JEJU TEĒ KUM JA̰A̰ 18

Ɓē kə́ Babilon əsō

1Gō tə́ anī, m-á̰a̰ de kə́ dɔ rā̰ tə́ kə́ rang ḭḭ dɔ rā̰ tə́ jə̄ngā. Tɔ́gən i ngá̰ý ō, ndə́lē yān rāā adə̄ loo unjə̄ kow dɔ nang tə́ ō. 2Ni-əga kɔŕ ngá̰ý əda na: Babilon ń i ɓē kə́ bo ní əsō kɔ̄ɔ́, əsō kɔ̄ɔ́! Adə̄ tél i loo ndi ndíĺ kə́ majaĺ gə̄ ō, loo ɓɔ̄ɔ̄ rɔ̄ yā ndíĺ kə́ yḛr gə̄ malang ō, yā yel̄ kə́ yḛr gə̄ malang ō, yā dā̰ kə́ yḛr gə̄ malang kə́ majən̄ aĺ ta kum de gə̄ tə́ ō. 3Tɔdɔ̄ nápar de gə̄ malang a̰ȳn̄ kasə ájə́ba kɔ̄r̄ yān ō, mban̄g kə́ dɔ nang tə́ gə̄ malang ɓīīn̄ seneé loo ájə́ba tə́ ō, ngé rāā gātə̄ kə́ dɔ nang tə́ gə̄ əngen̄ yá̰a̰ kə ta kūl̄ mang kə́ ni-mangdə́ yá̰á̰ kə́ majə ngá̰ý gə̄ kə́ gātə̄də́ i ngá̰ý tə́ ō.

4Anī m-ōō ndū de kə́ rang dɔ rā̰ tə́ əda na: Sḭḭ̄ gír deē yāḿ gə̄, ī-teēī kɔ̄ɔ́ kem ɓē ń toō tə́ na sōgə́ ī-rāāī majaĺ ń ni-rāā ní ō, yá̰á̰ kə́ tōr̄ ń əndān̄ dɔ danaá tām̄ yān tə́ ní rāāsí ō. 5Tɔdɔ̄ yá̰a̰ rāān kə́ majaĺ gə̄ ugə̄ dɔ rā̰ tə́ ō, əga kem Nə́ɓā dɔ yá̰a̰ rāān kə́ gōtə́ aĺ gə̄ tə́ ō. 6Yá̰á̰ ń ni-rāā kə madə̄n gēé ní, ī-rāāī seneé ō, yá̰á̰ ń ni-rāā ní ī-rāāī seneé loo nja kə́ jōó tə́ ō, kópə ń ni guŕ kasə nduú kemeé adə̄ de gə̄ ní, ī-guríī kemeé loo nja kə́ jōó tə́ ādīin̄ ō. 7Ī-rāāin̄ yá̰á̰ kə́ tōr̄ gə̄ ō, ī-rāāin̄ ādə̄ əhɔ ndoō ō, ādə̄ asə kə gō kɔr ń ni ɔr ta rɔ̄n ní ō, ādə̄ asə kə gō tə́ndā ń ni tə́ndā yá̰á̰ kə́ majə ngá̰ý yān gə̄ kə ta naá ní ō. Tɔdɔ̄ ni-əda kemən tə́ na n ndi na i kə́ mban̄g kə́ dəyá̰ tə́ ō, ngaan na oy aĺ ō, na n əhɔ ndoō aĺ i kə́ bátə́ gə̄ tə́ ō. 8I tām̄ najə̄ ń noō tə́ n yá̰á̰ kə́ tōr̄ gə̄ ń əndān̄ dɔ danaá tām̄ yān tə́ ní, a reēn̄ dɔn tə́ i ndɔ̄ kógə̄ḿ beē ní. Yá̰á̰ kə́ tōr̄ gə̄ ní i yo ō, kəhɔ ndoō ō, ɓō ō, tá hor a o̰o̰n ō. Tɔdɔ̄ Kɔ́ɔ̄ɓē Nə́ɓā ń gān̄g sarya dɔn tə́ ní, tɔ́gən i ngá̰ý.

9Dan ń mban̄g kə́ dɔ nang tə́ gə̄ ń ɓīīn̄ seneé loo ájə́ba tə́ ō, tə́ndān̄ yá̰á̰ kə́ majə ngá̰ý yādə́ gə̄ kə ta naá ō, a a̰a̰n̄ sa hor kə́ dɔn tə́ anī, a nōōn̄ ō, a əndan̄ kadədə́ najə̄ yān tə́ ō. 10Nin̄-ndan̄ dan sa̰y tām̄ ɓōlə́n̄ yá̰á̰ kə́ tōr̄ ń rāān ní, ba ədan̄ na: Rɔ̄ tō ndoō, rɔ̄ tō ndoō! Tām̄ Babilon ń i ɓē kə́ bo kə́ tɔ́gən i ngá̰ý ní, gāngə̄n̄ sarya kə́ dɔn tə́ i kum mbang kógə̄ḿ beē ngóy.

11Ba ngé rāā gātə̄ kə́ dɔ nang tə́ gə̄ nōōnən̄ ō, əhɔn̄ ndoō tām̄ yān tə́ ō. Tɔdɔ̄ deē mangdə́ yá̰a̰ to̰ alé. 12Yá̰a̰ gə̄ ní i lɔ́r ō, gində̄ arjā̰a̰ ō, mbal̄ gə̄ kə́ gātə̄də́ i ngá̰ý gə̄ ō, məde gə̄ ō, kūbə̄ lḛ́ḛ ō, kūbə̄ kə́ kəla kum man̄ yá̰á̰ kə́ kərē ning tə́ ō, kūbə̄ səwāa ō#18.12 Səwāa: I dəndō kə́ taw̄ kə́rēý gə̄ ənīn̄ dɔdə́ tə́. Banī de gə̄ a ɔr̄ a əjōn̄ kūbə̄ tə́., kūbə̄ kə́ kəla kum man̄ yá̰á̰ kə́ kərē bḭḭ tə́ ō, kāgə̄ malang kə́ kotə majə ō, yá̰a̰ malang kə́ rāā kə ngān̄g dā̰á̰ ō, kə kāgə̄ kə́ gātə̄n i ngá̰ý ō, kə gində̄ nə̄ngá kasaá ō, kə gindīí ō, kə mbal̄ máŕbər ō. 13Kə́ rang gə̄ i kadə kāgə̄ kanel ō, yá̰a̰ kum tá̰á̰ kə́ otə majə ō, ndujə̄ yá̰á̰ kə́ otə majə gə̄ ō, nō kāgə̄ mír ō, kajaja ō, kasə nduú ō, yibə̄ ō, ndujə̄ kə́ lándə̄ ō, kōō gémē ō, man̄g gə̄ ō, batə̄ gə̄ ō, sə́nda gə̄ ō, púsə rɔ̄ɔ̄ gə̄ ō, ɓəlo gə̄ ō, dəngáy gə̄ ō. 14Kan̄ kāgə̄ gə̄ ń ngurdə́ rāāī ngá̰ý ní aw̄n̄ sa̰y ngá̰ý rɔ̄í tə́ kɔ̄ɔ́ ō, yá̰á̰ kə́ majə ngá̰ý gə̄ ō, kə́ ndə́lē ngá̰ý gə̄ ō ní, tadə́ tḭ̄ḭ̄ kɔ̄ɔ́ sa̰y ngá̰ý rɔ̄í tə́ ō. Deē a əngedə́ to̰ aĺ bátə́. 15Ngé rāā gātə̄ gə̄ ń əngen̄ yá̰a̰ kə ta kūl̄neé ní a ran̄ dan sa̰y, tām̄ nin̄-ɓōlə́n̄ yá̰á̰ kə́ tōr̄ ń rāān ní. Nin̄ a nōōn̄ ō, a əhɔn̄ ndoō ō, 16ba a ədan̄ na: Rɔ̄ tō ndoō, rɔ̄ tō ndoō! Tɔdɔ̄ ɓē kə́ bo ń o̰ō̰ kūbə̄ lḛ́ḛ ō, kūbə̄ kə́ kəla kum man̄ yá̰á̰ kə́ kərē ning tə́ ō, kum man̄ yá̰á̰ kə́ kərē bḭḭ tə́ ō, lɔ́ŕ i rɔ̄n tə́ ō, mbal̄ gə̄ kə́ gātə̄də́ i ngá̰ý gə̄ i rɔ̄n tə́ ō, məde gə̄ i rɔ̄n tə́ ō ní, 17yá̰a̰ kənge yān kə́ asə naā beé ń noō, i kə́ nujəń kɔ̄ɔ́ kum mbang kógə̄ḿ beē ngóy.

Ngé kəhɔ dɔ ga̰ to bo gə̄ malang ō, ngé njə̄rā mbā dɔ bā bo gə̄ tə́ malang ō, ngé rāā kəla kə́ kem to bo gə̄ tə́ ō, ngé ndo̰ kānjə̄ gə̄ ō, ran̄ dan sa̰y. 18Ba dan ń a̰ā̰n̄ sa hor kə́ dɔn tə́ anī, əgan̄ kɔŕ ədan̄ na: I ɓē kə́ rá n to tītə̄ ɓē bo ń toō ní? 19Nin̄-əgan̄ bumbə́ru kə̄ dɔdə́ tə́ dɔdə́ tə́ ō əgan̄ kɔŕ ō, nōōn̄ ō, əhɔn̄ ndoō ō, ba ədan̄ na: Rɔ̄ tō ndoō, rɔ̄ tō ndoō! Tɔdɔ̄ ɓē kə́ bo ń ngé to bo gə̄ kə́ dɔ bā bo gə̄ tə́ malang əngen̄ yá̰a̰ i kə ta kūl̄neé ní, nujə sák sák kɔ̄ɔ́ i kum mbang kógə̄ḿ beē ngóy.

20Dɔ rā̰, ī-rāā rɔ̄nel̄ tām̄ nujə ń ni nujə sák sák kɔ̄ɔ́ tə́ ní! Ba sḭḭ̄ deē yā Nə́ɓā gə̄ ō, ngámbang kəla gə̄ ō, ngé koō ta gə̄ ō ní, ī-rāāī rɔ̄nel̄ ō. Tām̄ Nə́ɓā gān̄g sarya dɔn tə́ i najə̄ yá̰á̰ kə́ majaĺ ń ni-rāā sesí tə́ ní.

21Anī de kə́ dɔ rā̰ tə́ kógə̄ḿ kə́ tɔ́gən i ngá̰ý, un mbal̄ kógə̄ḿ kə́ bo tītə̄ mbal̄ riī yá̰á̰ kə́ bo beé, ənī kum bā bo tə́ ba əda na: A unən̄ Babilon ń i ɓē kə́ bo ní yā kənīn gidə kógə̄ḿ tītə̄ ń noō ō, a əngen̄ ɓē kə́ Babilon gogə́ to̰ aĺ ō. 22Deē a oō kōō ngé kugə kənde gə̄ ō, gōsə̄ gə̄ ō, ngé kɔ̄ŕ nal gə̄ ō, ngé kɔ̄ŕ bərúnjə gə̄ ō, looí to̰ alé. Deē a ənge kɔdə̄ yá̰á̰ kə́rēý ɓēé looí to̰ aĺ ō, a oō kōō mbal̄ riī yá̰a̰ looí to̰ aĺ ō. 23Deē a a̰a̰ hor kə́ tū lámbá tə́ ɓēé looí to̰ aĺ ō, nge nong kə́ dəngam ō, dəyá̰ nong yān ō ní, deē a oō ndūdə́ ɓēé looí to̰ aĺ ō. Tɔdɔ̄ ngé rāā gātə̄ yāí gə̄ i de kə́ bo gə̄ kə́ dɔ nang tə́, tām̄ rāā kəga yāí rāā adə̄ nápar de gə̄ malang ndúmə̄n̄ kɔ̄ɔ́.

24Ngé koō ta gə̄ ō, deē yā Nə́ɓā gə̄ ō, de kə́ dɔ nang tə́ gə̄ malang ń tɔ̄lə̄n̄də́ ō ní, mósə́də́ a̰ȳ nang tə́ i kem ɓē kə́ Babilon tə́.

Currently Selected:

JEJU TEĒ KUM JA̰A̰ 18: SARDC

Highlight

Copy

Compare