NDŪ NAJƏ̄ 31
31
Ta tɔl ta najə̄ yā Moijə ō, yon ō
Jojue a un gotə Moijə
1Moijə əda ngán Israel gə̄ malang na:
2Ngɔlaā ní ɓālə̄ḿ i ɓú kə kutə jōó kɔ̄ɔ́, adə̄ m-ásə kɔr nosí to̰ alé. Tá ɓáý to̰ ní Kɔ́ɔ̄ɓē ədam̄ na m-ā m̄-teē bā Jurdḛ ń toō aĺ ō. 3Adə̄ i Kɔ́ɔ̄ɓē Nə́ɓā yāí nəkɔ́ n a mān̄ kété noí tə́ ní. I ni n a nujə nápar de gə̄ ń ndin̄ gidə bā Jurdḛ kə́ dām̄ kə́ nú tə́ ní kɔ̄ɔ́ tá ā ásəń taā dɔ nang yādə́ ní. Ba tītə̄ ń Kɔ́ɔ̄ɓē ədań ní, nge njə̄rā kété noí tə́ i Jojue. 4Kɔ́ɔ̄ɓē a nujə nápar de gə̄ ń noō tītə̄ ń nujəń mban̄g yā Amor gə̄ ń i Sihon nin̄ kə Og ní ō, tītə̄ ń nujəń ɓē yādə́ sák sák kɔ̄ɔ́ ní ō. 5Kɔ́ɔ̄ɓē a əladə́ kem jīí tə́, ba i gō míndə malang ń m-ə́daī kadə̄ ī-rāā ní n ā ī-rāā sedə́ ní. 6Ə́hɔ rɔ̄í tɔgə ō, ī-ra dəngam ō, ī-lōō kadə̄ ɓōĺ rāāī ō, ī-lōō ndebə ta kumdə́ tə́ ō, tɔdɔ̄ Kɔ́ɔ̄ɓē Nə́ɓā yāí a njə̄rā seí naā tə́. Ni a mbātíī aĺ ō, a əya̰ī kɔ̄ɔ́ aĺ ō.
7Gō tə́ anī Moijə ɓāŕ Jojue ba ədan ta kum ngán Israel gə̄ tə́ malang na:
Ə́hɔ rɔ̄í tɔgə ō, ī-ra dəngam ō, tɔdɔ̄ i ḭ̄ n ā āw̄ kə ngán Israel gēé dɔ nang ń Kɔ́ɔ̄ɓē ənī ndūn adə̄ kaadə́ gə̄ yā kadə̄də́ ní tə́. I ḭ̄ n ā ī-nə̄ɓōdə́ dɔ nang ní ní. 8Kɔ́ɔ̄ɓē a njə̄rā kété noí tə́. Ni i seí naā tə́. A mbātíī aĺ ō, a əya̰ī kɔ̄ɔ́ aĺ ō. Ní, ī-lōō ɓōĺ ō, ī-lōō kadə̄ tɔ́gí ur̄ wak ō.
A tə́dan̄ ndū najə̄ ɓāl̄ kə́ nge ko̰ sīrí tə́
9Moijə ndang ndū najə̄ yā Nə́ɓā ní, ba adə̄ ngán Lebi kə́ ngé tun̄ yá̰a̰ gə̄ ń i ngé kətō sandúkə madə̄ naā yā Kɔ́ɔ̄ɓē gə̄ ní ō, kum kɔɔ̄ gə̄ malang yā ngán Israel gə̄ ō. 10-11Gō tə́ anī ni ədadə́ na:
Kə dɔ ɓāl̄ kə́ nge ko̰ sīrí gə̄ malang ń i ɓāl̄ kə́ yā kəya̰ń gō kə̄rā gə̄ kɔ̄ɔ́ ní, ā ī-tə́daī ndū najə̄ ń toō ndɔ̄ rāā nāā kújə́ kámbə gə̄ tə́. Ā úniī ndūsí kə̄ dɔɔ́ yā tə́dań kadə̄ ngán Israel gə̄ malang ń reē ran̄ no Kɔ́ɔ̄ɓē Nə́ɓā tə́, loo ń ni gə̄rā tə́ ní kadə̄ oōn̄. 12Gír de gə̄ malang a kánə̄n̄ naā, dəngam gə̄gē, dəyá̰ gə̄gē, ngán gə̄gē, tə̄rā kə́ nge nam̄ ń ndi ɓēé looí ní gə̄gē kadə̄ oōn̄ ndū najə̄ ń a tə́dan̄ ní, yā ndóoń loo ɓōĺ Ndíĺ Kɔ́ɔ̄ɓē Nə́ɓā ō, yā rāań yá̰a̰ malang ń ndū najə̄ əda ní ō. 13Ngán gə̄ ń gerə̄n̄ aĺ ɓáý ní a oōn̄ ō, yā kadə̄ ndóōn̄neé loo ɓōĺ Ndíĺ Kɔ́ɔ̄ɓē Nə́ɓā yāí kə dɔ ndɔ̄ gə̄ malang ń ā ī-ndiń kə kumií dɔ nang ń ā ī-teē bā Jurdḛ yā kaw̄ taā tə́ ní.
Israel gə̄ a ran̄ dɔ ndūdə́ tə́ alé
14Kɔ́ɔ̄ɓē əda Moijə na:
Ndɔ̄ ń kadə̄ óyń ní a ugə̄ ngɔr. Ní ī-ɓāŕ Jojue ba āwī kem kújə kənge naā tə́ ādə̄ m-ɔ́jən yá̰á̰ kə́ yā rāā gə̄.
Adə̄ Moijə nin̄ kə Jojue aw̄n̄ kem kújə kənge naā tə́. 15Kɔ́ɔ̄ɓē ɔjə rɔ̄n kə̄ ndágá dan kil̄ man̄ kə́ ra kə ngālāá ɓururu tə́. Kil̄ man̄ ní ra i ta kújə kənge naā tə́. 16Kɔ́ɔ̄ɓē əda Moijə na:
Ā óy yā kaw̄ gō kaaí gə̄ tə́, ba gír de gə̄ ń toō a ḭḭn̄ gotií tə́ yā rāā ɓesə̄ gə̄ ń i nə́ɓā yā tə̄rā gə̄ ń ndin̄ dɔ nang ń nin̄ a aw̄n̄ kə̄ tū tə́ ní. Nin̄ a əya̰mə̄n̄, adə̄ a gāngə̄n̄ madə̄ naā ń m-ə́hɔ sedə́ ní kɔ̄ɔ́. 17Ndɔ̄ ń noō tə́ wōn̄g a rāām̄ sedə́ ngá̰ý, adə̄ m-ā m-ə́yá̰də́ kɔ̄ɔ́ ō, m-ā m̄-tūr̄ gidəḿ tadə́ tə́ kɔ̄ɔ́ kadə̄ nin̄ a a̰a̰n̄ ta kumḿ aĺ ō. Loo ń noō tə́ ngé ba̰ā̰də́ gə̄ a əsan̄də́ ō, yá̰á̰ kə́ to kum kaȳ aĺ ngá̰ý gə̄, kə wur kɔl kə́ ngá̰ý gə̄ a rāān̄də́ ō. Adə̄ ndɔ̄ ń noō tə́ nin̄ a ədan̄ na:
Yá̰á̰ kə́ to kum kaȳ aĺ gə̄ ń toō rāān̄jí i tām̄ Nə́ɓā yājí ń gətóo dɔ dáńjí tə́ ní aĺ a? 18Banī ndɔ̄ ń noō tə́ m-ā m̄-na̰y kə̄ loo tūr̄ gidəḿ tadə́ tə́ kɔ̄ɔ́ ɓáý najə̄ yá̰á̰ kə́ majaĺ ń nin̄ rāān á i rāā ɓesə̄ gə̄ ní tə́. 19Ngɔlaā ní ī-ndangiī kum najə̄ gə̄ kə́ tū pā ń toō tə́ tām̄ yāsí tə́. Ḭ̄ Moijə, ā ī-ndóō ngán Israel gə̄. Ā ə̄ndā kumií gírí kadə̄ ndóō gerə̄n̄, kadə̄ pā ń toō tél najə̄ kə́ kum tə́ yāḿ kə̄ no ngán Israel gə̄ tə́. 20Tɔdɔ̄ m-ā m-āw̄ sedə́ dɔ nang ń mba ō, yibə̄ tejə ō, i ngá̰ý tū tə́ á m-ə̄nī ndūḿ m-ādə̄ kaadə́ gə̄ ní tə́. A əsan̄ yá̰a̰ kadə̄ asədə́ ō, a ndin̄ majə ō. Gō tə́ anī a tūrə̄n̄ rɔ̄də́ kə̄ rɔ̄ ɓesə̄ gə̄ tə́ yā rāā kəla kadə̄də́. Ba a kídə̄mə̄n̄ ō, a gāngə̄n̄ madə̄ naā ń m-ə́hɔ sedə́ ní kɔ̄ɔ́ ō. 21Loo ń noō tə́ yá̰á̰ kə́ to kum kaȳ aĺ ngá̰ý gə̄ ō, wur kɔl kə́ ngá̰ý gə̄ ō, a rāān̄də́. Banī pā ń toō a tél najə̄ kə́ kum tə́ kə́ kəda dɔdə́ tə́. Tɔdɔ̄ dɔ ngáńdə́ gə̄ ō, ngán kaadə́ gə̄ ō, a ndígə̄nal pā ń toō alé. Yá̰á̰ ń ndi a nɔ́mə̄n̄ kemdə́ tə́ ɓōólaā ní, m̄-ger̄ majə kɔ̄ɔ́ pá tá kadə̄ m-āw̄ sedə́ dɔ nang ń m-ə̄nī ndūḿ yā kadə̄də́ tə́ ní.
22Moijə ndang kum najə̄ gə̄ kə́ tū pā ní tə́, ba ndóō ngán Israel gə̄.
23Gō tə́ anī Kɔ́ɔ̄ɓē əda Jojue ngōn̄ Nun na:
Ə́hɔ rɔ̄í tɔgə ō, ī-ra dəngam ō, tɔdɔ̄ i ḭ̄ n ā āw̄ kə ngán Israel gēé dɔ nang ń m-ə̄nī ndūḿ yā kadə̄də́ tə́ ní. Ba mā i naā tə́ seí.
24Dan ń Moijə ndang ndū najə̄ yā Nə́ɓā kem makətūbūú malang oy anī, 25əda ngán Lebi gə̄ kə́ ngé kətō sandúkə madə̄ naā yā Kɔ́ɔ̄ɓē na:
26Ī-taāī makətūbə̄ ndū najə̄ yā Nə́ɓā ń toō ə̄nīī kadə sandúkə madə̄ naā yā Kɔ́ɔ̄ɓē Nə́ɓā yāsí tə́. A to i loo ń noō tə́ kadə̄ rāā rɔ̄n i yá̰á̰ kə́ kum tə́ kə̄ no ngán Israel gə̄ tə́. 27Tɔdɔ̄ m̄-ger̄ mbātə́ najə̄ yādə́ ō, dɔ ngan̄g yādə́ ō. Dan ń m̄-ndi kə kumḿ dandə́ tə́ ɓáý á mbātə́n̄ najə̄ ta Kɔ́ɔ̄ɓē tə́ toō ní, ré m-óy kɔ̄ɔ́ anī a rāān̄ kə́ kadə̄ mān̄ loo ń noō. 28Kum kɔɔ̄ gə̄ kə́ dɔ gír ɓē yāsí gə̄ tə́ ō, ngé ndóō de gə̄ ndū najə̄ gə̄ ō ní, ī-reēī sedə́ rɔ̄ḿ tə́ malang. Dɔ rā̰ ō, dɔ nang ō, i kə́ kum tə́ yāḿ gə̄ kə̄ nodə́ tə́, kadə̄ m̄-tə́dań kum pā ń Nə́ɓā adə̄m̄ ní kadə̄ oōn̄. 29Tɔdɔ̄ m̄-ger̄ kadə̄ ré m-óy kɔ̄ɔ́ anī, ngán Israel gə̄ a rāān̄ yá̰a̰ majaĺ ō, a əya̰n̄ róbə́ ń m-ɔ́jə́də́ ní kɔ̄ɔ́ ō. Ta tɔ̄l̄ ta anī yá̰á̰ kə́ to kum kaȳ aĺ a reē dɔdə́ tə́, tām̄ yá̰á̰ kə́ majaĺ ń rāān̄ adə̄ rɔ̄ Kɔ́ɔ̄ɓē nelə̄n aĺ ō, wōn̄g rāān ō ní tə́.
Pā yā Moijə
30Loo ń noō tə́ Moijə tə́da kum pā ń toō ta mbī ngé kán̄ naā gə̄ malang yā ngán Israel gə̄ tə́, pā ní n toó:
Currently Selected:
NDŪ NAJƏ̄ 31: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
