JEJU TEĒ KUM JA̰A̰ 16

Kópə gə̄ ń wōn̄g yā Nə́ɓā i kemeé ní

1Anī m-ōō ndū deē kógə̄ḿ kə́ bo teē kem kújə yā Kɔ́ɔ̄ɓē tə́. Ni-əda de kə́ dɔ rā̰ tə́ kə́ sīrí gə̄ ní na kə aw̄ kə ɓōkə́n̄ wōn̄g yā Nə́ɓā kə́ kem kópə kə́ sīrí gə̄ ní tə́ dɔ nang tə́.

2De kə́ dɔ rā̰ tə́ kə́ ta kəga dɔ aw̄ ɓōkə́ wōn̄g kə́ kem kópə yān tə́ dɔ nang tə́. Anī de gə̄ ń tə́ré yá̰a̰ yā dā̰ i rɔ̄də́ tə́ ō, nin̄-rɔȳn̄ ndíĺ yá̰á̰ kə́ ɔsə kum gotə dā̰ ō ní, do səya̰ kə́ majaĺ ngá̰ý ō, kə́ tōr̄ ngá̰ý ō, əsō dɔdə́ tə́.

3Kə́ nge ko̰ jōó ɓōkə́ wōn̄g kə́ kem kópə yān tə́ kum bā bo tə́. Anī bā bo tél to tītə̄ mósə de kə́ koy kɔ̄ɔ́ beē. Adə̄ yá̰a̰ malang kə́ ndi kə kumneé kum bā bo tə́ oy kɔ̄ɔ́.

4Kə́ nge ko̰ mətá ɓōkə́ wōn̄g kə́ kem kópə yān tə́ kum bā gə̄ tə́ ō, ta kəɓa man̄ kə́ nang tə́ gə̄ tə́ ō. Anī man̄ gə̄ ní télən̄ mósə. 5Anī de kə́ dɔ rā̰ tə́ ń əndānən̄ dɔ man̄ gə̄ tə́ ní ɔr̄ najə̄ adə̄ m-ōō, əda na: Ḭ̄ ń ī-ndi ngɔlaā ō, ī-ndi kété ō, ī-to kadə̄ deē ɓōĺ ndílí ō rɔyī ō ní, ḭ̄ i de kə́ gōtə́, tām̄ ī-gān̄g sarya dɔ yá̰a̰ gə̄ ń toō tə́. 6Dan ń nin̄-ɓōkə́n̄ mósə deē yāí gə̄ ō, mósə́ ngé koō ta yāí gə̄ ō nang tə́ ní, i gō tə́ kadə̄ ādə̄də́ mósə kadə̄ a̰ȳn̄. 7Anī m-oō ndū deē kógə̄ḿ ɔr̄ najə̄ dām̄ loo ń loo tun̄ yá̰a̰ i tū tə́ ní, əda na: A̰á̰ā̰ Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý, najə̄ ń ī-gāngəń sarya ní i najə̄ kə́ rɔ̄kum ō, sarya gāngīí i gōtə́ ō.

8Kə́ nge ko̰ sɔ́ ɓōkə́ wōn̄g kə́ kem kópə yān tə́ dɔ mbang tə́, anī adə̄n̄ mbang ta róbə kadə̄ kəngān rāā de gə̄. 9Loo ń noō tə́ kəngā mbang kə́ ngá̰ý rāā de gə̄, adə̄ ngonjə̄n̄ kə rī Nə́ɓā kə́ nge kaw̄ kə tɔ́gə dɔ yá̰á̰ kə́ tōr̄ gə̄ ní tə́. Banī nin̄-tūrə̄n̄ háĺdə́ ɔsənə̄ń gɔnən alé.

10Kə́ nge ko̰ mí ɓōkə́ wōn̄g kə́ kem kópə yān tə́ dɔ kōr̄ kāgə̄ mbang yā dā̰ ní tə́, anī loo ń dā̰ ní o̰o̰ ɓē dɔ tə́ ní risə til nding. Yá̰á̰ kə́ tōr̄ rāā de gə̄ adə̄ tṵ́ṵ̄n̄ ndo̰o̰də́ gə̄. 11Nin̄-tájə̄n̄ Nə́ɓā kə́ dɔ rā̰ tə́ tām̄ yá̰á̰ kə́ tōr̄ kə́ rāādə́ tə́ ō, tām̄ do səya̰ yādə́ tə́ ō. Banī nin̄-tūrə̄n̄ gidədə́ kɔ̄ɔ́ ta yá̰a̰ rāādə́ kə́ majaĺ gə̄ tə́ alé.

12Kə́ nge ko̰ mehḛ́ ɓōkə́ wōn̄g kə́ kem kópə yān tə́ kum bā kə́ bo ń i bā Opəratə ní tə́, anī man̄ kə́ tū tə́ iī kɔ̄ɔ́ kadə̄ róbə toń tām̄ yā mban̄g gə̄ ń a ḭḭn̄ gír ɓē tə́ yā reē ní tə́. 13Anī m-á̰á̰ ndíĺ kə́ yḛr kə́ tītə̄ karā̰ gə̄ mətá, teēn̄ ta dā̰ kə́ to ɓōĺ ngá̰ý ní tə́ ō, dā̰ kə́ rang tə́ ō, ta nge koō ta kə́ rɔ̄kum aĺ tə́ ō. 14Nin̄ i ndíĺ kə́ majaĺ gə̄ kə́ ngé rāā yá̰á̰ kə́ yáā gə̄. Nin̄-aw̄n̄ rɔ̄ mban̄g kə́ dɔ nang tə́ gə̄ tə́ malang yā kɔsə dɔdə́ naā tə́, tām̄ ndɔ̄ kə́ bo ngá̰ý ń i ndɔ̄ yā Nə́ɓā kə́ bo kə́ tɔ́gən i ngá̰ý ní tə́.

15Á̰a̰ī, m-ā m̄-reē tītə̄ nge ɓogə beé. Rɔ̄nel̄ i kə deē ń ndi kanjə̄ kənī ɓīī kumən tə́ ō, ngɔ̄m̄ kūbə̄ yān gə̄ na sōgə́ de gə̄ a̰a̰nən̄ loo njə̄rā tə́ rɔ̄n karī anī rɔ̄n sɔlə̄n ní ō.

16Ndíĺ kə́ majaĺ gə̄ ní ɔsən̄ dɔ mban̄g gə̄ naā tə́ loo ń a ɓārə́n̄ kə ta Hebəro na i Harmagedo̰ ní tə́.

17Kə́ nge ko̰ sīrí ɓōkə́ wōn̄g kə́ kem kópə yān tə́ tū néĺ tə́, anī ndū deē kógə̄ḿ teē tū kōr̄ kāgə̄ mbang tə́ kə tɔ́gɔ́ kem kújə yā Kɔ́ɔ̄ɓē tə́ əda na: I kə́ rāā kɔ̄ɔ́ ɓá. 18Anī man̄ tel̄ kə̄ loo gə̄ tə́ ō, ndū de gə̄ ɓār̄ ō, man̄ ndang kə̄ loo gə̄ tə́ ō, dɔ nang ndew i ndew kə́ to ɓōĺ ngá̰ý kə́ jóo toó deē a̰a̰ dɔ nang loo ndew tə́ tītə̄ ń noō aĺ ɓáý ō. 19Ɓē bo kēgə̄ naā tə́ gír loo mətá ō, ɓē gə̄ yā nápar de gə̄ tə́sōn̄ ō. Loo ń noō tə́ əga kem Nə́ɓā dɔ Babilon ń i ɓē kə́ bo ní tə́, yā kadə̄ ni-adə̄n kópə ń kasə wōn̄g yān a nēgə́ kemeé ní. 20Dor̄ loo gə̄ malang a̰ȳn̄ naā kɔ̄ɔ́ ō, mbal̄ bo gə̄ hində̄n̄ lim kɔ̄ɔ́ ō. 21Kɔ̄sə̄ kə́ kɔȳ ngá̰ý gə̄ ḭḭn̄ dɔ rā̰ tə́ tə́sōn̄ dɔ de gə̄ tə́, adə̄ nin̄-tájə̄n̄ Nə́ɓā najə̄n tə́, tɔdɔ̄ i yá̰á̰ kə́ tōr̄ kə́ to ɓōĺ ngá̰ý.

Currently Selected:

JEJU TEĒ KUM JA̰A̰ 16: SARDC

Highlight

Copy

Compare