Makətūbə̄ ń Pol ndang adə̄ Rom gə̄ ní 9

Nə́ɓā ō gír de gə̄ ń ni-gə̄rādə́ ní ō

1Najə̄ ń m-ā m-ə́da toó i najə̄ kə́ rɔ̄kum. Mā i deē yā *Kərist ō, m̄-sor̄ aĺ ō. Tá *Ndíĺ kə́ Táĺ ədam̄ kemḿ tə́ kadə̄ i rɔ̄kum ō. 2Kemḿ nelə̄m̄ aĺ ngá̰ý ō, najə̄ tōr̄ kemḿ ngá̰ý kanjə̄ dəba ō. 3m̄-ndə̄ngā kadə̄ Nə́ɓā kōnjə̄m̄ ō, ɔrə̄m̄ kɔ̄ɔ́ kadə Kərist tə́ ō, yā kajəń ngákó̰ó̰ḿ kə́ gír kojə yāḿ tə́ gə̄. 4Tām̄ nin̄ i ngán *Israel gə̄: Nə́ɓā rāādə́ i ngánən gə̄ tə́ ō, adə̄də́ *kɔsə gɔn yān ō, rāā *madə̄ naā sedə́ ō, adə̄də́ *ndū najə̄ yān gə̄ ō, ɔjədə́ loo rāā kəla kadə̄n ō, ənī míndən yā kadə̄də́ yá̰a̰ gə̄ ō. 5I nin̄ ɓáý to̰ n i ngán kaa ngé taā kem kə́ jóo gə̄ ní. Kə́ ta yā deē ndul gə̄ tə́ ɓáa *Kərist i deē yādə́. Ni i dɔ yá̰a̰ gə̄ tə́ malang ō, i Nə́ɓā kə́ de gə̄ a tɔ̄ȳnən̄ ngándáńg ō. *Adə̄ i tītə̄ ń noō.

6Adə̄ yá̰á̰ ń Nə́ɓā ənī míndən yā rāā ní, ni-rāā aĺ i mbée a? Najə̄ m̄-sāā kəda ní n noó alé. Tɔdɔ̄ de gə̄ malang ń nin̄ i gír yā *Israel tə́ ní, nin̄ i Israel kə́ rɔ̄kum gə̄ malang alé. 7Tá de gə̄ malang ń nin̄ i gír yā Abəraham tə́ ní, nin̄ i ngánən kə́ rɔ̄kum gə̄ malang alé, tɔdɔ̄ Nə́ɓā əda Abəraham na:

Gír kaan a teē i gír kojə yā Isaak tə́#9.7 K. 7 Á̰a̰ī Tkg 21.12.

8Kumən na ngán gə̄ ń ojən̄də́ kə gō yā dā̰ rɔ̄ɔ́ ní, i nin̄ n i ngáń Nə́ɓā gə̄ ní alé. I ngán gə̄ ń ojən̄də́ kə gō kənī míndə yā Nə́ɓāá ní ngóy n a rāān̄də́ ngáń kaa gə̄ kə́ rɔ̄kum gə̄ tə́ ní. 9Tɔdɔ̄ Nə́ɓā nəkɔ́ ənī míndən tītə̄ ń toō beé na:

Ɓāl̄ ndɔ̄ a n-a n-reē kə nāā nəkɔ́ ń toó, anī Sara a ndi kə ngōn̄ kə́ dəngam kógə̄ḿ jīn tə́#9.9 K. 27 Á̰a̰ī Tkg 18.10.

10Ba kə́ rang na̰y noó ɓáý to̰. Ngán Rebeka kə́ jōó gə̄ ní bɔbə̄də́ i kógə̄ḿ beē, i kaají Isaak. 11-12Ba loo gə̄rā ń Nə́ɓā a gə̄rā de gə̄ ní, i yá̰á̰ kə́ nəkɔ́ ɔjə loon kété jóo: Nə́ɓā a gə̄rā de gə̄ i kə gō ɓāŕ ń nəkɔ́ a ɓāŕdə́ ní, banī i tām̄ kəla rāādə́ gə̄ tə́ alé. Yā kɔjəń kadə̄ n-əya̰ yá̰á̰ kə́ nəkɔ́ ɔjə loon kété kɔ̄ɔ́ aĺ ní, Nə́ɓā əda Rebeka na:

Nge kə́ nga tɔ́gə a əla dɔn gíŕ tɔ́gə yā nge kə́ dūú tə́ ní#9.11-12 K. 11-12: Á̰a̰ī Tkg 25.23.

Ba dan ngeé ń noō tə́ ní Rebeka ojə ngán gə̄ ní aĺ ɓáý. 13Yá̰á̰ ń toō reē i kə gō najə̄ ń ndangən̄ kem makətūbūú tītə̄ ń toō beé ədan̄ na:

m̄-tár Jakob ba m-īm̄ Esau#9.13 K. 13: Á̰a̰ī Mal 1.2-3.

14Ní, kə j-ədaī na i rí? Kadə̄ Nə́ɓā i de kə́ gōtə́ aĺ a? Yḛtə aĺ bátə́! 15Tɔdɔ̄ Nə́ɓā nəkɔ́ əda Moijə tītə̄ ń toō beé na:

M-á̰a̰ kum tō ndoō yā deē ń m̄-gḛy ka̰a̰ kum tō ndoō yān ní ō,

kumḿ a o̰o̰m̄ kə deē ń m̄-gḛy kadə̄ kumḿ o̰o̰m̄ seneé ní ō#9.15 K. 15: Á̰a̰ī Teē 33.19.

16Adə̄ gə̄rā ń Nə́ɓā gə̄rā de gə̄ ní, i tām̄ kem ndigə yā deē tə́ aĺ ō, i tām̄ kəhɔ rɔ̄ tɔgə yā deē tə́ aĺ ō, banī i kə gō ka̰a̰ ń Nə́ɓā nəkɔ́ a̰a̰ kum tō ndoō yā deē ní ngóy. 17I beé n Nə́ɓā ədań *Parao̰ najə̄ ń ndangən̄ kem makətūbūú na:

I mā n m-úniī yā kɔjəń tɔ́gə́ḿ ō, yā kadə̄ rīḿ ɓārəń dɔ nang tə́ laā malang ō ní.

18Adə̄ deē ń Nə́ɓā gḛy ka̰a̰ kum tō ndoō yān ní a, Nə́ɓā a a̰a̰ kum tō ndoō yān ō, deē ń Nə́ɓā gḛy rāā kadə̄ kemən ngan̄g ngóróró ní a, a rāā kadə̄ kemən a ngan̄g ngóróró ō.

Wōn̄g yā Nə́ɓā ō, ka̰a̰ kə́ ni-a̰a̰ kum tō ndoō yā deē ō

19Majanī ā ī-tél yā kəda na ré i tītə̄ ń noō anī, kum gɔŕyɔ̄ ń Nə́ɓā a gɔŕyɔ̄ de gə̄ ní ké na i rí wa. Tɔdɔ̄ yá̰á̰ ń kem Nə́ɓā ndigə ní, i de kə́ ba̰ý n a mbātə́ rāā ní? 20Banī ḭ̄ deē i náā á kadə̄ ī-nējī naā najə̄ kə Nə́ɓāá ní?

Yá̰á̰ ń kɔdə̄ əɓā kə jīneé ní a tél a əda kɔdə̄ na ké i tām̄ rí tə́ áké kɔdə̄ əɓān beé wa a?

21Nánjə̄ ń kɔdə jóó ló̰ȳ ní, asə rāań yá̰á̰ ń kemən ndigə ní aĺ a? Ré gḛy kəɓāń i jóó kə́ to rɔȳ anī, a əɓāń ō, i jóó kə́ karī anī a əɓāń ō aĺ a?

22Nə́ɓā gḛy i kɔjə wōn̄g yān ō, tɔ́gən ō. Ɓá tā ba ni-tə́gā tan dɔ ngé gə̄ ń asə kadə̄ ni-rāā wōn̄g sedə́ ō, nujədə́ kɔ̄ɔ́ ō ní tə́. 23Nə́ɓā gḛy i kɔjə *kɔsə gɔn yān kə́ to ɓōĺ ngá̰ý tām̄ yājí jḭḭ̄ ń kumən o̰o̰n sejí ō, jḭḭ̄ ń nəkɔ́ əndājí dɔ jīn kadə̄ j-udiī kem kɔsə gɔn yān tə́ ní ō. 24Tɔdɔ̄ jḭḭ̄ i kə́ Nə́ɓā ɓāŕjí i dan *Jipə gə̄ tə́ ngóy alé, banī i dan nápar de kə́ rang gə̄ tə́ ō. 25I yá̰á̰ ń toō n Nə́ɓā nəkɔ́ əda kem makətūbə̄ yā Ojee tə́ na:

Ngé gə̄ ń i gír deē yāḿ gə̄ aĺ ní, m-ā m̄-ɓāŕdə́ gír deē yāḿ gə̄ ō,

ngé gə̄ ń m̄-táŕdə́ aĺ ní, m-ā m̄-ɓāŕdə́ kó tár yāḿ gə̄ ō ní.

26Ba loo ń ədan̄də́ tū tə́ na sḭḭ̄ i gír deē yāḿ gə̄ aĺ ní,

i loo nəkɔ́ ń noō tə́ n a ɓārə́n̄də́ tū tə́ na i gír deē yā Nə́ɓā kə́ ndi kə kumneé gə̄ ní.

27Ɓáý to̰ ní Ijai ɔr̄ najə̄ yā ngán *Israel gə̄ ngeé ń noō kə ndū boó əda na: Ká ré kutə ngán Israel gə̄ asəń i kə kutə nán̄g ngárə̄ḿnjēý kə́ ta bā bo tə́ gə̄gē anī, i gotədə́ kə́ na̰y n a ənge kajə yā Nə́ɓā ní. 28Tɔdɔ̄ Kɔ́ɔ̄ɓē a rāā kadə̄ najə̄ yān reē udə gírí dɔ nang tə́ laā i kə taá malang ō, i láẃ ō#9.28 K. 27-28: Á̰a̰ī Ij 10.22-23.

29I yá̰a̰ nəkɔ́ ń toō n Ijai əda kété ɓáý to̰ ní, ni-əda na:

Nə́ngētə́ Kɔ́ɔ̄ɓē kə́ bo kə́ tɔ́gən i ngá̰ý əya̰ kōōjí sḛ́ý aĺ anī,

ta yājí a to tītə̄ yā Sodom ō Gomor ō.

Israel ō Najə̄ kə́ Majə ō

30I beé ní kə j-ədaī na i rí tā? Yá̰á̰ ń kadə̄ j-ədaī ní n toó: De gə̄ ń nin̄ i *Jipə aĺ gə̄ ō, sāān̄ kadə̄ kə n-télən̄ de kə́ gōtə́ gə̄ ta kum Nə́ɓā tə́ aĺ ō ní, ngɔlaā télən̄ de kə́ gōtə́ gə̄ ta kum Nə́ɓā tə́ tām̄ nin̄-taān̄ kem. 31Banī ngán Israel gə̄ ń a sāān̄ ndū najə̄ kə́ yā rāā sedə́ kadə̄ kə n-télən̄ de kə́ gōtə́ gə̄ ta kum Nə́ɓā tə́ ní, mānə̄n̄ dɔ *ndū najə̄ ní kɔ̄ɔ́. 32I tām̄ yā rí tə́? I tɔdɔ̄ nin̄-gírə̄n̄ kadə̄ i taā kem yādə́ n a rāā kadə̄ nin̄-télən̄ de kə́ gōtə́ gə̄ ta kum Nə́ɓā tə́ ní alé, banī i kəla rāādə́ gə̄. Adə̄ mbal̄ əgadə́ 33tītə̄ ń ndangən̄ kem makətūbūú ní, ndangən̄ na:

Á̰a̰ī, m-ə̄ndā mbal̄ kə́ a tə́gā de gə̄ kem ɓē kə́ *Siyo̰ tə́,

mbal̄ bo kə́ a tə́gā de gə̄ tə́nīdə́.

Ba deē ń taā kemən ní rɔ̄n a sɔlə̄n alé#9.33 K. 33: Á̰a̰ī Ij 28.16.

Currently Selected:

Makətūbə̄ ń Pol ndang adə̄ Rom gə̄ ní 9: BS

Highlight

Copy