1 YÁ̰A̰ GƏ̄ 16

1Reē əndān̄ sandúkə ní kem kújə tandā ń Dabid adə̄ udən̄ kə rīí ní danaá bang. Gō tə́ anī ndējə̄n̄ Nə́ɓā yá̰a̰ tun̄ gə̄ kə́ róō horoó ō, yá̰a̰ tun̄ gə̄ kə́ tām̄ yā kem kógə̄ḿ tə́ ō. 2Dan ń Dabid tun̄ yá̰a̰ gə̄ ń noō malang adə̄ Nə́ɓā oy anī tɔ́r̄ tan dɔ kósə de gə̄ tə́ kə rī Kɔ́ɔ̄ɓēé. 3Gō tə́ anī nə̄ɓō ngán Israel gə̄ malang kə́ dəngam gē kə dəyá̰ gē yá̰a̰ kəsa: Mápá kə́ gōr̄ ō, kan̄ túmbur kə́ kɔsə ba tənī dɔ bəran ō, kan̄ kāgə̄ nduú kə́ kɔsə ba tənī dɔ bəran ō, kógə̄ḿ kógə̄ḿ kə dɔdə́ gēé.

Ngán Lebi gə̄ tɔ̄ȳn̄ Kɔ́ɔ̄ɓē kə pāá

(Á̰a̰ī Pā 105.1-15; 96; 106.1,47-48)

4Dabid tə́ndā ngán Lebi kə́rēý gə̄ ń ta kəla i dɔdə́ tə́ ní no sandúkə yā Kɔ́ɔ̄ɓē tə́, kadə̄ rāān̄ nāā yā Kɔ́ɔ̄ɓē Nə́ɓā yā Israel ō, kadə̄ tɔ̄ȳn̄ Kɔ́ɔ̄ɓē Nə́ɓā yā Israel ō, ɔsə̄n̄ gɔnən ō. 5Jama dɔdə́ i Asap, ba nge kɔsə kíl Asap kem kəlaá i Jakari. Gō tə́ anī i Ajiel ō, Semiramot ō, Yeyel ō, Matitia ō, Eliab ō, Benaya ō, Obed Edom ō. Yeyel i nge kugə kənde kə́ kəlān i ngá̰ý ō, kənde kə́ kəlān i ngá̰ý aĺ ō. Ba Asap i nge kənda gində̄ kə́ laa gə̄ kə́ yā kənda naā tə́ kadə̄ ɓār̄ gə̄. 6Ngé tun̄ yá̰a̰ gə̄ ń i Benaya ō, Yajiel ō, ní, nin̄ i ngé kɔ̄ŕ bərúnjə́ ngándáńg no sandúkə madə̄ naā yā Nə́ɓā tə́. 7Dabid əla gír kəndā kəla tɔ̄ȳ Kɔ́ɔ̄ɓē dɔ Asap tə́ kə ngákó̰o̰n gēé i ndɔ̄ ń noō tə́.

8Ɔ́siī gɔn Kɔ́ɔ̄ɓē, ī-ɓāríī rīn kə ndū boó.

Ə̄nīī gotə yá̰á̰ kə́ to ɓōĺ gə̄ ń ni-rāā ní

dan gír de gə̄ tə́ ādə̄ oōn̄.

9Ə̄nīī pā ō, ə́ndaī yá̰á̰ kə́ ɓār̄ gōsə̄ gə̄ ō, tām̄ yān tə́.

Ə̄nīī gotə yá̰á̰ kə́ yáā gə̄ malang ń ni-rāā ní.

10Sḭḭ̄ ngé sāā Kɔ́ɔ̄ɓē gə̄, ɔ́riī ta rɔ̄sí tām̄ yā rīn kə́ táĺ tə́,

ādī rɔ̄sí nel̄sí.

11Ī-sāāī Kɔ́ɔ̄ɓē ō, tɔ́gən ō,

ī-sāāī kadə̄ ī-ndiī ta kumən tə́ ngándáńg.

12-13Sḭḭ̄ ngán kaa nge kəla yān Israel gə̄,

sḭḭ̄ ngán Jakob gə̄ ń ni-gə̄rāsí ní,

ādə̄ əga kemsí dɔ yá̰á̰ kə́ yáā gə̄ ō,

kə́ to ɓōĺ gə̄ ō ń ni-rāā tə́ ní ō,

dɔ sarya gə̄ ń ni-gān̄g tə́ ō ní.

14I ni n i Kɔ́ɔ̄ɓē Nə́ɓā yājí

kə́ nge ko̰o̰ ɓē dɔ dɔ nang tə́ malang ní.

15Ādə̄ əga kemsí dɔ madə̄ naā yān tə́ ngándáńg.

I najə̄ kə́ tām̄ yā de gə̄ tə́ ō,

ngándə́ gə̄ tə́ ō, ngán kaadə́ gə̄ tə́ ō, bátə́ ugə̄ń dɔ ngán kaadə́ gə̄

kə́ nge ko̰ dūbú tə́.

16Madə̄ naā ní i madə̄ naā ń ni-əhɔ kə Abəraham ō,

túbə adə̄ Isaak najə̄n tə́ ɔjəń kə̄ ndágá kadə̄ i rɔ̄kum ō,

17rāā adə̄ tél i yá̰á̰ kə́ ndang kadə̄ yā rāā tām̄ yā Jakob tə́ ō,

madə̄ naā kə́ ngándáńg tām̄ yā Israel tə́ ō ní.

18Dan ń ni-əda na: M-ādī dɔ nang kə́ Kanaan ń i núsə

dɔ nang kə́ gān̄g kadə̄sí kə ngánsí gə̄ ō, ngán kaasí gə̄ ō,

kadə̄ i yá̰a̰ kənge yāsí ní

19Dan ngeé ń noō tə́ ni, kutədə́ i ngá̰ý alé.

I ngé nam̄ ɓē gə̄ kə́ nin̄ i sḛ́ý beē ngóy.

20Nin̄ aw̄n̄ ō, télən̄ ō, kə̄ dan nápar de kə́ rang gə̄ tə́.

Nin̄ ḭḭn̄ ɓē ko̰o̰ kə́rēý tə́ aw̄n̄ kə́ noō tə́.

21Banī Nə́ɓā əya̰ deē kógə̄ḿ adə̄ rāādə́ yá̰á̰ kə́ majaĺ alé.

Ənda mban̄g gə̄ najə̄ yādə́ tə́.

22Əda de gə̄ na: Ī-lōōī kɔdə rɔ̄ ngé gə̄ ń m-úr yibə̄ dɔdə́ tə́ ní,

ī-lōōī rāā ngé koō ta yāḿ gə̄ yá̰á̰ kə́ majaĺ!

23De kə́ dɔ nang tə́ gə̄ malang, ə̄nīī pā tām̄ yā Kɔ́ɔ̄ɓē tə́,

ə́daī de gə̄ kə ndɔ̄ gə̄ na ni i nge kajə deē.

24Ɔ́jiī de gə̄ malang najə̄ kɔsə gɔn yān.

Yá̰á̰ kə́ to kɔr kum gə̄ ń ni-rāā ní, ɔ́jiī gír de gə̄ malang gotə.

25Tɔdɔ̄ Kɔ́ɔ̄ɓē i de kə́ bo ō, asə kadə̄ de gə̄ ɓōkə́nən̄ tɔ̄ȳ ō.

Ni to ɓōĺ ngá̰ý tɔȳ nə́ɓā gə̄ malang ń i ɓesə̄ gə̄ ní.

26Nə́ɓā gə̄ malang yā gír de gə̄ i yá̰á̰ kə́ kanjə̄ kumən.

Banī Kɔ́ɔ̄ɓē rāā dɔ rā̰.

27Loo kə́ ndə́lē pipir ō, unjə̄ kow ō, i kété non tə́.

Loo ń ni-ndi tū tə́ ní tɔ́gə ō, rɔ̄nel̄ ō, i ngá̰ý tū tə́.

28Gír de gə̄ kə́ kə gō ɓē gə̄ malang, ī-reē ī-rɔyī Kɔ́ɔ̄ɓē,

ə́daī najə̄ kɔsə gɔn yān ō, tɔ́gə yān ō.

29Ī-reē ɔ́siī gɔn rīn,

ī-reēī kə kadə̄ karī yāsí gēé kə̄ non tə́.

Ɔ́siī nosí nang tə́ no Kɔ́ɔ̄ɓē tə́ loo ń

ni ɔjə háĺ kə́ táĺ yān ní.

30De gə̄ malang kə́ dɔ nang tə́, ī-ndebiī ta kumən tə́.

Dɔ nang ra ngan̄g, yá̰á̰ yéȳn alé.

31Ādə̄ dɔ rā̰ rāā rɔ̄nel̄. Ādə̄ dɔ nang tḭ́ḭ̄ bal walya.

Ə́daī dan nápar de gə̄ tə́ malang na Kɔ́ɔ̄ɓē i mban̄g.

32Ādə̄ kōō bā bo kə yá̰a̰ malang kə́ tū tə́ ɓār̄ bu bu!

Ādə̄ loo kə́ bembeé kə yá̰á̰ kə́ kemeé gə̄ malang rāān̄ rɔ̄nel̄!

33Ādə̄ kāgə̄ gə̄ malang kə́ kem ku gə̄ tə́ túrə̄n̄ kɔĺ rɔ̄nel̄,

tɔdɔ̄ ni-reē i ko̰o̰ ɓēé dɔ nang tə́.

34Ī-tɔ̄yī Kɔ́ɔ̄ɓē tɔdɔ̄ ni i nge kem majə ō,

kem majə yān a to ngándáńg ō.

35Ba ə́gaī kɔŕ kə̄ dɔn tə́ ə́daī na: Nə́ɓā nge kajəjí, ájə́jí!

Ī-gān̄g dɔjí jī nápar de kə́ rang gə̄ tə́, ba ɔ́sə njají kə̄ naā tə́.

Loo ń noō tə́ ré j-a jə-tɔ̄yī anī,

j-a j-əda rīí kə́ táĺ ō,

j-a j-a̰a̰ yá̰a̰ ta kum naā tə́ tām̄ kɔsə kə́ j-ɔsə gɔnií tə́ ō.

36Ādə̄ de gə̄ ɓōkə́n̄ Kɔ́ɔ̄ɓē ń i Nə́ɓā yā Israel ní tɔ̄ȳ!

Ī-tɔ̄yin̄ kə kum mbang gə̄ malang!

Loo ń noō tə́ ngé kán̄ naā gə̄ malang unən̄ ndūdə́ kə̄ dɔɔ́ ədanə̄ń na: Adə̄ i tītə̄ ń noō, ɔ́siī gɔn Kɔ́ɔ̄ɓē!

37Dabid əndā Asap nin̄ kə ngákó̰o̰n gēé ta sandúkə madə̄ naā yā Kɔ́ɔ̄ɓē tə́, kadə̄ rāān̄ kəla yādə́ ta tə́ kanjə̄ kəya̰ ta kə gō ń kadə̄ rāān̄neé kə dɔ ndɔ̄ gə̄ ní ō, 38əndā Obed Edom kə ngéén gēé, deē kutə mehḛ́ gidə i sɔ́sɔ́, kadə̄ ngɔ̄mə̄n̄ ta loo ō, əndā Obed Edom kə́ ngōn̄ Yedutun ō, Hosa ō, kadə̄ ngɔ̄mə̄n̄ ta loo ō. 39Dabid əndā Sadok nge tun̄ yá̰a̰ nin̄ kə ngákó̰o̰n kə́ ngé tun̄ yá̰a̰ gēé ta kújə yā Kɔ́ɔ̄ɓē tə́, loo kə́ kḭḭ kə̄ dɔɔ́ kə́ Gabaon tə́, 40kadə̄ ndējə̄n̄ Kɔ́ɔ̄ɓē yá̰a̰ tun̄ kə́ róō horoó gə̄ loo tun̄ yá̰á̰ tə́ dəloí ō, loo sɔlí ō, kə dɔ ndɔ̄ gə̄ kanjə̄ kəya̰ ta ō, kadə̄ rāān̄ yá̰a̰ malang kə́ ndang tū ndū najə̄ ń Kɔ́ɔ̄ɓē adə̄ Israel gə̄ tə́ ní ō. 41Heman nin̄ kə Yedutun i sedə́ ō, gotə de kə́ rang gə̄ ń gə̄rān̄də́ kə rī tɔ̄ȳ Kɔ́ɔ̄ɓēé kadə̄ ədan̄ na kem majə yān a to ngándáńg ní nin̄ i sedə́ ō. 42Kəla rā Heman nin̄ kə Yedutun i ka̰a̰ gō bərúnjə gə̄ ō, gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, yá̰á̰ kə́ rang kə́ ɓār̄ gōsə̄ gə̄ ń a dānə̄nəń gō pā gə̄ yā Nə́ɓā ní ō. Ngán Yedutun gə̄ i ngé ngɔ̄m̄ ta róbə gə̄.

43Gō tə́ anī ngán Israel gə̄ malang télən̄ kə̄ ɓē yādə́ gə̄ tə́ kógə̄ḿ kógə̄ḿ ō, Dabid tél aw̄ gogə́ ɓēé yā tɔ́r̄ tan dɔ deē yān gə̄ kə́ kem kújə yān tə́ ō.

Currently Selected:

1 YÁ̰A̰ GƏ̄ 16: SARDC

Highlight

Copy

Compare