JEJU TEĒ KUM JA̰A̰ 17

Dəyá̰ kə́ rāā ájə́ba ngá̰ý

1Anī de kə́ dɔ rā̰ tə́ kógə̄ḿ dan ngé kə́ sīrí gə̄ ń kópə kə́ sīrí gə̄ i jīdə́ tə́ ní, reē ɔr̄ najə̄ seḿ, ədam̄ na:

Ī-reē ādə̄ m-ɔ́jiī sarya yā dəyá̰ kə́ nge rāā ájə́ba ngá̰ý ń ndi kadə bā bo gə̄ tə́ ní. 2Mban̄g kə́ dɔ nang tə́ gə̄ ɓīīn̄ seneé loo ájə́ba tə́ ō, kasə ájə́ba yān rāā de kə́ dɔ nang tə́ gə̄ ō.

3Loo ń noō tə́ ni-un ndílə́ḿ aw̄ń kem dəla loo tə́, adə̄ m-á̰a̰ dəyá̰ kógə̄ḿ kə́ ndi dɔ dā̰ kógə̄ḿ kə́ kərē pírírí tə́, ba ndangən̄ rī kə́ to ndájə̄ najə̄ dɔ Nə́ɓā tə́ gə̄ rɔ̄ dā̰ ní tə́ malang. Dā̰ ní dɔn i sīrí ba gajən gə̄ i kutə. 4Dəyá̰ ní o̰ō̰ kūbə̄ kə́ kərē ning ō, kə́ kərē bḭḭ ō. Lɔ́ŕ kə́ rɔ̄n tə́ ō, mbal̄ gə̄ kə́ gātə̄də́ i ngá̰ý gə̄ kə́ rɔ̄n tə́ ō, məde gə̄ kə́ rɔ̄n tə́ ō, ndə́lēn̄ pipir. Ni-əhɔ kópə kógə̄ḿ kə́ rāā kə lɔ́rɔ́, kə́ yá̰á̰ kə́ majaĺ ngá̰ý gə̄ i kemeé jīn tə́. Yá̰á̰ kə́ majaĺ ngá̰ý gə̄ ní i yá̰á̰ kə́ yḛr gə̄ ń ni-rāā loo ájə́ba yān tə́ ní. 5Ndangən̄ rī kógə̄ḿ nɔtə non tə́. Rī ní i rī kə́ kumən to loo mundə̄ tə́. Rī ní n toó: Babilon kə́ bo ń i kó̰ó̰ ájə́ba gə̄ ō, kó̰ó̰ yá̰á̰ kə́ majaĺ ngá̰ý gə̄ kə́ dɔ nang tə́ ní ō. 6Ba m-á̰a̰ kadə̄ mósə de gə̄ yā Nə́ɓā ō, mósə de kə́ kum tə́ gə̄ yā Jeju ō, rāā dəyá̰ ní kə́ kasə tə́.

Dan ń m-á̰a̰n anī ɔr kumḿ ngá̰ý. 7Anī de kə́ dɔ rā̰ tə́ ní ədam̄ na ké ɔr kumḿ i najə̄ rí tə́ wa. Na n-a n-ɔjəm̄ kum yá̰á̰ kə́ to loo mundə̄ tə́ ń i dəyá̰ ní ō, i dā̰ kə́ dɔn i sīrí ba gajən i kutə ń dəyá̰ ní ndi gidən tə́ ní ō. 8Dā̰ ń na m-á̰a̰n ní na ndi kété, ba ń toō ɓáa na gətóo kɔ̄ɔ́. Ni a teē bəlo kə́ ngɔ́nən gətóó tə́ yā kaw̄ loo kə́ tan a tḭ̄ḭ̄ kɔ̄ɔ́ tū tə́ tə́. Ba de kə́ dɔ nang tə́ gə̄ ń kété ta kəla gír kəndā dɔ rā̰ ō dɔ nang ō tə́, ndangən̄ rīdə́ kem makətūbə̄ ndi kə kumuú tə́ alé ní, dan ń nin̄ a a̰a̰n̄ dā̰ ní anī, a ɔr kumdə́ ngá̰ý. Tām̄ dā̰ ní ndi kété ō, gətóo kɔ̄ɔ́ ō, banī a tél yā reē ɓáý ō.

9Kum mbang ń toō i kum mbang kə́ kadə̄ kum deē ger̄ kum yá̰a̰ ō, kadə̄ kum deē edə̄ ō. Dɔ kə́ sīrí gə̄ ní i mbal̄ kə́ sīrí gə̄ ń dəyá̰ ní ndi tū tə́ ní. Tá nin̄ i mban̄g kə́ sīrí gə̄ ō. 10Kə́ mí gə̄ dandə́ tə́ tə́sōn̄ kɔ̄kə́ ō, kógə̄ḿ ndi a o̰o̰ ɓē laā ō. Kə́ nge ko̰ sīrí ugə̄ aĺ ɓáý, ba ré ugə̄ anī a ndi ngá̰ý alé. 11Dā̰ ń ndi kété ba ngɔlaā gətóó ní, i nəkɔ́ n i mban̄g kə́ nge ko̰ sɔ́sɔ́ ní. Ni i dan ngé kə́ sīrí gə̄ tə́ ō, a aw̄ i kə̄ loo kə́ tan a tḭ̄ḭ̄ kɔ̄ɔ́ tū tə́ tə́ ō.

12Gajən kə́ kutə gə̄ ń á̰a̰ā̰ ní, i mban̄g gə̄ kutə kə́ o̰ō̰n̄ ɓē aĺ ɓáý, banī nin̄ a o̰ō̰n̄ ɓē naā tə́ kə dā̰ ní kum mbang kógə̄ḿ. 13Gír̄ yādə́ i kógə̄ḿ beē, i kadə̄ adə̄n̄ dā̰ ní tɔ́gə́də́ ō, ko̰o̰ ɓē yādə́ ō. 14Nin̄ a rɔ̄ɔ̄n̄ Ngōn̄ Batə̄, ba Ngōn̄ Batə̄ a tetədə́ rɔ̄ɔ̄, tɔdɔ̄ ni i Kɔ́ɔ̄ɓē kə́ dɔ Kɔ́ɔ̄ɓē gə̄ tə́ ō, mban̄g kə́ dɔ mban̄g gə̄ tə́ ō. Ngé gə̄ ń ni-ɓāŕdə́ ō, ngé gə̄ ń ni gə̄rādə́ ō, ngé gə̄ ń ran̄ dɔ ndūdə́ tə́ ō ní, a tetən̄ rɔ̄ɔ̄ seneé ō.

15Gō tə́ anī de kə́ dɔ rā̰ tə́ ní ədam̄ na:

Man̄ gə̄ ń na m-á̰a̰ā̰ loo ń dəyá̰ kə́ nge rāā ájə́ba ndi tū tə́ ní, na i gír de gə̄ ō, kósə de gə̄ ō, nápar de gə̄ ō, gír ta gə̄ ō. 16Gajə dā̰ kə́ kutə gə̄ ń na m-á̰a̰ā̰ ō, dā̰ ní ō, a imə̄n̄ dəyá̰ kə́ nge rāā ájə́ba ní. Nin̄ na a taān̄ yá̰a̰ yān malang adə̄ rɔ̄n i karī. Nin̄ na a əsan̄ dā̰n ba na a róōn̄ gotən kə́ na̰y horoó. 17Tɔdɔ̄ Nə́ɓā na rāā adə̄ kemdə́ gḛy rāā yá̰á̰ ń ni-núm̄ ní. Gír̄ yādə́ i kógə̄ḿ beē: I kadə̄ ko̰o̰ ɓē yādə́ rāā kəla adə̄ dā̰ ní, bátə́ kadə̄ najə̄ ń Nə́ɓā əda ní reē udəń gírí.

18Ba dəyá̰ ń na m-á̰a̰ā̰ ní, na i ɓē kə́ bo ń o̰o̰ ɓē dɔ mban̄g kə́ dɔ nang tə́ gə̄ tə́ ní.

Currently Selected:

JEJU TEĒ KUM JA̰A̰ 17: SARDC

Highlight

Copy

Compare