1 YÁ̰A̰ GƏ̄ 15
15
Dabid rāā loo kun sandúkə kə́ táĺ
1Dabid adə̄ rāān̄ kújə yān kem ɓē yān tə́. Ni-rāā loo tām̄ yā sandúkə́ kə́ táĺ yā Nə́ɓā tə́ ba udə kújə tandā tū tə́ kadə̄ sandúkə́ ní ndi gírí. 2Gō tə́ anī, ni-əda na: I ngán Lebi gə̄ ngóy n a ətōn̄ sandúkə́ kə́ táĺ yā Nə́ɓā ní, tɔdɔ̄ i nin̄ n Kɔ́ɔ̄ɓē gə̄rādə́ kadə̄ ətōn̄ sandúkə yān ō, kadə̄ rāān̄ kəla yān ō ngándáńg ní.
3Dabid ɓāŕ Israel gə̄ adə̄ kánə̄n̄ naā Jerusalem malang, kadə̄ aw̄ unən̄ sandúkə yā Kɔ́ɔ̄ɓē reēnneé əndān̄ loo ń ni-rāā tām̄ yān tə́ ní tə́. 4Ni-ɔsə dɔ ngé tun̄ yá̰a̰ gə̄ ń i de kə́ gír kaa yā Aaro̰ tə́ gə̄ ní ō, ɔsə dɔ ngán Lebi gə̄ ō naā tə́. 5De kə́ gír kaa yā Kehat tə́ gə̄ i deē 120. Ngoldə́ i Uriel. 6De ké gír kaa yā Merari tə́ gə̄ i deē 220. Ngoldə́ i Asaya. 7De kə́ gír kaa yā Gersom tə́ gə̄ i deē 130. Ngoldə́ i Joel. 8De kə́ gír kaa yā Elisapan tə́ gə̄ i deē 200. Ngoldə́ i Semaya. 9De kə́ gír kaa yā Hebron tə́ gə̄ i deē 80. Ngoldə́ i Eliel. 10De kə́ gír kaa yā Ujiel tə́ gə̄ i deē 112. Ngoldə́ i Aminadab. 11Dabid ɓāŕ ngé tun̄ yá̰a̰ gə̄ ń i Sadok nin̄ kə Abiatar ní ō, ngán Lebi gə̄ ń i Uriel ō, Asaya ō, Joel ō, Semaya ō, Eliel ō, Aminadab ō ní ō, 12ba ədadə́ na: Sḭḭ̄ gə̄ ń i ngār gə̄ kə́ dɔ de gə̄ kə́ gír kojə yā Lebi tə́ gə̄ ní, sḭḭ̄ gə̄gē, ngákó̰ó̰sí gə̄gē, ɔ̄rī kam̄sí ba āw̄ úniī sandúkə yā Kɔ́ɔ̄ɓē Nə́ɓā yā Israel ī-reēīneé loo ń m̄-rāā tām̄ yān tə́ ní tə́. 13Tām̄ dan ń sḭḭ̄ ī-gətóoī ní, Kɔ́ɔ̄ɓē Nə́ɓā əndají tɔdɔ̄ jə-rāā yá̰a̰ i kə gō ń ni ndigə ní alé. 14Loo ń noō tə́ ngé tun̄ yá̰a̰ gə̄ ō, ngán Lebi gə̄ ō, ɔrə̄n̄ kam̄də́ yā kətōń sandúkə yā Kɔ́ɔ̄ɓē Nə́ɓā yā Israel. 15Gō tə́ anī ngán Lebi gə̄ unən̄ sandúkə́ ní kə sáa kāgə̄ gēé əndān̄ dɔ bɔ̄gə̄də́ tə́ tītə̄ ń Kɔ́ɔ̄ɓē əndāń ta Moijə tə́ adə̄ ədań ní. 16Dabid əda ngol ngán Lebi gə̄ kadə̄ tə́ndān̄ ngákó̰ó̰də́ kə́ ngé kənī pā gə̄ kem kəla yādə́ tə́, kadə̄ ənīn̄ pā kə yá̰á̰ kə́ ɓār̄ gōsə̄ gēé. Yá̰a̰ gə̄ ní i kənde gə̄ kə́ kəlādə́ i ngá̰ý gə̄ ō, kə́ kəlādə́ i ngá̰ý aĺ gə̄ ō, i gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō. A ugən̄ kənde gə̄ ní ō, a əndan̄ gində̄ kə́ laa gə̄ ní naā tə́ ō, kadə̄ kōōdə́ ɓār̄ ngá̰ý yā kɔjəń na rɔ̄nel̄ to.
17De gə̄ ń ngán Lebi gə̄ tə́ndān̄də́ kem kəla yādə́ gə̄ tə́ ní i Heman ngōn̄ Joel ō, Asap ngōn̄ Berekia ń gə̄rānən̄ dan ngákó̰o̰n gə̄ tə́ ní ō, Etan ngōn̄ Kusaya ń gə̄rānən̄ dan ngán Merari gə̄ ń i ngákó̰ó̰də́ gə̄ ní tə́ ō. 18De gə̄ ń i sedə́ ō, utə̄n̄ gōdə́ ō ní, i ngákó̰ó̰də́ gə̄ kə́ ngé ngɔ̄m̄ ta róbə́ kújə gə̄. Rīdə́ n toó: Jakari, Ben, Yajiel, Semiramot, Yehiel, Uni, Eliab, Benaya, Maseya, Matitia, Elipəlehu, Mikəneya, Obed Edom, Yeyel. 19Dan ngé kənī pā gə̄ tə́ ní, ngé kənda gində̄ kə́ laa gə̄ kə́ yā kənda naā tə́ kadə̄ ɓār̄ gə̄ i Heman ō, Asap ō, Etan ō. 20Ngé kugə kənde kə́ kəlādə́ i ngá̰ý ba ɓār̄ ndū dūú gə̄ i Jakari ō, Ajiel ō, Semiramot ō, Yehiel ō, Uni ō, Eliab ō, Maseya ō, Benaya ō. 21Ngé kugə kənde kə́ kəlān i ngá̰ý gə̄ yā kunəń dɔ pā gə̄ i Matitia ō, Elipəlehu ō, Mikəneya ō, Obed Edom ō, Yeyel ō, Ajajia ō. 22Dan ngán Lebi gə̄ tə́ ní Kenania i ngār yā ngé kətō sandúkə madə̄ naā. I ni n i nge kəndā kumən gō kəla ń noō tə́ ní, tɔdɔ̄ ger̄ loon majə. 23-24Dan ngé ngɔ̄m̄ ta róbə gə̄ tə́ ní Berekia nin̄ kə Elkana ō, Obed Edom nin̄ kə Yehiya ō, i ngé ngɔ̄m̄ sandúkə gə̄. Ngé tun̄ yá̰a̰ gə̄ ń i Sebania ō, Yosapat ō, Netanel ō, Amasai ō, Jakari ō, Benaya ō, Eliejer ō ní, nin̄ i ngé kɔ̄ŕ bərúnjə gə̄ no sandúkə yā Nə́ɓā tə́.
Unən̄ sandúkə madə̄ naā reēnəń Jerusalem
(Á̰a̰ī 2 Sam 6.12-19)
25Loo ń noō tə́ Dabid ō, kum kɔɔ̄ gə̄ yā Israel gə̄ ō, ngol de kə́ dūbú gə̄ ō, aw̄n̄ kə rɔ̄nelēé gō sandúkə yā Kɔ́ɔ̄ɓē tə́ ɓē Obed Edom yā kun reēń. 26Tá tɔ̄lə̄n̄ man̄g kə́ bəra gə̄ sīrí ō, bal batə̄ gə̄ sīrí ō, ba tunə̄n̄ kadə̄ Nə́ɓā rāań kə ngán Lebi kə́ ngé kətō sandúkə madə̄ naā yā Kɔ́ɔ̄ɓē gə̄ ní 27Dabid ō, ngán Lebi gə̄ kə́ ngé kətō sandúkə gə̄ ō, gōsə̄ gə̄ ō, ngār yā gōsə̄ gə̄ ń i Kenania ní ō, o̰ō̰n̄ i kūbə̄ lḛ́ḛ́ kə́ kəlā kəjōn kídə̄ yululu. Dabid əla kūbə̄ epod lḛ́ḛ #15.27 Epod lḛ́ḛ: Á̰a̰ī 1 Sam 2.18 rɔ̄n tə́. 28Ngán Israel gə̄ malang unən̄ sandúkə madə̄ naā yā Kɔ́ɔ̄ɓē aw̄n̄neé Jerusalem. Nin̄ əgan̄ kɔŕ rɔ̄nel̄ dɔ tə́ ō, kɔ̄rə́n̄ tōw̄ ō, bərúnjə ō, əndan̄ gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, ugən̄ kənde gə̄ kə́ kəlādə́ i ngá̰ý gə̄ ō, kə́ kəlādə́ i ngá̰ý aĺ gə̄ ō.
29Dan ń sandúkə madə̄ naā yā Kɔ́ɔ̄ɓē ugə̄ ɓē yā Dabid tə́ ní anī, Mikal nə̄yá̰ Dabid kə́ ngōn̄ Saul əga kumən kə̄ ndágá ko̰rō̰ kújə́ tə́ a̰a̰ń loo. Ni-a̰a̰ mban̄g Dabid loo tḭ́ḭ bal ndām̄ tə́ anī idə tan gírən tə́.
Currently Selected:
1 YÁ̰A̰ GƏ̄ 15: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
