NDŪ NAJƏ̄ 3
3
Israel gə̄ taān̄ ɓē ko̰o̰ yā mban̄g Og
1Gō tə́ anī jə-tūrī rɔ̄jí j-awī kumjí kə̄ Basan. Banī Og ń i mban̄g kə́ Basan ní, teē tə́nī tají kə deē yān gēé malang reē rɔ̄ɔńjí Edrey. 2Tā anī Kɔ́ɔ̄ɓē ədam̄ na:
Ī-lōō ɓōlə́n, tɔdɔ̄ ni ō, deē yān gə̄ malang ō, dɔ nang yān ō ní, i kə́ m-ə́ládə́ kem jīí tə́ kɔ̄ɔ́ ɓá. Yá̰á̰ ń ī-rāā kə Sihon, mban̄g yā Amor gə̄ ń ndi kem ɓē kə́ Hesəbon tə́ ní, ā ī-rāā seneé ō. 3Kɔ́ɔ̄ɓē yājí əla Og, mban̄g kə́ Basan, kə gír deē yān gēé malang kem jījí tə́ ɓáý to̰ adə̄ jə-tɔ̄līdə́ náḿ náḿ kanjə̄ kəya̰ deē kógə̄ḿ kadə̄ ndi kə kumneé. 4Gō tə́ anī jə-táāī ɓē yān gə̄ malang, ɓē yān kógə̄ḿ kə́ dum̄jí gətóo. Ɓē yān gə̄ malang ń jə-táāī ní i ɓē kutə mehḛ́. I ɓē gə̄ kə́ gō nang Argob tə́ malang ń mban̄g Og o̰o̰ ɓē dɔ tə́ ní. Argob i gō nang kə́ Basan tə́. 5Ɓē gə̄ ní rāān̄ ndogə̄ mbal̄ kə́ ngāl̄ ngá̰ý gə̄ gīrə̄n̄neé gidədə́ gə̄ ō, utə̄n̄ tadə́ gə̄ kə bápə gə̄ jōó jōó ba rákə̄n̄ adə̄ ngan̄g ō. Tá ngán ɓē kə́ kanjə̄ ndogə̄ bɔr gə̄ i ngá̰ý ɓáý to̰. 6Jə-bāāī dɔ ɓē gə̄ ń noō malang j-adī Kɔ́ɔ̄ɓē, tītə̄ ń jə-rāāīneé dɔ nang yā Sihon mban̄g kə́ Hesəbon tə́ ní. Jə-tɔ̄lī dəngam gə̄ ō, dəyá̰ gə̄ ō, ngán kə́ kemeé gə̄ ō, kɔ̄ɔ́ malang. 7Ba yá̰a̰ gə̄ ń j-ɔyiī tām̄ yājí tə́ ní i yá̰a̰ kul̄ ō, i yá̰a̰ kənge kə́ kem ɓē gə̄ ní tə́ ō.
Moijə nə̄ɓō nang kə́ Galaad
8Adə̄ ɓāl̄ ngeé ń noō tə́ ní, Amor kə́ jōó gə̄ ń ndin̄ mban̄g gidə bā Jurdḛ kə́ dām̄ kə́ gír ɓē tə́, dɔ dán man̄ Arnon tə́ kə mbal̄ Hermon ní, jə-táāī dɔ nang yādə́ gə̄. 9De kə́ Sidon gə̄ a ɓārə́n̄ mbal̄ Hermon na i Sirion. Ba Amor gə̄ a ɓārə́n̄ mbal̄ Hermon na i Senir. 10Jə-táāī ɓē kə́ dɔ mbalá gə̄ malang. Jə-táāī dɔ nang kə́ Galaad ō, kə́ Basan ō, j-awī bátə́ jə-taāī Salka ō, Edrey ō. Ɓē gə̄ kə́ Basan ń mban̄g Og o̰o̰ ɓē dɔ tə́ ní, jə-táāī kɔ̄ɔ́ malang ō. 11I Og ń i mban̄g kə́ Basan ní ngóy n teē ta yo tə́ dan Repay gə̄ tə́ ní. Ré deē aw̄ Raba ń i ɓē bo yā Amon gə̄ ní tə́ anī a a̰a̰ tə̄rá ton ɓáý. I tə̄rá gində̄. Ngālən asə kíl deē nja ndōhó ō, laan asə kíl deē nja sɔ́ ō.
12Adə̄ jə-taāī dɔ nang ní i malang. Núsə mbal̄ gə̄ kə́ Galaad kə ɓē gə̄ kə́ tū tə́ ń əla gír Aroer dɔ gɔ́sə man̄ Arnon tə́ ní, m-ādə̄ deē yā Ruben gə̄ ō, yā Gad gə̄ ō. 13Gotə dɔ nang kə́ Galaad ō, nang kə́ Basan malang ō ń i ɓē ko̰o̰ yā mban̄g Og ní, m-ādə̄ núsə de gə̄ kə́ gír ɓē yā Manase tə́. A ɓārə́n̄ gō nang kə́ Argob malang, naā tə́ kə dɔ nang kə́ Basan malang na i dɔ nang yā Repay gə̄. 14Yair ngōn̄ Manase taā nang kə́ Argob bátə́ ugə̄ń dɔ nin̄ dɔ nang yā Gesur gə̄ tə́ ō, Maaka gə̄ tə́ ō. Ni-əndā rī dɔ ngán ɓē gə̄ kə́ gō nang ngeé ń noō tə́ na i ngán ɓē gə̄ yā Yair. Adə̄ bátə́ ɓōólaā gə̄gē ní rī ní to gotoó noō ɓáý. 15Gō nang kə́ Galaad ní m-ādə̄ i Makir ngōn̄ Manase. 16Ba de gə̄ yā Ruben ō, Gad ō ní, i dɔ nang ń to dɔ dán Galaad tə́ kə man̄ Arnon ní n m-ādə̄də́ ní. Man̄ Arnon rāā rɔ̄n i dɔ nin̄ dɔ nang ní tə́ dām̄ mbɔ́r ɓē kə́ geleé tə́, ba man̄ Yabok rāā rɔ̄n i dɔ nin̄ dɔ nang ní tə́ kə dɔ nang yā Amon gēé. 17Dɔ nin̄ dɔ nang ní kə́ dām̄ kə́ no ɓē tə́ un i gō wól man̄ Jurdḛ, dɔ dán bā bo Kineret tə́ kə bā katə̄ kə́ Araba tə́ bátə́ ugə̄ń nja mbal̄ Pisga ń ra dām̄ kə́ gír ɓē tə́ ní.
18Tā anī m-ə́dásí najə̄ ń toō m-ə́da na:
Dan ń Kɔ́ɔ̄ɓē Nə́ɓā yāsí adə̄sí dɔ nang kə́ gidə bā Jurdḛ kə́ dām̄ kə́ gír ɓē tə́ oy kɔ̄ɔ́ ɓá ní, majə kadə̄ ngé rɔ̄ɔ̄ gə̄ malang kə́ dɔ dáńsí tə́ ɔyn̄ yá̰a̰ rɔ̄ɔ̄ yādə́ gə̄ teēn̄neé bā Jurdḛ, ba njə̄rān̄ kété no ngákó̰ó̰sí gə̄ ń i gotə ngán Israel gə̄ ní tə́. 19I nə̄yá̰sí gə̄ ō, ngáńsí gə̄ ō, yá̰a̰ kul̄ yāsí gə̄ ō ń m̄-ger̄ kadə̄ i ngá̰ý ní ō, ngóy n a na̰yn̄ gogə́ laā kem ɓē gə̄ ń m-ādə̄sí tə́ ní, 20bátə́ kadə̄ Kɔ́ɔ̄ɓē rāań kadə̄ ngákó̰ó̰sí gə̄ əngen̄neé loo kə́ yā ndi tū tə́ lɔm tītə̄ yāsí, dɔ nang ń Kɔ́ɔ̄ɓē Nə́ɓā yāsí adə̄də́ gidə bā Jurdḛ kə́ dām̄ kə́ nú tə́ ní. Pá tá sḭḭ̄ kógə̄ḿ kógə̄ḿ ā ī-téliī kə̄ ɓē yāsí gə̄ tə́, dɔ nang ń m-ādə̄sí tə́ ní ɓáý.
21Ba Jojue tā anī m-ə́dan na yá̰á̰ ń Kɔ́ɔ̄ɓē Nə́ɓā yāsí rāā kə mban̄g kə́ jōó gə̄ ń toō ní, nəkɔ́ Jojue na a̰a̰ kə kumneé. Kɔ́ɔ̄ɓē a rāā beé kə mban̄g gə̄ ń ī-teē bā Jurdḛ anī a ə́ngédə́ dɔ nang yādə́ gə̄ tə́ ní ō. 22Ní kə ī-ɓōlíīdə́ alé, tɔdɔ̄ i Kɔ́ɔ̄ɓē Nə́ɓā yāsí nəkɔ́ n a rɔ̄ɔ̄ tām̄ yāsí tə́ ní.
Moijə a ugə̄ nang kə́ Kanaan tə́ alé
23Tā anī m̄-rāā Kɔ́ɔ̄ɓē ɓɔ́ m-ə́da na:
24Kɔ́ɔ̄ɓē Nə́ɓā, ə́lá gír kɔjəm̄ mā nge kəla yāí kadə̄ ḭ̄ i de kə́ bo ō, tɔ́gə jīí to ō, kɔ̄ɔ́ ɓá. Nə́ɓā kógə̄ḿ kə́ dɔ rā̰ tə́ aké dɔ nang tə́, kə́ rāā yá̰a̰ tītə̄ yāí ō, kə́ tɔ́gən asə seí ō, ndi noó a? 25Ə́ya̰m̄ ādə̄ m̄-teē bā Jurdḛ, ādə̄ m-āw̄ m-á̰a̰ dɔ nang kə́ majə kə́ mbalá ń noō ō, mbal̄ kə́ Liban tə́ gə̄ ō. 26Banī Kɔ́ɔ̄ɓē rāā wōn̄g seḿ najə̄ yāsí tə́, adə̄ mbātə́ koō ndɔ̄ȳ yāḿ. Ni-ədam̄ na:
Asə beé. Ī-lōō kədam̄ najə̄ ń noō to̰. 27Āl̄ ta tél mbal̄ Pisga tə́, ba á̰a̰ loo kum kə̄ no ɓē tə́ ō, dām̄ mbɔ́r ɓē kə́ geleé tə́ ō, kə́ ko̰ó̰ tə́ ō, á̰a̰ loo kum kə̄ dūn̄ ɓē tə́ ō. Ī-teē kumií ngá̰ý á̰a̰ń loo, tɔdɔ̄ ā ī-teē bā Jurdḛ ń toō alé. 28Ɔ́jə Jojue yá̰a̰ gə̄ ń ī-ndigə kadə̄ rāā ní. Ī-rāā seneé ādə̄ əhɔ rɔ̄n tɔgə ō, ə́la go̰ kemən tə́ ādə̄ ra dəngam ō. Tɔdɔ̄ i ni n a əsō róbó kété no gír de gə̄ ń toō tə́ yā teē sedə́ bā Jurdḛ ō, i ni n a rāā kadə̄ a əngen̄ dɔ nang ń á̰a̰ā̰ toó ō ní.
29Loo ń noō tə́ jə-tél jə-ndiī wól loo ń ra sɔɔ̄n̄ ta naā kə ɓē kə́ Bet Peor tə́ ní.
Currently Selected:
NDŪ NAJƏ̄ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.