NDŪ NAJƏ̄ 7

Israel gə̄ i gír de gə̄ kə́ ɔrə̄n̄ kam̄də́

1Kɔ́ɔ̄ɓē Nə́ɓā yāsí a aw̄ sesí dɔ nang ń kadə̄ ī-taāī tə́ ní. A tə̄ɓā nápar de kə́ ngá̰ý gə̄ kə́ dɔ nang ní tə́ kɔ̄ɔ́ nosí tə́. A tə̄ɓā nápar de gə̄ sīrí kə́ nin̄ i ngá̰ý tɔȳsí ō, ngangə̄n̄ tɔȳsí ō, adə̄ i Het gə̄ ō, Girgas gə̄ ō, Amor gə̄ ō, Kanaan gə̄ ō, Periji gə̄ ō, Hibi gə̄ ō, Yebus gə̄ ō. 2Kɔ́ɔ̄ɓē a əladə́ kem jīsí tə́ kadə̄ ī-tetiīdə́ rɔ̄ɔ̄ ō, ī-bāāī dɔdə́ ādə̄niī ō. Ī-lōōī əhɔ madə̄ naā sedə́ ō, ka̰a̰ kum tō ndoō yādə́ ō. 3Ā ī-taāī naā sedə́ alé: Ā ādī ngáńdə́ kə́ dəngam gə̄ ngáńsí kə́ dəyá̰ gə̄ kadə̄ taān̄də́ aĺ ō, ā ī-taāī ngáńdə́ kə́ dəyá̰ gə̄ yā kadə̄ ngáńsí kə́ dəngam gə̄ aĺ ō. 4Ré i beé aĺ anī tə̄rā gə̄ ń noō a rāān̄ ngáńsí gə̄ kadə̄ tūrə̄n̄ gidədə́ ta Kɔ́ɔ̄ɓē tə́ kɔ̄ɔ́ ba aw̄ ndɔ̄ȳn̄ ɓesə̄ gə̄. Loo ń noō tə́ Kɔ́ɔ̄ɓē a rāā wōn̄g sesí ō, a nujə sesí kɔ̄ɔ́ malang kanjə̄ kɔr bā̰ā̰ ō. 5Banī yá̰á̰ ń ā ī-rāāī kə nápar de gə̄ ń noō ní n toó: Ī-nujiī loo tun̄ yá̰a̰ yādə́ gə̄ kɔ̄ɔ́ ō, ī-tɔ̄ɔ̄ī mbal̄ yādə́ gə̄ ń túdə̄n̄ kə nja dɔɔ́ ní kɔ̄ɔ́ ō, ī-tétī kāgə̄ ɓesə̄ yādə́ kə́ yā ɓōĺ gidə gə̄ kɔ̄ɔ́ ō, ī-róōī yá̰a̰ yādə́ kə́ tɔ́sə̄ kudə gə̄ horoó kɔ̄ɔ́ ō. 6Tɔdɔ̄ sḭḭ̄ i gír de gə̄ kə́ ɔrə̄n̄ kam̄sí tayā tām̄ yā Kɔ́ɔ̄ɓē Nə́ɓā yāsí tə́. I sḭḭ̄ n Kɔ́ɔ̄ɓē gə̄rāsí dan gír de gə̄ malang kə́ dɔ nang tə́ tə́ kadə̄ ī-téliī gír deē yān gə̄ kə́ sɔɔ̄ dɔn nəkɔ́ ngóý ní.

Kɔ́ɔ̄ɓē i nge tūr̄ ndūn alé

7I tām̄ kutəsí kə́ tɔȳ yā gír de gə̄ malang n Kɔ́ɔ̄ɓē tə́ya̰ń gōsí tə́ ō, gə̄rańsí ō ní alé. Tɔdɔ̄ sḭḭ̄ i de kə́ ngá̰ý aĺ tɔȳ gotə gír de gə̄ malang. 8Ba ré Kɔ́ɔ̄ɓē teē sesí kɔ̄ɔ́ kem ɓē ń ī-rāāī ɓəlo tū tə́ ní tə́ kə tɔ́gə jīneé ō, ré ni-taāsí kɔ̄ɔ́ jī Parao̰ ń i mban̄g kə́ Ejiptə tə́ ní əya̰sí dɔɔ́ ō anī, kumən na Kɔ́ɔ̄ɓē táŕsí ō, ra dɔ ndūn ń ənī adə̄ kaasí gə̄ ní tə́ ō.

9I Kɔ́ɔ̄ɓē Nə́ɓā yāsí ngóy n i Nə́ɓā kə́ rɔ̄kum ní majə kadə̄ ī-gerī. Ngé gə̄ ń tárnən̄ ō, ngɔ̄mə̄n̄ gō míndən gə̄ ō ní, madə̄ naā yān ń rāā sedə́ ō, rāā kə gír kojə yādə́ gə̄ ń a reēn̄ ɓáý ní ō ní a əhɔ gír kadə̄ ngan̄g ō, a tūr̄ ndūn aĺ ō. 10Banī ngé gə̄ ń im̄nən̄ ní a rāādə́ yá̰á̰ kə́ tōr̄ kə̄ ta jī tə́ noō kanjə̄ kɔr bā̰ā̰ kadə̄ oyn̄ kɔ̄ɔ́. 11Gō míndə gə̄ ō, ndū najə̄ gə̄ ō, jī-bēl̄ loo rāā yá̰a̰ gə̄ ō ń m-ə̄ndā dɔsí tə́ ɓōólaā kadə̄ ī-rāāī ní, ī-ngɔ̄mī.

12Ré ī-nēlī mbīsí ōōīneé yá̰a̰ gə̄ ń noō ō, ə̄ndāī kumsí gírí ī-rāāī ō anī, Kɔ́ɔ̄ɓē Nə́ɓā yāsí a un ta madə̄ naā ń əhɔ kə kaasí gēé ní sesí ō, a tūr̄ ndūn aĺ ō. 13A táŕsí ō, a rāā majə sesí ō. A adə̄sí ngán gə̄ ngá̰ý ō, kōō gémē ō, kasə nduú ō, yibə̄ ō. Loo ń ā ī-ndiī dɔ nang ń ənī míndən adə̄ kaasí gə̄ yā kadə̄sí tə́ ní anī, a rāā kadə̄ man̄g yāsí gə̄ kə batə̄ yāsí gə̄ ojən̄ naā ngá̰ý ō. 14A rāā majə sesí ngá̰ý tɔȳ yā gír de kə́ rang gə̄. De kə́ dəngam aké de kə́ dəyá̰ kə́ kujə a gətóo dɔ dáńsí tə́. Yá̰a̰ kul̄ yāsí kə́ kujə a gətóo. 15Kɔ́ɔ̄ɓē a ɔgə̄ mo̰y gə̄ malang reē rɔ̄sí tə́ ngɔr. Nápar mo̰y kə́ majaĺ gə̄ malang ń əsōn̄ dɔ kósə de gə̄ tə́ dɔ nang kə́ Ejiptə tə́ á ī-gerīdə́ ní, Kɔ́ɔ̄ɓē a ɔgə̄də́ reē rɔ̄sí tə́ ngɔr. Ni a ənī mo̰y gə̄ ń noō dɔsí tə́ alé, ba a ənīdə́ i dɔ de gə̄ malang ń imə̄n̄sí tə́ ní.

16Gír de gə̄ malang ń Kɔ́ɔ̄ɓē Nə́ɓā yāsí a əladə́ kem jīsí tə́ ní, ā ī-nujiī sedə́ kɔ̄ɔ́ malang kanjə̄ ka̰a̰ kum tō ndoō yādə́. Ā ī-ndɔ̄yī ɓesə̄ yādə́ gə̄ alé, tɔdɔ̄ ɓesə̄ yādə́ gə̄ i gūmbə̄ tām̄ yāsí tə́.

Kɔ́ɔ̄ɓē i nge ngɔ̄m̄ gír deē yān gə̄

17Majanī ā ī-gírī kemsí tə́ ā ə́daī na: Nápar de gə̄ ń ngangə̄n̄ tɔȳsí ní ké ā ī-rāāī i ba̰ý n ā ī-taāīneé dɔ nang yādə́ ní wa? 18Ī-lōōī ɓōĺdə́. Ādə̄ əga kemsí dɔ yá̰á̰ ń Kɔ́ɔ̄ɓē Nə́ɓā yāsí rāā kə mban̄g Parao̰ ō kə de gə̄ malang kə́ Ejiptə tə́ ní ō. 19Ādə̄ əga kemsí dɔ yá̰a̰ nāā kə́ ngan̄g ngá̰ý gə̄ ń reē nāańdə́ adə̄ á̰a̰ī kə kumsí ní ō, dɔ yá̰á̰ kə́ tō ɓōĺ ngá̰ý gə̄ ń ni-rāā tə́ ní ō, ādə̄ əga kemsí dɔ tɔ́gə jīn tə́ ō, jīn kə́ kəla kə̄ dɔɔ́ tə́ ń teēń sesí kɔ̄ɔ́ kem ɓē kə́ Ejiptə tə́ ní ō. Yá̰á̰ ń Kɔ́ɔ̄ɓē Nə́ɓā yāsí rāā sedə́ ní, a rāā kə gír de gə̄ malang ń ī-ɓōlíīdə́ ní. 20A əla gəmbā gə̄ dɔdə́ tə́ kadə̄ túrə̄n̄də́ gə̄gē ɓáý. Ngé gə̄ ń teēn̄ ta yo tə́ jīsí tə́ á a̰ȳ ɓɔ̄ɔ̄n̄ rɔ̄də́ ní gə̄gē a gətóon̄ kɔ̄ɔ́ malang. 21Ī-lōōī ndebə ta kumdə́ tə́, tɔdɔ̄ Kɔ́ɔ̄ɓē Nə́ɓā yāsí ń i Nə́ɓā kə́ bo ō, to ɓōĺ ngá̰ý ō ní i sesí. 22Ni a tə̄ɓādə́ sḛ́ý sḛ́ý kɔ̄ɔ́ nosí tə́. Ā ásiī tɔ̄l̄də́ malang gidə kógə̄ḿ alé, ré i beé aĺ anī dā̰ kə́ bembeé gə̄ a ojən̄ naā ngá̰ý kadə̄ a tél a rāān̄sí majaĺ. 23Ba ta tɔ̄l̄ ta anī Kɔ́ɔ̄ɓē Nə́ɓā yāsí a əla nápar de gə̄ ń noō jīsí tə́. A əla ɓōĺ kə́ ngá̰ý kemdə́ tə́ bátə́ kadə̄ ī-tɔ̄līneédə́ kɔ̄ɔ́ malang. 24A əla mban̄g yādə́ gə̄ jīsí tə́ kadə̄ deē a ɓāŕ rīdə́ dɔ nang tə́ to̰ alé. Mban̄g kə́ yā dum̄ tasí a gətóo. A ī-tɔ̄līdə́ kɔ̄ɔ́ malang. 25Yá̰a̰ gə̄ ń tɔ́sə̄ udən̄ ɓesə̄ tə́ ní, ā ī-róōīdə́ horoó kɔ̄ɔ́ malang. Ī-lōōī kadə̄ ngur ngɔ̄m̄ gində̄ arjā̰a̰ ō, lɔ́ŕ ō, kə́ rɔ̄də́ tə́ tām̄ yāsí tə́ əhɔsí kə́ gūmbə̄ tə́. Tɔdɔ̄ i yá̰á̰ kə́ majaĺ ngá̰ý ta kum Kɔ́ɔ̄ɓē Nə́ɓā yāsí tə́. 26Ā āwī kə yá̰á̰ kə́ majaĺ kem kújə yāsí tə́ alé. Ré āwīneé anī a bāān̄ dɔsí naā tə́ kə yá̰á̰ kə́ majaĺ ní yā kadə̄ Kɔ́ɔ̄ɓē. Ā ī-mbātíīdə́ kɔ̄ɔ́ kə taá malang ō, ā ī-rāāīdə́ i yá̰á̰ kə́ majaĺ tə́ ō. Tɔdɔ̄ yá̰á̰ kə́ beé gə̄ i yá̰á̰ kə́ yā nujəń kɔ̄ɔ́ kə taá malang.

Currently Selected:

NDŪ NAJƏ̄ 7: SARDC

Highlight

Copy

Compare