Galasiɛ́ŋ 6
6
1Beliméen, númaán ndiméen wanɔ omodi usagua uguá giédie, banuá nugódionu Giléende giá Budányɛ, nuendie yɔ́ uguá yɛbyɛb uguá ŋŋil ya gindényé, sig mɔndɔ ubígɛ́ŋ áneé udiguɛn uguá yɔɔ́bídɛ́n. 2Ánaá núsambanɛn binɔ́h biánɔ, nɔ́ núónóhónyenu gigodi giá Klístus. 3Gɔgaá, mɔndɔ úmábíánan áneé unyɛ giyáŋáŋá, henyé udibá ta buand, wɔɔ́bínɔŋa úmuanyɛ muɛ́d. 4Gɔgaá, ánaá sig mɔndɔ úbíyɔŋimɛn melélíe még, úmɔɔ́b mɔ́ beseé, búnyɛ gég gá busió mbánan, búdibá gá bígedenye sɔ́gá. 5Gá giagiá sig mɔndɔ wanábídúgɛn ginɔ́h giég. 6Mɔndɔ uhɔ́nhɔnaá nugálɔ nuá Uhaluá, ugódi áneé waba bunɛ́m buég na mɔndɔ uhuínyihuinyeé yɔ́. 7Nudibínɔ́ŋá, bɔ́diɔ́hɔna Uhaluá, mɔndɔ wonóge ubuɔ́ ugúnanɔ́. 8Mɔndɔ ugúnanɔ́ gá busió buá mmegu yég mbánan, wonóge ubuɔ́ mmegu yég íhúmenu: Nigué. Ugúnanɔ́ gá busió buá Gileénde giá Budányɛ, wonóge ubuɔ́ Gileénde giá Budányɛ gíhúmenu: Nusɔ́da nuá ságásagá. 9Ánaá díala beseé kanda nidɔgíná, gá giagiá ginɛŋ gióguólon igiɛ́ díónógonú, dímódidisonsólídíe imbɔ́g. 10Anagányɛ gɔg, haná dímanyaá na ginɛŋ, ánaá díala buóli gá beseé wa mɔndɔ gidigid, hómohómue gɔg gá busió buá beliméen básɔ bá guágɔdɛ́m.
Gidógínye giá nsúgie na mbígélíd
11Ánaá nuán biandá biá ŋŋɔbɔliá ibiɛ, yɔɔ́núɔ́ŋɔn biɛ́ na ɔmbɔ́g huámɛ mbánan. 12Abánúgúdanɔ́ na nuansana, búnyɛ bandɔ abámbanɔ́ áneé bán bɔ́ beseé uguá bilɔŋ biá bunyɛ bandɔ, bɔ́guɔ́bɔn bugádɔ áneé bédígényigényé bɔ́ gá busió buá nuag nuá Klístus. 13Bandɔ báguɔ́ abálanɔ́ nuansana bámuanyɛ mbánan bódióhónonye gigodi, báguamba áneé nubíansa, bébígide gisasɔ na nuansana nuánɔ. 14Gá guámɛ, yɔɔ́guɔya gubígide gisasɔ pɛ́ŋ gá busió buá nuag nuá Ɔgúná wasɔ Yésuse Klístus. Uguá nuag, guísi gúmegué gámɛ gá busió, gúu yaŋuá súsɔ́n mmegué gá busió buá guísi. 15Ta abá abíansán, ta abá obólból, búdibá buɔ́ Uhaluá wámbanɔ́. Ubuɔ́ wámbanɔ́ búnyɛ áneé abá gulɔŋ ugugɔ́sɛ. 16Gá busió buá ebébineneé nuhuínyhuínyi nuámɛ, yɔɔ́guɔya áneé: Ánaá bumbénu na beseé wa Uhaluá múbá nɔɔ́nɔb naá uguá buán buá Uhaluá gidigid. 17Gubul dabdab, mɔndɔ udiondóŋólín na meyú, gá giagiá bibambuá ibiɛ́ ŋŋódiónú uguámɛ guá nuɔ́l, bíédíyenye áneé yɔɔ́guɔ́bɔnɛn na Yésuse. 18Beliméen, ánaá magɔg má Ɔgúná wasɔ Yésuse Klístus mábá na gileénde giánɔ. Anagányɛ!
Currently Selected:
Galasiɛ́ŋ 6: EKM
Highlight
Share
Copy
Want to have your highlights saved across all your devices? Sign up or sign in
