NDŪ NAJƏ̄ 11

Moijə ter̄ kem Israel gə̄

1Ī-táriī Kɔ́ɔ̄ɓē Nə́ɓā yāsí, úniī gō ndū najə̄ yān gə̄ ō, yá̰a̰ kāgə̄ ɓē yān gə̄ ō, yá̰a̰ gə̄ ń əndā dɔsí tə́ kadə̄ ī-rāāī ní ō, kə dɔ ndɔ̄ gə̄. 2Ɓōólaā sḭḭ̄ ī-gerī ba i ngáńsí gə̄ n gerə̄n̄ aĺ ní, tām̄ nin̄ a̰a̰n̄ alé. Sḭḭ̄ ī-gerī yá̰á̰ ń Kɔ́ɔ̄ɓē Nə́ɓā yāsí ndóōsí ní: Ī-gerī kadə̄ ni i de kə́ bo ō, ī-gerī tɔ́gə jīn ō, á̰a̰ī jīn kə́ kəla kə̄ dɔɔ́ ō, 3yá̰a̰ gə̄ ń ni-rāā yā kɔjəńsí yá̰á̰ ní ō, kəla rāān gə̄ ō. Ī-gerī yá̰á̰ ń ni-rāā kə mban̄g Parao̰ kem ɓē kə́ Ejiptə tə́ ō, kə dɔ nang yān malang ō, 4kə áskar yān gə̄ ō ní. Dan ń áskar yān gə̄ a ngɔ̄də̄n̄ gōsí kə sə́nda gə̄ ō, púsə́ sə́nda gə̄ ō ní, Kɔ́ɔ̄ɓē rāā adə̄ man̄ bā tə̄ɓā gə̄ ɔr tan dɔdə́ tə́, adə̄ gír yādə́ gān̄g kɔ̄ɔ́, bátə́ ɓōólaā gə̄gē. 5Ī-gerī yá̰á̰ ń ni-rāā sesí kem dəla loo tə́ bátə́ ūgīneé loo ń toō tə́ laā ní ō, 6yá̰á̰ ń rāā kə Datan ō, Abiram ō ń i ngán Eliab kə́ ngōn̄ Ruben ní#11.6 K. 6: Á̰a̰ī Tə́da 16 ō. Rāā adə̄ dɔ nang teē tan urdə́ ta kum ngán Israel gə̄ tə́ malang kə gír kojə yādə́ ō, kə kújə tandā yādə́ gə̄ ō, kə de gə̄ malang kə́ gōdə́ tə́ ō. 7Yá̰á̰ kə́ bo ngá̰ý gə̄ malang ń Kɔ́ɔ̄ɓē rāā ní sḭḭ̄ á̰a̰ī kə kumsí. 8Ī-rāāī gō míndə gə̄ malang ń m-ə̄ndā dɔsí tə́ ɓōólaā kadə̄ ī-rāāī ní. Ā ə́ngeī tɔ́gə tū tə́ yā taāń dɔ nang ń ā āwī kə̄ tū tə́ ní. 9Loo ń noō tə́ a ī-ndiī kə kumsí ɓāl̄ ngá̰ý kem ɓē ń mba ō, yibə̄ tejə ō, i ngá̰ý tū tə́, á Kɔ́ɔ̄ɓē ənī ndūn yā kadə̄ kaasí gə̄ ō, ngáńdə́ gə̄ ō, ngán kaadə́ gə̄ ō ní.

Dɔ nang ń Kɔ́ɔ̄ɓē a̰a̰ gō ní

10Dɔ nang ń ā āwī yā taā ní, to tītə̄ nge kə́ Ejiptə ń ī-teēī kɔ̄ɔ́ kemeé ní alé. Nú ní ī-dubī kum kōō ba ī-rāāī man̄ dɔ tə́ i kə njasí#11.10 Kə njasí: Dɔ nang kə́ Ejiptə tə́ ní ngé ndɔr̄ gə̄ a əjan̄ bəlo i kə ngālāá kə gō gidə ndɔrɔ́ kadə̄ man̄ ra tū tə́. A gāngə̄n̄ gír ndɔr̄ i kə bɔrɔɔ́ yā kɔgə̄ń man̄ kun. Ré gḛyn̄ kadə̄ man̄ aw̄ gír kōó anī a mbutən̄ kum bɔr ní i kə njadə́. tītə̄ loo ndɔr̄ mbī kámbə beé. 11Banī dɔ nang ń ā āwī yā taā ní, i dɔ nang kə́ mbal̄ gə̄ ō, wól loo gə̄ ō i tū tə́. I dɔ nang kə́ a a̰ȳ i man̄ kə́ edə dɔɔ́ n tū tə́ ní ō. 12I dɔ nang kə́ Kɔ́ɔ̄ɓē Nə́ɓā yāsí a̰a̰ gō, əndā kumən gírí kanjə̄ kɔr ta tə́ ɓālāá ō, ɓaraá ō.

13Ré yá̰a̰ gə̄ ń ɓōólaā m-ə̄ndā dɔsí tə́ kadə̄ ī-rāāī ní ī-rāāīdə́ rɔ̄kum, adə̄ ī-táriī Kɔ́ɔ̄ɓē Nə́ɓā yāsí ō, ī-rāāī kəla ādə̄niī kə ngarā̰ kemsí gēé malang ō, kə rɔ̄sí malang ō anī, 14m-ā m̄-rāā kadə̄ man̄ edə dɔ nang yāsí tə́ kə dɔ nāāneé: M-ā m̄-rāā kadə̄ man̄ ta ɓar ō, man̄ ta ɓāl̄ ō, edən̄ dɔ nang yāsí tə́ kadə̄ ə́ngeīneé kōō gémē ō, kasə nduú ō, yibə̄ ō. 15M-ā m̄-rāā kadə̄ dɔ nang yāsí gə̄ a əɓan̄ mu tām̄ yā dā̰ yāsí gə̄ tə́ ō, ā ə́saī yá̰a̰ kadə̄ ā ī-ndānī ō.

16Ī-lōōī kadə̄ deē gól̄sí kadə̄ ī-tɔ̄ɔ̄ī róbə ō, kadə̄ ī-rāāī kəla ādī ɓesə̄ gə̄ ō, kadə̄ ɔ́siī nosí nang tə́ nodə́ tə́ ō. 17Tɔdɔ̄ nge ń noō a rāā kadə̄ Kɔ́ɔ̄ɓē a rāā wōn̄g sesí. Ni a utə̄ ta dɔ rā̰ kɔ̄ɔ́ kadə̄ man̄ a edə to̰ aĺ ō, dɔ nang a teē kōō to̰ aĺ ō, ā ī-gətóoī láẃ ngá̰ý kɔ̄ɔ́ kem ɓē kə́ majə ń Kɔ́ɔ̄ɓē adə̄sí ní tə́ ō. 18Najə̄ gə̄ ń m-ɔ̄r̄ sesí toō, ā ī-ngɔ̄mīdə́ kemsí tə́. Ā ī-do̰ō̰īdə́ jīsí tə́ ō, nɔtə nosí tə́ ō, yā kadə̄ dɔsí ndígə̄nal alé. 19Ā ī-ndóōī ngáńsí gə̄. Ré ā ī-ndiī ta kújə yāsí tə́, aké ā ī-njə̄rāī dɔ róbə́ tə́, aké ā ī-toī nang tə́, aké ā ḭ́ḭī dɔɔ́ anī, ā ɔ̄rī najə̄n sedə́. 20Ā ī-ndangiīdə́ tū kāgə̄ ta róbə́ kújə yāsí gə̄ tə́ ō, tū ta róbə ndogə̄ mbal̄ kə́ yā kudəń kə̄ kem ɓē yāsí gə̄ tə́ ō. 21Ré ī-rāāī beé anī, sḭḭ̄ ō, ngáńsí gə̄ ō, ngán kaasí gə̄ ō, ā ī-ndiī ta kaw̄ jóo dɔ nang ń Kɔ́ɔ̄ɓē ənī ndūn adə̄ kaasí gə̄ yā kadə̄də́ tə́ ní, kə ndɔ̄ gə̄ malang ń dɔ rā̰ a rań dɔɔ́ dɔ dɔ nang tə́ ní.

22Tɔdɔ̄ yá̰a̰ malang ń m-ə̄ndā dɔsí tə́ kadə̄ ī-rāāī ní, ré ī-rāāīdə́ rɔ̄kum adə̄ ī-táriī Kɔ́ɔ̄ɓē Nə́ɓā yāsí ō, úniī gō róbə yān gə̄ malang ō, ə́hɔī gōn ō anī, 23gíŕ nápar de gə̄ ń kutədə́ tɔȳ yāsí ō, tɔ́gə́də́ tɔȳ yāsí ō ní, Kɔ́ɔ̄ɓē a tə̄ɓādə́ kɔ̄ɔ́ nosí tə́ kadə̄ ā ī-taāī dɔ nang yādə́. 24Loo malang ń ā ə̄ndāī da njasí tū tə́ ní a tél loo yāsí: Dɔ nang yāsí a əla gír i dəla loo tə́ dām̄ mbɔ́r ɓē kə́ geleé tə́ bátə́ kadə̄ ugə̄ń mbal̄ gə̄ kə́ Liban tə́ dām̄ mbɔ́r ɓē kə́ ko̰ó̰ tə́ ō, a ḭḭ bā Opəratə ń i bā kə́ bo ní tə́ dām̄ kə́ gír ɓē tə́ bátə́ kadə̄ ugə̄ń bā bo tə́ no ɓē tə́ ō. 25De kə́ asə ra nosí tə́ a gətóo. Loo malang ń āwī tū tə́ ní, Kɔ́ɔ̄ɓē a əla sōl̄ ō, ɓōĺ ō, kem de gə̄ tə́ tām̄ yāsí tə́ tītə̄ ń ədańsí ní.

26Á̰a̰ī m-ə̄ndā tɔ́r̄ ta ō, ndɔ̄ĺ ō, nosí tə́ kadə̄ ī-gə̄rāī ɓōólaā: 27Ré ī-rāāī yá̰a̰ gə̄ ń Kɔ́ɔ̄ɓē Nə́ɓā yāsí əndā dɔsí tə́ kadə̄ ī-rāāī á m-ə́dásí ɓōólaā ní anī, tɔ́r̄ ta i dɔsí tə́. 28Ba ré ī-rāāī aĺ ō, ī-tūrī gidəsí kɔ̄ɔ́ ta róbə́ ń m-ɔ́jə́sí ɓōólaā tə́ ní, ba āw̄ ī-ndɔ̄yī ɓesə̄ gə̄ ń i nə́ɓā gə̄ kə́ ī-gerīdə́ aĺ ní ō anī, ndɔ̄ĺ i dɔsí tə́.

29Dɔ nang ń ā āwī kə̄ taá ní, ré Kɔ́ɔ̄ɓē Nə́ɓā yāsí rāā adə̄ ūgī tū tə́ anī, ā ī-raī i dɔ mbal̄ Garijim tə́ n ā ī-tɔ́rīneé tasí dɔ de gə̄ tə́ ō, ā ī-raī i dɔ mbal̄ Ebal tə́ n ā ī-ndɔ̄líīneédə́ ō ní. 30Mbal̄ gə̄ ní ran̄ i gidə bā Jurdḛ kə́ dām̄ kə́ nú tə́ gidə róbə́ kə́ no ɓē tə́ tə́, dɔ nang yā Kanaan gə̄ ń ndin̄ wól loo kə́ Jurdḛ tə́ ní tə́, ngɔr kə̄ kadə kāgə̄ sén gə̄ kə́ More tə́, loo ń ra sɔɔ̄n̄ ta naā kə Gilgal tə́ ní. 31Tɔdɔ̄ ā ī-teēī bā Jurdḛ yā kaw̄ taā dɔ nang ń Kɔ́ɔ̄ɓē Nə́ɓā yāsí adə̄sí ní yā ndi tū tə́. 32Loo ń noō tə́ ndū najə̄ gə̄ malang ō, yá̰a̰ kāgə̄ ɓē gə̄ malang ō ń m-ɔ́jə́sí ɓōólaā ní, ā ə̄ndāī kumsí gírí yā rāā.

Currently Selected:

NDŪ NAJƏ̄ 11: SARDC

Highlight

Copy

Compare