JEJU TEĒ KUM JA̰A̰ 10

De kə́ dɔ rā̰ tə́ ō, makətūbə̄ kə́ dūú ō

1Anī m-á̰a̰ de kə́ dɔ rā̰ tə́ kə́ rang kə́ tɔ́gən i ngá̰ý, ḭḭ dɔ rā̰ tə́ a risə kə̄ nang tə́. Ni-əla kil̄ man̄ rɔ̄n tə́ tītə̄ kūbə̄ beé ō, kə́ dēsə́ bā i dɔn tə́ ō, ta kumən to tītə̄ mbang beé ō, njan to tītə̄ hor kə́ ra kə ngālāá ɓururu ō. 2Makətūbə̄ kə́ dūú kə́ kemən i kə́ teē i jīn tə́ ō. Ni-əndā njan kə́ ko̰ó̰ dɔ bā bo tə́ ō, kə́ geleé dɔ nang tə́ ō. 3Ni-əga kɔŕ ngá̰ý tītə̄ ɓɔl kə́ a nōō beé. Dan ń ni-əga kɔŕ anī, ndán̄g man̄ kə́ sīrí gə̄ rāān̄ ndūdə́ adə̄ ɔr̄ najə̄. 4Dan ń ndán̄g man̄ kə́ sīrí gə̄ ɔrə̄n̄ najə̄ oy á m̄-rāā yā ndang najə̄ gə̄ ní anī, m-ōō ndū deē kógə̄ḿ ɔr̄ najə̄ dɔ rā̰ tə́ əda na:

Najə̄ ń ndán̄g man̄ kə́ sīrí gə̄ ɔrə̄n̄ ní, kə m-ɔ́r mbō̰ ta tə́, ba kə m̄-lōō ndang.

5Anī de kə́ dɔ rā̰ tə́ ń m-á̰a̰n ra kə njan kə́ dɔɔ́ dɔ bā bo tə́ ō, dɔ nang tə́ ō ní, əla jī ko̰n kum kə̄ dɔ rā̰ tə́, 6ba túbə̄ kə nge ń ndi kə kumneé kə dɔ ɓāl̄ gə̄ ɓāl̄ gə̄ ō, rāā dɔ rā̰ kə yá̰a̰ kə́ tū tə́ gə̄ ō, dɔ nang kə yá̰a̰ kə́ tū tə́ gə̄ ō, bā bo kə yá̰á̰ kə́ tū tə́ gə̄ ō ní, əda na:

Kum mbang kə́ rang kə́ yā kəya̰ kadə̄ mān̄ to̰ gətóo. 7Ba kem ndɔ̄ gə̄ ń deē a oōń ndū de kə́ dɔ rā̰ tə́ kə́ nge ko̰o̰ sīrí loo kɔ̄ŕ bərúnjə tə́ ní, yá̰á̰ kə́ to loo mundə̄ tə́ yā Nə́ɓā a rāā yá̰a̰. Ni-əda ngé kəla yān gə̄ ń i ngé koō ta gə̄ ní najə̄n kété. Najə̄ ń ni-əda ní i Najə̄ kə́ Majə.

8Gō tə́ anī de kə́ dɔ rā̰ tə́ ń ɔr̄ najə̄ seḿ adə̄ m-ōō ndūn kété ní, tél ɔr̄ najə̄ seḿ ɓáý to̰ əda na:

Āw̄ ī-taā makətūbə̄ kə́ teē kem ń to jī de kə́ dɔ rā̰ tə́ ń ra dɔ bā bo tə́ ō, dɔ nang tə́ ō noó.

9Anī m-āw̄ rɔ̄ de kə́ dɔ rā̰ tə́ ní, ba m-ə́dan na kə adə̄m̄ makətūbə̄ kə́ dūú ní. Loo ń noō tə́ ni-ədam̄ na kə m̄-taā kə m-ə́sa. Makətūbə̄ ní na a atə̄ kemḿ tə́ ba na a nel̄ taḿ tə́ tītə̄ yibə̄ tejə beé.

10Anī m̄-taā makətūbə̄ kə́ dūú ní jī de kə́ dɔ rā̰ tə́ ní ba m-ə́sa. Dan ń i taḿ tə́ ní, lúndə̄ tītə̄ yibə̄ tejə beé, ba dan ń m-ə́san oy anī atə̄ kemḿ tə́.

11Loo ń noō tə́ ədamə̄n̄ na majə kadə̄ najə̄ ń Nə́ɓā əndā taḿ tə́ tām̄ yā gír de kə́ ngá̰ý gə̄ tə́ ō, nápar de kə́ ngá̰ý gə̄ tə́ ō, gír ta kə́ ngá̰ý gə̄ tə́ ō, mban̄g kə́ ngá̰ý gə̄ tə́ ō ní, kə m̄-tél kə m-ə́dá ɓáý to̰.

Currently Selected:

JEJU TEĒ KUM JA̰A̰ 10: SARDC

Highlight

Copy

Compare