Balomɛ́ŋ 5

Nsémbie na Uhaluá

1Agányɛ gɔg, guágɔdɛ́m guásɔ gúédiéyenye bugindényé ubuɔ́ dínya uguá bumbénu na Uhaluá uguá Yésuse Klístus Ɔgúna wasɔ, 2uguá Yésuse Klístus waáguɔ́ naá uguá guágɔdɛ́m dímabiá giásɛ giá guɛ́d gá dáŋáab magɔg ɔmɔɔ́ dínya abagúnán guɔ́, diond dibígide gisas na nubídágídɛ́n nuá nigúmi niá Uhaluá. 3Diábíand gubígide gisas gá meyú másɔ, muɛ́d diálinsan áneé meyú móguólon na nsuálál, 4súsɔn nsuálál yoólon na bugilád ubúganyaá ubúɔ́bídɔ́n, bugilád ubúɔ́bídɔ́n búólon na nubídágídɛ́n. 5Nubídágídɛ́n nudiɔnɔ́nɔŋɔnɛn, núdiésémenyinye gá giagiá Uhaluá umesegídínyé ginɔ́nɛ́n giég uguásɔ guá idɛ́m uguá Gileénde giá Budányɛ igiɛ́ úmádihuá. 6Ɛɛ́ɛ, dimabá dimanyɛ kanda bugaga, ginɔ́g giá ginɛŋ giá nigué niá Klístus igíésieg, uwegué gá busió buá bɔlɔga. 7Búnyɛ maná meyú gá gueleé mɔndɔ ugué gá busió buá mɔndɔ wa gindényé. Alaála unyɛ andá wa guádáab gugué gá busió buá mɔndɔ wa bilɔŋ biá beseé. 8Ndé gɔg haná Uhaluá údíyenyeé ginɔ́nɛ́n giég igiɛ́ ugódionu naánasɔ, dimabá dimanyɛ bɔlɔga, Klístus uwesigué gásɔ gá busió. 9Haná gɔg dínya bindényé dabdab uguég guá manɔ́ŋ, giagɛ gɔg igíánálanɔ́ áneé Uhaluá, udidídúgún gég gá ilúnd uguá Yésuse Klístus? 10Dimabá babɛlɛ́bɛl bá Uhaluá, gúu umáal nsémbie naánasɔ na nigué niá muɔ́n weg, iŋand ínig gɔg na dabdab uyɔ, uyɔɔ́ diámánugual nsémbie dianábá ebédúgúnén gá nusɔ́da nuá Yésuse Klístus. 11Diándabalaga giod gudɔ́mb agá busió buá Uhaluá, dabdab diábalaga gá busió buá Ɔgúná wasɔ Yésuse Klístus uyɔɔ́ diabiá nsémbie na Uhaluá.

Na Adám na Yésuse Klístus

12Buand buáguɔ́ gá busió buá mɔndɔ omoómi gifal gímebíŋín uguá guɔ́m, gifal igíébíŋínye nigué, nigué iniégimbin bandɔ gidigid, gá giagiá bámuanyɛ bem bámal gifal. 13Gigodi gímesígégíe áneé gifal gíganyɛ uguá guɔ́m. Bádiálinsan gɔg gifal uguá ginɛŋ igiɛ́ gigodi gídiábá 14Henyé gɔg áneé gubul agá Adám, guesieg agá Mɔ́sɛsa nigué níégindime, nígimben ta bandɔ abámabádial idú hana Adám. Adám umabá ninam niá gineéŋun giá Adám omodi úmaábá wa guól.

15Búdibá mpónyé gɔg na gifal giá Adám na mpuán ya magɔg má Uhaluá. Mmába gɔg gá busió buá mɔndɔ omoómi áneé Adám giod gímeguén, gɔgaá magɔg má Uhaluá mányɛ giandá guandadɔ́mb súsɔ́n mpuán iyɛɛ́ úmaádáabɛ́n giod giá bandɔ gá gilé uguélém guá mɔndɔ omoómi áneé Yésuse Klístus, inyɛ giandá guandadɔ́mb. 16Guond mpuán ya magɔg má Uhaluá igódi bugaga gudɔ́mb gifal giá mɔndɔ omoómi. Gusɔ́mb guá gisan giá gifal giá mɔndɔ omoómi uguól na nusésényi, henyé gɔg áneé gubulin gá giod giá bifal, mpuán ya magɔg ma Uhaluá yaguɛ́d guenegén agá gindényé. 17Mmába gɔg, nigué nímedíyényé buŋaŋa buég uguélém guá gifal giá mɔndɔ pɛ́ŋ omoómi, pɛ́ŋ uguélém guá Yésuse Klístus giod gíénégilebenú uguá nusɔ́da, gíánádáaŋába giod giá magɔg na mpuán ya gindényé. 18Muɛ́d, haná búnya gɔg áneé mɔndɔ gidigid umabiá nusésényi gá busió buá gifal giá mɔndɔ omoómi, súsɔ́n gá busió buá melélíe má gindényé má mɔndɔ omoómi áneé Yésuse Klístus, Uhaluá weéguéyenye bandɔ gidigid gindényé, gíhua bɔ́ nusɔ́da. 19Haná búnya áneé giod giá bandɔ gímayan bafal gá busió buá mɔndɔ omoómi umáal idú, buand búmomi súsɔ́n gá busió buá mɔndɔ umaábiá giɔ́bína, giod giá bandɔ gíónónd gindényé agá busió buá Uhaluá. 20Hana gigodi gímoól, bifal ibíɔ́bíɔ́hígɛn, agaá gɔg bifal bíbíɔ́hígɔnaá magɔg má Uhaluá ménenenye. 21Haná gifal gímegilébé uguá nigué, nɔ́ uguá gindényé magɔg má Uhaluá ménégilebenú na gisódie, gá guɛ́d naánasɔ uguá nusɔ́da nuá ságásagá uguá Yésuse Klístus Ɔgúná wasɔ.

Currently Selected:

Balomɛ́ŋ 5: EKM

Highlight

Copy