-lōō gír̄ kəda kemií tə́ na
ké i náā n a aw̄ dɔ rā̰ tə́ yā reē kə Kərist ní wa,
7aláa ké i náā n a aw̄ ɓádá#10.7 K. 7: Á̰a̰ī Ndū 9.4, 30.12-13 yā teē kə Kərist dan de kə́ koy gə̄ tə́ ní wa.
8Ədan̄ na i rí n noó? Yá̰á̰ ń ədan̄ ní n toó:
Najə̄ i rɔ̄í tə́ laā ngɔr,
i taí tə́ ō, i kemií tə́ ō#10.8 K. 8a: Á̰a̰ī Ndū 30.14.
Najə̄ ní i najə̄ taā kem ń j-ə̄nā mbērən ní. 9Ré ə́da taí tə́ na Jeju i Kɔ́ɔ̄ɓē ō, ré ī-taā kem mámák kadə̄ Nə́ɓā ndólə̄n̄ dan de kə́ koy gə̄ tə́ ō anī, ā ájə. 10Tɔdɔ̄ i taā kem kə́ mámák n a rāāī kadə̄ ī-tél de kə́ gōtə́ ní ō, i kəda kə́ əda taí tə́ na Jeju i Kɔ́ɔ̄ɓē ní n a ajiī ní ō. 11Tɔdɔ̄ makətūbə̄ əda na:
Deē malang ń a taā kem Jeju ní rɔ̄n a sɔlə̄n alé#10.11 K. 11: Á̰a̰ī Ij 28.16.
12Adə̄ yá̰á̰ kə́ ɔr̄ kam̄ de gə̄ kadə̄ i *Jipə gə̄ ń toó aláa Gərek gə̄ n toó ní gətóo. Nin̄ malang ní Kɔ́ɔ̄ɓē yādə́ i kógə̄ḿ beē. De gə̄ malang ń a ɓāŕnən̄ ní ni a rāā majə sedə́ ngá̰ý.
13Tɔdɔ̄ deē malang ń a ənī kemən ɓārəń Kɔ́ɔ̄ɓē ní, Kɔ́ɔ̄ɓē a ajən#10.13 K. 13: Á̰a̰ī Jo 2.32.
14Banī ré taān̄ kemən aĺ anī, a ɓár̄nən̄ i ba̰ý? Ré oōn̄ najə̄ yā Kɔ́ɔ̄ɓē aĺ anī, a taān̄ kemən i ba̰ý? Ré deē kógə̄ḿ ɔjədə́ najə̄ yā Kɔ́ɔ̄ɓē aĺ anī, a oōn̄ najə̄ ní i ba̰ý? 15Ré Nə́ɓā əla deē aĺ anī, loo kadə̄ deē a ɔjədə́ najə̄ yā Kɔ́ɔ̄ɓē i ba̰ý? Tɔdɔ̄ makətūbə̄ əda na:
Ka̰a̰ ngé kəda najə̄ kə́ majə loo reē tə́ i yá̰á̰ kə́ majə ngá̰ý#10.15 K. 15: Á̰a̰ī Ij 52.7!
16Ba ngé gə̄ ń ndigən̄ Najə̄ kə́ Majə ní i de gə̄ malang alé, tɔdɔ̄ Ijai əda na:
Kɔ́ɔ̄ɓē i náā n taā kem najə̄ ń j-ɔjə ní#10.16 K. 16: Á̰a̰ī Ij 53.1?
17Adə̄ yá̰á̰ ń a reē kə taā kemeé ní i najə̄ kə́ kɔjə, ba najə̄ ń ɔjən̄ ní i najə̄ yā *Kərist.
18Ba mā m̄-sāā dəje na: Ké nin̄-oōn̄ najə̄ ní aĺ wa? Oōn̄ majə, tɔdɔ̄ makətūbə̄ əda na:
Ndūdə́ na ɓār̄ taā gō dɔ nang malang ō,
deē ra i ta ngóy dɔ nang tə́ gə̄gē anī a oō najə̄ kɔrdə́ gə̄ ō#10.18 K. 18 Á̰a̰ī Pā 19.5 .
19Ba m-ā m̄-dəje ɓáý na: Ní ngán *Israel gə̄ gerə̄n̄ kum aĺ i mbée a? Ōōī najə̄ ń Moijə əda dɔ tə́ ní:
M-ā m̄-rāā kadə̄ i gír de kə́ rɔ̄kum aĺ gə̄ n ā ə̄ndāīdə́ nii ní ō,
kadə̄ ī-rāāī wōn̄g kə nápar de kə́ ger̄ najə̄ aĺ gə̄ ō#10.19 K. 19b: Á̰a̰ī Ij 65.2.
20Ijai aw̄ bátə́ əda ɓáý to̰ na:
De gə̄ ń əngemə̄n̄ ní i ngé sāāḿ gə̄ alé.
De gə̄ ń m-ɔ́jə rɔ̄ḿ ta kumdə́ tə́ ní, i ngé gə̄ ń dəjemə̄n̄ yá̰á̰ sḛ́ý aĺ bátə́ ní#10.20 K. 20: Á̰a̰ī Ij 65.1 .
21Ba ngán Israel gə̄ ɓá anī Nə́ɓā əda tītə̄ ń toō dɔdə́ tə́ na:
Kə dɔ ndɔ̄ gə̄ mā m̄-sə́ra jīḿ
kə̄ rɔ̄ ngáń kə́ dum̄ naā gə̄ tə́ ō, kə́ mbātə́ najə̄ gə̄ tə́ ō#10.21 K. 21b Á̰a̰ī Ij 65.1-2.
Currently Selected:
Makətūbə̄ ń Pol ndang adə̄ Rom gə̄ ní 10: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
