NDŪ NAJƏ̄ 8

Kɔ́ɔ̄ɓē ɔjə Israel gə̄ yá̰a̰

1Gō míndə gə̄ malang ń m-ɔ́jə́sí ɓōólaā ní, ə̄ndāī kumsí gírí ī-rāāī, kadə̄ ī-ndiīneé kə kumsí ō, ī-téliīneé kósə de kə́ ngá̰ý gə̄ ō, ī-taāīneé dɔ nang ń Kɔ́ɔ̄ɓē ənī ndūn adə̄ kaasí gə̄ najə̄n tə́ ní ō. 2Ādə̄ əga kemsí dɔ róbə́ ń Kɔ́ɔ̄ɓē Nə́ɓā yāsí rāā adə̄ ī-njə̄rāī tū tə́ ɓāl̄ kutə sɔ́ kem dəla loo tə́ ní. Ni-rāā adə̄ yá̰á̰ kə́ ngan̄g gə̄ əngen̄sí i yā nāańsí ō, i yā ka̰a̰ń yá̰á̰ kə́ kemsí tə́ ō, yā gerə̄ń ké ā ī-rāāī yá̰a̰ gə̄ ń ɔjəsí ní aké ā ī-rāāī aĺ wa ō. 3Kɔ́ɔ̄ɓē Nə́ɓā rāā adə̄ yá̰á̰ kə́ ngan̄g gə̄ əngen̄sí ō, ɓō rāāsí ō, ba adə̄sí mána ń i yá̰a̰ kəsa kə́ sḭḭ̄ ō, kaasí gə̄ ō, ī-gerī gír aĺ ní adə̄ ə́saī. Rāā yá̰á̰ ń noō ɔjəńsí i kadə̄ deē a ndi kə kumneé i kə ta kūl̄ yá̰a̰ kəsaá ngóy alé, ba i kə ta kūl̄ najə̄ malang ń teē ta Kɔ́ɔ̄ɓē tə́ ní. 4Kem ɓāl̄ kə́ kutə sɔ́ gə̄ ń ī-rāāī kem dəla loo tə́ ní, kūbə̄ yāsí gə̄ ngísən̄ aĺ ō, njasí gə̄ tágə̄n̄ aĺ ō. 5Ní majə kadə̄ ī-gerī na Kɔ́ɔ̄ɓē Nə́ɓā yāsí ɔjəsí i yá̰a̰ kadə̄ ī-gerī tītə̄ ń bɔbə̄ ngōn̄ a ɔjəń ngōnən yá̰a̰ kadə̄ ger̄ ní. 6Úniī gō róbə gə̄ yā Kɔ́ɔ̄ɓē Nə́ɓā yāsí ō, ī-ɓōlíī ndílən ō, ī-rāāīneé yá̰a̰ gə̄ ń ni ədasí kadə̄ ī-rāāī ní.

Yá̰a̰ nāā gə̄ kə́ dɔ nang yā Israel gə̄ tə́

7Kɔ́ɔ̄ɓē Nə́ɓā yāsí a aw̄ sesí i dɔ nang kə́ majə tə́, i dɔ nang kə́ man̄ a nūgə́ tū tə́ ō, man̄ kə́ teē nang tə́ gə̄ a nūgə́n̄ tū tə́ ō, man̄ kə́ gíŕ nángāá gə̄ a kə̄rān̄ tū tə́ kum wól loo gə̄ tə́ ō, dɔ mbal̄ gə̄ tə́ ō. 8I dɔ nang kə́ kōō gémē ō, kōō ɔ́rjə ō, a əɓan̄ tū tə́ ō, kə́ kāgə̄ nduú ō, kāgə̄ kótə̄ ō, kāgə̄ gərenadə ō, kə́ yibə̄ olibə ō#8.8 Olibə: Á̰a̰ī Teē 27.20, yibə̄ tejə ō, i ngá̰ý tū tə́. 9A mbɔ̄jə́n̄ i yá̰a̰ kəsa tá a adə̄n̄sí dɔ nang ní tə́ aĺ ō, i dɔ nang kə́ ā ī-nalī yá̰a̰ tū tə́ aĺ ō. I dɔ nang kə́ gində̄ i tū mbal̄ gə̄ kə́ tū tə́ tə́ ō, deē ndēr̄ mbal̄ bo gə̄ kə́ tū tə́ anī a ənge gində̄ nə̄ngá kasə ō. 10Ā ə́saī yá̰a̰ tū tə́ kadə̄ ā ī-ndānī ō, ā ə́daī najə̄ kə́ majə dɔ Kɔ́ɔ̄ɓē Nə́ɓā yāsí ń adə̄sí dɔ nang kə́ majə ní tə́ ō.

11Ə̄ndāī kumsí gíŕ yá̰a̰ yā Kɔ́ɔ̄ɓē Nə́ɓā yāsí kə́ yā rāā gə̄ tə́ ō, jī-bēl̄ loo rāā yá̰a̰ yān gə̄ tə́ ō, ndū najə̄ yān gə̄ tə́ ō ń m-ādə̄sí ɓōólaā ní, na sōgə́ dɔsí ndígə̄nal dɔ Kɔ́ɔ̄ɓē Nə́ɓā yāsí tə́. 12Loo ń ré ə́saī yá̰a̰ ī-ndānī ō, ī-rāāī kújə́ kə́ majə gə̄ ī-ndiī kemeé ō, 13ré man̄g yāsí gə̄ kə batə̄ yāsí gə̄, kə bə̄yā̰ yāsí gə̄ ojən̄ naā ngá̰ý ō, gində̄ arjā̰a̰ yāsí gə̄ kə lɔ́r yāsí gə̄ kə yá̰a̰ kənge yāsí kə́ tayā tayā gə̄ i ngá̰ý ō anī, 14ī-lōōī kɔjə rɔ̄sí ō, ī-lōōī kadə̄ dɔsí ndígə̄nal dɔ Kɔ́ɔ̄ɓē Nə́ɓā yāsí tə́ ō. I ni n i nge kɔr̄sí ɓəloó kɔ̄ɔ́ kem ɓē kə́ Ejiptə tə́ ní. 15I ni n rāā sesí adə̄ ī-njə̄rāīneé kem dəla loo kə́ bo ngá̰ý tə́ ō, to ɓōĺ ngá̰ý tə́ ō ń lī kə́ do̰ tōr̄ ngá̰ý gə̄#8.15 Lī kə́ do̰: Á̰a̰ī Tə́da 21.6. ō, gə́na gə̄ ō, i ngá̰ý tū tə́ ní. I loo kə́ kəndā a rāā deē tū tə́ banī deē a ənge man̄ tū tə́ yā ka̰ȳ alé. Ba ni-rāā adə̄ man̄ teē tū mbal̄ kə́ ngan̄g ngá̰ý tə́ tām̄ yāsí tə́. 16Mána ń i yá̰a̰ kəsa kə́ kaasí gə̄ gerə̄n̄ aĺ ní, i ni n i nge kadə̄sí kadə̄ ə́saī kem dəla loo tə́ ní. Ni- rāā adə̄ ko̰y əngesí i yā nāańsí ō, yá̰á̰ kə́ majə gə̄ kə́ tām̄ yāsí tə́ ní, ni-əndā dɔ jīn yā rāań majə sesí kem ndɔ̄ gə̄ ń a reēn̄ ɓáý tə́ ní ō. 17Ī-lōōī gír̄ kemsí tə́ kəda na ə́ngeī yá̰a̰ gə̄ ń noō na i kə ta kūl̄ tɔ́gə́sí sḭḭ̄ kɔ́ gə̄. 18Ādə̄ əga kemsí na i Kɔ́ɔ̄ɓē Nə́ɓā yāsí n i nge kadə̄sí tɔ́gə kadə̄ ə́ngeīneé yá̰a̰ gə̄ ń noō ní. Rāā beé i yā kɔjəń na ɓōólaā gə̄gē ní ni-əhɔ ta madə̄ naā ń ni-əhɔ kə kaasí gēé ní ɓáý.

19Ré dɔsí ndígə̄nal dɔ Kɔ́ɔ̄ɓē Nə́ɓā yāsí tə́, adə̄ ə́laī dɔsí gír ɓesə̄ gə̄ tə́ ī-rāāī kəla ādīdə́ ō, ɔ́siī nosí nang tə́ nodə́ tə́ ō anī, m-ə́dásí kə́ ngáā tə́ ɓōólaā m-ādə̄ ōōī, ā ī-gətóoī kɔ̄ɔ́ malang. 20Rɔ̄kum, ré ōōī ta Kɔ́ɔ̄ɓē Nə́ɓā yāsí aĺ anī, ā ī-gətóoī kɔ̄ɔ́ tītə̄ yā nápar de gə̄ ń Kɔ́ɔ̄ɓē rāādə́ adə̄ gətóon̄ kɔ̄ɔ́ nosí tə́ ní.

Currently Selected:

NDŪ NAJƏ̄ 8: SARDC

Highlight

Copy

Compare