NDŪ NAJƏ̄ 30

Israel a tél yā reē rɔ̄ Kɔ́ɔ̄ɓē tə́

1Dan ń tɔ́r̄ ta gə̄ ō, ndɔ̄ĺ gə̄ ō ń m-ɔ́jiī najə̄n ní reē ugə̄n̄ dɔí tə́ malang anī, ā ī-gír̄ dɔ tə́ dan nápar de gə̄ malang ń Kɔ́ɔ̄ɓē Nə́ɓā yāí a aw̄ seí loodə́ ní. 2Ā ī-tél yā reē rɔ̄ Kɔ́ɔ̄ɓē Nə́ɓā yāí tə́ yā koō tan. Yá̰a̰ gə̄ ń ədaī kadə̄ ī-rāā á m-ɔ́jiī ɓōólaā ní, ḭ̄ ō, ngání gə̄ ō, ngán kaaí gə̄ ō, ā ī-rāāī kə gōó kə ngarā̰ kemsí malang ō, kə rɔ̄sí malang ō. 3Kɔ́ɔ̄ɓē Nə́ɓā yāí a tūr̄ gíŕ yá̰a̰ gə̄ ń a reēn̄ kə̄ dɔí tə́ ní kɔ̄ɔ́. Ni a rāā kem majə seí ō, a ɔysí kɔ̄ɔ́ dan gír de gə̄ malang ń ni tə̄ndā tḭ̄ḭ̄sí kə̄ dandə́ tə́ ní ō, yā reē sesí gogə́ ɓēé. 4Ká ré aw̄n̄ sesí bátə́ ugə̄n̄ sesí i ta ngóy dɔ nang tə́ gə̄gē anī, Kɔ́ɔ̄ɓē Nə́ɓā yāsí a aw̄ gōsí tə́ loo ní tə́ yā kɔysí reē sesí ɓēé. 5Ni a reē sesí dɔ nang yā kaasí gə̄ tə́. Ā ī-téliī yā taā dɔ nang ní ō, ni a a̰a̰ gōsí kadə̄ tɔȳ ka̰a̰ ń a̰a̰ gō kaasí gə̄ ní ō, a rāā kadə̄ kutəsí tɔȳ yādə́ ō. 6Kɔ́ɔ̄ɓē Nə́ɓā yāsí a ə́ja mɔtə kə́ dan wursí tə́ ō, kə́ dan wur ngáńsí gə̄ tə́ ō, ngán kaasí gə̄ tə́ ō, kadə̄ ā ī-táriī Kɔ́ɔ̄ɓē Nə́ɓā yāsí kə ngarā̰ kemsí malang ō, kə rɔ̄sí malang ō tá kadə̄ ī-ndiīneé kə kumsí. 7Yá̰á̰ kə́ tōr̄ gə̄ malang ń m-ə́dásí najə̄n ní, Kɔ́ɔ̄ɓē Nə́ɓā yāsí a reēń dɔ madə̄ ba̰ā̰sí gə̄ tə́ ō, dɔ ngé kim̄sí gə̄ tə́ ō, 8banī sḭḭ̄ ā ī-téliī yā koō tan gogə́ rang, adə̄ ā ī-rāāī gō míndə malang ń ədasí kadə̄ ī-rāāī á m-ɔ́jə́sí ɓōólaā ní. 9Kɔ́ɔ̄ɓē Nə́ɓā yāsí a adə̄sí rɔ̄nel̄ tū yá̰a̰ malang ń ā ī-rāāī tə́ ní, tɔdɔ̄ a adə̄sí ngán gə̄ ngá̰ý ō, a rāā kadə̄ yá̰a̰ kul̄ yāsí gə̄ ojən̄ naā ngá̰ý ō, a rāā kadə̄ dɔ nang yāsí teē kōō ngá̰ý ō. Tītə̄ ń ndi majə yā kaasí gə̄ nelə̄ń Kɔ́ɔ̄ɓē kété ní, yá̰á̰ ń a tél yā nelə̄n gogə́ rang ní i ndi majə yāsí sḭḭ̄ ō, 10tɔdɔ̄ ōōī ndū Kɔ́ɔ̄ɓē Nə́ɓā yāsí ō, ī-rāāī gō míndə malang ń ədasí kadə̄ ī-rāāī ní ō, ī-ngɔ̄mī ndū najə̄ yān gə̄ malang ń i kə́ ndang kem makətūbə̄ ndū najə̄ ń toō tə́ ní ō, ī-tél ī-reēī rɔ̄ Kɔ́ɔ̄ɓē Nə́ɓā yāsí tə́ kə ngarā̰ kemsí malang ō, kə rɔ̄sí malang ō.

Najə̄ yā Nə́ɓā i ngɔr rɔ̄ deē tə́

11Gō míndə ń m-ɔ́jiī ɓōólaā ní i yá̰á̰ kə́ ngan̄g ngá̰ý kə́ ásə ger̄ kum aĺ aĺ ō, kə́ sa̰y ngá̰ý kə́ kadə̄ ásə kugə̄ gō tə́ aĺ aĺ ō. 12To i dɔ rā̰ tə́ á deē a ədań na:

I náā n a aw̄ gō tə́ dɔ rā̰ tə́ yā reēń kadə̄ j-oō ba jə-rāā kə gōó aĺ ō. 13To i gidə bā bo tə́ á deē a ədań na:

I náā n a aw̄ gō tə́ gidə bā bo tə́ yā reēń kadə̄ j-oō ba jə-rāā kə gōó aĺ ō. 14Ndū najə̄ ní i rɔ̄í tə́ ngɔr. I taí tə́ ō, dan wurií tə́ ō, kadə̄ ī-rāań yá̰á̰ ń əda ní.

Gə̄rā kajə

15Á̰a̰ā̰, ɓōólaā m-ə̄ndā ndi kə kumuú nin̄ kə rɔ̄nelēé ō, yo nin̄ kə yá̰á̰ kə́ to kum kaȳ aĺ ō noí tə́. 16Ɓōólaā m-ə̄ndā dɔí tə́ kadə̄ ī-táŕ Kɔ́ɔ̄ɓē Nə́ɓā yāí ō, kadə̄ ún gō róbə yān gə̄ ō, kadə̄ ī-rāā gō míndə gə̄ ń ni ədaī ní ō, kadə̄ ī-ngɔ̄m̄ ndū najə̄ yān gə̄ ō, jī-bēl̄ loo rāā yá̰a̰ yān gə̄ ō, kadə̄ ī-ndiń kə kumií ō, ójiīneé naā ngá̰ý ō, kadə̄ Kɔ́ɔ̄ɓē Nə́ɓā yāí rāań majə seí kem ɓē ń ā āw̄ kə̄ tū tə́ yā taā tə́ ní ō. 17Ba ré ī-tūr̄ gidií kɔ̄ɔ́ tan tə́ ō, ōō tan aĺ ō, ə́ya̰ rɔ̄í ādə̄ aw̄n̄ seí adə̄ ɔ́sə noí nang tə́ no ɓesə̄ gə̄ tə́ ō, ī-rāā kəla ādə̄də́ ō anī, 18m-ə́daī gān̄g ɓōólaā ā ī-gətóo. Dɔ nang ń ā āw̄ yā taā gidə bā Jurdḛ kə́ dām̄ kə́ nú tə́ ní, ā ī-ndi tū tə́ dan i ngá̰ý alé.

19Ɓōólaā m-ún dɔ rā̰ ō, dɔ nang ō, kadə̄ nin̄ i ngé kəda najə̄ kə́ kum tə́ dɔí tə́. Yá̰á̰ ń m-ə̄ndā noí tə́ ní i ndi kə kumuú nin̄ kə yoó ō, i tɔ́r̄ ta nin̄ kə ndɔ̄ĺɔ́ ō. Ā ī-gə̄rā i ndi kə kumuú kadə̄ ī-ndiń kə kumií kə ngání gə̄ ō, ngán kaaí gə̄ ō. 20Ā ī-táŕ Kɔ́ɔ̄ɓē Nə́ɓā yāí ō, ōō tan ō, ī-tə́ya̰ gon tə́ ō. I beé n ā ī-ndiń kə kumií ɓāl̄ ngá̰ý dɔ nang ń Kɔ́ɔ̄ɓē ənī ndūn yā kadə̄ kaaí Abəraham ō, Isaak ō, Jakob ō tə́ ní.

Currently Selected:

NDŪ NAJƏ̄ 30: SARDC

Highlight

Copy

Compare