JEJU TEĒ KUM JA̰A̰ 6

Mbō̰ kə́ sīrí gə̄

1Anī m-á̰a̰ Ngōn̄ batə̄ ɔsə mbō̰ kə́ ta kəga dɔ kə́ dan kə́ sīrí gə̄ tə́ ɔr̄. Anī dan yá̰á̰ kə́ kə kumuú kə́ sɔ́ gə̄ tə́ ní, m-ōō nge kə́ kógə̄ḿ dandə́ tə́ əda kə ndūn kə́ ɓār̄ tītə̄ ndán̄g man̄ beé na: Ī-reē. 2Anī m-á̰á̰ sə́ndá kə́ ndaa. Ba deē ń ndi gidən tə́ ní, əhɔ ga̰ gərā jīn tə́. Adə̄n̄ deē ní jākā mbang kógə̄ḿ. Ba ni-aw̄ i kə́ nge tetə rɔ̄ɔ̄ tə́, yā kaw̄ tetə rɔ̄ɔ̄.

3Dan ń ɔsə mbō̰ kə́ nge ko̰ jōó ɔr̄ anī, m-ōō ndū yá̰á̰ kə́ kə kumuú kə́ nge ko̰ jōó əda kə tɔ́gɔ́ na: Ī-reē. 4Anī sə́ndá kə́ rang kə́ kərē tītə̄ hor beé teē. Ba deē ń ndi gidən tə́ ní, adə̄nən̄ kadə̄ taā kem sɔl̄ lɔm kə́ dɔ nang tə́ kɔ̄ɔ́, yā kadə̄ de gə̄ tɔ̄lə̄n̄ naā ō, adə̄nən̄ kaskar kə́ bo ngá̰ý ō.

5Dan ń ɔsə mbō̰ kə́ nge ko̰ mətá ɔr̄ anī, m-ōō ndū yá̰á̰ kə́ kə kumuú kə́ nge ko̰ mətá əda kə tɔ́gɔ́ na: Ī-reē. Anī m-á̰á̰ sə́ndá kə́ ndul, ba deē ń ndi gidən tə́ ní, yá̰a̰ mbɔ̄jə́ kɔȳ yá̰a̰ i jīn tə́. 6Anī m-ōō ndū yá̰á̰ kə́ ɓār̄ tītə̄ ndū deē beé dan yá̰á̰ kə́ kə kumuú kə́ sɔ́ gə̄ ní tə́, kɔ́ɔ̄ əda na: Ī-ndégə̄ kōō gémē kem yá̰á̰ kógə̄ḿ tām̄ yā kəla kə́ ndɔ̄ kógə̄ḿ tə́ ō, ī-ndégə̄ kōō ɔ́rjə kem yá̰a̰ mətá tām̄ yā kəla kə́ ndɔ̄ kógə̄ḿ tə́ ō. Ba yā yibə̄ ō, kasə nduú ō ɓáa, ɔ́də rɔ̄ alé.

7Dan ń ni-ɔsə mbō̰ kə́ nge ko̰ sɔ́ ɔr̄ anī, m-ōō ndū yá̰á̰ kə́ kə kumuú kə́ nge ko̰ sɔ́ əda na: Ī-reē. 8Anī m-á̰á̰ sə́ndá kə́ ɓálən ndul gusə gusə. Ba deē ń ndi gidən tə́ ní, rīn na i yo ō, loo kə́ ɓádá un gōn ō. Ré gángə̄n̄ dɔ nang gír loo sɔ́ anī, gírən kə́ kógə̄ḿ ní, adə̄n̄də́ tɔ́gə dɔ tə́ kadə̄ tɔ̄lə̄n̄ de kə́ tū tə́ gə̄ kə kaskaraá ō, kə ɓōó ō, kə mo̰yo̰ó̰ ō, kə dā̰ ngān̄g gə̄ kə́ dɔ nang tə́ ō.

9Dan ń ni-ɔsə mbō̰ kə́ nge ko̰ mí ɔr̄ anī, de gə̄ ń tɔ̄lə̄n̄də́ tām̄ najə̄ yā Nə́ɓā tə́ ō, najə̄ kə́ kum tə́ ń nin̄-ədan̄ tə́ ō ní, m-á̰á̰də́ gír loo tun̄ yá̰á̰ tə́. 10Nin̄-əgan̄ kɔŕ ngá̰ý ədan̄ na: Ngoljí kə́ táĺ ō, kə́ rɔ̄kum ō, ā ɔ́r bā̰ā̰ loo gān̄g sarya tə́ ō, loo dal ba̰ā̰ mósə́jí, dɔ de kə́ dɔ nang tə́ gə̄ tə́ ō, i bátə́ rə́ngáý tə́? 11Anī adə̄n̄də́ kūbə̄ ngāl̄ kə́ ndaa kógə̄ḿ kógə̄ḿ kə dɔdə́ gēé, ba ədan̄də́ na kə tə́gān̄ tadə́ sḛ́ý ɓáý kə ngóōn̄neé bátə́ kadə̄ madə̄ kəladə́ gə̄ ō, ngákó̰ó̰də́ gə̄ ō ń kadə̄ tɔ̄lə̄n̄də́ tītə̄ yādə́ ní, kutədə́ kə asə naā pá tá.

12Dan ń ni-ɔsə mbō̰ kə́ nge ko̰ mehḛ́ ɔr̄ anī, m-á̰a̰ dɔ nang ndew ngá̰ý ō, mbang tél ndul tītə̄ ngong kə́ rāā kə yiī sə́ndá beé ō, nāā kə taá tél to tītə̄ mósə beé ō. 13Tə́yō̰ kə́ dɔ rā̰ tə́ gə̄ tə́sōn̄ nang tə́ tītə̄ ɓogə́ró kótə̄ kə́ néĺ kə́ bo ngá̰ý yéȳn adə̄ ur̄ beé. 14Dɔ rā̰ aw̄ kɔ̄ɔ́ tītə̄ makətūbə̄ kə́ deē ɓír̄ gidə naā tə́ beé ō, mbal̄ bo gə̄ malang ō, dor̄ loo gə̄ malang ō, ndɔ́tə̄n̄ kɔ̄ɔ́ loo ndadə́ gə̄ tə́ ō. 15Mban̄g kə́ dɔ nang tə́ gə̄ ō, de kə́ bo gə̄ kə ngol áskar gə̄ ō, de kə́ ngé kənge yá̰a̰ gə̄ kə de kə́ ngan̄g gə̄ ō, ɓəlo gə̄ kə de kə́ kɔ́ɔ̄ rɔ̄də́ gə̄ malang ō, ɓɔ̄ɔ̄n̄ rɔ̄də́ bəlo mbal̄ gə̄ tə́ ō, mbo̰ō̰ mbal̄ gə̄ tə́ ō. 16Nin̄-ədan̄ mbal̄ bo gə̄ ō, ngán mbal̄ gə̄ ō na kə tə́sōn̄ dɔdə́ tə́ ba kə ɓɔ̄ɔ̄n̄də́ kɔ̄ɔ́ sa̰y ta kum nge ń ndi dɔ kōr̄ kāgə̄ mbang tə́ ní ō, ta wōn̄g yā Ngōn̄ batə̄ tə́ ō. 17Tɔdɔ̄ ndɔ̄ kə́ bo yā wōn̄g yādə́ ugə̄ kɔ̄ɔ́ ní i náā n asə ra dɔɔ́?

Currently Selected:

JEJU TEĒ KUM JA̰A̰ 6: SARDC

Highlight

Copy

Compare