Balomɛ́ŋ 6

Na nigué na nusɔ́da uguá Yésuse Klístus

1Giagɛ igiɛ́ dínya dia guɔyɛd? Búáguamba áneé dilɔbɛn uguá gifal agányɛ magɔg mábadabá giod a? 2Búdibá nɔ́, gá giagiá dinyɛ ebéguén gá gifal, naánanyá dínya andá dia sɔ́dɔn uguá giɛ́? 3Ugúnya ana nuáguanyanyɛ áneé basuá bem dimabiá giyuminye uguá Yésuse Klístus, búnyɛ gég gá nigué dimabiá giyuminye a? 4Gég gá giyuminye dimabiá ginyo neéneg uguég guá nigué. Gá gueleé haná Klístus úmahám uguá gibɛ́l uguá nigúmi niá Síe, disɔ́dɔn basuá súsɔ́n nusɔ́da unugɔ́sɛ. 5Mmába dimabá gɔg hómohómue uguá gidide, mpónyé na nigué niég, dianábá nɔ́ súsɔ́n uguég guá hám uguá gibɛ́l. 6Ánaá díɔ́b buɔ́ beseé, gubá guásɔ guá nsuá gúmegué neéneg uguá nuag, ánaá dígad nuɔ́l nuá gifal gá gueleé didiandábá giɔ́lɛ giá gifal. 7Gá giagiá uségué unyɛ aháŋánɔ gá bifal busió gidigid. 8Mmába dinyɛ ebéguén gɔg na Klístus, diáguágan súsɔ́n ɔdɛ́m áneé diɔnɔ́sɔ́dɔn neéneg. 9Diálinsan súsɔ́n áneé Klístus umahám uguá gibɛ́l udienéndegué ta buɔ́sɛ, gugilebe guá nigué gúdibánd uguég. 10Gá giagiá umegué, búnyɛ gá bifal úmegué uŋand pɛ́ŋ húmomi, wɔɔ́sɔ́dɔn búnyɛ gá Uhaluá usɔ́dɔnaá. 11Banuá súsɔ́n mpónyé imoómi ánaá núbíánan hana nunyɛ ebeguén gá gilɔga gúu núsɔ́dɔnaá gá busió buá Uhaluá uguá Yésuse Klístus. 12Gilɔga gídíéndegilebe uguánɔ guá duɔ́l udúénéguénu uguá Uhaluá, gá gueleé gínúgɔ́ga uguég guá gilɔg giá guhúgɔ́m. 13Núdíníhínán binam biánɔ áneé bíbán haná maláŋ má bilɔga, gá guala ubúdiabá gindényé, níhínánɔ mɔ́ gɔg máala buóli gá busió buá Uhaluá. Ánaá binam biánɔ bíbá haná maláŋ má gindényé, gá gueleé nusɔ́dɔn hana numosiónd uguá búnyɛ nnyɔlɛ. 14Gá giagiá, gilɔga gídiándabianan bugaga uguánɔ guá duɔ́l, gá gueleé nudibánd uguá ihiligine hiá gigodi giá Mɔ́sɛsa gɔgaá uguá ihiligine hiá magɔg.

Buóli buá ubúnya gindényé

15Giagɛ gɔg? Diídan na busió na guala gilɔga gá giagiá didibánd uguá ihiligine hiá gigodi giá Mɔ́sɛsa a? Dinyɛ gá hiá magɔg a? Búdibá nɔ́. 16Nudiálinsan áneé ginɛŋ igiɛ́ núálanaá mɔndɔ buóli hana giɔ́lɛ nuɔ́guɔ́bɔnɛn yɔ́, nunyɛ giɔ́lɛ giá uyɔɔ́ núɔ́bɔninaá: Ugúnya ana uguá gilɔga igiídanaá agá nigué, ugúnya ana uguá giɔ́bína igiídanaá agá gindényé a? 17Ánaá díéŋén Uhaluá mbíyigie, numabá giɔ́lɛ giá gilɔga gúu númabiá giɔ́bína na ɔdɛ́m huánɔ gidigid uguá bunuhɔ́nhɔ́n ubuɔ́ bámanúsúgídɛ́n. 18Gɔgaá, nunyɛ abaháŋánɔ gá gilɔga, nuganyɛ biɔ́lɛ biá gindényé. 19Yaágálgal hana bunyɛ bandɔ gánɔ gá bugué. Nsuá, numasílɛ́ɛg binam biánɔ gá guala buóli hana biɔ́lɛ biá ndigis na ombuŋímbuŋíe umúálanɔ́ áneé diala Uhaluá idú. Buand buáguɔ́ búmomi dabdab nugódionu áneé nunihɛn binam biánɔ bíala buóli gá busió buá gindényé. Búbúálanɔ́ áneé diáyɛ bisámb. 20Uguá ginɛŋ igiɛ́ númabá biɔ́lɛ biá gilɔga numasábá uguá ihiligine hiá núgɔ́d uguá gindényé. 21Kásɛ bumelélíe númabianán gɔg? Nuɔ́guɔ́bɔ́n ɔduá gunɔh hínen gá giagiá nsúgie ya gilɔga yaáguídan naánanɔ uguá nigué. 22Dabdab gɔg, nunyɛ abaháŋánɔ gánɔ gá bilɔga, nuganyɛ biɔlɛ biá Uhaluá, núáguala melélíe eménúéyenyeé bisámb, nsúgie ya melélíe má gindényé íyídánaá naánanɔ aga nusɔ́da nuá ságásagá. 23Gá giagiá bisuɛ́n biánɔ biá gilɔga bíbínya nigué. Mpuán ya magɔg gɔg ya gilé ya Uhaluá ínyaá nusɔ́da nuá ságásagá uguá Yésuse Klístus Ɔgúná wasɔ.

Currently Selected:

Balomɛ́ŋ 6: EKM

Highlight

Copy