NDŪ NAJƏ̄ 12

Ndū najə̄ gə̄ yā Kɔ́ɔ̄ɓē

(12—26)

1 Ndū najə̄ gə̄ ō, yá̰a̰ kāgə̄ ɓē gə̄ ō ń ā ə̄ndāī kumsí gírí yā rāā kə dɔ ndɔ̄ gə̄ malang ń ā ī-ndiīneé kə kumsí dɔ nang tə́, kem ɓē ń Kɔ́ɔ̄ɓē Nə́ɓā yā kaasí gə̄ a adə̄sí tə́ ní n toó:

Loo ndɔ̄ȳ Nə́ɓā gíŕ i kógə̄ḿ beē

2Loo rāā ɓesə̄ yā nápar de gə̄ ń ā ī-taāī dɔ nang yādə́ á i dɔ mbal̄ bo gə̄ tə́ ō, dɔ ngán mbal̄ gə̄ tə́ ō, gír kāgə̄ gə̄ kə́ mbīdə́ i ngá̰ý tə́ ō ní, ā ī-nujiīneé kɔ̄ɔ́ malang. 3Ā ī-tɔ̄ɔ̄ī loo tun̄ yá̰a̰ yādə́ gə̄ ō, mbal̄ yādə́ gə̄ ń túdə̄n̄ kə nja dɔɔ́ ní ō kɔ̄ɔ́. Ā ī-róōī kāgə̄ ɓesə̄ yādə́ kə́ yā ɓōĺ gidə gə̄ ń a ndɔ̄ȳn̄ ní horoó kɔ̄ɔ́ ō. Ā ī-tétī yá̰a̰ gə̄ ń tɔ́sə̄n̄ ba rāān̄də́ nə́ɓā yādə́ gə̄ tə́ ní kɔ̄ɔ́ ō. Ā ī-rāāī kadə̄ rī ɓesə̄ gə̄ ní ɓār̄ dɔ nang ní tə́ to̰ alé. 4Ā ī-ndɔ̄yī Kɔ́ɔ̄ɓē Nə́ɓā yāsí tītə̄ ń nin̄ a ndɔ̄ȳn̄neé ɓesə̄ yādə́ gə̄ ní alé. 5I loo ń Kɔ́ɔ̄ɓē Nə́ɓā yāsí a gə̄rā dɔ nang kə́ gír ɓē yāsí tə́ yā kəndā rīn dɔ tə́ ō, yā ndi tū tə́ ō ní ngóy n ā āwī tū tə́ yā ndɔ̄ȳn ní. 6Dā̰ yāsí gə̄ kə́ yā róō horoó ō, kə́ yā tun̄ karī gə̄ ō, dɔ yá̰a̰ yāsí kə́ nge ko̰ kutə ō, yá̰a̰ yāsí gə̄ ń ī-ndējī Nə́ɓā kə gō kem ndigə yāsí ní ō, kadə̄ karī yāsí gə̄ ń ādī Nə́ɓā tām̄ ndūsí kə́ ə̄nīī tə́, aláa kanjə̄ núm̄ kemsí tə́ ní ō, hágə man̄g yāsí gə̄ ō, hágə batə̄ yāsí gə̄ ō, hágə bə̄yā̰ yāsí gə̄ ō ní, ā āwīneé i loo ń noō tə́. 7Ā ə́saī i loo ń noō tə́ ta kum Kɔ́ɔ̄ɓē Nə́ɓā yāsí tə́ kə gír kojə yāsí gēé. Ā ī-rāāī rɔ̄nel̄ dɔ kəla malang ń ī-rāāī á Kɔ́ɔ̄ɓē Nə́ɓā yāsí rāā adə̄ teē yá̰á̰ tə́ ní.

8Ā ī-rāāī yá̰a̰ i tītə̄ ń ɓōólaā j-a jə-rāāīneé jījí tə́ toō alé. Tām̄ laā ní náā nəkɔ́ ɓáa rāā i yá̰á̰ ń a̰a̰ kadə̄ i yá̰á̰ kə́ majə ta kumən tə́ ní. 9Tɔdɔ̄ ūgī loo ń Kɔ́ɔ̄ɓē Nə́ɓā yāsí a adə̄sí kadə̄ ī-ndiī tū tə́ lɔm tə́ ní aĺ ɓáý. 10Banī ā ī-teēī bā Jurdḛ yā kaw̄ ndi dɔ nang ń ni adə̄sí tə́ ní. Ni a rāā kadə̄ ī-ndiī lɔm tām̄ ni a taāsí jī madə̄ ba̰ā̰sí gə̄ malang ń ndin̄ gīrə̄n̄ gidəsí tə́ ní yā kəya̰sí dɔɔ́ ō, ā ī-ndiī dɔ nang ní tə́ kanjə̄ sōl̄ yá̰á̰ kógə̄ḿ ō. 11I loo ń Kɔ́ɔ̄ɓē Nə́ɓā yāsí a gə̄rā yā kəndā rīn dɔ tə́ ní n ā āwī kə yá̰a̰ malang ń m-ə̄ndā dɔsí tə́ kadə̄ ādī ní tū tə́ ní: Dā̰ yāsí gə̄ kə́ yā róō horoó kə taá malang ō, kə́ yā tun̄ tām̄ yā kem kógə̄ḿ ō, dɔ yá̰a̰ yāsí kə́ nge ko̰ kutə kə́ ɔ̄rī ō, yá̰a̰ yāsí gə̄ ń ā ādī kə gō kem ndigə yāsí ní ō, yá̰a̰ malang ń ā ī-gə̄rāī yā kadə̄ Kɔ́ɔ̄ɓē kadə̄ karī tə́ tām̄ ndūsí kə́ ə̄nīī tə́ ō ní, ā āwīneé i loo ngeé ń noō tə́. 12Ā ī-rāāī rɔ̄nel̄ ta kum Kɔ́ɔ̄ɓē Nə́ɓā yāsí tə́ kə ngáńsí kə́ dəngam gə̄ ō, kə́ dəyá̰ gə̄ ō, kə ngé rāā kəla yāsí gə̄ kə́ dəngam gə̄ ō, kə́ dəyá̰ gə̄ ō, naā tə́ kə ngán Lebi gə̄ ń ndin̄ kem ɓē yāsí gə̄ tə́ ní, tām̄ nin̄ əngen̄ dɔ nang yādə́ dɔ dáńsí tə́ alé.

13Ī-lōōī róō dā̰ yāsí gə̄ horoó loo malang ń ā á̰a̰ī tə́ ní. 14Ā ī-róōī dā̰ yāsí gə̄ i loo ń Kɔ́ɔ̄ɓē a gə̄rā dɔ nang kə́ gír ɓē yāsí tə́ ní ngóy. Yá̰a̰ malang ń m-ə́dásí kadə̄ ī-rāāī ní, ā ī-rāāī i loo ń noō tə́. 15Ba ā ī-tɔ̄lī dā̰ kə gō kem ndigə yāsí yā kəsa kem ɓē yāsí gə̄ tə́ malang, kə gō ń Kɔ́ɔ̄ɓē Nə́ɓā yāsí a rāań majə sesí ní. Deē ń i kə́ yḛr ní ō, deē ń i kə́ unjə̄ njáý njáý ní ō, a əsan̄ dā̰ ní tītə̄ loo kəsa dā̰ kāl̄ aláa dā̰ lúm beé. 16Ɓá tā banī ā ə́saī mósə dā̰ alé. Ā ī-ɓōkíī i nang tə́ tītə̄ man̄.

17Dɔ kōō gémē aláa kasə nduú, aláa yibə̄ kə́ nge ko̰ kutə kə́ ɔ̄rī tām̄ yā Nə́ɓā tə́ ní, ā ə́saī kə̄ kem ɓē yāsí gə̄ tə́ alé. Ā ə́saī hágə man̄g aĺ ō, hágə batə̄ aĺ ō, hágə bə̄yā̰ aĺ ō. Kadə̄ karī yāsí gə̄ ń ādī Nə́ɓā tām̄ ndūsí kə́ ə̄nīī tə́, aláa kanjə̄ núm̄ kemsí tə́ ní ō, yá̰a̰ yāsí gə̄ ń ī-ndējī Nə́ɓā kə gō kem ndigə yāsí ō ní, ā ə́saī kə̄ kem ɓē yāsí gə̄ tə́ alé. 18Ā ə́saī i ta kum Kɔ́ɔ̄ɓē Nə́ɓā yāsí tə́ ngóy, kem loo ń ni a gə̄rā tə́ ní. Ā ə́saī i kə ngáńsí kə́ dəngam gə̄ ō, kə́ dəyá̰ gə̄ ō, ngé kəla yāsí kə́ dəngam gə̄ ō, kə́ dəyá̰ gə̄ ō, kə ngán Lebi gə̄ ń ndin̄ kem ɓē yāsí gə̄ tə́ ní ō. Ā ī-rāāī rɔ̄nel̄ ta kum Kɔ́ɔ̄ɓē Nə́ɓā yāsí tə́ dɔ kəla malang ń ī-rāāī tə́ ní. 19Ī-lōōī rāā ngán Lebi gə̄ nja bə̄yā̰ kə́ gogə́ tə́ kə dɔ ndɔ̄ gə̄ malang ń ā ī-ndiīneé dɔ nang yāsí tə́ ní.

20Dan ń Kɔ́ɔ̄ɓē Nə́ɓā yāsí a teē kem dɔ nang yāsí kə̄ gogə́ adə̄sí tītə̄ ń ni-ənīń ndūn adə̄sí ní, ba ngur kəsa dā̰ rāāsí anī, ə́saī tītə̄ ń kemsí ndigə ní. 21Loo ń Kɔ́ɔ̄ɓē Nə́ɓā yāsí gə̄rā yā kəndā rīn dɔ tə́ ní, ré ī-ndiī i sa̰y rɔ̄ tə́ anī, ā ī-tɔ̄lī man̄g, aláa batə̄, aláa bə̄yā̰ kə́ dan yá̰a̰ kul̄ yāsí gə̄ ń Kɔ́ɔ̄ɓē adə̄sí tə́ ní kə gō ń m-ɔ́jəńsí ní. Loo ń noō tə́ ā ə́saī dā̰ tītə̄ ń kemsí ndigə ní. 22Ā ə́saī i tītə̄ loo kəsa dā̰ kāl̄, aláa dā̰ lúm beé. De kə́ yḛr ō, de kə́ unjə̄ njáý njáý ō ní a əsan̄ dā̰ ní naā tə́ mbak. 23Banī yá̰á̰ ń kadə̄ ə̄ndāī kumsí gírí kadə̄ ī-rāāī aĺ ní i kógə̄ḿ beē ngóy. Majə kadə̄ ā ə́saī dā̰ ń mósə i tū tə́ ní alé. Tɔdɔ̄ ndi kə kumuú i tū mósə́ tə́. 24Ā ə́saī alé ba ā ī-ɓōkíī i nang tə́ tītə̄ man̄ beé. 25Ré ī-rāāī beé anī, sḭḭ̄ ō, ngáńsí gə̄ ō, ngán kaasí gə̄ ō ní, rɔ̄sí a nel̄sí, tɔdɔ̄ ī-rāāī i yá̰á̰ kə́ gōtə́ ta kum Kɔ́ɔ̄ɓē tə́.

26Yá̰a̰ gə̄ ń ā āwīneé loo ń Kɔ́ɔ̄ɓē a gə̄rā tə́ ní, i yá̰a̰ gə̄ ń ā ɔ̄rī kam̄də́ tayā tām̄ yā Kɔ́ɔ̄ɓē tə́ ní ō, i yá̰a̰ gə̄ ń ə̄nīī ndūsí yā kadə̄ Kɔ́ɔ̄ɓē ní ō ngóy. 27Ré i dā̰ kə́ yā róō horoó kə taá malang anī, ā ī-ndējī Nə́ɓā dā̰n ō, mósən ō, dɔ loo tun̄ yá̰a̰ yā Kɔ́ɔ̄ɓē Nə́ɓā yāsí tə́. Ré i dā̰ kə́ yā tun̄ tām̄ yā kem kógə̄ḿ tə́ anī, ā ī-ɓōkíī mósən dɔ loo tun̄ yá̰a̰ yā Kɔ́ɔ̄ɓē tə́ ba ā ə́saī dā̰ ní.

28Najə̄ malang kə́ dɔ yá̰á̰ kə́ yā rāā gə̄ tə́ ń m-ɔ̄r̄ sesí ní, ə̄ndāī mbīsí gírí majə ō, úniī gō ō. Loo ń noō tə́ rɔ̄sí sḭḭ̄ ō, rɔ̄ ngáńsí gə̄ ō, ngán kaasí gə̄ ń a utə̄n̄ gōsí ní ō, a nel̄sí kə dɔ ndɔ̄ gə̄. Tām̄ i yá̰á̰ kə́ majə ō, i yá̰á̰ kə́ gōtə́ ō n ī-rāāī ta kum Kɔ́ɔ̄ɓē Nə́ɓā yāsí tə́ ní.

Najə̄ kə́ dɔ ɓesə̄ gə̄ kə́ Kanaan tə́

29Nápar de gə̄ ń ndin̄ dɔ nang ń ā āwī kə̄ tū tə́ ní, Kɔ́ɔ̄ɓē Nə́ɓā yāsí a nujədə́ sák sák kɔ̄ɔ́ nosí tə́. Loo ń noō tə́ ā ī-taāī dɔ nang yādə́ ō, ā ī-ndiī tū tə́ ō. 30Dan ń Kɔ́ɔ̄ɓē Nə́ɓā yāsí a nujədə́ malang kɔ̄ɔ́ nosí tə́ anī, ī-lōōī ndájə̄ yá̰a̰ rāādə́ yā kəsōń kum gūmbə̄ yādə́ tə́. Ī-lōōī sāā nja ɓesə̄ yādə́ gə̄ kəda na, nápar de gə̄ ń toō a ndɔ̄ȳn̄ ɓesə̄ yādə́ gə̄ i ba̰ý? Ādə̄ m̄-ndɔ̄ȳ tītə̄ yādə́ ō. 31Ā ī-ndɔ̄yī Kɔ́ɔ̄ɓē Nə́ɓā yāsí tītə̄ ń nin̄ a ndɔ̄ȳn̄neé ɓesə̄ yādə́ gə̄ ní alé. Tɔdɔ̄ yá̰a̰ malang kə́ to yḛr ta kum Kɔ́ɔ̄ɓē tə́ ō, yá̰a̰ malang ń nelə̄n aĺ ō ní, nin̄ rāān̄ tām̄ yā ɓesə̄ yādə́ gə̄ tə́. Nin̄ aw̄n̄ bátə́ tɔ̄lə̄n̄ ngán kemdə́ kə́ dəngam gə̄ ō, kə́ dəyá̰ gə̄ ō, ba róōn̄də́ horoó adə̄n̄ ɓesə̄ yādə́ gə̄.

Currently Selected:

NDŪ NAJƏ̄ 12: SARDC

Highlight

Copy

Compare