NDŪ NAJƏ̄ 27
27
Yá̰a̰ kəga kem dɔ madə̄ naā tə́
(27—28)
Mbal̄ gə̄ kə́ túdə̄n̄ dɔ mbal̄ Ebal tə́
1Moijə, naā tə́ kə kum kɔɔ̄ gə̄ yā ngán Israel gə̄, ɔr̄ najə̄ kə kósə de gēé ədadə́ na:
Gō míndə́ Nə́ɓā malang ń m-ə́dásí ɓōólaā ní ī-ngɔ̄mī. 2Ndɔ̄ ń ā ī-teēīneé bā Jurdḛ yā kaw̄ń dɔ nang ń Kɔ́ɔ̄ɓē Nə́ɓā yāsí adə̄sí tə́ ní, ā ɔ́yiī mbal̄ kə́ bo gə̄ yā túdə̄ kə nja dɔɔ́, ba ā ī-rāāī hō̰rō̰ man̄ kə́ ndaa gidədə́ tə́. 3Ā ī-ndangiī yá̰á̰ kə́ yā rāā gə̄ malang ń ndū najə̄ ń toō əda ní dɔ tə́ ō. I beé n ā ūgīneé dɔ nang ń Kɔ́ɔ̄ɓē Nə́ɓā yāsí adə̄sí tə́ ní. Dɔ nang ń mba ō, yibə̄ tejə ō, i ngá̰ý tū tə́, tītə̄ ń Kɔ́ɔ̄ɓē Nə́ɓā yā kaasí gə̄ ədańsí ní. 4Loo ń ré ī-teēī bā Jurdḛ oy anī, ā údiī mbal̄ gə̄ ní kə nja dɔɔ́ dɔ mbal̄ Ebal tə́, tītə̄ ń m-ə́dańsí ɓōólaā kadə̄ ī-rāāī ní. Ba ā ī-rāāī hō̰rō̰ man̄ kə́ ndaa gidədə́ tə́. 5Gō tə́ anī ā ī-rāāī loo tun̄ yá̰a̰ kə ngán mbal̄ gə̄ kə́ gində̄ ɔdə rɔ̄ aĺ gə̄ loo ní tə́ tām̄ yā Kɔ́ɔ̄ɓē Nə́ɓā yāsí tə́. 6Ā ī-rāāī loo tun̄ yá̰a̰ yā Kɔ́ɔ̄ɓē Nə́ɓā yāsí i kə ngán mbal̄ gə̄ kə́ ton̄ kə taá. Ā ī-ndējī Kɔ́ɔ̄ɓē Nə́ɓā yāsí dā̰ kə́ róō horoó gə̄ i dɔ loo tun̄ yá̰á̰ ní tə́. 7Ā ī-ndējən i dā̰ kə́ tun̄ tām̄ yā kem kógə̄ḿ tə́ ō, ā ə́saī i kə̄ loo ń noō tə́ kə rɔ̄nelēé ta kum Kɔ́ɔ̄ɓē Nə́ɓā yāsí tə́ ō. 8Ā ī-ndangiī ndū najə̄ gə̄ ń toō malang majə dɔ mbal̄ gə̄ ń ī-túdī tə́ ní.
9Gō tə́ anī Moijə, naā tə́ kə ngán Lebi kə́ ngé tun̄ yá̰a̰ gə̄, ɔr̄ najə̄ kə Israel gēé malang, ədadə́ na:
Israel gə̄, ī-raī jəke ōōī. Ɓōólaā Kɔ́ɔ̄ɓē Nə́ɓā yāsí rāā adə̄ ī-téliī gír deē yān gə̄. 10Beé ní, ā ōōī ndū Kɔ́ɔ̄ɓē Nə́ɓā yāsí. Adə̄ ā ī-rāāī yá̰a̰ gə̄ ń ədasí ní ō, yá̰a̰ gə̄ ń gō míndə yān gə̄ ədan̄sí ní ō, tītə̄ ń m-ə́dańsí ɓōólaā ní. 11Ndɔ̄ ń noō tə́ Moijə mēr̄ de gə̄ rāā yá̰á̰ ń toō ō, ədadə́ na:
12Loo ń ī-teēī bā Jurdḛ oy anī, de gə̄ kə́ gír ɓē yā Simeo̰ tə́ ō, Lebi tə́ ō, Juda tə́ ō, Isakar tə́ ō, Jəjep tə́ ō, Benjamḛ tə́ ō, a ran̄ dɔ mbal̄ Garijim tə́ yā tɔ́rəń tadə́ dɔ gír deē yāsí gə̄ tə́. 13Ba de gə̄ kə́ gír ɓē yā Ruben tə́ ō, Gad tə́ ō, Aser tə́ ō, Jabulo̰ tə́ ō, Dan tə́ ō, Nepətali tə́ ō, a ran̄ dɔ mbal̄ Ebal tə́ yā kədań najə̄ kə́ to ndɔ̄ĺ gə̄.
Ndɔ̄ĺ kə́ kutə gidə i jōó gə̄
14 Ngán Lebi gə̄ a ədan̄ dəngam gə̄ malang kə́ Israel tə́ kə ndūdə́ kə́ kə tɔ́gɔ́ na:
15Deē ń a tə́gā kāgə̄ yā kudə ɓesə̄ tə́, aké a nō gində̄ horoó yā tɔ́sə̄ ba rāā kum gotə yá̰á̰ kə́rēý tə́ yā ndɔ̄ȳ loo mundə̄ tə́ jəke ní, ndɔ̄ĺ i dɔn tə́. Tɔdɔ̄ yá̰á̰ kə́ beé gə̄ ń de gə̄ rāān̄ kə jīdə́ ní, i yá̰á̰ kə́ to yḛr kum gə̄ ta kum Kɔ́ɔ̄ɓē tə́. Loo ń noō tə́ de gə̄ malang a ədan̄ na:
A̰á̰ā̰ ādə̄ i tītə̄ ń noō.
16Deē ń kídə̄ bɔbə̄n ō, kó̰o̰n ō ní, ndɔ̄ĺ i dɔn tə́. Loo ń noō tə́ de gə̄ malang a ədan̄ na:
A̰á̰ā̰ ādə̄ i tītə̄ ń noō.
17Deē ń a ndɔ́tə̄ kə dɔ nin̄ loo yā madə̄ ɓēneé ní, ndɔ̄ĺ i dɔn tə́. Loo ń noō tə́ de gə̄ malang a ədan̄ na:
A̰á̰ā̰ ādə̄ i tītə̄ ń noō.
18Deē ń a ɔjə de kə́ nge kum tɔ̄ɔ̄ róbə́ kə́ gōtə́ aĺ ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
19Deē ń a ɔgə̄ tə̄rā kə́ nge nam̄ ō, ngōn̄ hal ō dəyá̰ kə́ ngaa koy ō yá̰á̰ kə́ sɔɔ̄ dɔdə́ ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
20Deē ń ɓīī kə nə̄yá̰ bɔbə̄neé ní, ndɔ̄ĺ i dɔn tə́, tɔdɔ̄ un i kūbə̄ ń bɔbə̄n seĺ dɔ nə̄yá̰n tə́ ní kɔ̄ɔ́#27.20 Seĺ kūbə̄: Á̰a̰ī Ndū 23.1.. Loo ń noō tə́ de gə̄ malang a ədan̄ na:
A̰á̰ā̰ ādə̄ i tītə̄ ń noō.
21Deē ń ɓīī kə dā̰á̰ ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
22Deē ń ɓīī kə ngōkó̰o̰n kə́ dəyá̰, ká i kem bəra madə̄n, aké i kem kó̰o̰ madə̄n anī, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
23Deē ń ɓīī kə umən kə́ dəyá̰ ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
24Deē ń tɔ̄l̄ deē loo mundə̄ tə́ ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
25Deē ń ndigə nar yā tɔ̄ləń de kə́ najə̄ gətóo dɔn tə́ ní, ndɔ̄ĺ i dɔn tə́. Loo ń noō tə́ de gə̄ malang a ədan̄ na:
A̰á̰ā̰ ādə̄ i tītə̄ ń noō.
26Deē ń a rāā ndū najə̄ yā Nə́ɓā nja bə̄yā̰ kə́ gogə́ tə́ ō, a ngɔ̄m̄ aĺ ō ní, ndɔ̄ĺ i dɔn tə́. Loo ń noō tə́ gír de gə̄ malang a ədan̄ na:
A̰á̰ā̰ ādə̄ i tītə̄ ń noō.
Currently Selected:
NDŪ NAJƏ̄ 27: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
