Balomɛ́ŋ 4

Guágɔdɛ́m guá Áblahám

1Giagɛ gɔg igiɛ́ dinya dia guɔyɛd gá busió buá baba wasɔ Áblahám? Giagɛ igiɛ́ úmadáŋáab uguég mbánan? 2Mmába melélíe még mɔ́ mámáal áneé ubá mɔndɔ wa gindényé, ugódi áneé ubígide gisas búdibá gɔg agá eŋís ya Uhaluá. 3Ŋŋɔ́ŋɛ yɔɔ́guɔya gɔg giagɛ? Yɔɔ́guɔya áneé: Áblahám umaág ɔdɛ́m huég uguá Uhaluá, buand buáguɔ́ únya haná mɔndɔ wa gindényé. 4Mɔndɔ uwalanɔ́ buóli bádiáguánan bisuɛ́n biég hana magɔg, waánigimanan na biɛ́. 5Henyé udiálá buóli, waágan gɔg ɔdɛ́m huég agá uweyényinyeé gindényé, mɔndɔ wa bilɔga, Uhaluá wáguánan guágɔdɛ́m guég wondie yɔ́ gindényé. 6Buand buáguɔ́ Dáfide ugálgálaá gá busió buá beseé wa mɔndɔ uyɔɔ́ Uhaluá wéyenyeé gidényé ta gubíyɛg melélíe még. 7Beseé naá ɔbɔɔ́ bámayíbínɛ́n bifal biɔ́b, beseé naá ɔbɔɔ́ bámaníhínɛ́n bilɔga biɔ́b, 8beseé na mɔndɔ uyɔɔ́ Ɔgúná udiabíyigan gilɔga giég. 9Beseé uyɔ waábíyigan pɛ́ŋ abánya abansán a? Ugúnya ana waábíyigan súsɔ́n bobólból a? Diɔ́guɔya gɔg áneé Uhaluá umaánán guágɔdɛ́m guá Áblahám, uwaán yɔ́ hana mɔndɔ wa gindényé. 10Búmabá gɔg uguá udényi húlúm? Egélém gá nuansana lí, nsuá? Ɛ́ɛɛ́, búmasábá egélém, gɔgaá nsuá. 11Egélém agányɛ, uwahuá yɔ́ gilɛns giá nuansana haná ndiskán ya gindényé iyoólonineé uguá guágɔdɛ́m, uguá ginɛŋ igiɛ́ úmabá umanyɛ udibíans, hɔ́ úmasiáyɛ síe wa bandɔ bem abámaág ɔdɛ́m uguá Uhaluá kandabíans, gá gueleé Uhaluá waán bɔ́ súsɔ́n haná bandɔ bá gindényé. 12Wond ubá síe waá abámabíans naá abámabádibíans, búdibá pɛ́ŋ uguá nuɔ́l, gɔgaá bánda uguá ŋŋil ya síe wasɔ Áblahám iyɛɛ́ úmabá wanda uguá ginɛŋ igiɛ́ úmaág ɔdɛ́m úmanyɛ udibíans. 13Uhaluá umadánɛ́n Áblahám na banana bég áneé bánádáŋáab guɔ́m hana bigínd, ndán igányɛ imasábá gá gueleé umegimbé gigodi, búnyɛ áneé Uhaluá umaánán yɔ́ hana mɔndɔ wa gindényé uguég guá guágɔdɛ́m. 14Mmába bámadáŋáab bigínd gá gimbe gigodi, tábɔ́ áneé guágɔdɛ́m na ndán múnyɛ agá gudɔ́ɔ. 15Gigodi gíóguólon na ilúnd, hɔɔ́m ɔhɔɔ́ gigodi gídiabá, bádiáyalan giɛ́. 16Búnyɛ gɔg uguá guágɔdɛ́m bólásiáyán begíndigínd, gá gueleé búbá uguá magɔg, gá gueleé ndán súsɔ́n idúmbenye gá banana gidigid bá Áblahám, búdibá pɛ́ŋ ɔbɔ́bíɔyɔnɔ́ áneé bégimbe gigodi, súsɔ́n gá ɔbɔ́gɔ́lɔná nulinsa uguá guágɔdɛ́m haná Áblahám síe wasɔ wa bem. 17Búnyɛ ubúɔ́ŋɔ́n áneé mmáal áneé abá síe wa giod giá maán. Unyɛ síe wasɔ gɔg agá eŋís ya Uhaluá uyɔɔ́ umaág ɔdɛ́m egég, Uhaluá waáguɔ́ úhuáná ebéguen nusɔ́da, waáguala áneé ubúmábúdibá bubá, 18Ta haná nubídágídɛ́n númanudiandabá, Áblahám umabá ubídaga. Umaág ɔdɛ́m uguá Uhaluá, búbúmasíal áneé ubá síe wa giod giá maán haná nugálɔ núɔ́yɔnɔ́ áneé: «Anagányɛ banana báhɔ bánábánɔ́.» 19Umasɛɛ́d mɔdɔg gá guég duɔŋ edín átánɔ, umasábíyigan nuɔ́l nuég unúmabá núganyɛ na gidɔga, súsɔ́n nimuɛnd niá ugándɔ weg Sála nímasábá niá guandasamb muɔ́n ta nɔ́ gɔg guágɔdɛ́m guég gúmaságuá. 20Uguá ndán ya Uhaluá gɔg umaságuág mpál uguá guágɔdɛ́m guég, gɔgaá guágɔdɛ́m guég uguáhuán yɔ́ bugaga, weéŋen Uhaluá mbíyigie. 21Umalinsán beseé na beseé áneé ubuɔ́ Uhaluá úmadán ugódi buŋaŋa búóhónye buɔ́. 22Buand buáguɔ́ Uhaluá wánanaá yɔ́ haná mɔndɔ wa gindényé. 23Búdibá gɔg pɛ́ŋ gég gá busió búnya ubúɔ́ŋɔ́n áneé Uhaluá umaán yɔ́ haná mɔndɔ wa gindényé. 24Búnyɛ gásɔ súsɔ́n básuá ɔbɔɔ́ Uhaluá údiánanaá haná bandɔ bá gindényé uguásɔ guá guágɔdɛ́m. Ɛɛ́ɛ! Basuá súsɔ́n dimaág ɔdɛ́m uguá umeéhémíe Yésuse Ɔgúná wásɔ uguá bilɔ́ŋ. 25Uhaluá umasilɛ́ɛg yɔ́ gásɔ gá bilɔga, guhám guég uguá gibɛ́l gúédiéyenye gindényé.

Currently Selected:

Balomɛ́ŋ 4: EKM

Highlight

Copy