NDŪ NAJƏ̄ 5
5
Ndū najə̄ kə́ kutə kógə̄ḿ gə̄
1Moijə ɓāŕ ngán Israel gə̄ malang ba ədadə́ na:
Israel gə̄, ōōī ndū najə̄ gə̄ ō, jī-bēl̄ loo rāā yá̰a̰ gə̄ ō ń m-ā m-ə́dásí ɓōólaā kadə̄ ōōī ní. Ī-ndóōī ō, ə̄ndāī kumsí gírí kadə̄ úniī gō ō. 2Kɔ́ɔ̄ɓē Nə́ɓā yājí əhɔ madə̄ naā sejí dɔ mbal̄ Horeb tə́. 3Əhɔ madə̄ naā i kə kaají gēé alé, ba i kə ngarā̰ kumjí jḭḭ̄ ń ɓōólaā jə-raī laā malang toō. 4Tasí a̰a̰ naā kə Kɔ́ɔ̄ɓēé n ɔrə̄ń najə̄ sesí dɔ mbalá kum hor tə́ ní. 5Dan ngeé ń noō tə́ ní m̄-rā i dɔ dáńsí sḭḭ̄ kə Kɔ́ɔ̄ɓēé tə́ n m-ə́dańsí najə̄ gə̄ ń a ɔr̄ sesí ní. Tɔdɔ̄ dan ń á̰a̰ī hor ní, ī-ɓōlíī adə̄ ālī dɔ mbalá alé. Ni- əda na:
6I mā n i Kɔ́ɔ̄ɓē Nə́ɓā yāí, nge kɔrī ɓəloó kɔ̄ɔ́ kem ɓē kə́ Ejiptə tə́ ní.
7Ā ī-ndɔ̄ȳ nə́ɓā kə́ rang alé, i mā ngóy n ā ī-ndɔ̄ȳm̄ ní.
8Ā údə ɓesə̄ kə́ to tītə̄ yá̰á̰ kə́rēý kə́ dɔ rā̰ tə́ aĺ ō, kə́ dɔ nang tə́ aĺ ō, kə́ kum man̄ tə́ gíŕ nángāá aĺ ō. 9Ā ɔ́sə noí nang tə́ nodə́ tə́ aĺ ō, ā ī-rāā kəla ādə̄də́ aĺ ō. Tɔdɔ̄ mā i Kɔ́ɔ̄ɓē Nə́ɓā yāí ō, mā i Nə́ɓā kə́ nge rāā jang ō#5.9 Nge rāā jang: Israel gə̄ rāān̄ rɔ̄də́ i dəyá̰ tə́ tām̄ yā Kɔ́ɔ̄ɓē tə́, adə̄ ré nin̄ ndɔ̄ȳn̄ ɓesə̄ gə̄ ń i nə́ɓā kə́ rang gə̄ ní anī, Nə́ɓā a rāā jang tām̄ yādə́ tə́.. Ré de kə́rēý mbātə́ najə̄ taḿ tə́ anī, m-ā m-ādə̄ yá̰á̰ kə́ tōr̄ a reē dɔ kɔ́ɔ̄ tə́ ō, dɔ ngánən gə̄ tə́ ō, dɔ ngán kaan gə̄ tə́ ō, dɔ ngán kaa gugūn gə̄ tə́ ō, dɔ ngán kaa dɔgən gə̄ tə́ ō. 10Banī de gə̄ ń tármə̄n̄ ō, rāān̄ yá̰a̰ gə̄ ń m-ə́dádə́ kadə̄ rāān̄ ō ní, m-ā m̄-rāā kem majə sedə́ ō, kə dūbə̄ gír kojə yādə́ gə̄ malang ń a reēn̄ ɓáý ní ō.
11Ā ī-ɓāŕ rīḿ kanjə̄ kumən alé, tɔdɔ̄ deē ń a ɓāŕ rīḿ kanjə̄ kumən ní, mā Kɔ́ɔ̄ɓē Nə́ɓā yāí m-ā m-ə́ya̰n karī alé.
12Ɔ̄r̄ kam̄ ndɔ̄ sabat ə̄ndā tayā tām̄ yā Kɔ́ɔ̄ɓē tə́ tītə̄ ń ədaīneé ní. 13Ā ī-rāā kəla yāí gə̄ malang ndɔ̄ mehḛ́, 14ba ndɔ̄ kə́ nge ko̰ sīrí i ndɔ̄ sabat tām̄ yā Kɔ́ɔ̄ɓē Nə́ɓā yāí tə́. Ndɔ̄ ń noō tə́ ḭ̄ ō, ngání gə̄ ō, ngé kəla yāí kə́ dəngam gə̄ ō, kə́ dəyá̰ gə̄ ō, man̄g yāí ō, kərō yāí ō, dā̰ kógə̄ḿ kə́ dan dā̰ yāí gə̄ tə́ ō, tə̄rā kə́ nge nam̄ ń ndi ɓēé looí ní ō, ā ī-rāāī kəla ndɔ̄ ń noō tə́ alé. Majə kadə̄ ngé kəla yāí kə́ dəngam gə̄ ō, kə́ dəyá̰ gə̄ ō, ɔrə̄n̄ koō tītə̄ yāí. 15Ɓəlo ń ī-rāā dɔ nang kə́ Ejiptə tə́ á Kɔ́ɔ̄ɓē Nə́ɓā yāí ɔrī kum tə́ kɔ̄ɔ́ kə tɔ́gə jīneé ō, kə jīn kə́ kəla kə̄ dɔɔ́ ō ní, ādə̄ dɔí ndígə̄nal alé. I tām̄ najə̄ ń noō tə́ n ni ədaīneé na kə ɔ̄r̄ koō ndɔ̄ sabat tə́ ní.
16Ī-rɔȳ bɔbí nin̄ kə kó̰ó̰í tītə̄ ń Kɔ́ɔ̄ɓē Nə́ɓā yāí ədaīneé ní, yā kadə̄ ī-ndiń kə kumií ta kaw̄ jóo ō, kadə̄ rɔ̄í nelīiń dɔ nang ń Kɔ́ɔ̄ɓē Nə́ɓā yāí adī tə́ ní ō.
17Ā ī-tɔ̄l̄ deē alé.
18Ā ī-sāāī naā loo kaya tə́ alé.
19Ā ī-ɓogə alé.
20Ā ī-sor̄ dɔ madí tə́ alé.
21Ī-lōō sāā ɓīī kə nə̄yá̰ madí. Ā ī-ndə̄ngā yá̰a̰ yān kógə̄ḿ alé. Ā ī-ndə̄ngā kújə yān aĺ ō, ndɔr̄ yān aĺ ō, nge kəla yān kə́ dəngam aĺ ō, kə́ dəyá̰ aĺ ō, man̄g yān aĺ ō, kərō yān aĺ ō.
22 Ndū najə̄ gə̄ ń toō Kɔ́ɔ̄ɓē ra i dɔ mbalá kum hor tə́ ō, dan kil̄ man̄ tə́ ō, kum loo kə́ risə til nding tə́ ō n ədańsí kə tɔ́gɔ́ ní. Əda najə̄ kə́ rang dɔ tə́ alé. Ndangdə́ i gidə bar mbal̄ gə̄ tə́ jōó n adə̄m̄ ní.
Moijə i nge kɔr̄ najə̄ kum gotə Nə́ɓā
23Dan ń sḭḭ̄ ōōī ndū deē ɔr̄ najə̄ sesí kum loo kə́ risə til nding tə́ ō, dɔ mbal̄ kə́ əɓa hor tə́ ō anī, ngār gə̄ kə́ dɔ gír ɓē yāsí gə̄ tə́ malang ō, kum kɔɔ̄ yāsí gə̄ ō, ndɔ́tə̄n̄ kə̄ rɔ̄ḿ tə́ ngɔr, 24ba ədamə̄n̄ najə̄ ń ə̄ndāī tadə́ tə́ ní, ədan̄ na:
Kɔ́ɔ̄ɓē Nə́ɓā yājí ɔjəjí kadə̄ ni i de kə́ bo ngá̰ý ō, ɔjəjí yá̰á̰ kə́ to kɔsə gɔn yān ō, adə̄ j-a̰a̰ kə kumjí ō, j-oō ndūn kum hor tə́ ō. Ɓōólaā ní jə-ger̄ kadə̄ Nə́ɓā asə kɔr̄ najə̄ kə de gēé ba kəya̰də́ kadə̄ ndin̄ kə kumdə́. 25Ba i tām̄ rí tə́ á kə hor kə́ bo ń toō o̰o̰jí kadə̄ j-oy kɔ̄ɔ́ ní? Ré jə-to i dan koō ndū Kɔ́ɔ̄ɓē Nə́ɓā yājí tə́ kə mbījí tītə̄ ń noō kə́ njɔ́ḿ gə̄ tə́ anī, j-a j-oy kɔ̄ɔ́. 26I de kə́ rá n oō ndū Nə́ɓā kə́ ndi kə kumneé loo kɔr̄ najə̄ tə́ kum hor tə́ tītə̄ yājí ba kɔ́ɔ̄ oy aĺ ní? 27Adə̄ ḭ̄ Moijə, ī-ndɔ́tə̄ kə̄ rɔ̄ Kɔ́ɔ̄ɓē Nə́ɓā yājí tə́, ōō najə̄ malang ń a ɔr̄ seí ní, ba ī-reē ə̄nījí gotə. Na j-a j-oō ō, j-a jə-rāā yá̰á̰ ń ni-əda ní ō. 28Najə̄ malang ń ɔ̄rī seḿ ní Kɔ́ɔ̄ɓē oō, adə̄ ni ədam̄ na:
Najə̄ ń ngán Israel gə̄ ədanī ní, m-ōō. Najə̄ yādə́ i gōtə́. 29Ré ran̄ dɔ míndə́də́ tə́ ō, ɓōlə́n̄ ndílə́ḿ adə̄ rāān̄ yá̰a̰ malang ń m-ə́dádə́ kadə̄ rāān̄ ní ō, kə ndɔ̄ gə̄ anī, nin̄ ō, ngáńdə́ gə̄ ō, ngán kaadə́ gə̄ ō ní rɔ̄də́ a nel̄də́ i ta kaw̄ kə̄ jóo. 30Āw̄ ə́dádə́ ādə̄ tél aw̄n̄ gogə́ kem kújə tandā yādə́ gə̄ tə́. 31Banī ḭ̄ ī-ndi gogə́ rɔ̄ḿ tə́ laā. M-ā m-ɔ́jiī gō míndə gə̄ ō, ndū najə̄ gə̄ ō, jī-bēl̄ loo rāā yá̰a̰ gə̄ ō malang. Ā ī-ndóōdə́ kadə̄ unən̄ gō dɔ nang ń m-ā m-ādə̄də́ kadə̄ taān̄ jī madə̄ ba̰ā̰də́ gə̄ tə́ ní.
32Yá̰á̰ ń Kɔ́ɔ̄ɓē Nə́ɓā yāsí ədasí ní, ə̄ndāī kumsí gírí ī-rāāī kə gōó kanjə̄ tɔ̄ɔ̄ geleé aláa ko̰ó̰. 33I róbə́ ń Kɔ́ɔ̄ɓē Nə́ɓā yāsí njar nosí tə́ ní n ā úniī kə ndɔ̄ gə̄ ní, yā kadə̄ ī-ndiīneé kə kumsí ō, rɔ̄sí nelə̄ńsí ō, ī-ndiīneé ta kaw̄ jóo dɔ nang ń ā ī-taāī tə́ ní ō.
Currently Selected:
NDŪ NAJƏ̄ 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
