JEJU TEĒ KUM JA̰A̰ 12

Dəyá̰ ō, dā̰ kə́ to ɓōĺ ō

1Anī yá̰á̰ kə́ to kɔr kum kógə̄ḿ teē dɔ rā̰ tə́. Yá̰á̰ ní i dəyá̰ kógə̄ḿ kə́ əla mbang rɔ̄n tə́ kūbə̄ tə́, ba nāā i gír njan tə́ ō, jākā mbang kə́ i tə́yō̰ gə̄ kutə gidə i jōó i dɔn tə́ ō. 2Dəyá̰ ní ndān̄ ngōn̄. Ba kem ɔsə seneé. Dan ń a rāā loo kojə ngōn̄ ní, rɔ̄n tōrə̄n ngá̰ý, adə̄ əga kɔŕ.

3Loo ń noō tə́ yá̰á̰ kə́ to kɔr kum kógə̄ḿ kə́ rang teē dɔ rā̰ tə́. Yá̰á̰ ní i dā̰ kógə̄ḿ kə́ kərē kə́ to ɓōĺ ngá̰ý#12.3 Dā̰ kógə̄ḿ, ní rīn kə ta nasárá na i dərago̰.. Dɔn i sīrí ō, gajən gə̄ i kutə kógə̄ḿ ō. Dɔn kə́ sīrí gə̄ ní, jākā mbang i tū tə́ kógə̄ḿ kógə̄ḿ.

4Ré gángə̄n̄ tə́yō̰ kə́ dɔ rā̰ tə́ gə̄ gír loo mətá anī, kə̄lá dā̰ ní sa̰ā̰ gírən kə́ kógə̄ḿ ɓōkə́ dɔ nang tə́. Dā̰ ní reē ra ta dəyá̰ ń a rāā loo kojə ngōn̄ tə́ ní, yā kadə̄ ré ojə ngōn̄ ní oy anī kə n-əsa ngōn̄ ní. 5Dəyá̰ ní ojə ngōn̄ kə́ dəngam. I ngōn̄ kə́ yā kadə̄ a o̰o̰ ɓē dɔ nápar de gə̄ tə́ malang, kə kāgə̄ ko̰o̰ ɓē kə́ rāān̄ kə gindīí. Ba unən̄ ngōnən ní aw̄n̄ seneé rɔ̄ Nə́ɓā tə́, kadə kōr̄ kāgə̄ mbang yān tə́. 6Dəyá̰ ní a̰ȳ aw̄ kem dəla loo tə́, loo ń Nə́ɓā rāā loo tū tə́ tām̄ yān tə́, yā kadə̄ a̰a̰n̄ gōn tū tə́ kə yá̰a̰ kəsaá ndɔ̄ 1260 ní.

7Anī rɔ̄ɔ̄ kógə̄ḿ əsō dɔ rā̰ tə́. I Mikael nin̄ kə deē yān kə́ dɔ rā̰ tə́ gə̄ n a rɔ̄ɔ̄n̄ dā̰ kə́ to ɓōĺ ngá̰ý ní. Ba dā̰ kə́ to ɓōĺ ngá̰ý ní nin̄ kə deē yān kə́ dɔ rā̰ tə́ gēé a rɔ̄ɔ̄n̄də́ nin̄ ō. 8Banī rɔ̄ɔ̄ tetədə́ adə̄ əngen̄ loo dɔ rā̰ tə́ to̰ alé. 9Adə̄ dā̰ kə́ to ɓōĺ kə́ bo ngá̰ý ń i lī kə́ jóó ń a ɓāŕnən̄ na i diabəl ō, Sətan ō ní, ni ń i nge gól̄ de gə̄ malang kə́ dɔ nang tə́ ní, mbəre ənīnən̄ dɔ nang tə́, naā tə́ kə deē yān kə́ dɔ rā̰ tə́ gēé.

10Anī deē kógə̄ḿ ɔr̄ najə̄ kə tɔ́gɔ́ dɔ rā̰ tə́ adə̄ m-ōō ndūn: Ń toō ní kum mbang kajə deē asə kɔ̄ɔ́! Ngɔlaā ń toō ní Nə́ɓā yājí ɔjə tɔ́gən kə̄ ndágá ō, ɔjə ko̰o̰ ɓē yān kə̄ ndágá ō! Ngɔlaā ń toō ní ko̰o̰ ɓē i jī Kərist yān tə́. Tɔdɔ̄ nge sekə́ ngákó̰ó̰jí gə̄ ní mbərenən̄ dɔ rā̰ tə́ ənīnən̄ ndágá kɔ̄ɔ́. I ni n i nge sekə́də́ rɔ̄ Nə́ɓā yājí tə́ ndɔ̄ɔ́ gē kadaá gē ní. 11Ba nin̄-tetənən̄ rɔ̄ɔ̄ i kə ta kūl̄ mósə Ngōn̄ batə̄ ō, i kə ta kūl̄ najə̄ kə́ kum tə́ yādə́ ń nin̄-ədan̄ tām̄ yān tə́ ní ō. Nin̄-tárən̄ rɔ̄də́ alé, adə̄ ɓōlə́n̄ yo alé bátə́ oynə̄ń. 12I beé ní, dɔ rā̰ ī-rāā rɔ̄nel̄ ō, sḭḭ̄ de gə̄ ń ī-ndiī dɔ rā̰ tə́ ní, ī-rāāī rɔ̄nel̄ ō. Ba sḭḭ̄, dɔ nang ō bā bo ō ní, yá̰á̰ kə́ to kum kaȳ aĺ a əsō dɔsí tə́. Tɔdɔ̄ diabəl risə kum kə̄ dɔsí tə́ noō. Wōn̄g rāān ngá̰ý tām̄ ni-ger̄ kadə̄ kum mbang yān na̰y i ngá̰ý alé.

13Dan ń dā̰ kə́ to ɓōĺ ngá̰ý ní mbəre ənīnən̄ dɔ nang tə́ anī, ni-ngɔ̄də̄ gō dəyá̰ ń ojə ngōn̄ kə́ dəngam ní. 14Banī adə̄n̄ dəyá̰ ní bɔ̄gə̄ kə̄rō kə́ bo ngá̰ý gə̄ jōó, kadə̄ ḭḭń bɔ̄gə̄ ta kaw̄ kə̄ mángá, loo ń rāān̄ tām̄ yān tə́ ní, yā kadə̄ a̰a̰n̄ gōn tū tə́ kə yá̰a̰ kəsaá ɓāl̄ mətá kə nāā mehḛ́, sa̰y kɔ̄ɔ́ ta kum lī tə́. 15Banī dā̰ kə́ to ɓōĺ ngá̰ý ní ɓōkə́ man̄ tan tītə̄ bā beé gō dəyá̰ ní tə́, yā kadə̄ man̄ bā ní əndan aw̄ seneé. 16Ba dɔ nang dḭḭ̄ dəyá̰ ní, adə̄ teē tan a̰ȳń man̄ bā ń teē ta dā̰ kə́ to ɓōĺ ngá̰ý tə́ ní kɔ̄ɔ́. 17Ba dā̰ kə́ to ɓōĺ ngá̰ý ní rāā wōn̄g kə dəyá̰ ní, adə̄ aw̄ rɔ̄ɔ̄ gotə ngán kaan gə̄ ń na̰yn̄ ní. Nin̄ i ngé gə̄ ń rāān̄ gō míndə gə̄ yā Nə́ɓā ní ō, ngé gə̄ ń ngɔ̄mə̄n̄ najə̄ kə́ kum tə́ yā Jeju ní ō.

18Gō tə́ anī ni-ra dɔ nán̄g ngárə̄ḿnjēý kə́ ta bā bo tə́.

Currently Selected:

JEJU TEĒ KUM JA̰A̰ 12: SARDC

Highlight

Copy

Compare