Galasiɛ́ŋ 5
5
Nudinímie ibembi hiánɔ
1Klístus umedídúgún gá gueleé áneé dibá hómohómue uguá ibembi. Ánaá núbíbia gá gueleé nudiondúguond uguá duoli duá duayɛ duá buɔ́lɛ. 2Yaŋuá Póle, yɔɔ́núɔyɔn buɔ́, númábíansa, tábɔ́ áneé ubuɔ́ Klístus úmal gánɔ búdiband buand. 3Yéndegindenye áneé mɔndɔ umaámánabíans, ugódi áneé wala muand muá gigodi gidigid. 4Banuá nuambanɔ́ gubá gindényé agá eŋís ya Uhaluá uguá gigodi, nunyɛ abadándúnán na Klístus. Nudibánd na magɔg ma Uhaluá. 5Mmába hana gásɔ, diámina mɔgɔdɛ áneé Uhaluá úwonódíondionú gindényé egég gá eŋís. Buɔ́ dígíganaá uguá buŋaŋa buá Gileénde igíálanɔ́ buóli uguásɔ guá guágɔdɛ́m. 6Gá giagiá, mɔndɔ uminanɔ́ mɔgɔdɛ uguá Klístus, ta ubá abíansán, ta ubá obólból, búdiésésenye. Ubúnya beseé búnyɛ guágɔdɛ́m na ginɔ́nɛ́n. 7Nuágɔ́ns ɔdɛ́d beseé. Ányá gɔg uwaánúbíndɛ́n ŋŋil áneé hómohómue udiendénúendenye? 8Ubuɔ́ bɔ́núɔyídɛ́n ubugányɛ gá núgusinye, búdióguólonin agá Uhaluá unúdɔ́ŋɔnaá. 9Ílinsalinsa hímɔlɔg ilálá hiá mebuŋ#5.9 Maná buanyɛ wa fudúgenye oguŋ, bugídígíd ana, woóguóbonye gidɔba. Búnyɛ guásɔ gugúnúnie ɔlɔŋ uhúgányɛ.. 10Gá guámɛ, yaáguágan ɔdɛ́m huámɛ agá Ɔgúná gánɔ gá busió. Nudienéndebínidin ŋŋil idoódi gɔgaá, mɔndɔ unúbuŋibuŋié, ta ubá giagɛ, wanábia nusésénye. 11Beliméen, mmába hana gá guámɛ, mmɔ́ndɔnúɔyidɛn áneé nubíansa, gá giagɛ béŋényígenyeé gá buɔ́? Gá igigányɛ gisigɛl, buónyi buá Yésuse buá gué uguá nuag búdíéndesésenye mɔndɔ. 12Bandɔ obónúólonineé na ombuŋímbuŋíe, ánaá bábíágan mege beseé na beseé.
Na Gileénde na mmegu
13Beliméen, búnyɛ gɔg gá busió buá ibembi bɔ́mɔnúdɔ́ŋɛ́ɛn banuá. Gúu, nudiágígɛ́n gá hiɛ́ gá guala hana mmegu yámbanɔ́. Gɔgaá, ánaá núdúmábánɛn uguá ginɔ́nɛ́n. 14Gá giagiá, gigodi gidigid gíóbíhónonye uguá nugálɔ unugányɛ pɛ́ŋ númomi: «Ɔyá sɔ́gá mɔndɔ hana aŋuá mbánan.» 15Gɔgaá, númánúmanɛn nuond nudábanɛn, ánaá núbídédínye, nuanámúnanɛn. 16Mbídɔ́lígɔ́nɔ́nɔ́n: Andánánɔ uguá ambanɔ ya Gileénde, agányɛ nudianánduguala guɔyɛd guá mmegu. 17Gá giagiá, mmegu yasɔ yɔɔ́guɔya muand umúnya yaŋuna naá muá Gileénde, gúu súsɔ́n Gileénde gínya na muand muég yaŋuna naá muá mmegu, múnyɛ mosió máandɛ. Búáguala áneé adial ubuɔ́ ámbanɔ́ áneé al. 18Gɔgaá, Gileénde gíménúendenye, nudibánd uguá ihiligine hiá gigodi. 19Melélíe má mmegu mádiábíanyanye, búnyɛ muand hana: Gilɔg giá uŋand, biíle, gidáŋa 20gubúlúgenye biaŋana, guala manyɛ, mbina, nsáŋ, yaág, ilúnd, guamba gumáníganɛn bɔsɔ́gá, gubídándúna uguá bimbi kanda guɔ́bɔnina, 21bábísáma, bábúmánan, bɔ́lɔtɔba, bála muand umúnya mpónyé naá umúganyɛ, yaánúasigan dabdab hana yaámánaguala. Abálanɔ́, bádianábia giásɛ uguá Niguili niá Uhaluá. 22Gɔgaá, melélíe má Gileénde mémeényé: Ginɔ́nɛ́n, ibal, bumbénu, nubídémbídínyi, ɔdɛ́m beseé, gudúmába, bugilád, guágɔdɛ́m, 23gubá gisún na lɛns gubígimbin ɔdɛ́m. Gigodi gídiéguenenye umugányɛ muand. 24Bandɔ ɔbɔ́bɔninaá na Klístus bɔ́mɔ́n mmegu yɔb uguá nuag na melélíe má yɛ́ na niída niá yɛ́. 25Haná dísɔ́dɔnaá uguá Gileénde, ánaá dianda súsɔ́n uguá ambanɔ yá giɛ́.
Gigodi giá Klístus
26Didibígɔ́lɔ́n, didisógísógínyé, didiágánɛ́n yaág.
Currently Selected:
Galasiɛ́ŋ 5: EKM
Highlight
Share
Copy
Want to have your highlights saved across all your devices? Sign up or sign in
