NDŪ NAJƏ̄ 4

Majə kadə̄ deē rāā yá̰á̰ ń ndū najə̄ əda ní

1Ngán Israel gə̄, ōōī ndū najə̄ gə̄ ō, jī-bēl̄ loo rāā yá̰a̰ gə̄ ō ń mə̄kɔ́ m-ɔ́jə́sí loo kun gō ní. I beé n ā ī-ndiīneé kə kumsí ō, ā ī-taāīneé dɔ nang ń Kɔ́ɔ̄ɓē Nə́ɓā yā kaasí gə̄ adə̄sí ní ō. 2Yá̰a̰ gə̄ ń Kɔ́ɔ̄ɓē Nə́ɓā yāsí əndā dɔsí tə́ kadə̄ ī-rāāī á m-ə́dásí ní, ā ə̄nīī kə́ rang dɔ tə́ aĺ ō, ā ə́ya̰ī kógə̄ḿ kɔ̄ɔ́ aĺ ō, ba ā ī-ngɔ̄mīdə́. 3Yá̰á̰ ń Kɔ́ɔ̄ɓē rāā Baal Peor#4.3 Baal Peor: Á̰a̰ī Tə́da 25.1-9. ní, sḭḭ̄ kɔ́ gə̄ á̰a̰ī kə kumsí malang. De gə̄ malang ń unən̄ gō ɓesə̄ Baal kə́ Peor ní, Kɔ́ɔ̄ɓē Nə́ɓā yāsí nujə sedə́ kɔ̄ɔ́ malang dɔ dáńsí tə́. 4Ba sḭḭ̄ ń ə́hɔī gō Kɔ́ɔ̄ɓē Nə́ɓā yāsí ngan̄g ní, ɓōólaā sḭḭ̄ malang ī-ndiī kə kumsí.

5Ī-gerī kadə̄ m-ɔ́jə́sí ndū najə̄ gə̄ ō, jī-bēl̄ loo rāā yá̰a̰ gə̄ ō, tītə̄ ń Kɔ́ɔ̄ɓē Nə́ɓā yāḿ ədam̄neé na kə m-ɔ́jə́sí ní, yā kadə̄ ré ūgī dɔ nang ń ā ī-taāī tə́ ní anī, ī-rāāī tītə̄ ń m-ɔ́jəńsí ní. 6Ré ī-rāāī kə gō ń m-ɔ́jəńsí ní anī, gír de kə́ rang gə̄ ń a oōn̄ ndū najə̄ gə̄ ń toō malang ní, a rāān̄sí i gír de kə́ ngáā gə̄ tə́ ō, de kə́ ger̄ yá̰a̰ gə̄ tə́ ō, a ədan̄ na: Nápar de gə̄ ń toō i nápar de gə̄ kə́ yā kɔsə gɔndə́, i gír de kə́ ngáā gə̄ ō, kə́ ger̄ yá̰a̰ gə̄ ō. 7Tɔdɔ̄ i nápar de kə́ ngá̰ý gə̄ kə́ rá n ɓesə̄ yādə́ gə̄ i ngɔr rɔ̄də́ tə́ tītə̄ ń Kɔ́ɔ̄ɓē Nə́ɓā yājí i ngɔr rɔ̄jí tə́ kə dɔ ɓāŕ gə̄ malang ń j-a jə-ɓāŕniī kadə̄ dḭḭ̄jí ní ní? 8I nápar de kə́ ngá̰ý kə́ rá gə̄ n ndū najə̄ yādə́ gə̄ ō, jī-bēl̄ loo rāā yá̰a̰ yādə́ gə̄ ō, ton̄ kə gōó majə tītə̄ ndū najə̄ gə̄ malang ń m-ɔ́jə́sí ɓōólaā ní? 9Banī yá̰á̰ ń kadə̄ ə̄ndāī kumsí gírí majə ní, i kadə̄ dɔsí ndígə̄nal yá̰a̰ gə̄ ń á̰a̰ī kə kumsí ní alé. Bátə́ gēé ādī dɔsí ndígə̄nal alé, ba ɔ́jiī ngáńsí gə̄ ō, ngán kaasí gə̄ ō, ādə̄ gerə̄n̄.

Nə́ɓā teē kum Israel gə̄ dɔ madə̄ naā yān tə́

10Ādə̄ əga kemsí dɔ ndɔ̄ ń āw̄ ī-rāīneé no Kɔ́ɔ̄ɓē Nə́ɓā yāsí tə́ nja mbal̄ Horeb tə́ ní. Kɔ́ɔ̄ɓē ədam̄ na:

Ɔ́sə dɔ gír de gə̄ kə̄ naā tə́ rɔ̄ḿ tə́ ādə̄ m-ɔ̄r̄ najə̄ sedə́, kadə̄ ndóōn̄ loo ɓōĺ ndílə́ḿ dan ń a ndin̄neé kə kumdə́ dɔ nang tə́ ní ō, kadə̄ ndóōn̄ ngáńdə́ gə̄ kadə̄ gerə̄n̄ ō. 11Adə̄ ndɔ̄ ń noō tə́ ní sḭḭ̄ ī-ndɔ́tī kə̄ ngɔr ba ī-raī kə njasí dɔɔ́ nja mbal̄ Horeb tə́. Mbal̄ ní əɓa hor, adə̄ ndo̰ hor gə̄ aw̄n̄ ugə̄n̄ ɓōdə̄ rā̰ tə́ dɔɔ́, dan kil̄ man̄ kə́ ndul ndí ndḭ́ tə́ ō, kum loo kə́ risə til nding tə́ ō. 12Kɔ́ɔ̄ɓē ra kum hor tə́ ɔrə̄ń najə̄ sesí. Sḭḭ̄ ōōī i ndūn loo kɔr̄ najə̄ tə́, banī á̰a̰ī kumən alé. I ndūn ngóy n ōōī ní. 13Ɔr̄ najə̄ sesí i dɔ madə̄ naā yān ń rāā sesí ní tə́, adə̄ i najə̄ kə́ kutə kógə̄ḿ gə̄ ń ndangdə́ dɔ bar mbal̄ gə̄ tə́ jōó ba ədasí na kə úniī gō ní. 14Dan ngeé ń noō tə́ ní, Kɔ́ɔ̄ɓē ədam̄ na kə m̄-ndóōsí ndū najə̄ gə̄ ō, jī-bēl̄ loo rāā yá̰a̰ gə̄ ō, kadə̄ ré ūgī dɔ nang ń ā āwī kə̄ taá tə́ ní anī úniī gō.

Moijə tāā Israel gə̄ dɔ rāā ɓesə̄ gə̄ tə́

15Ə̄ndāī kumsí gír rɔ̄sí sḭḭ̄ kɔ́ gə̄ tə́ majə, tɔdɔ̄ ndɔ̄ ń Kɔ́ɔ̄ɓē ɔrə̄ń najə̄ sesí kum hor tə́ dɔ mbal̄ Horeb tə́ ní, á̰a̰ī ngarā̰ kumən nəkɔ́ alé. 16Adə̄ ī-lōōī rāā yá̰á̰ kə́ majaĺ kə́ tītə̄ kudə ɓesə̄, aláa tɔ́sə̄ kāgə̄ rāā ndíĺ yá̰á̰ kə́rēý tə́, ndíl de kə́ dəngam tə́, aké de kə́ dəyá̰ tə́, 17ndíl dā̰ tə́, aké ndíl yel̄ tə́, 18ndíl kur̄ kə́ kagə nang tə́ tə́ aké ndíl kānjə̄ tə́. 19Ī-lōōī kənī kumsí kə̄ dɔɔ́ ka̰a̰ń mbang ō, nāā ō, tə́yō̰ gə̄ ō, ɓūtə̄ yá̰a̰ gə̄ kə́ dɔ rā̰ tə́ malang ō, ba kəya̰ rɔ̄sí kadə̄ gólə̄n̄sí kadə̄ ɔ́siī nosí nang tə́ nodə́ tə́ ō, ī-rāāī kəla ādīdə́ ō. Tɔdɔ̄ háĺ yá̰a̰ rāā kə́ tītə̄ ń noō ní, Kɔ́ɔ̄ɓē Nə́ɓā yāsí adə̄ i gír de kə́ rang gə̄ malang ń ndin̄ dɔ nang tə́ ní. 20Banī Kɔ́ɔ̄ɓē ɔysí sḭḭ̄ teē sesí kɔ̄ɔ́ kem ɓē kə́ Ejiptə ń rāā rɔ̄n i hor nō gində̄ tə́ kə́ njɔ́ḿ gə̄ tə́ ní, yā kadə̄ ī-téliī gír deē yān gə̄ kə́ yá̰a̰ halan gə̄ tə́ tītə̄ ń ī-ndiīneé jīsí tə́ ɓōólaā toó.

21Kɔ́ɔ̄ɓē rāā wōn̄g seḿ najə̄ yāsí tə́. Ni-ənī ndūn ədamə̄ń na m-ā m̄-teē bā Jurdḛ aĺ ō, na m-ā m-ūgə̄ dɔ nang kə́ majə ń ni a rāā yā kadə̄sí yá̰a̰ halasí tə́ ní aĺ ō. 22Adə̄ m-ā m-óy dɔ nang ń toō tə́ kanjə̄ teē bā Jurdḛ. Banī sḭḭ̄ ā ī-teēī bā yā kaw̄ taā dɔ nang kə́ majə ní. 23Ī-lōōī kadə̄ dɔsí ndígə̄nal madə̄ naā ń Kɔ́ɔ̄ɓē Nə́ɓā yāsí əhɔ sesí ní ba kḭḭ rāā ɓesə̄ gə̄ ō, tɔ́sə̄ yá̰a̰ rāā ndíĺ yá̰a̰ gə̄ ń ni ɔgə̄sí rāā tə́ ní ō. 24Tām̄ Kɔ́ɔ̄ɓē Nə́ɓā yāsí i hor kə́ a o̰o̰ loo. Ni i Nə́ɓā kə́ nge rāā jang#4.24 Nge rāā jang: Á̰a̰ī Teē 20.5.

25Loo ń ré ójiī ngán gə̄ ō, ngáńsí gə̄ ojən̄ ngán kaasí gə̄ ō, adə̄ ī-ndiī dɔ nang ń Kɔ́ɔ̄ɓē ənī míndən yā kadə̄sí tə́ ní dan i ngá̰ý anī, ī-lōōī rāā ɓesə̄ kəsōń kum majaĺ tə́ ō, tɔ́sə̄ yá̰á̰ kógə̄ḿ rāā kum gotə yá̰á̰ kə́rēý tə́ ō. Ī-lōōī rāā yá̰á̰ kə́ majaĺ ta kum Kɔ́ɔ̄ɓē Nə́ɓā yāsí tə́ kadə̄ adə̄n wōn̄g. 26Ré ī-rāāī yá̰á̰ kə́ majaĺ kə́ beé gə̄ anī, m-ə́dásí ɓōólaā m-ādə̄ gān̄g ō, dɔ rā̰ nin̄ kə dɔ nang i kə́ kum tə́ yāḿ gə̄ ō. Ā ī-gətóoī kɔ̄ɔ́ kə̄ ta jī tə́ beē dɔ nang ń ā ə́ngeī gidə bā Jurdḛ kə́ dām̄ kə́ nú tə́ ní. Ā ī-ndiī tū tə́ dan i ngá̰ý aĺ n ā ī-gətóoīneé kɔ̄ɔ́ malang ní. 27Kɔ́ɔ̄ɓē a tə̄ndā yā tḭ̄ḭ̄sí kə̄ dan nápar de kə́ rang gə̄ tə́ kɔ̄ɔ́. Ā ī-na̰yiī i sḛ́ý beē ngóy dan nápar de gə̄ ń a aw̄ sesí kə̄ dandə́ tə́ ní. 28Ā ī-ndɔ̄yī ɓesə̄ gə̄ ń i kāgə̄ gə̄, kə mbal̄ gə̄ ń de gə̄ tɔ́sə̄n̄ kə jīdə́ ní loo ní tə́. Ɓesə̄ gə̄ ń asən̄ ka̰a̰ loo aĺ ō, koō loo aĺ ō, kəsa yá̰a̰ aĺ ō, asən̄ kun wusə yá̰a̰ aĺ ō ní, ā ī-rāāī kəla yā kadə̄də́. 29Loo ń noō tə́ ní ā ī-sāāī Kɔ́ɔ̄ɓē Nə́ɓā yāsí. Ré ī-sāāniī kə ngarā̰ kemsí mámák ō, kə rɔ̄sí malang ō anī, ā ə́ngeniī. 30Ré yá̰a̰ gə̄ ń m̄-tāāsí najə̄n malang toó reē ugə̄n̄ dɔsí tə́ adə̄ ī-ndiī dan wur kɔl tə́ anī, ā ī-téliī yā reē rɔ̄ Kɔ́ɔ̄ɓē Nə́ɓā yāsí tə́ ō, yā koō najə̄ kɔrə̄n gogə́ rang ō. 31Tɔdɔ̄ Kɔ́ɔ̄ɓē Nə́ɓā yāsí i Nə́ɓā kə́ kumən a o̰o̰n, adə̄ ni a əya̰sí kɔ̄ɔ́ aĺ ō, a nujə sesí kɔ̄ɔ́ malang aĺ ō. Madə̄ naā ń ənī míndən rāań kə kaasí gēé ní dɔn a ndígə̄nal aĺ ō.

Israel gə̄ əngen̄ yá̰á̰ kə́ gotə de gə̄ əngen̄ alé

32Ī-gírī dɔ yá̰a̰ gə̄ ń rāān̄ yá̰á̰ kété jóo nosí tə́ ní, ə́laī gír dɔ ndɔ̄ ń Nə́ɓā əndāń deē dɔ nang tə́ ní tə́. Yá̰a̰ gə̄ ń rāān̄ yá̰á̰ gír dɔ nang tə́ laā ta kaw̄ kə̄ ta ngóý dɔ nang tə́ nú ní, ī-gírī á̰a̰ī ké yá̰á̰ kə́ bo ngá̰ý kə́ beé rāā yá̰á̰ kété ɓá wa. De gə̄ ədan̄ gotə najə̄ kə́ beé kété ɓá a? 33I gír de kə́ rá gə̄ n nə́ɓā kógə̄ḿ ɔr̄ najə̄ sedə́ kum hor tə́ adə̄ oōn̄ ndūn ba ndin̄ kə kumdə́ tītə̄ yāsí dan ń Nə́ɓā yāsí ɔrə̄ń najə̄ sesí ní? 34Aké nə́ɓā kógə̄ḿ nāā kɔr̄ deē yān gə̄ kɔ̄ɔ́ ɓá jī madə̄ ba̰ā̰də́ gə̄ tə́ kə ta kūl̄ yá̰a̰ nāā gə̄ ō, yá̰a̰ kɔjə gə̄ ō, yá̰á̰ kə́ yáā gə̄ ō, rɔ̄ɔ̄ kə́ rɔ̄ɔ̄ de gə̄ ō, kə jīn kə́ ngan̄g ngá̰ý ń əla kə̄ dɔɔ́ ní ō, kə yá̰á̰ kə́ to ɓōĺ ngá̰ý gə̄ ō, kɔ̄ɔ́ ɓá tītə̄ ń Kɔ́ɔ̄ɓē Nə́ɓā yāsí rāań adə̄ á̰a̰ī Ejiptə tə́ ní a? 35Ɔjən̄sí yá̰a̰ gə̄ ń noō adə̄ á̰a̰ī kə kumsí i yā kadə̄ ī-gerīneé kadə̄ i Kɔ́ɔ̄ɓē ngóy n i Nə́ɓā ní. Nə́ɓā kə́ rang gətóo. 36Ndū ń ndi dɔ rā̰ tə́ rāā adə̄ ōōī ní i yā kɔjəńsí yá̰a̰. Ba dɔ nang tə́ ɓáa ni-rāā adə̄ á̰a̰ī hor yān kə́ bo ō, ōōī ndūn loo kɔr̄ najə̄ tə́ kum tə́ ō. 37Nəkɔ́ teē sesí kɔ̄ɔ́ dɔ nang kə́ Ejiptə tə́ kə ta kūl̄ tɔ́gən kə́ ngá̰ý tɔdɔ̄ ni tár kaasí gə̄ ō, gə̄rasí sḭḭ̄ ngán kaadə́ gə̄ ní. 38Ngɔlaā ni a tə̄ɓā nápar de gə̄ kə́ kutədə́ ō, tɔ́gə́də́ ō, tɔȳ yāsí kɔ̄ɔ́ nosí tə́, ba a aw̄ sesí dɔ nang yādə́ tə́ yā kadə̄sí kadə̄ téĺ yá̰a̰ halasí. 39Ní, yá̰á̰ ń kadə̄ ī-gerī ɓōólaā ō, ī-ngɔ̄mī kemsí tə́ ō ní n toó: I Kɔ́ɔ̄ɓē n i Nə́ɓā dɔ rā̰ tə́ ō, dɔ nang tə́ ō ní. Nə́ɓā kə́ rang gətóo. 40Ndū najə̄ yān gə̄ ō, yá̰a̰ gə̄ ń ni-əndā dɔsí tə́ kadə̄ ī-rāāī ō ń m-ɔ́jə́sí ɓōólaā ní, úniī gō, kadə̄ sḭḭ̄ ō, ngáńsí gə̄ ō, ngán kaasí gə̄ ń a utə̄n̄ gōsí ní ō, ə́ngeīneé rɔ̄nel̄ ō, ī-ndiīneé kə kumsí ta kaw̄ kə̄ jóo dɔ nang ń Kɔ́ɔ̄ɓē Nə́ɓā yāsí adə̄sí kə́ kə́ njɔ́ḿ gə̄ tə́ gə̄ tə́ ní ō.

Ɓē ɓɔ̄ɔ̄ rɔ̄ gə̄ kə́ gidə bā Jurdḛ tə́

41Tā anī Moijə gə̄rā ɓē gə̄ mətá gidə bā Jurdḛ kə́ dām̄ kə́ gír ɓē tə́, 42kadə̄ i loo ɓɔ̄ɔ̄ rɔ̄ yā deē ń tɔ̄l̄ deē kə gō kem ndigə yānneé aĺ ō, kanjə̄ kimə̄n kemən tə́ kété ō ní. Ré ni a̰ȳ aw̄ ɓɔ̄ɔ̄ rɔ̄n kem nge kə́ kógə̄ḿ tə́ dandə́ tə́ anī a ajə. 43Ɓē ɓɔ̄ɔ̄ rɔ̄ gə̄ ní n toó: Deē yā Ruben gə̄ a ɓɔ̄ɔ̄n̄ rɔ̄də́ i Beser kem dəla loo kə́ mbalá tə́. Deē yā Gad gə̄ a ɓɔ̄ɔ̄n̄ rɔ̄də́ i Ramot, dɔ nang kə́ Galaad tə́. Deē yā Manase gə̄ a ɓɔ̄ɔ̄n̄ rɔ̄də́ i Golan dɔ nang kə́ Basan tə́.

Najə̄ kɔr̄ Moijə kə́ nge ko̰ jōó

(4—11)

44-45Dan ń ngán Israel gə̄ teēn̄ kɔ̄ɔ́ kem ɓē kə́ Ejiptə tə́ ní, Moijə adə̄də́ ndū najə̄ gə̄ yā Nə́ɓā. Ni-adə̄də́ ndū kə́ kun gə̄ ō, ndū najə̄ gə̄ ō, ɔjədə́ jī-bēl̄ loo rāā yá̰a̰ gə̄ ō. 46Dan ń noō tə́ ní nin̄ i gidə bā Jurdḛ kə́ dām̄ kə́ gír ɓē tə́, kum wól loo ń ra sɔɔ̄n̄ ta naā kə Bet Peor ní tə́, dɔ nang yā Sihon mban̄g yā Amor gə̄ tə́. Mban̄g Sihon ndi i Hesəbon. Banī Moijə nin̄ kə ngán Israel gə̄ tetənən̄ rɔ̄ɔ̄ kɔ̄ɔ́ ba taān̄ dɔ nang yān. 47Nin̄ taān̄ dɔ nang yā Og mban̄g kə́ Basan ō. Mban̄g kə́ jōó gə̄ ń toō o̰o̰n̄ ɓē i gidə bā Jurdḛ kə́ dām̄ kə́ dūn̄ ɓē tə́. Nin̄ i Amor gə̄. 48Adə̄ dɔ nang ń ḭḭ Aroer dɔ gɔ́sə man̄ Arnon tə́ bátə́ ugə̄ń mbal̄ Hermon ń a ɓārə́n̄ na i Sion tə́ ní, 49gō nang kə́ Araba ń un núsə́ wól bā Jurdḛ kə́ dām̄ kə́ gír ɓē tə́ no kem, teēń bā katə̄ tə́ nja mbal̄ Pisga tə́ ní, ngán Israel gə̄ taān̄ malang.

Currently Selected:

NDŪ NAJƏ̄ 4: SARDC

Highlight

Copy

Compare