NDŪ NAJƏ̄ 9

Nə́ɓā adə̄ Israel gə̄ dɔ nang i karī

1Israel gə̄, ōōī majə. Ɓōólaā ā ī-teēī bā Jurdḛ kə̄ gidə kə́rēý tə́ yā kaw̄ tə̄ɓā nápar de kə́ ngá̰ý gə̄ ō, kə́ ngangə̄n̄ tɔȳn̄sí gə̄ ō, ba taāń ɓē yādə́ kə́ bo gə̄ ō, kə́ ndogə̄ mbal̄ kə́ gidə tə́ gə̄ ngālə̄n̄ ngá̰ý kum kə̄ dɔɔ́ ō. 2Gír de gə̄ ń ā ī-táāī ɓē yādə́ gə̄ ní i ngán Anak gə̄ ń ī-gerī kadə̄ i gír de kə́ ngangə̄n̄ ngá̰ý ō, ngālə̄n̄ ngá̰ý ō, ōōī kadə̄ ədan̄ dɔdə́ tə́ na ké i náā n asə ra ta kum ngán Anak gə̄ tə́ wa ní. 3Ɓōólaā ā ī-gerī kadə̄ i Kɔ́ɔ̄ɓē Nə́ɓā yāsí n i nge njə̄rā nosí tə́ tītə̄ hor kə́ a o̰o̰ loo ní. I ni n i nge tə̄ɓā ngán Anak gə̄ kɔ̄ɔ́ nosí tə́ ō, nge kəla dɔdə́ gíŕ tɔ́gə́sí tə́ ō ní. Ā ī-táāī ɓē yādə́ gə̄ ō, ā ī-nujiī sedə́ kɔ̄ɔ́ malang kanjə̄ kɔr bā̰ā̰ tītə̄ ń Kɔ́ɔ̄ɓē ənīń míndən adə̄sí ní ō.

4Dan ń Kɔ́ɔ̄ɓē Nə́ɓā yāsí a tə̄ɓādə́ kɔ̄ɔ́ nosí tə́ anī ī-lōōī gír̄ kəda na Kɔ́ɔ̄ɓē adə̄sí ta róbə taā dɔ nang ń toō na i najə̄ kəla rāāsí kə́ gōtə́ tə́. Kə́ rɔ̄kum tə́ ní, Kɔ́ɔ̄ɓē a tə̄ɓā nápar de gə̄ ń toō kɔ̄ɔ́ nosí tə́ i tām̄ yá̰a̰ rāādə́ kə́ gōtə́ aĺ tə́ gə̄. 5I tām̄ kəla rāāsí kə́ gōtə́ tə́, aké ngarā̰ kemsí kə́ súmūú tə́ n ā ī-taāīneé dɔ nang yādə́ ní alé. Kɔ́ɔ̄ɓē a tə̄ɓā nápar de gə̄ ń noō kɔ̄ɔ́ nosí tə́ i tām̄ háĺdə́ kə́ majaĺ tə́ ō, i tām̄ míndən ń ənī adə̄ kaasí gə̄ Abəraham ō, Isaak ō, Jakob ō ní tə́. 6Yá̰á̰ ń majə kadə̄ ī-gerī ní, Kɔ́ɔ̄ɓē Nə́ɓā yāsí adə̄sí dɔ nang kə́ majə ń toō i tām̄ kəla rāāsí kə́ gōtə́ tə́ alé, tɔdɔ̄ sḭḭ̄ i gír de kə́ ngé dɔ ngan̄g gə̄.

Israel gə̄ nōn̄ lɔ́r rāān̄ ngōn̄ man̄g tə́

7Ādə̄ əga kemsí dɔ rāā ń ī-rāāī Kɔ́ɔ̄ɓē Nə́ɓā yāsí adə̄ wōn̄g rāān kem dəla loo tə́ ní. Ī-lōōī kadə̄ dɔsí ndígə̄nal nge ń noō. Əla gír dɔ ndɔ̄ ń ī-teēīneé kɔ̄ɔ́ kem ɓē kə́ Ejiptə tə́ ī-reēīneé bátə́ ūgīneé loo ń toō tə́ laā ní, sḭḭ̄ ī-rāāī i kəla mbātə́ najə̄ ta Kɔ́ɔ̄ɓē tə́. 8Sḭḭ̄ ī-rāāī Kɔ́ɔ̄ɓē adə̄ wōn̄g rāān ngá̰ý sesí mbal̄ kə́ Horeb tə́, adə̄ ni gḛy nujə sesí kɔ̄ɔ́ malang.

9Dan ń m-āl̄ dɔ mbalá yā taā bar mbal̄ madə̄ naā ń Kɔ́ɔ̄ɓē əhɔ sesí ní, m̄-rāā ndɔ̄ kutə sɔ́ ō, kadə kutə sɔ́ ō, dɔ mbalá kanjə̄ kəsa yá̰a̰ ō, ka̰ȳ man̄ ō. 10Kɔ́ɔ̄ɓē Nə́ɓā adə̄m̄ bar mbal̄ kə́ jōó gə̄ ń nəkɔ́ ndang najə̄ tū tə́ kə jīneé ní. I najə̄ gə̄ ń ra kum hor tə́ dɔ mbalá ɔr̄ sesí ndɔ̄ kán̄ naā tə́ ní.

11Dan ń ndɔ̄ kə́ kutə sɔ́ gə̄ ō, kadə kə́ kutə sɔ́ gə̄ ō təgān̄ anī, ni-adə̄m̄ bar mbal̄ madə̄ naā gə̄ ní, 12ba ədam̄ na:

Ḭ́ḭ dɔɔ́ ba ī-risə láẃ, tɔdɔ̄ gír deē yāí gə̄ ń ī-teē sedə́ kɔ̄ɔ́ kem ɓē kə́ Ejiptə tə́ ní, rāān̄ yá̰á̰ kə́ majaĺ ngá̰ý. Róbə́ ń m-ɔ́jə́də́ ní nin̄ tɔ̄ɔ̄n̄ gō tə́ kɔ̄ɔ́ ɓá. Nōn̄ gində̄ horoó rāān̄ ɓesə̄ tə́ tām̄ yādə́ tə́. 13Ba Kɔ́ɔ̄ɓē tél ədam̄ ɓáý to̰ na:

M-á̰a̰ā̰ ní, gír de gə̄ ń toō i gír de kə́ ngé dɔ ngan̄g gə̄. 14Ə́ya̰m̄ ādə̄ m̄-nujə sedə́ kɔ̄ɔ́ malang. M-ā m̄-rāā kadə̄ dɔ de gə̄ ndígə̄nal dɔ rīdə́ tə́ kɔ̄ɔ́ dɔ nang tə́. Ba m-ā m̄-rāāī ḭ̄ kadə̄ ī-téĺ nápar de gə̄ kə́ tɔ́gə́də́ ō, kutədə́ ō i ngá̰ý tɔȳ yādə́. 15M-ə́hɔ bar mbal̄ madə̄ naā gə̄ ní jīḿ jōó ba m̄-tūr̄ rɔ̄ḿ kadə̄ m̄-risə kɔ̄ɔ́ dɔ mbal̄ bo ń hor i tū tə́ ní tə́. 16Anī m-á̰á̰sí ī-rāāī ngōn̄ man̄g kə gində̄ kə́ nō horoó ɓesə̄ tə́ tām̄ yāsí tə́. Sḭḭ̄ ī-rāāī majaĺ kə Kɔ́ɔ̄ɓē Nə́ɓā yāsí rɔ̄kum. Tɔdɔ̄ róbə́ ń Kɔ́ɔ̄ɓē ɔjəsí ní ī-tɔ̄ɔ̄ī gō tə́ láẃ ngá̰ý kɔ̄ɔ́. 17Loo ń noō tə́ m̄-teē gír bar mbal̄ kə́ jōó gə̄ ń m-ə́wádə́ jīḿ jōó ní m̄-tə́nā m̄-tɔ̄də́ ta kumsí tə́.

Moijə rāā Nə́ɓā ɓɔ́ tām̄ yā Israel gə̄ tə́

18Loo ń noō tə́ m̄-tél m-ə̄sō kə̄ nang tə́ no Kɔ́ɔ̄ɓē tə́. m̄-rāā ndɔ̄ kutə sɔ́ ō, kadə kutə sɔ́ ō, kanjə̄ kəsa yá̰a̰ ō, ka̰ȳ man̄ ō, ɓáý to̰ najə̄ yā yá̰á̰ kə́ majaĺ ń ī-rāāī tə́ ní. Yá̰á̰ ń ī-rāāī ní nel̄ kem Kɔ́ɔ̄ɓē alé. 19Yá̰á̰ ń m̄-ɓōĺ ní i wōn̄g kə́ ngá̰ý yā Kɔ́ɔ̄ɓē. Tōrə̄n sesí ngá̰ý adə̄ ni sāā nujə sesí kɔ̄ɔ́ malang. Banī kum mbang ngeé ń noō tə́ ní Kɔ́ɔ̄ɓē oō ndɔ̄ȳ yāḿ ɓáý to̰. 20Wōn̄g rāān ngá̰ý kə Aaro̰ ō, adə̄ ni ndigə tɔ̄l̄ Aaro̰ kɔ̄ɔ́, banī m̄-rāān ɓɔ́ tām̄ yā Aaro̰ tə́ ō. 21M-ún ngōn̄ man̄g ń ī-rāāī á i kəla rāāsí kə́ majaĺ ní m̄-róō horoó ba m-úr ndujə̄ tə́, m̄-seĺ kum man̄ ń ḭḭ dɔ mbalá a nūgə́ ní tə́.

22Sḭḭ̄ ī-rāāī Kɔ́ɔ̄ɓē ādə̄ wōn̄g rāān Tabera ō, Masa ō, Kibərot Taaba ō#9.22 Kibərot Taaba: Á̰a̰ī Tə́da 11.3,34; Teē 17.7.. 23Tá dan ń jḭḭ̄ i Kades Barnea#9.23 Kades Barnea: Á̰a̰ī Tə́da 13.26. á ni-əlasí əda na kə āwī kə ī-taāī dɔ nang ń n-ādəsí ní anī, sḭḭ̄ ī-mbātíī koō ta Kɔ́ɔ̄ɓē Nə́ɓā yāsí kɔ̄ɔ́. Ī-taāī kemən alé, adə̄ ōōī tan alé. 24Jóo nəkɔ́ ń m̄-gerə̄ńsí toó ní sḭḭ̄ ī-rāāī i kəla mbātə́ najə̄ ta Kɔ́ɔ̄ɓē tə́.

25Adə̄ dan ń Kɔ́ɔ̄ɓē əda rī nujə sesí kɔ̄ɔ́ malang ní, m-ə̄sō kə̄ nang tə́ non tə́, m̄-rāā ndɔ̄ kutə sɔ́ ō, kadə kutə sɔ́ ō. 26m̄-rāān ɓɔ́ m-ə́da na: Kɔ́ɔ̄ɓē Nə́ɓā, ī-lōō nujə kə gír deē yāí gə̄ ń ī-gān̄g dɔdə́ loo de kə́ bo tə́ ō, ī-teē sedə́ kɔ̄ɔ́ Ejiptə kə tɔ́gí kə́ ngá̰ý ō ní. 27Ādə̄ əga kemií dɔ ngé kəla yāí gə̄ ń i Abəraham ō, Isaak ō, Jakob ō ní tə́. Ī-lōō kəndā kumií gō dum̄ naā yā gír de gə̄ ń toō tə́ ō, kem ndul yādə́ tə́ ō, majaĺ yādə́ tə́ ō. 28Ī-lōō rāā kadə̄ de gə̄ kə́ kem ɓē ń ī-teē sejí kɔ̄ɔ́ kemeé ní ədan̄ na Kɔ́ɔ̄ɓē na asə kaw̄ kə de gə̄ ń toō dɔ nang ń ni-ənī ndūn yā kadə̄də́ ní tə́ alé. Na im̄də́ i mbée n teē sedə́ kɔ̄ɔ́ kem ɓēé yā kaw̄ kəya̰də́ kadə̄ oyn̄ kem dəla loo tə́ ní. 29Kɔ́ɔ̄ɓē, nin̄ i gír deē yāí gə̄ ń ī-teē sedə́ kɔ̄ɔ́ kem ɓē kə́ Ejiptə tə́ kə tɔ́gí kə́ ngá̰ý ō, kə jīí kə́ kəla kə̄ dɔɔ́ ō ní.

Currently Selected:

NDŪ NAJƏ̄ 9: SARDC

Highlight

Copy

Compare