NDŪ NAJƏ̄ 28
28
Yá̰a̰ gə̄ kə́ a reēn̄ kə rɔ̄nelēé
1-2Ré ōō ta Kɔ́ɔ̄ɓē Nə́ɓā yāí rɔ̄kum, adə̄ gō míndə gə̄ ń m-ə́daī kadə̄ ī-rāā á m-ɔ́jiī ɓōólaā ní ə̄ndā kumií gīrí malang ī-rāā anī, ni a rāā kadə̄ ḭ̄ i de kə́ kété no nápar de gə̄ malang ń əndādə́ dɔ nang tə́ ní. Yá̰á̰ kə́ majə gə̄ ń ni a rāā seí ní n toó:
3Tɔ́r̄ ta a reē dɔí tə́ kem ɓēé ō, a reē dɔí tə́ bembeé ō. 4Tɔ́r̄ ta a reē dɔ ngán kemií gə̄ tə́ ō, dɔ kōō yāí gə̄ tə́ ō, dɔ yá̰a̰ kul̄ yāí gə̄ tə́ ō, dɔ kó̰o̰ man̄g yāí gə̄ tə́ ō, dɔ kó̰o̰ batə̄ yāí gə̄ tə́ ō, dɔ kó̰o̰ bə̄yā̰ yāí gə̄ tə́ ō. 5Tɔ́r̄ ta a reē dɔ jáng yāí tə́ ō, dɔ yá̰a̰ ɓōkə́ ndujə̄ yāí tə́ ō. 6Tɔ́r̄ ta a reē dɔí tə́ ta kawí tə́ ō, ta télí tə́ ō.
7Ré madə̄ ba̰ā̰í gə̄ a ənīnī rɔ̄ɔ̄ anī, Kɔ́ɔ̄ɓē a tetədə́ rɔ̄ɔ̄ yā kadī. Ré unən̄ i róbə́ kə́ kógə̄ḿ beē n reēn̄neé yā rɔ̄ɔ̄ī anī, a télən̄ yā ka̰ȳ naā noí tə́ i kə ta róbə́ kə́ rang gēé gír sīrí. 8Kɔ́ɔ̄ɓē Nə́ɓā yāí a ngɔ̄m̄ yá̰a̰ malang ń ī-kán̄ nja kə̄ kem mō̰ȳ yāí gə̄ tə́ ní ō, kəla malang ń ā ə́lá gír rāā ní, a rāādə́ kadə̄ teēī yá̰á̰ tə́ ō. Ni a rāā majə seí kem ɓē ń adī tə́ ní.
9Dan ń ī-rāā gō míndə gə̄ ń Kɔ́ɔ̄ɓē Nə́ɓā yāí əda na kə ī-rāā ní ō, ún gō róbə yān gə̄ ō anī, ni a rāāī kadə̄ ī-tél gír de gə̄ kə́ tām̄ yān tə́, tītə̄ ń ənīń ndūn adī ní. 10Gír de kə́ rang gə̄ malang kə́ dɔ nang tə́ a a̰a̰n̄ kadə̄ ɓāŕnī i kə rī Kɔ́ɔ̄ɓēé anī a ɓōĺnī. 11Kɔ́ɔ̄ɓē Nə́ɓā yāí a rāā kadə̄ rɔ̄í nelī dɔ nang ń ənī ndūn adə̄ kaaí gə̄ yā kadī tə́ ní. Tɔdɔ̄ ni a adī ngán gə̄ ngá̰ý ō, a rāā kadə̄ yá̰a̰ kul̄ yāí gə̄ ojən̄ naā ngá̰ý ō, kadə̄ dɔ nang yāí a teē kōō ngá̰ý ō. 12Kɔ́ɔ̄ɓē a teē ta man̄ yān kə́ majə kə́ dɔ rā̰ tə́ yā kadī, kadə̄ edə dɔ nang yāí tə́ kə dɔ nāāneé, kadə̄ kəla malang ń ī-rāā ní majə. Nápar de gə̄ ngá̰ý a tə̄nān̄ yá̰a̰ jīí tə́, banī ḭ̄ ā ī-tə̄nā yá̰a̰ alé. 13Kɔ́ɔ̄ɓē a əndāī i kété ba i gogə́ alé. Ngáńdáńg ā āw̄ i kum kə̄ dɔɔ́ ba ā ī-tél kə̄ nang tə́ alé, tɔdɔ̄ ī-rāā gō míndə gə̄ ń Kɔ́ɔ̄ɓē Nə́ɓā yāí əda na kə ī-rāā á m-ə́daī ɓōólaā na kə ī-ngɔ̄m̄ ō, kə ī-rāā ō ní. 14Ni a rāā majə seí tɔdɔ̄ ī-tɔ̄ɔ̄ geleé aĺ ō, ko̰ó̰ aĺ ō, dɔ róbə gə̄ malang ń m-ɔ́jə́sí ɓōólaā tə́ ní ō, ī-ndɔ̄ȳ ɓesə̄ gə̄ ń i nə́ɓā kə́ rang gə̄ ní aĺ ō.
Yá̰a̰ gə̄ kə́ a reēn̄ kə yá̰á̰ kə́ to kum kaȳ aĺ
15Ba ré ōō ta Kɔ́ɔ̄ɓē Nə́ɓā yāí alé, ré gō míndə gə̄ ō, ndū najə̄ gə̄ ō ń ni mērə̄m̄ kɔjiī á m-ɔ́jiī ɓōólaā ní, ré ə̄ndā kumií gīrí malang ī-rāā alé anī, ndɔ̄ĺ gə̄ ń a reēn̄ dɔí tə́ ō, a rāānī ō ní n toó:
16Ndɔ̄ĺ a reē dɔí tə́ ɓēé ō, a reē dɔí tə́ bembeé ō. 17Ndɔ̄ĺ a reē dɔ jáng yāí tə́ ō, dɔ yá̰a̰ ɓōkə́ ndujə̄ yāí tə́ ō. 18Ndɔ̄ĺ a reē dɔ ngání gə̄ tə́ ō, dɔ kōō yāí tə́ ō, dɔ kó̰o̰ man̄g yāí gə̄ tə́ ō, kó̰o̰ batə̄ yāí gə̄ tə́ ō, kó̰o̰ bə̄yā̰ yāí gə̄ tə́ ō. 19Ndɔ̄ĺ a reē dɔí tə́ ta kawí ō, ta télí ō.
20Kɔ́ɔ̄ɓē a əla kə rɔ̄ tō ndoó ō, ɓōĺ kə́ ngá̰ý ō, yá̰á̰ kə́ to ndíl ka̰ȳ gə̄ ō, dɔí tə́ tū kəla rāāí gə̄ tə́ malang, bátə́ kadə̄ ī-təgāń kɔ̄ɔ́ ō, bátə́ kadə̄ ī-gətóoń kɔ̄ɔ́ gidə kógə̄ḿ tām̄ yá̰á̰ kə́ majaĺ ń ī-rāā á i kəya̰n kɔ̄ɔ́ ní tə́ ō. 21Kɔ́ɔ̄ɓē a ənī mo̰y ngāl̄bɔ̄gīí dɔí tə́ dɔ nang ń ā āw̄ kə̄ taā tə́ ní, kadə̄ tɔ̄lī bátə́ kadə̄ ī-təgāń kɔ̄ɔ́ malang. 22Ni a rāāī kadə̄ ōn̄g ō, a ənī mo̰y gajə ō, rɔ̄ kagə̄ ō dɔí tə́. A rāā kadə̄ rɔ̄í a təngā tólóló ō, a rāā kadə̄ man̄ a əhɔ laa ō, a ənī mo̰y dɔ kōō gə̄ tə́ kadə̄ kərēn̄ ngéŕ ngéŕ ō, kadə̄ kumdə́ teē aĺ ō. Yá̰á̰ kə́ tōr̄ gə̄ ń noō a rāānī bátə́ kadə̄ ī-gətóoń kɔ̄ɔ́. 23No rā̰ kə́ dɔí tə́ a ngan̄g tītə̄ gində̄ nə̄ngá kasə beé ō, dɔ nang kə́ gír njaí tə́ a ngan̄g tītə̄ gində̄ beé ō. 24I man̄ n Kɔ́ɔ̄ɓē a rāā kadə̄ edə dɔ nang yāí tə́ ní alé, ba i bū ō, bumbə́ru ō. A dəsen̄ dɔí tə́ tun tun bátə́ kadə̄ ī-gətóoń kɔ̄ɔ́. 25Kɔ́ɔ̄ɓē a rāā kadə̄ madə̄ ba̰ā̰í gə̄ a tetənī rɔ̄ɔ̄. Ré ún i róbə́ kə́ kógə̄ḿ beē n āw̄ ə̄nińdə́ rɔ̄ɔ̄ anī, ā ī-tél yā ka̰ȳ nodə́ tə́ i kə ta róbə́ kə́ rang gēé gír sīrí. Ā ī-téĺ yá̰á̰ kə́ əga deē kə̄ngā sāā tə́ tām̄ yā ɓē ko̰o̰ gə̄ malang kə́ dɔ nang tə́ ń a a̰a̰n̄ yá̰á̰ ń a rāāī ní tə́. 26I yel̄ kə́ dɔɔ́ gə̄, kə dā̰ kə́ bembeé gə̄ n a əsan̄ nīní ní. De kə́ yā tə̄ɓādə́ dɔ tə́ a gətóo.
27Kɔ́ɔ̄ɓē a rāā kadə̄ ngaw ń a əɓa de kə́ Ejiptə gə̄ ní əɓaī ō, a rāā kadə̄ yá̰a̰ agī ō, kadə̄ kur əsaī ō, kadə̄ rɔ̄ ndo̰ō̰ kə́ dan gān̄g aĺ əsō dɔí tə́ ō. 28Ni a rāā kadə̄ ā̰ȳ kɔ̄r̄ ō, kumií a̰a̰ loo aĺ ō, dɔí ndi gōtə́ aĺ ō. 29A ī-mám̄ loo dan kadə ndaá tītə̄ nge kum tɔ̄ɔ̄ ō, yá̰á̰ kə́ a teēī do tə́ a gətóo ō. De gə̄ a əsanī i mbéé ngándáńg ō, a taān̄ yá̰a̰ yāí gə̄ jīí tə́ kɔ̄ɔ́ ō, de kə́ yā dḭḭ̄ī a gətóo ō.
30Dəyá̰ ń ā ə́hɔ gātə̄n ní i de kə́ rang n a ɓīī seneé. Kújə́ ń ā ī-rāā ní, ā ī-ndi kemeé alé. Ā ī-ndɔr̄ kāgə̄ nduú, ba kanə̄n kə́ ta kəga dɔ gə̄gē ā ə́ja alé. 31A tɔ̄lə̄n̄ man̄g yāí ta kumií tə́ ba ā ə́sa dā̰n alé. A əhɔn̄ kərō yāí ta kumií tə́ yā kaw̄ń, ba a télən̄neé yā kadī gogə́ to̰ alé. Madə̄ ba̰ā̰í gə̄ a əhɔn̄ batə̄ yāí gə̄, ba de kə́ yā dḭḭ̄ī a gətóo. 32Ngání kə́ dəngam gə̄ ō, kə́ dəyá̰ gə̄ ō a aw̄n̄ ɓəloó ɓē gír de kə́ rang gēé ta kumií tə́. A ɔr loo gó̰ō̰ ta róbə́də́ tə́ dəloí bátə́ kadə̄ mbang udəń. Ba ḭ̄ ā ásə rāā yá̰á̰ kógə̄ḿ alé. 33Gír de gə̄ kə́ ī-ger̄də́ aĺ gə̄ a əsan̄ kōō yāí, kə yá̰a̰ malang ń ī-rāā á teē ní. Ngáńdáńg de gə̄ a əsanī i mbée ō, a rāānī majaĺ ō. 34Yá̰a̰ gə̄ ń a rāān̄ yá̰a̰ ta kumií tə́ á á̰a̰ kə ndɔ̄ gə̄ ní, ta tɔ̄l̄ ta anī a rāānī kadə̄ kɔ̄r̄ rāāī.
35Kɔ́ɔ̄ɓē a rāā kadə̄ do móy-seí əla gír kəsaī kejií tə́ ō, ɓúrí tə́ ō, pá tá tɔ̄ɔ̄ kə̄ loo gə̄ tə́ rɔ̄í tə́. A ḭḭ jam dɔí tə́ bátə́ da njaí tə́. 36Kɔ́ɔ̄ɓē a əlaī, ḭ̄ ō, mban̄g yāí ń ā ə̄ndā dɔí tə́ ní ō, jī nápar de gə̄ kə́ ḭ̄ gə̄gē, bɔbí gə̄gē ī-gerīdə́ aĺ tə́, kadə̄ ī-rāā kəla adə̄ ɓesə̄ kāgə̄ gə̄ kə ɓesə̄ mbal̄ gə̄ kem ɓē yādə́ tə́. 37Gír de gə̄ malang ń Kɔ́ɔ̄ɓē Nə́ɓā yāí a aw̄ seí ɓēé loodə́ ní a ɔr kumdə́ seí. A əgōnī ō, a lurnī ō.
38Ā ī-dubə̄ kōō ngá̰ý kem ndɔr̄ yāí tə́ ba ā ə́ja i sḛ́ý beē, tɔdɔ̄ yḭm̄ gə̄ a əsan̄ kɔ̄ɔ́ malang. 39A ī-ndɔr̄ kāgə̄ nduú ō, ā á̰a̰ gō ō, banī ā ā̰ȳ kasən alé. Ā ə́ja kan̄ nduú ní aĺ gə̄gē, tɔdɔ̄ kur̄ gə̄ a əsan̄ malang kɔ̄ɔ́. 40Ā āw̄ kə kāgə̄ olibə gə̄ dɔ nang yāí tə́ malang, banī ā ī-ndum yibə̄n alé. Tɔdɔ̄ kan̄ olibə yāí gə̄ a urə̄n̄ kɔ̄ɔ́.
41Ā ójə́ ngáń kə́ dəngam gə̄ ō, kə́ dəyá̰ gə̄ ō, banī ā ásə ngɔ̄m̄də́ rɔ̄í tə́ alé, tɔdɔ̄ a aw̄n̄ sedə́ ɓəloó kɔ̄ɔ́. 42Kāgə̄ yāí gə̄ malang ō, yá̰a̰ malang ń teē dɔ nang yāí tə́ ō ní, yḭm̄ gə̄ a əsan̄ kɔ̄ɔ́.
43Tə̄rā kə́ nge nam̄ ń ndi mbo̰ō̰í tə́ ní, tɔ́gən a tɔȳ yāí kum kə̄ kété kété, banī tɔ́gí ḭ̄ a tél i kum kə̄ gogə́ kə dɔ ndɔ̄ gə̄. 44I ni n a adī yá̰a̰ loo tə̄nā tə́ ní, ba ḭ̄ ā ə́ngé yá̰á̰ kə́ yā kadə̄n loo tə̄nā tə́ alé. Ni a ndi i kété, banī ḭ̄ ā ī-ndi i gogə́.
45Ndɔ̄ĺ gə̄ ń noō a reēn̄ dɔí tə́ malang ō, a əhɔn̄ gōí ō, a rāānī bátə́ kadə̄ ī-gətóoń. Tɔdɔ̄ ḭ̄ ōō ta Kɔ́ɔ̄ɓē Nə́ɓā yāí alé, adə̄ ī-rāā gō míndə gə̄ ń ni ədaī kadə̄ ī-rāā ní aĺ ō, ī-ngɔ̄m̄ ndū najə̄ yān gə̄ aĺ ō. 46Yá̰a̰ gə̄ ń noō a rāānī kadə̄ télən̄ yá̰a̰ gə̄ kə́ yā kɔjiīneé yá̰a̰ ō, yá̰á̰ kə́ kɔr kum tām̄ yāí tə́ ō. A to i tītə̄ ń noō kə́ njɔ́ḿ gə̄ tə́ tām̄ yā ngání gə̄ tə́ ō, ngán kaaí gə̄ tə́ ō.
47Ré ə́ngé yá̰á̰ ngá̰ý ba ɔ́də rāā kəla yā Kɔ́ɔ̄ɓē Nə́ɓā yāí kə rɔ̄nelēé aĺ ō, kə kemií kə́ nelī ngá̰ý aĺ ō anī, 48Kɔ́ɔ̄ɓē a əla kə madə̄ ba̰ā̰í gēé kadə̄ ī-rāā kəla yādə́ kə ɓōó ō, kə kəndā maná ō, kə rɔ̄í kə́ karīí ō, kə yá̰a̰ malang kə́ ndoōī ō. A ənī njúkə gində̄ míndí tə́ bátə́ kadə̄ ī-gətóoń. 49Ni a ɔy nápar de gə̄ kógə̄ḿ kə́ ḭ̄ ī-ger̄ kum najə̄ kɔr̄də́ aĺ gə̄, ta ngóy dɔ nang tə́ sa̰y yā reē ɓōkə́də́ dɔí tə́ tītə̄ kə̄rō kə́ a jə̄ngā kə̄ dɔ dā̰ tə́ yā kəhɔn beé. 50I nápar de gə̄ kə́ kumdə́ o̰o̰də́ alé, kə́ a ɓōlə́n̄ ndíl de kə́ tɔgə ɓə́ga aĺ ō, a a̰a̰n̄ kum tō ndoō yā ngōn̄ kə́ dūú aĺ ō. 51A əsan̄ yá̰a̰ kul̄ yāí gə̄ ō, kōō ndɔrí gə̄ ō, bátə́ kadə̄ ī-gətóoń. Nin̄ a əya̰n̄ kōō gémē ō, man̄ nduú ō, yibə̄ ō yā kadī alé. A əya̰n̄ ngán man̄g yāí gə̄ ō, ngán batə̄ yāí gə̄ ō, ngán bə̄yā̰ yāí gə̄ ō, yā kadī alé, bátə́ kadə̄ ī-gətóoń. 52Nin̄ a gīrə̄n̄ gidə ɓē yāí gə̄ malang yā rɔ̄ɔ̄īneé bátə́ kadə̄ ndogə̄ mbal̄ kə́ ngan̄g yāí gə̄ ń ə̄ndā kemií dɔ tə́ ní ɓéngə̄lēn̄ kɔ̄ɔ́ malang. A gīrə̄n̄ gidə ɓē yāí gə̄ malang dɔ nang ń Kɔ́ɔ̄ɓē Nə́ɓā yāí adī tə́ ní yā rɔ̄ɔ̄īneé. 53Dan ń madə̄ ba̰ā̰í gə̄ a rɔ̄ɔ̄nī á gīrə̄n̄ gidə ɓē yāí malang əlan̄ ta naā tə́ ní, a ənīnī dan ndoō kə́ ngá̰ý tə́, adə̄ ā ī-tél a ə́sa i ngán kemií gə̄, dā̰ ngání kə́ dəngam gə̄ ō, kə́ dəyá̰ gə̄ ō ń Kɔ́ɔ̄ɓē Nə́ɓā yāí adī ní. 54De kə́ dəngam kə́ mbo̰ō̰í tə́ kə́ o̰o̰n ta rɔ̄n ngá̰ý ō, əndā kumən gír rɔ̄n tə́ ngá̰ý tɔȳ madə̄n gə̄ ō, a a̰a̰ ngákó̰o̰n gə̄ ō, nə̄yá̰n ń ni tárən ngá̰ý ní ō, ngánən gə̄ ń a ngɔ̄m̄də́ ɓáý ní ō, i kə kumən kə́ majaĺ. 55Tām̄ dan ń madə̄ ba̰ā̰í gə̄ a rɔ̄ɔ̄nī á nin̄ gīrə̄n̄ gidə ɓē yāí gə̄ əlan̄ ta naā tə́, adə̄ ndoō kə́ ngá̰ý əsō dɔí tə́ kə̄ kem ɓē yāí gə̄ tə́ malang ní, sōlə̄m̄ a rāān, adə̄ ni a adə̄ deē kógə̄ḿ kə́ dandə́ tə́ dā̰ ngánən gə̄ ń ni a əsa i kanjə̄ kəya̰ gotə ní alé, sɔɔ̄ń yá̰a̰ kəsa yān kə́ rang kə́ gətóo. 56-57Dan ń madə̄ ba̰ā̰í gə̄ a rɔ̄ɔ̄nī á nin̄ gīrə̄n̄ gidə ɓē yāí əlan̄ ta naā tə́ adə̄ ndoō kə́ ngá̰ý əsō dɔí tə́ kem ɓē yāí gə̄ tə́ ní, dəyá̰ kə́ mbo̰ō̰í tə́ ń tár rɔ̄n ngá̰ý ō, kumən o̰o̰n tɔdɔ̄ rɔ̄n ngá̰ý tɔȳ madə̄n gə̄ ō ní, a rāā tītə̄ ń noō ō. Ni ń tár rɔ̄n ngá̰ý adə̄ da njan gə̄gē ndigə kəndā nang tə́ aĺ ní, a a̰a̰ ngaan ō, ngōnən kə́ dəngam ō, kə́ dəyá̰ ō i kə kumən kə́ majaĺ, tām̄ ni a ndigə kadə̄də́ kɔw ń teē kemən tə́ ní aĺ ō, a ndigə kadə̄də́ ngán kemən gə̄ ń ni ojədə́ ní aĺ ō, a əsadə́ i loo mundə̄ tə́ jəke jəke.
58Ré ī-ɓōĺ rī kə́ to kɔsə gɔn ō, to ɓōĺ ō ń i Kɔ́ɔ̄ɓē Nə́ɓā yāí ní alé, adə̄ ə̄ndā kumií gíŕ yá̰á̰ kə́ yā rāā gə̄ ń ndū najə̄ yā Nə́ɓā əda malang á ndangən̄ kem makətūbə̄ ń toō tə́ ní ī-rāā aĺ anī, 59Kɔ́ɔ̄ɓē nəkɔ́ a ənī do kə́ kumdə́ rúu gə̄ ō, do səya̰ gə̄ ō, mo̰y kə́ majaĺ gə̄ kə́ əya̰n̄ de gə̄ láẃ alé ō, dɔí tə́ ō, dɔ ngání gə̄ tə́ ō, ngán kaaí gə̄ tə́ ō. 60Ni a tél kə mo̰y kə́ tayā tayā gə̄ ń ī-ɓōĺdə́ dɔ nang kə́ Ejiptə tə́ ngá̰ý ní yā reēń dɔí tə́ kadə̄ rāāī. 61Mo̰y gə̄ kə do gə̄ ń ndangən̄ najə̄ yādə́ kem makətūbə̄ ndū najə̄ ń toō tə́ aĺ ní gə̄gē, Kɔ́ɔ̄ɓē a bə̄gādə́ dɔí tə́ bátə́ kadə̄ ī-gətóoń. 62Sḭḭ̄ ń kutəsí asə naā kə kutə tə́yō̰ gə̄ kə́ dɔ rā̰ tə́ ní, ā ī-tél ā ī-na̰yiī i sḛ́ý beē, tɔdɔ̄ ōō ta Kɔ́ɔ̄ɓē Nə́ɓā yāí alé. 63Tītə̄ ń ka̰a̰ gōsí kadə̄ ī-ndiī majə ō, rāā kadə̄ kutəsí i ngá̰ý ō, i yá̰á̰ kə́ nel̄ Kɔ́ɔ̄ɓē ngá̰ý ní, yá̰á̰ ń a tél yā nelə̄n ní i kəndā kumən gōsí tə́ yā rāań kadə̄ sḭḭ̄ ī-gətóoī kɔ̄ɔ́ ō, yā nujəńsí kɔ̄ɔ́ malang ō. Ni a ngḭ̄sí yā kɔr̄sí kɔ̄ɔ́ dɔ nang ń ā āwī kə̄ tū tə́ yā taā ní. 64Kɔ́ɔ̄ɓē a tə̄ndā yā tḭ̄ḭ̄sí kə̄ dan gír de gə̄ tə́ malang. A əla gír i ta ngóy dɔ nang kə́rēý tə́ bátə́ ta ngóy dɔ nang kə́ noō tə́. Loo ń noō tə́ ā ī-rāā kəla yā kadə̄ ɓesə̄ kāgə̄ gə̄, kə ɓesə̄ mbal̄ gə̄ ń i nə́ɓā gə̄ ń ḭ̄ gə̄gē kaaí gə̄ gə̄gē ī-gerīdə́ aĺ ní. 65Ā ə́nge loo ndi lɔm dan nápar de gə̄ ngeé ń noō tə́ alé. Loo kə́ yā kadə̄ ə̄ndań njaí tū tə́ gə̄gē ā ə́nge alé. Kɔ́ɔ̄ɓē a adī dan wur kə́ a ndi i kə sōlōó ō, kum kə́ ndə́lē aĺ ō, rɔ̄ kə́ ur wak kɔ̄ɔ́ ō. 66Yo a otiī pḭpḭ ō, ā ī-ɓōĺ ndɔ̄ɔ́ ō, kadaá ō, ā ɔ̄r̄ kemií dɔ rɔ̄í tə́ kɔ̄ɔ́ ō. 67Yá̰a̰ gə̄ ń a rāān̄ yá̰á̰ á ā á̰a̰ā̰ ní kemií a gān̄g man̄. Adə̄ ré loo i dəloí anī ā ə́da na ké loo a tíbə i rə́ngáý tə́ wa ō, ré loo tíbə anī ā ə́da na ké loo a tīī i rə́ngáý tə́ wa ō. 68Kɔ́ɔ̄ɓē a tél seí kə too boó yā kaw̄ seí gogə́ Ejiptə, dɔ nang ń m-ə́daī na ā ī-tél yā ka̰a̰ gogə́ to̰ aĺ i kə́ bátə́ gə̄ tə́ ní tə́. Loo ń noō tə́ sḭḭ̄ kɔ́ gə̄ ā ə̄ndāī rɔ̄sí gātāá, dəyá̰ gē dəngam gē, kadə̄ madə̄ ba̰ā̰sí gə̄ mangən̄sí ba rāān̄sí ɓəlo tə́, banī de kə́ yā mangsí a gətóo.
Najə̄ kɔr̄ Moijə kə́ nge ko̰ mətá
(28—30)
69Najə̄ gə̄ ń Moijə ɔr̄ kə ngán Israel gēé əhɔń madə̄ naā sedə́ dɔ nang kə́ Moab tə́ kə gō ndū Kɔ́ɔ̄ɓēé ní n toó. Madə̄ naā ń ni-əhɔ sedə́ dɔ nang kə́ Moab tə́ ní to kə dɔneé, nge kə́ mbal̄ Horeb tə́ i dáńg ō.
Currently Selected:
NDŪ NAJƏ̄ 28: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
