NDŪ NAJƏ̄ 6

Ā ī-táŕ Kɔ́ɔ̄ɓē Nə́ɓā yāí

1Gō míndə gə̄ ō, ndū najə̄ gə̄ ō, jī-bēl̄ loo rāā yá̰a̰ gə̄ ō ń Kɔ́ɔ̄ɓē Nə́ɓā yāsí mērə̄m̄ ndóōsí kadə̄ úniī gō dɔ nang ń ā ī-rāāī yā taā tə́ ní n toó. 2I beé n ā ī-ndóōīneé loo ɓōĺ Ndíĺ Kɔ́ɔ̄ɓē Nə́ɓā yāsí kə dɔ ndɔ̄ gə̄ malang ń ā ī-ndiīneé kə kumsí ní ō, ā ī-ndóōīneé loo ngɔ̄m̄ ndū najə̄ gə̄ ō, yá̰á̰ kə́ yā rāā gə̄ ō ń m-ādə̄sí ní. M-ādə̄sí i sḭḭ̄ ō, ngáńsí gə̄ ō, ngán kaasí gə̄ ō, yā kadə̄ ī-ndiīneé ta kaw̄ jóo. 3Ngán Israel gə̄ ōōī ō, ə̄ndāī kumsí gírí kadə̄ úniī gō ō, ɓáa rɔ̄sí a nel̄sí ō, kutəsí a reē ngá̰ý dɔ madə̄ tə́ ō, kem ɓē ń mba ō, yibə̄ tejə ō, i ngá̰ý tū tə́ ní tə́ tītə̄ ń Kɔ́ɔ̄ɓē Nə́ɓā yā kaasí ənīń míndən adə̄sí ní.

4Israel gə̄, ōōī majə: I Kɔ́ɔ̄ɓē kal kógə̄ḿ beē ngóy n i Nə́ɓā yājí ní. 5Ā ī-táŕ Kɔ́ɔ̄ɓē Nə́ɓā yāí kə kemií malang ō, kə dā̰ rɔ̄í malang ō, kə tɔ́gí malang ō. 6Yá̰á̰ kə́ yā rāā gə̄ ń m-ɔ́jiī ɓōólaā toó, ā ə́hɔ́də́ kemií tə́ kadə̄ ngan̄g. 7Ā ɔ́jə́ ngání gə̄ kə̄ nja naā tə́ dan ń ā ī-ndi ta kújí tə́, aké ā ī-njə̄rā dɔ róbə́ tə́, aké ā ī-to nang tə́, aké ā ī-ra kə njaí dɔɔ́ ní. 8Ā ī-do̰ō̰də́ jīí tə́#6.8 Ī-do̰ō̰də́ jīí tə́: A ndangən̄ najə̄ gə̄ ní i kem makətūbūú yā do̰ō̰ nɔtə nodə́ tə́ ō, jīdə́ tə́ ō, kadə̄ əgań kemdə́ dɔ Nə́ɓā tə́. ō, nɔtə noí tə́ ō, yā kadə̄ dɔí ndígəńnal alé. 9Ā ī-ndangdə́ tū kāgə̄ ta róbə́ kújə yāí tə́ ō, ta róbə ndogə̄ kə́ yā kudəń kə̄ kem ɓē yāí tə́ ō.

Ādī dɔsí ndígə̄nal dɔ Nə́ɓā tə́ alé

10Ré Kɔ́ɔ̄ɓē Nə́ɓā yāsí aw̄ sesí dɔ nang ń ənī míndən adə̄ kaasí Abəraham ō, Isaak ō, Jakob ō, yā kadə̄sí tə́ ní anī, ā ə́ngeī ɓē bo kə́ majə gə̄ kə́ sḭḭ̄ ī-rāāī aĺ gə̄ ō, 11kújə gə̄ kə́ yá̰á̰ kə́ majə kə́ tayā tayā gə̄ kə́ sḭḭ̄ ī-sāāī aĺ gə̄ rosən̄ kem ō, bəlo man̄ gə̄ kə́ sḭḭ̄ ī-ndērī aĺ gə̄ ō, kāgə̄ nduú gə̄ kə kāgə̄ olibə gə̄#6.11 Olibə: Á̰a̰ī Teē 27.20. kə́ sḭḭ̄ ə́hɔī aĺ gə̄ ō. Ā ə́ngeī yá̰á̰ ngá̰ý yā kəsa kadə̄ ndān̄sí. 12Ba ādī dɔsí ndígə̄nal dɔ Kɔ́ɔ̄ɓē ń ɔr̄sí ɓəloó kɔ̄ɔ́ kem ɓē kə́ Ejiptə tə́ ní alé. 13I ni ngóy n ā ī-ɓōlíī ndílən ō, ā ī-ndɔ̄ȳniī ō, ā ī-túbiī kə rīneé ō ní.

14Ā ə́laī dɔsí gír ɓesə̄ gə̄ yā gír de kə́ rang gə̄ ń ndin̄ gīrə̄n̄ gidəsí tə́ ní alé. 15Tɔdɔ̄ Kɔ́ɔ̄ɓē Nə́ɓā yāsí ń ndi dɔ dáńsí tə́ ní, i Nə́ɓā kə́ nge rāā jang#6.15 Nə́ɓā kə́ nge rāā jang: Á̰a̰ī Teē 20.5.. Ī-lōōī rāā kadə̄ wōn̄g rāān sesí, na sōgə́ ni nujə sesí kɔ̄ɔ́ malang dɔ nang tə́. 16Ī-lōōī nāā Kɔ́ɔ̄ɓē Nə́ɓā yāsí tītə̄ ń ī-nāāniīneé loo kə́ Masa tə́ ní#6.16 Masa: Á̰a̰ī Teē 17.1-7.. 17Yá̰a̰ gə̄ ń Kɔ́ɔ̄ɓē Nə́ɓā yāsí ədasí kadə̄ ī-rāāī ní ō, ndū kə́ kun gə̄ ō, ndū najə̄ yān gə̄ ō ní, ā ə̄ndāī kumsí gírí majə. 18Ī-rāāī yá̰á̰ kə́ súmūú ō, yá̰á̰ kə́ majə ō, ta kum Kɔ́ɔ̄ɓē tə́ yā kadə̄ rɔ̄sí nelə̄ńsí ō, ī-taāīneé dɔ nang ń Kɔ́ɔ̄ɓē túbə ənīń míndən yā kadə̄ kaasí gə̄ ní ō. 19Ā ī-tə̄ɓāī madə̄ ba̰ā̰sí gə̄ kɔ̄ɔ́ kemeé tītə̄ ń Kɔ́ɔ̄ɓē ədań ní.

20Ba ré bírí ngáńsí gə̄ a dəjen̄sí najə̄ ədan̄ na:

Ndū kə́ kun gə̄ ō, ndū najə̄ gə̄ ō, jī-bēl̄ loo rāā yá̰a̰ gə̄ ō ń Kɔ́ɔ̄ɓē Nə́ɓā yājí adə̄sí ní i tām̄ rí tə́? 21Anī ī-téĺ ə́daīdə́ na: Kété ní jḭḭ i ɓəlo gə̄ yā mban̄g Parao̰ dɔ nang kə́ Ejiptə tə́, banī Kɔ́ɔ̄ɓē teē sejí kɔ̄ɔ́ Ejiptə kə tɔ́gə jīneé. 22Kɔ́ɔ̄ɓē rāā yá̰á̰ kə́ yā kɔjəń yá̰a̰ gə̄ ō, yá̰á̰ kə́ yáā kə́ to ɓōĺ gə̄ ō, kə́ bo ngá̰ý gə̄ ta kumjí tə́ ənīń yá̰á̰ kə́ to kum kaȳ aĺ dɔ ɓē kə́ Ejiptə tə́ ō, dɔ mban̄g Parao̰ tə́ ō, dɔ ngéén gə̄ tə́ malang ō, 23ba teē sejí kɔ̄ɔ́ Ejiptə yā kaw̄ sejí dɔ nang ń ənī míndən dɔ tə́ adə̄ kaají gə̄ ní, yā kaw̄ kadə̄jí. 24Əndā dɔjí tə́ kadə̄ j-uniī gō ndū najə̄ gə̄ ń noō malang ō, kadə̄ jə-ɓōlíī ndílən nəkɔ́ Kɔ́ɔ̄ɓē Nə́ɓā yājí ō, yā kadə̄ rɔ̄jí nelə̄ńjí kə ndɔ̄ gə̄ ō, kadə̄ ni ngɔ̄məńjí kadə̄ jə-ndiīneé kə kumjí tītə̄ ń jə-ndiīneé jījí tə́ ɓōólaā toó ō.

25Gō míndə gə̄ ń noō ré j-əndāī kumjí gírí malang jə-rāāī ta kum Kɔ́ɔ̄ɓē Nə́ɓā yājí tə́ tītə̄ ń əndāń dɔjí tə́ ní anī, j-a jə-téliī de kə́ súmūú gə̄.

Currently Selected:

NDŪ NAJƏ̄ 6: SARDC

Highlight

Copy

Compare