NDŪ NAJƏ̄ 10

Nə́ɓā mā̰ȳ rɔ̄n dɔ Israel gə̄ tə́

1Loo ń noō tə́ Kɔ́ɔ̄ɓē ədam̄ na:

Ī-rāā bar mbal̄ gə̄ jōó kə́ kadə̄ ton̄ tītə̄ ngé kə́ kété gə̄ ní ō, ī-rāā sandúkə kāgə̄ ō, ba āl̄ ī-reē dɔɔ́ rɔ̄ḿ tə́ dɔ mbalá. 2Najə̄ gə̄ kə́ gidə bar mbal̄ kə́ kété gə̄ ń ī-tɔ̄ɔ̄də́ kɔ̄ɔ́ tə́ ní, m-ā m̄-tél yā ndang gidə ngé gə̄ ń toō tə́ ō, ā ī-ɓōkə́də́ kem sandúkú ō. 3Adə̄ m̄-rāā sandúkə kə kāgə̄ akasiya ō, m̄-tɔ́sə̄ bar mbal̄ gə̄ jōó kə́ ton̄ tītə̄ madə̄ kə́ kété gə̄ ō, ba m-ɔ́y bar gə̄ ní jīḿ tə́ m-āləń dɔ mbalá. 4Najə̄ kə́ kutə gə̄ ń Kɔ́ɔ̄ɓē ɔr̄ sesí kum hor tə́ dɔ mbalá ndɔ̄ kán̄ naā tə́ ní, ndangdə́ dɔ bar mbal̄ kə́ kijə kə́ jōó gə̄ ní tə́ tītə̄ kə́ kété, ba gō tə́ anī téləń adə̄m̄. 5Dan ń m̄-risə kɔ̄ɔ́ dɔ mbalá ní, m̄-ɓōkə́ bar mbal̄ gə̄ ní kem sandúkə́ ń m̄-rāā tə́ ní. Ton̄ kemeé noō kə gō ndū Kɔ́ɔ̄ɓē ń adə̄m̄ ní.

6Ngán Israel gə̄ ḭḭn̄ kɔ̄ɔ́ dɔ bəlo man̄ gə̄ kə́ Bene Yakan tə́ aw̄n̄ Mosera. Aaro̰ oy adə̄ dubə̄nən̄ i loo ń noō tə́. Ngōnən Eleajar un gotən kem kəla tun̄ yá̰á̰ tə́.

7Ngán Israel gə̄ ḭḭn̄ loo ń noō tə́ aw̄n̄ Gudəgoda, ḭḭn̄ Gudəgoda aw̄n̄ Yotəbata. Yotəbata i loo ń ngán man̄ kə́ nūgə́ kə tɔ́gɔ́ gə̄ i ngá̰ý tū tə́ ní.

8Loo ń noō tə́ Kɔ́ɔ̄ɓē adə̄ de kə́ gír ɓē yā Lebi tə́ gə̄ kəla kətō sandúkə madə̄ naā yā Kɔ́ɔ̄ɓē ō, kəla ra ta kum Kɔ́ɔ̄ɓē tə́ rāań kəla yān ō, tɔ́rəń tadə́ dɔ de gə̄ tə́ kə rīneé ō. I kəla gə̄ ń noō n ɓōólaā gə̄gē a rāān̄ ɓáý ní. 9I tām̄ najə̄ ń noō tə́ n de kə́ gír ɓē yā Lebi tə́ gə̄ əngen̄neé dɔ nang kə madə̄də́ gēé aĺ ní. Tītə̄ ń Kɔ́ɔ̄ɓē Nə́ɓā yāsí ədańdə́ ní, yá̰a̰ kənge yādə́ i Kɔ́ɔ̄ɓē.

10m̄-rāā ndɔ̄ kutə sɔ́ ō, kadə kutə sɔ́ ō, dɔ mbalá tītə̄ kə́ kété. Kɔ́ɔ̄ɓē oō ndɔ̄ȳ yāḿ ɓáý to̰ adə̄ lōō gír nujə sesí kɔ̄ɔ́ malang tə́. 11Tā anī ni ədam̄ na:

Ḭ́ḭ dɔɔ́ āw̄ ī-ra no gír de gə̄ ń toō tə́, ba ādə̄də́ ndūí ādə̄ əsōn̄ róbó. Ādə̄ aw̄ taān̄ dɔ nang ń m-ə̄nī ndūḿ m-ādə̄ kaadə́ gə̄ kadə̄ m-ādə̄də́ ní.

Ndū najə̄ kə́ dɔ táŕ Nə́ɓā tə́ ō, koō tan tə́ ō

12Ngán Israel gə̄, yá̰á̰ ń Kɔ́ɔ̄ɓē Nə́ɓā yāsí ndi a ngóō ta kadə̄ ī-rāāī ngɔlaā ní i rí? Ni a ngóō i kadə̄ ī-ɓōlíī ndílən ba úniī gō róbə yān gə̄ ō, ī-tárniī ō, ī-rāāī kəla yān kə ngarā̰ kemsí malang ō, kə rɔ̄sí malang ō. 13Ni a ngóō i kadə̄ ī-rāāī yá̰á̰ ń ni ədasí kadə̄ ī-rāāī ní ō, ī-ngɔ̄mī ndū najə̄ yān gə̄ ń m-ādə̄sí ɓōólaā tām̄ yā rɔ̄nel̄ yāsí tə́ ní ō. 14Rɔ̄kum, dɔ rā̰ ō, loo kə́ kḭḭ dɔ rā̰ tə́ ta kaw̄ kə̄ dɔɔ́ ō, i yā Kɔ́ɔ̄ɓē Nə́ɓā yāsí. Tá dɔ nang kə yá̰a̰ malang kə́ tū tə́ i yān ō. 15Ɓá tā ba i kaasí gə̄ ngóy n Kɔ́ɔ̄ɓē əhɔ gōdə́ táŕdə́ kété ní. Tá i sḭḭ̄ ngán kaadə́ gə̄ n ni gə̄rāsí dan gír de gə̄ tə́ tītə̄ ń á̰a̰īń ɓōólaā ní. 16Ā ə́ja i mɔtə kə́ dan wur tə́ ō, ī-lōōī rāā dɔ ngan̄g ō. 17Tɔdɔ̄ i Kɔ́ɔ̄ɓē Nə́ɓā yāsí n i Nə́ɓā yā nə́ɓā gə̄ ō, Kɔ́ɔ̄ɓē yā kɔ́ɔ̄ ɓē gə̄ ō ní. Ni i Nə́ɓā kə́ bo ō, tɔ́gən i ngá̰ý ō, to ɓōĺ ngá̰ý ō, a sāā ger̄ ta kum deē tá yā rāań majə seneé aĺ ō, ni i nge mbātə́ yá̰á̰ kə́ kəla nang tə́ kadə̄ deē kadə̄ rāań yá̰a̰ ō. 18Ni i nge rɔ̄ɔ̄ dɔ ngōn̄ hal tə́ ō, dɔ dəyá̰ kə́ ngaa koy tə́ ō, ni i nge tár nge nam̄ kə yá̰a̰ kəsaá ō, kə kūbūú ō. 19Adə̄ ī-táriī ngé nam̄ gə̄ ń ndin̄ dɔ dáńsí tə́ ní ō, tām̄ dan ń ī-ndiī dɔ nang kə́ Ejiptə tə́ ní, sḭḭ̄ i ngé nam̄ gə̄.

20I Kɔ́ɔ̄ɓē Nə́ɓā yāsí n ā ī-ɓōlíī ndílən ō, ā ī-rāāī kəla yān ō, ā ə́hɔī gōn ō, ā ə̄nīī ndūsí i kə rīneé ō ní. 21I ni n ā ī-ɓōkə́niī tɔ̄ȳ ní ō, i nəkɔ́ ngóy n i Nə́ɓā yāsí ń rāā yá̰á̰ kə́ majə ngá̰ý gə̄ ō, kə́ to ɓōĺ ngá̰ý gə̄ ō, tām̄ yāsí tə́ á á̰a̰ī kə kumsí ní. 22Dan ń kaasí gə̄ ugə̄n̄ dɔ nang kə́ Ejiptə tə́ ní, nin̄ i deē kutə sīrí beē ngóy, banī ngɔlaā ní Kɔ́ɔ̄ɓē yāsí rāā adə̄ kutəsí asə naā kə kutə tə́yō̰ gə̄ kə́ dɔ rā̰ tə́.

Currently Selected:

NDŪ NAJƏ̄ 10: SARDC

Highlight

Copy

Compare