JEJU TEĒ KUM JA̰A̰ 11

De kə́ kum tə́ kə́ jōó gə̄

1Anī adə̄mə̄n̄ tə̄ɓā kə́ to tītə̄ kāgə̄ mbɔ̄jə́ yá̰a̰ beé, ba ədamə̄n̄ na kə m-ḭ́ḭ dɔɔ́ kə m̄-mbɔ̄jə́ kújə yā Nə́ɓā ō, loo tun̄ yá̰a̰ ō, kə m̄-tə́da kutə de gə̄ ń a rɔȳn̄ Nə́ɓā kemeé ní ō. 2Kə m-ə́yá̰ ndágə loo kə́ gīr̄ gidə kújə yā Kɔ́ɔ̄ɓē, ba kə m̄-lōō mbɔ̄jə́. Tām̄ na adə̄n̄ de gə̄ kə́ nin̄ i Jipə aĺ gə̄ ta róbə́ tə́ɓā ɓē kə́ táĺ njadə́ tə́ nāā kutə sɔ́ gidə i jōó. 3Ba m-ā m-ādə̄ de kə́ kum tə́ yāḿ kə́ jōó gə̄ kadə̄ a ədan̄ najə̄ kə́ Nə́ɓā əndā tadə́ tə́. Nin̄ a o̰ō̰n̄ kūbə̄ kəhɔ ndoō yā kədań najə̄ ní ndɔ̄ 1260.

4I nin̄ n i kāgə̄ olibə kə́ jōó gə̄ ō, ɗəra hor kə́ jōó gə̄ ō ń ran̄ no kɔ́ɔ̄ dɔ nang tə́ ní. 5Ba ré deē kógə̄ḿ sāā rāādə́ yá̰á̰ kə́ tōr̄ anī, hor kógə̄ḿ teē tadə́ tə́ ba o̰o̰ madə̄ ba̰ā̰də́ gə̄. Náā nəkɔ́ ń sāā rāādə́ yá̰á̰ kə́ tōr̄ ní, a oy i tītə̄ ń noō. 6Nin̄-aw̄n̄ kə tɔ́gə kutə̄ ta dɔ rā̰, kadə̄ man̄ edə alé kem ndɔ̄ gə̄ ń nin̄ a ədan̄neé najə̄ ń Nə́ɓā əndā tadə́ tə́ ní ō, aw̄n̄ kə tɔ́gə rāā kadə̄ man̄ téĺ mósə ō, aw̄n̄ kə tɔ́gə kənda dɔ nang kə yá̰á̰ kə́ tōr̄ kə́ tayā tayā gə̄ kadə̄ asə kumən yādə́ ō.

7Dan ń nin̄ a ədan̄ najə̄ kə́ kum tə́ yādə́ oy anī, dā̰ ń teē kem bəlo kə́ bo ngá̰ý kə́ ngɔ́nən gətóó tə́ ní, a rɔ̄ɔ̄də́ ō, a tetədə́ rɔ̄ɔ̄ ō, a tɔ̄l̄də́ ō. 8Ba nīńdə́ a to ndágə loo kə́ kem ɓē bo ń unən̄ gidə rī kə̄ gogə́ əndān̄ dɔ tə́ na i Sodom ō Ejiptə ō ní tə́. Əndan̄ Kɔ́ɔ̄ɓē yādə́ kə mayá̰ tū kāgə̄ kə́ dēsə́ tə́ i loo ngeé ń noō tə́. 9De gə̄ a ḭḭn̄ kə̄ dan gír de gə̄ tə́ ō, kə̄ gír ɓē gə̄ tə́ ō, gír ta gə̄ tə́ ō, kə̄ dan nápar de gə̄ tə́ ō, yā reē ka̰a̰ nīńdə́ ndɔ̄ mətá kə núsə, ba ɔgə̄n̄ dubə̄də́. 10De kə́ dɔ nang tə́ gə̄ a rāān̄ rɔ̄nel̄ najə̄ yādə́ tə́ ō, a əlan̄ kə yá̰a̰ gēé yā kadə̄ naā karī ō. Tɔdɔ̄ ngé koō ta kə́ jōó gə̄ ngeé ń toō ní, rāān̄ de kə́ dɔ nang tə́ gə̄ yá̰á̰ kə́ tōr̄ gə̄ ngá̰ý.

11Ba gō ndɔ̄ kə́ mətá kə núsə́ ní tə́ anī, koō kógə̄ḿ kə́ a rāā deē kadə̄ ndi kə kumneé, ḭḭ rɔ̄ Nə́ɓā tə́ udə kemdə́ tə́, adə̄ ḭḭ ran̄ kə njadə́ dɔɔ́. Loo ń noō tə́ ɓōĺ rāā de gə̄ ń a̰a̰n̄də́ ní ngá̰ý. 12Anī nin̄-oōn̄ ndū deē kógə̄ḿ kə́ teē dɔ rā̰ tə́, ədadə́ kə tɔ́gɔ́ na kə alə̄n̄ kə̄ dɔɔ́ rɔ̄n tə́ laā. Loo ń noō tə́ nin̄-alə̄n̄ ta kum madə̄ ba̰ā̰də́ gə̄ tə́ ta kaw̄ dɔɔ́, dan kil̄ man̄ tə́. 13Kum mbang ngeé ń noō tə́ ní, dɔ nang ndew ngá̰ý. Adə̄ ré gángə̄n̄ ɓē naā tə́ gír loo kutə anī, gírən kə́ kógə̄ḿ tétə̄ nang tə́ kɔ̄ɔ́ malang. Adə̄ de gə̄ dūbú sīrí oyn̄ dan ń dɔ nang ndewń tə́ ní. Gotə de gə̄ ń na̰yn̄ ní ɓōĺ rāādə́, adə̄ ɔsən̄ gɔn Nə́ɓā kə́ dɔ rā̰ tə́.

14Rɔ̄ tō ndoō kə́ ko̰ jōó mān̄ kɔ̄ɔ́, ba kə́ nge ko̰ mətá a reē ngɔr.

Bərúnjə́ kə́ nge ko̰ sīrí

15 De kə́ dɔ rā̰ tə́ kə́ nge ko̰ sīrí kɔ̄ŕ bərúnjə anī, de kə́ ndūdə́ ɓār̄ ngá̰ý gə̄ ɔrə̄n̄ najə̄ dɔ rā̰ tə́ ədan̄ na: Ngɔlaā ní i Kɔ́ɔ̄ɓē yājí nin̄ kə Kərist yānneé n a o̰o̰n̄ ɓē dɔ nang tə́ ní. Ni a o̰o̰ ɓē i kə dɔ ɓāl̄ gə̄ ɓāl̄ gə̄. 16Kum kɔɔ̄ kə́ kutə jōo gidə i sɔ́ gə̄ ń ndin̄ no Nə́ɓā tə́ dɔ kōr̄ kāgə̄ mbang yādə́ gə̄ tə́ ní, əsō sébən̄ kumdə́ nang tə́, ba rɔȳn̄ Nə́ɓā. 17Nin̄-ədan̄ na:

Kɔ́ɔ̄ɓē Nə́ɓā kə́ bo kə́ tɔ́gí i ngá̰ý,

ḭ̄ ń ī-ndi ngɔlaā ō, ī-ndi kété ō ní,

jə-ndadə̄ j-adī tɔdɔ̄ ó̰o̰ ɓē kə ta kūl̄ tɔ́gí kə́ ngá̰ý.

18Nápar de gə̄ rāān̄ wōn̄g,

ba i wōn̄g yāí ḭ̄ n reē rāā yá̰á̰ ní.

Kum mbang kə́ yā gāngəń sarya dɔ de kə́ koy gə̄ tə́ asə ō,

kum mbang kə́ yā kəndāń nja ngé kəla yāí gə̄ ń i ngé koō ta gə̄ ō,

i deē yāí gə̄ ō, ngé ɓōĺ rīí gə̄ ō ń

nin̄ i de kə́ dūú gə̄ ō, kə́ bo gə̄ ō ní, asə ō,

kum mbang nujə ngé nujə dɔ nang gə̄ asə ō.

19Ta kújə yā Nə́ɓā kə́ dɔ rā̰ tə́ teē ra wōyōó, anī m-á̰a̰ sandúkə madə̄ naā yān kemeé. Loo ń noō tə́ man̄ tel̄ ō, ndū de gə̄ ɓār̄ ō, man̄ ndang ō, dɔ nang ndew ō, kɔ̄sə̄ tə́sō ngá̰ý ō.

Currently Selected:

JEJU TEĒ KUM JA̰A̰ 11: SARDC

Highlight

Copy

Compare