NDŪ NAJƏ̄ 29

Yá̰á̰ ń Nə́ɓā rāā tām̄ yā Israel gə̄ tə́ ní

1Moijə ɓāŕ ngán Israel gə̄ malang ba ədadə́ na:

Yá̰a̰ malang ń Kɔ́ɔ̄ɓē rāā kə mban̄g Parao̰ ō, kə ngé rāā kəla yān gə̄ ō, kə dɔ nang yān ō, ta kumsí tə́ kem ɓē kə́ Ejiptə tə́ ní, sḭḭ̄ kɔ́ gə̄ á̰a̰ī kə kumsí malang. 2Yá̰a̰ nāā kə́ ngan̄g gə̄ ń əngedə́ ní ō, yá̰a̰ gə̄ ń Nə́ɓā rāādə́ yā kɔjəń yá̰á̰ ní ō, yá̰á̰ kə́ yáā kə́ to ɓōĺ gə̄ ń ni rāādə́ ní ō, sḭḭ̄ á̰a̰ī kə kumsí. 3Ɓá tā ba bátə́ ɓōólaā gə̄gē ní, Kɔ́ɔ̄ɓē adə̄sí dan wur kə́ yā gerə̄ń yá̰a̰ ō, kum kə́ yā ka̰a̰ń loo ō, mbī kə́ yā koōń loo ō aĺ ɓáý. 4Ni-rāāsí adə̄ ī-njə̄rāī kem dəla loo tə́ ɓāl̄ kutə sɔ́, banī kūbə̄ kə́ rɔ̄sí tə́ ngísə aĺ ō, sākə̄rā kə́ njasí tə́ gán̄g aĺ ō. 5I mápa n ə́saī aĺ ō, i kasə nduú n ā̰yī aĺ ō, i kasə kə́ tām̄ gə̄ n ā̰yī ní aĺ ō. Adə̄ majə kadə̄ ī-gerī kadə̄ i Kɔ́ɔ̄ɓē n i Nə́ɓā yāsí ní. 6Dan ń jə-reē j-ugī laā ní, Sihon mban̄g kə́ Hesəbon nin̄ kə Og mban̄g kə́ Basan reē rɔ̄ɔ̄n̄jí, banī jə-tetiīdə́ rɔ̄ɔ̄. 7Jə-taāī dɔ nang yādə́ j-adī de kə́ gír ɓē yā Ruben tə́ gə̄ ō, Gad tə́ gə̄ ō, núsə de kə́ gír ɓē yā Manase tə́ gə̄ ō. 8Adə̄ ī-ngɔ̄mī najə̄ gə̄ ń Nə́ɓā əhɔń madə̄ naā ń toō sesí ní ō, ī-rāāī yá̰a̰ gə̄ ń ni-əda ní ō. Loo ń noō tə́ yá̰a̰ malang ń ā ī-rāāī ní a majə.

Madə̄ naā yā Nə́ɓā i yá̰a̰ kɔsə kum alé

9Ɓōólaā ī-raī ta kum Kɔ́ɔ̄ɓē Nə́ɓā yāsí tə́ malang kum naā tə́ kə ngār yāsí gə̄ ō, gír ɓē yāsí gə̄ ō, kum kɔɔ̄ yāsí gə̄ ō, ngé ndóō de gə̄ ndū najə̄ gə̄ ō, adə̄ i dəngam gə̄ malang kə́ Israel tə́. 10Ngáńsí gə̄ ō, nə̄yá̰sí gə̄ ō, tə̄rā kə́ ngé nam̄ gə̄ ń ndin̄ sesí yā sāā kīr̄ ō, kɔdə man̄ ō, kadə̄sí ní ran̄ laā ō. 11Ī-raī laā ɓōólaā i yā kəhɔ madə̄ naā kə́ kə kənī ndūú danaá kə Kɔ́ɔ̄ɓē Nə́ɓā yāsí. Ni-əhɔ madə̄ naā ní sesí ɓōólaā. 12I yā kadə̄ sḭḭ̄ ī-téliīneé deē yān gə̄ ō, ni téləń Nə́ɓā yāsí ō, tītə̄ ń ənīń míndən adə̄sí ní ō, ənīń ndūn adə̄ kaasí Abəraham ō, Isaak ō, Jakob ō ní. 13Madə̄ naā kə́ rāā kə kənī ndūú danaá ń toō m̄-rāā i sesí sḭḭ̄ ngóy alé, 14ba i kə deē ń ra sejí ɓōólaā ta kum Kɔ́ɔ̄ɓē Nə́ɓā yājí tə́ ní ō, kə deē ń i sejí ɓōólaā aĺ ɓáý ní ō.

15Sḭḭ̄ ī-gerī loo ndi ń jə-ndiī dɔ nang kə́ Ejiptə tə́ ní ō, loo mān̄ ń jə-mānī dan nápar de gə̄ ń ī-teēī dɔ nang yādə́ tə́ ní ō. 16Yá̰á̰ kə́ to yḛr kum gə̄ ō, ɓesə̄ kāgə̄ gə̄ ō, ɓesə̄ mbal̄ gə̄ ō, ɓesə̄ kə́ rāā kə gində̄ arjā̰a̰á̰ gə̄ ō, kə gində̄ lɔ́rɔ́ gə̄ ō ń nin̄ aw̄n̄neé ɓē yādə́ tə́ ní sḭḭ̄ á̰a̰ī. 17Beé ní ādə̄ de kə́ dəngam, aláa kə́ dəyá̰, aláa de kə́ kem ndogə̄ kə́ kógə̄ḿ tə́ gə̄, aláa de kə́ gír ɓē kógə̄ḿ tə́ gə̄ kə́ dansí tə́, tūrə̄n̄ gidədə́ kɔ̄ɔ́ ɓōólaā ta Kɔ́ɔ̄ɓē Nə́ɓā yājí tə́ ba aw̄ rāān̄ kəla adə̄n̄ ɓesə̄ gə̄ yā nápar de gə̄ ń noō alé. Ādə̄ deē kógə̄ḿ dansí tə́ tél to tītə̄ ngəra kāgə̄ kə́ a tɔ̄l̄ deē, aké kə́ katə̄ kárárá alé. 18Ré de kə́rēý oō najə̄ gə̄ ń túbən̄neé toō ba kɔ́ɔ̄ gír̄ kemən tə́ na Nə́ɓā na rāā majə seneé kɔ̄ɔ́ ɓá, adə̄ əda kə̄ kemən tə́ na:

M-ə́ngé yá̰a̰ malang tɔdɔ̄ i yá̰a̰ gə̄ ń kemḿ ndigə ní n m-ə́hɔ gōdə́ m̄-rāādə́ ní, tām̄ dɔ nang ń adə̄nən̄ man̄ kɔ̄ɔ́ ɓá ní kəndā man̄ rāān to̰ alé anī, 19Kɔ́ɔ̄ɓē a mā̰ȳ rɔ̄n dɔn tə́ alé. Wōn̄g a rāān seneé ngá̰ý ō, jang a rāān seneé ngá̰ý ō, adə̄ ni a əya̰n karī alé. A əndan kə yá̰á̰ kə́ tōr̄ gə̄ malang ń ndangən̄ najə̄ yādə́ kem makətūbə̄ ń toō tə́ ní ō, a rāā kadə̄ əga kem de gə̄ dɔn tə́ dɔ nang tə́ to̰ aĺ ō. 20Kɔ́ɔ̄ɓē a ɔrə̄n kɔ̄ɔ́ dan gír ɓē gə̄ kə́ Israel tə́ yā kəndān kə kérneé kadə̄ yá̰á̰ kə́ tōr̄ gə̄ malang ń ənīn̄ ndūdə́ dɔ tə́ loo kəhɔ madə̄ naā ń ndangən̄ najə̄n kem makətūbə̄ ndū najə̄ ń toō tə́ ní rāān.

Yá̰á̰ kə́ majaĺ gə̄ ń Kɔ́ɔ̄ɓē ɔjə ní a reēn̄

21Najə̄ ń ngáńsí gə̄ ń a utə̄n̄ gōsí ní ō, tə̄rā gə̄ ń a ḭḭn̄ dɔ ɓē kə́ sa̰y gə̄ tə́ ní ō, a ədan̄ loo ń a a̰a̰n̄ ɓē yāsí kə́ nujə sák sák kɔ̄ɔ́ ń toō ō, yá̰á̰ kə́ majaĺ gə̄ ń Kɔ́ɔ̄ɓē reēń dɔ tə́ ō ní n toó: 22Dɔ nang yādə́ i bursu#29.22 Bursu: Á̰a̰ī Tkg 19.24 ō, katə̄ ō, hor ō malang. Deē dubə̄ yá̰a̰ tū tə́ aĺ ō, yá̰a̰ əɓa tū tə́ aĺ ō, mu əɓa tū tə́ aĺ ō, tītə̄ kə́ Sodom ō, Gomor ō, Adəma ō, Seboim ō, ń wōn̄g rāā Kɔ́ɔ̄ɓē á nujəń kɔ̄ɔ́ malang ní.

23Nápar de gə̄ malang a dəjen̄ najə̄, a ədan̄ na:

Kɔ́ɔ̄ɓē rāā kə ɓē ń toō yá̰á̰ kə́ beé i tām̄ rí tə́? I tām̄ rí tə́ á wōn̄g rāān ngá̰ý dɔ tə́ beé? 24Anī a tél a ədan̄də́ na:

I tām̄ nin̄ gāngə̄n̄ madə̄ naā ń Kɔ́ɔ̄ɓē Nə́ɓā yā kaadə́ gə̄ rāā sedə́ a teēń sedə́ kɔ̄ɔ́ dɔ nang kə́ Ejiptə tə́ ní. 25Nin̄ aw̄ rāān̄ kəla adə̄n̄ nə́ɓā kə́ rang gə̄ ń i ɓesə̄ gə̄ ní ō, ɔsən̄ nodə́ nang tə́ nodə́ tə́ ō, ɓesə̄ gə̄ ń i nə́ɓā gə̄ kə́ nin̄ gerə̄n̄də́ aĺ ō, Kɔ́ɔ̄ɓē adə̄də́ aĺ ō ní. 26I yá̰á̰ ń noō n wōn̄g rāań Kɔ́ɔ̄ɓē adə̄ reēń kə yá̰á̰ kə́ majaĺ gə̄ malang ń ndangən̄ kem makətūbūú ní dɔ ɓē ń toō tə́ ní. 27Kɔ́ɔ̄ɓē ɔr̄də́ dɔ nang yādə́ tə́ kɔ̄ɔ́ kə wōn̄g kə́ to ɓōĺ ngá̰ý, ba ənīdə́ dɔ nang kə́ rang tə́ tītə̄ ń á̰a̰īń ɓōólaā ní.

28Yá̰a̰ gə̄ ń ton̄ loo mundə̄ tə́ ní, i Kɔ́ɔ̄ɓē Nə́ɓā yājí ngóy n i nge ger̄də́ ní. Banī yá̰a̰ gə̄ ń teēn̄ kumjí dɔ tə́ ní, i tām̄ yājí tə́ ō, ngáńjí gə̄ tə́ ō, ngán kaají gə̄ tə́ ō, ngándáńg. Yá̰a̰ gə̄ ní i yá̰á̰ kə́ yā rāā gə̄ ń ndū najə̄ yā Nə́ɓā əda kadə̄ jə-rāāī ní.

Currently Selected:

NDŪ NAJƏ̄ 29: SARDC

Highlight

Copy

Compare