Makətūbə̄ ń Pol ndang adə̄ Rom gə̄ ní 11

Nə́ɓā əya̰ ngán Israel gə̄ kɔ̄ɔ́ alé

1Ādī m̄-dəjesí m-ōō: Adə̄ ń noō ní Nə́ɓā əya̰ i ngán *Israel gə̄ kɔ̄ɔ́ tā ḿ? Sḛ́ý yḛtə aĺ bátə́. Tɔdɔ̄ mə̄kɔ́ ń toō, mā i ngōn̄ Israel ō, mā i de kə́ gír kaa yā Abəraham tə́ ō, de kə́ gír ɓē yā Benjamḛ tə́ ō. 2Nə́ɓā əya̰ gír deē yān gə̄ ń nəkɔ́ gə̄rādə́ kété ní kɔ̄ɔ́ alé#11.2 K. 2a: Á̰a̰ī 1 Sam 12.22; Pā 94.14. Nōō ń *Eli nōō rɔ̄n rɔ̄ Nə́ɓā tə́ á makətūbə̄ əda ní, sḭḭ̄ ōōī aĺ a? Eli nōō rɔ̄n əda na:

3Kɔ́ɔ̄ɓē, á̰a̰ā̰ tɔ̄lə̄n̄ *ngé koō ta yāí gə̄ kɔ̄ɔ́ ō, tɔ̄ɔ̄n̄ *loo tun̄ yá̰a̰ yāí gə̄ kɔ̄ɔ́ ō.

I mā kógə̄ḿ beē ngóy n m̄-na̰y ní, ba a sāān̄ i tɔ̄lə̄m̄ kɔ̄ɔ́ ɓáý to̰!

4Ba najə̄ ń Nə́ɓā tél ədan ní ōōī a? Nə́ɓā ədan na:

M-ɔ̄r̄ de gə̄ dūbú sīrí m-ə̄ndādə́ dɔ jīḿ.

I ngé gə̄ ń tetən̄ kejədə́ nang tə́ no ɓesə̄ Baal tə́ aĺ ní#11.4 Baal: Á̰a̰ī tū «Kum Najə̄ kə́ Ngón̄g Ngón̄g gə̄» tə́. .

5Ngɔlaā nəkɔ́ ń jə-ndiī toó gá̰a̰ de gə̄ kə́ Nə́ɓā nəkɔ́ gə̄rā əya̰ ɔjəń rajə yān ndin̄ noó ō. 6Ba ré ɔjəń i dɔ rajə anī, i tām̄ yā kəla rāādə́ gə̄ tə́ to̰ alé. Tɔdɔ̄ ré i tām̄ yā kəla rāādə́ gə̄ tə́ anī, rajə ní i rajə to̰ alé.

7Kə j-ədaī na i rí? Yá̰á̰ ń ngán *Israel gə̄ a sāān̄ ní əngen̄ alé, ba ngé gə̄ ń gə̄rān̄də́ ní əngen̄. Gotə gə̄ rāān̄də́ kadə̄ kemdə́ ngan̄g ngóróró, 8tītə̄ ń makətūbə̄ yā Nə́ɓā ədań ní. Ndangən̄ na:

Nə́ɓā rāā adə̄ ndíĺdə́ a ɓīī i mbée ō,

kumdə́ a̰a̰ loo aĺ ō, mbīdə́ oō loo aĺ ō, bátə́ ɓōólaā#11.8 K. 8: Á̰a̰ī Ij 6.10; 29.10.

9Dabid əda yān ō na:

Kadə̄ yá̰a̰ kəsa yādə́ tél i gūmbə̄ kə́ kadə̄ əhɔdə́ ō,

réng ō, mbḛ̄ kə́ kadə̄ tə́sōn̄ kemeé ō,

yá̰á̰ kə́ tōr̄ kə́ kadə̄ rāādə́ ō.

10Kadə̄ kumdə́ risə til nding ō, kadə̄ kumdə́ a̰ā̰ loo aĺ ō.

Ī-rāā ādə̄ nōrə̄n̄ ngung ngándáńg ō#11.10 K. 10: Á̰a̰ī Pā 69.23-24.

11m̄-dəjesí ɓáý to̰: Kəsō ń ngán *Israel gə̄ əsōn̄ ní, i kə́ njɔ́ḿ gə̄ tə́ a? Sḛ́ý aĺ bátə́! Banī i kə ta kūl̄ kəsō ń əsōn̄ ní n, de gə̄ ń i Jipə aĺ gə̄ ní əngenə̄ń kajə, yā kadə̄ *Jipə gə̄ tél əndānńdə́ nii dɔ tə́ ní. 12Ba ré kəsō ń əsōn̄ ní teē kə nápar de kə́ rang gə̄ dɔɔ́ anī, tél reēdə́ gogə́ tū kajə tə́ ní a rāā yá̰á̰ kə́ bo tɔȳ nge ń noō aĺ a?

Nə́ɓā ajə ngé gə̄ ń i Jipə gə̄ aĺ ní

13Ngɔlaā m-ā m-ɔ̄r̄ najə̄ sesí, sḭḭ̄ ń i nápar de kə́ rang gə̄ ní. Mā i ngōmbang kəla kə́ əlamə̄n̄ tām̄ yā nápar de kə́ rang gə̄ tə́. m̄-sāā kadə̄ rī kəla yāḿ ɓār̄. 14Kadə̄ ngé gə̄ ń nin̄ i mósə́ḿ gə̄ ní əndāmə̄n̄ nii dɔ tə́, anī m-ájəń ngé kə́rēý gə̄. 15Tɔdɔ̄ ré kɔr̄ ń ɔr̄ əndān̄də́ gidə tə́ ndágá ní rāā tá kadə̄ de kə́ dɔ nang tə́ gə̄ əsōn̄ naā tə́ kə Nə́ɓā anī, i rí n a rāā yá̰a̰ ndɔ̄ ń tél a reēn̄ sedə́ gogə́ rɔ̄ Nə́ɓā tə́ ní? Ndɔ̄ ń noō tə́ ní, de kə́ koy gə̄ a teēn̄ ɓádá yā ndi kə kumdə́.

16Ba á̰a̰ī, dan ń dɔ mur̄ kə́ kugə i kə́ *táĺ anī, gá̰a̰ mur̄ ń na̰y ní i kə́ táĺ ō aĺ a? Ré ngəra kāgə̄ i kə́ táĺ anī, ta jīn gə̄ i kə́ táĺ ō aĺ a? 17Ngán *Israel gə̄ rāān̄ rɔ̄də́ i *kāgə̄ olibə kə́ ɓēé kə́ tə́gān̄ ta jīn kə́rēý gə̄ kɔ̄ɔ́ tə́. Ḭ̄ ń i *Jipə aĺ ní, ī-rāā rɔ̄í i kāgə̄ olibə kə́ bembeé, kə́ əhɔīn̄ gotədə́ tə́, adə̄ ī-ndi kə ta kūl̄ bəto ń ngəra kāgə̄ olibə kə́ ɓēé a adī ní. 18Loo ń noō tə́ ní, ḭ̄ i de kə́ kadə̄ ɔ́jə rɔ̄í dɔ ta jī kāgə̄ olibə gə̄ ń tə́gān̄də́ kɔ̄ɔ́ tə́ ní alé. Ā ɔ́jə rɔ̄í i ba̰ý? I ḭ̄ n i nge kətō ngə̄rā kāgə̄ olibə kə́ ɓēé ní alé, banī i ni n i nge kətōī ní.

19Majanī ā ə́da na: Jéngə̄n̄ ta jī kāgə̄ gə̄ ní yā kadə̄ əɓań ta gūrūn tə́. 20I gō tə́, ɓá tā ba jéngə̄n̄də́ i najə̄ yā taā kem aĺ yādə́ tə́, ba ḭ̄, yá̰á̰ ń ra seí loo ń noō tə́ ní i taā kem yāí. Ní ɔ́jə rɔ̄í alé, ba ngá̰ý a ī-ɓōĺ i mbéé tá. 21Tɔdɔ̄ ré *Jipə gə̄ ń i ta jī *kāgə̄ olibə kə́ ɓēé gə̄ ní, Nə́ɓā tə́gādə́ kɔ̄ɔ́ anī, ḭ̄ ń i kə́ ndə̄mā dɔɔ́ ní tá a əya̰ī a? 22Majə kadə̄ ə̄ndā kumií á̰a̰ń rāā ń Nə́ɓā rāā kem majə kə de gēé ní ō, kəndā ń a əndā katə̄n dɔdə́ tə́ ní ō. Ni-əndā katə̄n i dɔ ngé gə̄ ń əsōn̄ tə́ ní, ɔjə kem majə yān i seí ḭ̄ḭ́ ō dan ń ə̄ndā kemií dɔ kem majə yān ń toō tə́ ní. Ré i beé aĺ anī, a tə́gāī kɔ̄ɔ́ tītə̄ yādə́ ō. 23Ba nin̄ *Jipə gə̄, ré əya̰n̄ gír taā kem aĺ yādə́ kɔ̄ɔ́ anī, a télən̄ yā sitə gogə́ ta gūrūdə́ tə́. Tɔdɔ̄ Nə́ɓā i kə tɔ́gə yā rāāńdə́ kadə̄ sitən̄ gogə́ karī. 24Ḭ̄ ń i Jipə aĺ ní, ī-rāā rɔ̄í i ta jī *kāgə̄ olibə kə́ bembeé tə́. Gāngə̄n̄ ta jī kāgə̄ olibə kə́ bembeé ní, ba do̰ō̰n̄ tū gír gisə kāgə̄ olibə kə́ ɓēé tə́, adə̄ i kə gō jī loo rāā ń a rāān̄nəń kété gə̄ ní alé. Ba *Jipə gə̄ nin̄ i ta jī kāgə̄ olibə kə́ kəhɔ ɓēé, adə̄ tél kəhɔdə́ gogə́ ta gūrūdə́ tə́ i yá̰á̰ kə́ tōr̄ alé.

Nə́ɓā a tél yā kajə ngán Israel gə̄

25Ngákó̰ó̰ḿ gə̄, m̄-gḛy kadə̄ ī-gerī yá̰á̰ kə́ to loo mundə̄ tə́ kem Nə́ɓā tə́ ɓáý ń toō, na sōgə́ ī-gírī kemsí tə́ na sḭḭ̄ i ngé kum kedə̄ ngá̰ý gə̄. Yá̰á̰ ní n toó: Kem ngan̄g ń Nə́ɓā adə̄ kem ngán *Israel kə́rēý gə̄ ngan̄g ngóróró ní, a to bátə́ kadə̄ ré de gə̄ malang ń i Jipə aĺ gə̄ ní ajən̄ pá tá. 26Loo ń noō tə́ ngán Israel gə̄ malang a ajən̄. Tītə̄ ń makətūbə̄ yā Nə́ɓā ədań ní, ndangən̄ na:

Nge gān̄g dɔ de gə̄ a teē i kem ɓē kə́ *Siyo̰ tə́.

Ni a ɔr̄ háĺ ngán Jakob gə̄ ń i hál rāā yá̰a̰ kə gō ń Nə́ɓā ndigə alé ní kɔ̄ɔ́.

27I nge ń noō n i *madə̄ naā yāḿ kə́ sedə́

dan ń m-ā m-ɔ̄r̄ yá̰á̰ kə́ majaĺ yādə́ gə̄ kɔ̄ɔ́ ní.

28Tām̄ Najə̄ kə́ Majə yā Nə́ɓā ń *Jipə gə̄ mbātə́n̄ ní, nin̄ i madə̄ ba̰ā̰ Nə́ɓā gə̄. I nge ń noō n majə sesí ní. Ba tām̄ gə̄rā ń Nə́ɓā gə̄rādə́ tə́ ní, nin̄ i kó tár yān gə̄. Ba nge ń noō sɔɔ̄ń i kaasí gə̄. 29Tɔdɔ̄ yá̰á̰ ń Nə́ɓā adə̄ de gə̄ ní a tél yā taā gogə́ aĺ ō, ɓāŕ ń ni-ɓāŕdə́ ní, a ndə̄ngā rɔ̄n tāmə̄n̄ tə́ aĺ ō. 30Kété ní sḭḭ̄ ī-mbātíī koō najə̄ yā Nə́ɓā, ba ngɔlaā i mbātə́ ń nin̄-mbātə́n̄ koō ta Nə́ɓā ní n rāā adə̄ kum Nə́ɓā o̰o̰nneé sesí sḭḭ̄ ní. 31Nin̄-rāān̄ i tītə̄ yāsí ō: Mbātə́n̄ koō ta Nə́ɓā ngɔlaā, i kadə̄ kum Nə́ɓā o̰o̰nəń sesí sḭḭ̄. Ba tītə̄ ń kum Nə́ɓā o̰o̰n sesí sḭḭ̄ ní, kumən a o̰o̰n tām̄ yādə́ nin̄ tə́ ō. 32Tɔdɔ̄ Nə́ɓā utə̄ de gə̄ malang i kem mbātə́ koō tan tə́ tə́, yā kadə̄ kumən o̰o̰nəń sedə́ malang.

Nə́ɓā bo to ɓōĺ ngá̰ý

33Yá̰a̰ kənge yā Nə́ɓā ō, kum kedə̄ yān ō, yá̰a̰ ger̄ yān ō, i yá̰á̰ kə́ to ɓōĺ ngá̰ý, adə̄ deē a asə ka̰a̰ ta tɔ̄l̄ tan alé. De kə́ asə ndō̰ gíŕ yá̰a̰ rāān ní gətóo. De kə́ asə ger̄ gō róbə yān gə̄ gətóo ō. 34Tītə̄ ń makətūbə̄ yān ədań ní, ndangən̄ na:

I náā n ger̄ gír̄ yā Kɔ́ɔ̄ɓē ní? I náā n a adə̄n kɔjə̄ dɔ yá̰á̰ ń a rāā tə́ ní#11.34 K. 34: Á̰a̰ī Ij 40.13.

35I náā n adə̄ Nə́ɓā yá̰á̰ kété yā kadə̄ Nə́ɓā tél adə̄n kum gotə ní#11.35 K. 35 Á̰a̰ī Job 41.3?

36Tɔdɔ̄ yá̰a̰ malang teē i rɔ̄n tə́ ō, ndin̄ i kə kūl̄neé ō, i tām̄ yān tə́ ō. Ādə̄ de gə̄ malang ɔsən̄ gɔnən ngándáńg! *Adə̄ i tītə̄ ń noō.

Currently Selected:

Makətūbə̄ ń Pol ndang adə̄ Rom gə̄ ní 11: BS

Highlight

Copy