JEJU TEĒ KUM JA̰A̰ 7

De kə́ 144 000 gə̄ kə́ dan ngán Israel gə̄ tə́

1Gō yá̰á̰ noō tə́ anī, m-á̰á̰ de kə́ dɔ rā̰ tə́ gə̄ sɔ́ ran̄ kíl dɔ nang kə́ sɔ́ gə̄ tə́. Nin̄-əhɔn̄ néĺ kə́ sɔ́ gə̄ kə́ dɔ nang tə́ gotə kógə̄ḿ, yā kadə̄ nél əla dɔ nang tə́ aĺ ō, dɔ bā bo tə́ aĺ ō, dɔ kāgə̄ kógə̄ḿ tə́ aĺ ō. 2Anī m-á̰a̰ de kə́ dɔ rā̰ tə́ kógə̄ḿ kə́ rang ḭḭ gír ɓē tə́. Ni-əhɔ mbō̰ yā Nə́ɓā kə́ ndi kə kumneé jīn tə́. Ni əga kɔŕ ngá̰ý ədań de kə́ dɔ rā̰ tə́ kə́ sɔ́ gə̄ ń adə̄n̄də́ kadə̄ nujən̄ dɔ nang ō, bā bo ō ní na: 3Ī-lōōī nujə dɔ nang ō, bā bo ō, kāgə̄ ō, bátə́ kadə̄ ré j-əndā mbō̰ no ngé rāā kəla gə̄ yā Nə́ɓā yājí tə́ pá tá. 4Anī m-ōō kutə de gə̄ ń əndān̄ mbō̰ nodə́ tə́ ní: Nin̄ i deē 144 000, ɔyn̄də́ i kə gír ɓē gə̄ malang yā ngán Israel gə̄. 5De gə̄ kə́ gír ɓē yā Juda tə́ ń ɔsən̄ mbō̰ nodə́ tə́ ní i deē 12 000, kə́ gír ɓē yā Ruben tə́ i deē 12 000, kə́ gír ɓē yā Gad tə́ i deē 12 000, 6kə́ gír ɓē yā Aser tə́ i deē 12 000, kə́ gír ɓē yā Nepətali tə́ i deē 12 000, kə́ gír ɓē yā Manase tə́ i deē 12 000, 7kə́ gír ɓē yā Simeo̰ tə́ i deē 12 000, kə́ gír ɓē yā Lebi tə́ i deē 12 000, kə́ gír ɓē yā Isakar tə́ i deē 12 000, 8kə́ gír ɓē yā Jabulo̰ tə́ i deē 12 000, kə́ gír ɓē yā Jəjep tə́ i deē 12 000, kə́ gír ɓē yā Benjamḛ tə́ i deē 12 000.

Kósə de kə́ ngá̰ý gə̄

9Gō yá̰á̰ ń noō tə́ anī, m-á̰á̰ kósə de kə́ ngá̰ý gə̄, kə́ deē asə tə́dádə́ alé. Nin̄-ḭḭn̄ i kə̄ dan nápar de gə̄ tə́ malang ō, dan gír ɓē gə̄ tə́ malang ō, dan gír de gə̄ tə́ malang ō. Nin̄-ndan̄ kə njadə́ dɔɔ́ ta kōr̄ kāgə̄ mbang tə́ ō, kə̄ no Ngōn̄ batə̄ tə́ ō. O̰ō̰n̄ kūbə̄ ngāl̄ kə́ ndaa gə̄ ō, əhɔn̄ ta jī kāgə̄ túmbur gə̄ jīdə́ tə́ ō. 10Nin̄-əgan̄ kɔŕ ngá̰ý ədan̄ na: Kajə deē i yá̰a̰ yā Nə́ɓā yājí ń ndi dɔ kōr̄ kāgə̄ mbang tə́ ní ō, i yā Ngōn̄ batə̄ ō. 11Anī de kə́ dɔ rā̰ tə́ gə̄ malang ń ra gīrə̄n̄ gidə kōr̄ kāgə̄ mbang ō, kum kɔɔ̄ gə̄ ō, yá̰á̰ kə́ kə kumuú kə́ sɔ́ gə̄ ō ní, əsō ɔsən̄ nodə́ nang tə́ no kōr̄ kāgə̄ mbang tə́, ba rɔȳn̄ Nə́ɓā 12ədan̄ na: Adə̄ i tītə̄ ń noō! Tɔ̄ȳ ō, kɔsə gɔn ō, kum kedə̄ ō, ndadə̄ ō, rɔȳ ō, tɔ́gə ō, ngan̄g ō, i yá̰a̰ yā Nə́ɓā yājí, kə dɔ ɓāl̄ gə̄ ɓāl̄ gə̄! Adə̄ i tītə̄ ń noō!

13Anī kum kɔɔ̄ kógə̄ḿ dan madə̄n gə̄ tə́ dəjem̄ najə̄ əda na:

De gə̄ ń o̰ō̰n̄ kūbə̄ ngāl̄ kə́ ndaa gə̄ noó ní ké i naá gə̄ ō, ḭḭn̄ i rá ō wa.

14Anī m̄-téĺ m-ə́dan na:

Kɔ́ɔ̄ḿ, īkɔ́ ī-ger̄ mbak aĺ a.

Loo ń noō tə́ ni ədam̄ na:

I de gə̄ ń teēn̄ kum yá̰a̰ nāā kə́ bo ngá̰ý tə́ ní. Nin̄-tə́gon̄ kūbə̄ ngāl̄ yādə́ gə̄ adə̄ unjə̄ i kum mósə Ngōn̄ batə̄ tə́. 15I tām̄ najə̄ ń noō tə́ n nin̄-ndan̄ ta kōr̄ kāgə̄ mbang yā Nə́ɓā tə́, ba rāān̄ kəla adə̄nən̄ ndɔ̄ɔ́ ō, kadaá ō, kem kújə yān tə́ ní. Deē ń ndi dɔ kōr̄ kāgə̄ mbang tə́ ní a ngɔ̄m̄də́. 16Ɓō a rāādə́ to̰ aĺ ō, kəndā a rāādə́ to̰ aĺ ō, mbang ō, kəngān ō, a rāān̄ yá̰a̰ sedə́ to̰ aĺ bátə́ ō. 17Tɔdɔ̄ Ngōn̄ batə̄ ń ndi dɔ kōr̄ kāgə̄ mbang tə́ danaá bang ní, a ul̄də́ ō, a aw̄ sedə́ ta kəɓa man̄ kə́ a rāā kadə̄ deē ndi kə kumneé tə́ ō. Nə́ɓā a ɔl̄ man̄ nōō kə́ kumdə́ tə́ kɔ̄ɔ́ ō.

Currently Selected:

JEJU TEĒ KUM JA̰A̰ 7: SARDC

Highlight

Copy

Compare