Galasiɛ́ŋ 4

Beédébi bádibánd biɔ́lɛ báganyɛ baán bá Uhaluá

1Yeégedenye áneé: Uguá ginɛŋ igiɛ́ egíndigind úmanyaá muúŋayɔ, udényi huég húnyɛ buand búmomi naá huá giɔ́lɛ, ta haná bugíndigind gidigid búnya buég. 2Gɔgaá, ugódi áneé wɔɔ́bɔnɛn bandɔ ɔbɔ́gɔ́lɔnaá gisigɛl neéneg na begígbunɛ́m buég gueneg uguá buɔ́sɛ ubuɔ́ síe úmɔyɛ́d. 3Nɔ́ basuá súsɔ́n dímabá, agaá dímabá dimanyɛ hana biayɔ, agányɛ dimanyɛ uguá buɔ́lɛ buá bilɔg biá melélíe biá guísi. 4Gɔgaá, ginɛŋ igiɛ́ Uhaluá úmegimbín, gímeémésieg, uwadɔ́m Muɔ́n weg, uwebíbíén uguá ugándɔ uwond uwɔsɔ́dɔn uguá gigodi, 5uwasua gá dúgún abámabá uguá buɔ́lɛ buá gigodi, gá gueleé dibádabá baán bá Uhaluá. 6Gá díye áneé dinyɛ baán bég, Uhaluá umadɔ́m Gileénde giá Muɔ́n weg uguásɔ guá idɛ́m, igíhéhenyeé áneé: «Ába! Baba!» 7Agányɛ, adibánd giɔ́lɛ, agányɛ muɔ́n guond hana ányá muɔ́n, anyɛ súsɔ́n egíndigind: búnyɛ buóli buá Uhaluá.

Bagalasiɛ́ŋ bányɛ bógonduguond uguá buɔ́lɛ buá gigodi

8Nsuá na nsuá, numasámúnyan Uhaluá unuond unuabá uguá buɔ́lɛ buá buhaluá abádiabá Uhaluá. 9Dabdab gɔg uyɔɔ́ númúnyanaá Uhaluá, tógónó únúmúnyanaá, naánanyá núnya nua guond uguá buɔ́lɛ buá muand muá bugué naá muá gusɔ́g? Nuáguamba guonduguond biɔ́lɛ biɔ́b a? 10Nuáguágan ɔdɛ́m gá bídíbenye mɔɔ́sɛ mómodi, ihóli símodi, bisigɛl bímodi na duɔŋ dúmodi! 11Yeédíne áneé buóli ubuɔ́ mmála uguánɔ búbá gá gilé. 12Beliméen, yoónúbísógólídíe giod, ánaá núbá hana yaŋuá, hana yaŋuá súsɔ́n nnya hana banuá, numasáŋal ta buand buá gilɔg. 13Nuálinsan buɔ́ beseé áneé búnyɛ uguá gunúma mmósínúdógínyé Ginɔ́g giá Nsɔ́m gá uŋand huá busió. 14Giɔ́bíga giámɛ giá nuɔ́l gímenúsésényé, henyé numasánsɛ́ŋ, numeséŋen. Gɔgaá, numaŋíndígɛ́n hana gilúna giá Uhaluá, ugúnya ana hana Yésuse Klístus. 15Ibal hiánɔ hiá nsuá hínyɛ hanyɛ gɔg? Gá giagiá, yɔɔ́núɔyɔn áneé, búámábá áneé numabia bugaga, nuábíbál eŋís yanɔ gá mpuá yɔ́. 16Dabdab gɔg, mmaáyɛ abɛlɛ́bɛl wanɔ gá giagiá yɔɔ́núɔyɔn pɛ́ŋ hómohómue a? 17Bandɔ bɔ́gɔ́lɔn gisigɛl naánanɔ, gɔgaá bádibá beseé. Báguamba pɛ́ŋ gunúdándɔ́n naánamɛ gá gueleé nuɛ́d gá binen bɔ́. 18Ubúnya beseé, búnyɛ gá díye áneé yɔɔ́núɔya ginɛŋ gidigid, búdibá pɛ́ŋ uguá ginɛŋ igiɛ́ nnya ɔlɔŋ naánanɔ. 19Baán bámɛ, nnyɛ andá uguá giɔ́bíga gánɔ gá busió hana ugándɔ ubídɔ́lɔnɔ́ na nubíényi, gueneg haná núanáyanɔ́ hómohómue beédébi bá Klístus. 20Yɔɔ́guɔya gubá dabdab ɔlɔŋ naánanɔ, gá gueleé nlɛns hana nnya wa gálgal gánɔ, gá giagiá ndiényi haná nnya wa gual naánanɔ.

Nulinsa nuá Agál naá nuá Sála

21Banuá nuambanɔ́ gubígɔ́d na gigodi, nudiɔ́guɔ́bɔn ubuɔ́ gigodi giáguɔ́ gíɔ́yɔnɔ́ a? 22Búnyɛ ubúɔ́ŋɔ́n áneé Áblahám, umabiá baán báandɛ: omoómi na giɔ́lɛ Agál, omodi na ugányɛ weg Sála. 23Gɔgaá, muɔ́n wa giɔ́lɛ umebíbíén hana bunyɛ bandɔ, henyé muɔ́n wa Sála umebíbíén uguá ndán ya Uhaluá. 24Ŋŋɔ́ŋɛ igányɛ igódi ndínyi ya buónyi imodi: Bagándɔ abagányɛ bem báandɛ bédíyenye agál áhandɛ. Nímomi níólonin agá ɔŋuɛnyɛ huá Sinayí, níbíéne biɔ́lɛ, nínínya niá Agál. 25Gá giagiá ɔŋuɛnyɛ huá Sinayí húnyɛ uguá Alabí. Agál unyɛ hana Yelusalɛ́m wa dabdab, haná únya giɔ́lɛ na baán bég. 26Gɔgaá, Yelusalɛ́m wa gumɔn unyɛ uguá ibembi, únyaá noódíe wasɔ. 27Gá giagiá Ŋŋɔ́ŋɛ yɔɔ́guɔya áneé:

«Bálágá, ugándɔ umeésébíén muɔ́n,

ágán dubógbóg, aŋuá amaásábia giɔ́bíga giá nubíényi!

Gá giagiá, gibembélídié giá ugándɔ giánábia baán gudɔ́mb

ugándɔ uyɔɔ́ ɔnɛ́m weg úmɔyá.»

28Beliméen, mmába hana gánɔ, nunyɛ bilɔŋ bímomi hana Isák, nunyɛ baán bá ndán. 29Gɔgaá, nsuá na nsuá, muɔ́n umeébíbíén uguá guɔyɛd guá guísi, umabá ugényigenye umeébíbíén uguá guɔyɛd guá Gileénde giá Uhaluá, nɔ́ búnya guesieg na behínen. 30Gɔgaá, giagɛ igiɛ́ Ŋŋɔ́ŋɛ yɔ́yɔnɔ́? «Gúŋɛ́ɛd giɔ́lɛ na ginɔ́g giég, gá giagiá muɔ́n wa giɔ́lɛ udigódi áneé waba bigínd na muɔ́n wa ugándɔ udiábá giɔ́lɛ.» 31Anagányɛ gɔg beliméen, didibá baán bá ugándɔ unyaá giɔ́lɛ, dinyɛ baán bá ugándɔ udiábá giɔ́lɛ.

Currently Selected:

Galasiɛ́ŋ 4: EKM

Highlight

Copy