JEJU TEĒ KUM JA̰A̰ 8

Mbō̰ kə́ nge ko̰ sīrí

1Dan ń ni-ɔsə mbō̰ kə́ nge ko̰ sīrí ɔr̄ anī, loo tél to kúkúkú dɔ rā̰ tə́ asə ngán mbang kutə mətá. 2Anī m-á̰a̰ kadə̄ adə̄n̄ de kə́ dɔ rā̰ tə́ kə́ sīrí gə̄ ń ran̄ no Nə́ɓā tə́ ní bərúnjə gə̄ sīrí.

3Loo ń noō tə́ de kə́ dɔ rā̰ tə́ kə́ rang reē ra kadə loo tun̄ yá̰á̰ tə́, kə ganáń kə́ rāā kə lɔ́rɔ́. Anī adə̄nən̄ kajaja ngá̰ý kadə̄ ndējə̄ Nə́ɓā, naā tə́ kə ndɔ̄ȳ yā de kə́ táĺ gə̄ malang, dɔ loo tun̄ yá̰á̰ kə́ rāā kə lɔ́rɔ́ ń ra kété no kōr̄ kāgə̄ mbang tə́ ní. 4Sa kajaja ní ḭḭ jī de kə́ dɔ rā̰ tə́ kum kə̄ dɔɔ́ ta kum Nə́ɓā tə́, naā tə́ kə ndɔ̄ȳ yā de kə́ táĺ gēé. 5Anī de kə́ dɔ rā̰ tə́ un ganáń ní ō, ɔy hor kə́ dɔ loo tun̄ yá̰á̰ tə́ ɓōkə́ kemeé adə̄ rosə ō, ba ɓōkə́ dɔ nang tə́. Anī man̄ ndang ō, ndū de gə̄ ɓār̄ ō, man̄ tel̄ ō, dɔ nang ndew ō.

Bərúnjə gə̄

6Loo ń noō tə́ de kə́ dɔ rā̰ tə́ kə́ sīrí gə̄ ń bərúnjə́ kə́ sīrí gə̄ i jīdə́ tə́ ní, əndān̄ dɔ rɔ̄də́ danaá yā kɔ̄ŕ bərúnjə gə̄ ní.

7 De kə́ dɔ rā̰ tə́ kə́ ta kəga dɔ kɔ̄ŕ bərúnjə, anī kɔ̄sə̄ man̄ ō, hor ō ń əlan̄də́ naā tə́ kə mósó ní, ɓōkə́n̄də́ dɔ nang tə́. Adə̄ ré gángə̄n̄ dɔ nang gír loo mətá anī, hor o̰o̰ gírən kə́ kógə̄ḿ kɔ̄ɔ́ ō, ré gángə̄n̄ ɓūtə̄ kāgə̄ gə̄ gír loo mətá anī, hor o̰o̰ gírən kə́ kógə̄ḿ kɔ̄ɔ́ ō, o̰o̰ mu kə́ mbōl̄ gə̄ malang kɔ̄ɔ́ ō.

8 De kə́ dɔ rā̰ tə́ kə́ nge ko̰ jōó kɔ̄ŕ bərúnjə, anī ənīn̄ yá̰á̰ kə́rēý kə́ to tītə̄ mbal̄ kə́ o̰o̰ hor beé kum bā bo tə́. Adə̄ ré gángə̄n̄ bā bo gír loo mətá anī, gírən kə́ kógə̄ḿ téĺ mósə. 9Yá̰á̰ kə́ kum bā bo tə́ gə̄ ń Nə́ɓā rāādə́ ní, ré gángə̄n̄də́ gír loo mətá anī, gírən kə́ kógə̄ḿ oy malang ō, ré gángə̄n̄ ɓūtə̄ to bo gə̄ gír loo mətá anī, gírən kə́ kógə̄ḿ nujə malang kɔ̄ɔ́ ō.

10 De kə́ dɔ rā̰ tə́ kə́ nge ko̰ mətá kɔ̄ŕ bərúnjə, anī tə́yō̰ kógə̄ḿ kə́ bo ḭḭ dɔ rā̰ tə́ əsō, unjə̄ tītə̄ hor ngel̄ beé. Ré gángə̄n̄ bā gə̄ gír loo mətá anī, tə́yō̰ ní əsō i dɔ gírən kə́ kógə̄ḿ tə́ ō, dɔ kəɓa man̄ gə̄ tə́ ō. 11Rī tə́yō̰ ní na i Wur Katə̄. Ré gángə̄n̄ man̄ gə̄ gír loo mətá anī, gírən kə́ kógə̄ḿ tél i wur katə̄. Adə̄ de gə̄ ngá̰ý oyn̄, tɔdɔ̄ man̄ gə̄ ní atə̄n̄ kɔ̄ɔ́.

12De kə́ dɔ rā̰ tə́ kə́ nge ko̰ sɔ́ kɔ̄ŕ bərúnjə, anī mbang ń gángə̄n̄ gír loo mətá ō, nāā ń gángə̄n̄ gír loo mətá ō, ɓūtə̄ tə́yō̰ gə̄ ń gángə̄n̄də́ gír loo mətá ō ní, gíŕdə́ kə́ ko̰ mətá gə̄ tetən̄ ndul malang. Adə̄ ré gángə̄n̄ loo kə́ kadaá gír loo mətá anī, gírən kə́ ko̰ mətá tetə ndul ō, ré gángə̄n̄ loo kə́ ndɔ̄ɔ́ gír loo mətá anī, gírən kə́ ko̰ mətá tetə ndul ō.

13Anī m-á̰a̰ kə̄rō kógə̄ḿ nēl̄ ɓōdə̄ rā̰ tə́, ba un ndūn kə̄ dɔɔ́ ngá̰ý ədań na: Rɔ̄ tō ndoō, rɔ̄ tō ndoō, rɔ̄ tō ndoō i yā de kə́ dɔ nang tə́ gə̄, dan ń gotə de kə́ dɔ rā̰ tə́ kə́ mətá gə̄ a kɔ̄rə́n̄ bərúnjə gə̄ ní.

Currently Selected:

JEJU TEĒ KUM JA̰A̰ 8: SARDC

Highlight

Copy

Compare