1 YÁ̰A̰ GƏ̄ 17
17
Nə́ɓā ənī míndən adə̄ Dabid
(Á̰a̰ī 2 Sam 7.1-17)
1Dabid ndi kem kújə mban̄g yān tə́, anī ndɔ̄ kógə̄ḿ tə́ əda Natan nge koō ta yā Nə́ɓā na n-ndi na i kem kújə́ kə́ rāā kə kāgə̄ sédəreé tə́, ba sandúkə madə̄ naā yā Kɔ́ɔ̄ɓē na ndi na i gír kújə tandāá ní ké i ba̰ý wa. 2Anī Natan tél ədan na yá̰a̰ malang ń na gír̄ rāā ní kə rāā, tɔdɔ̄ Nə́ɓā na i naā tə́ seneé. 3Banī ndɔ̄ɔ́ ndɔ̄ ń noō tə́ anī Nə́ɓā ɔr̄ najə̄ kə Natan ədan na: 4Āw̄ ə́da nge kəla yāḿ Dabid na yá̰á̰ ń Kɔ́ɔ̄ɓē əda ní n toó: I ḭ̄ n ā ī-rāā kújə kadə̄ m̄-ndi kemeé ní alé. 5Tɔdɔ̄ əla gír ndɔ̄ ń m̄-teēń kə Israel kɔ̄ɔ́ kem ɓē kə́ Ejiptə tə́ bátə́ ɓōólaā ní, m̄-ndi i kem kújú alé, banī m̄-ndi i gír kújə tandā gə̄ tə́ n m-ā m̄-ndɔ́təń kə̄ kété kété ní. 6Tá ɓáý to̰ ní loo malang ń m̄-njə̄rā kə Israel gēé tū tə́ ní, m-ə́ya̰ kəla ko̰o̰ ɓē dɔ gír deē yāḿ gə̄ tə́ i gír jī ngé sarya gə̄ tə́. Banī deē kógə̄ḿ dandə́ tə́ kə́ m̄-dəjen najə̄ m-ə́da na ké i tām̄ rí tə́ áké rāā kújə kāgə̄ sédər adə̄m̄ aĺ wa ní gətóo. 7Adə̄ ngɔlaā ní āw̄ ɔ̄r̄ najə̄ kə nge kəla yāḿ Dabid ə́dan na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý ɔr̄ ní n toó: I mā n m-ɔ̄rī ta yá̰a̰ kul̄ gə̄ tə́ bembeé ba m-ə̄ndāī ngār dɔ Israel gə̄ ń i gír deē yāḿ gə̄ ní tə́. 8Loo malang ń āw̄ tū tə́ ní mā i seí naā tə́ ō, m̄-rāā adə̄ madə̄ ba̰ā̰í gə̄ gətóon̄ kɔ̄ɔ́ noí tə́ malang ō, m-ā m̄-rāā kadə̄ rīí ɓār̄ tītə̄ yā mban̄g kə́ bo ngá̰ý kə́ dɔ nang tə́ gə̄ ō. 9M-ā m̄-gō̰ loo yā kadə̄ gír deē yāḿ gə̄ ń i Israel gə̄ ní. M-ā m-ə̄ndādə́ tū tə́ kadə̄ ndin̄ gotə kógə̄ḿ loo yādə́ tə́. Yá̰a̰ a yéȳdə́ to̰ aĺ ō, ngé rāā majaĺ gə̄ a rāān̄də́ ndoō tə́ tītə̄ kə́ kété ń, 10m-ə̄ndań ngé sarya gə̄ dɔdə́ tə́ ní to̰ aĺ ō. m̄-tetə dɔ madə̄ ba̰ā̰í gə̄ malang. Ba ngɔlaā ní mə̄kɔ́ Kɔ́ɔ̄ɓē m-ə́daī na m-ā m̄-rāā kújə yā kadī#17.10 Kújə: Kumən na, adə̄ i de kə gír kojə yā mban̄g Dabid tə́ n na a ndi mban̄g gotən tə́ ní.. 11Loo ń ré ndɔ̄í gə̄ təgān̄ adə̄ óy āw̄ gō kaaí gə̄ tə́ ní anī, m-ā m-ə̄ndā ngōn̄ kemií gotií tə́. M-ā m̄-rāā kadə̄ a ndi ngan̄g dɔ ko̰o̰ ɓē yān tə́. 12I ni n a rāā kújə yāḿ ní, ba mā m-ā m̄-rāā kadə̄ kōr̄ kāgə̄ mbang yān a ndi ngan̄g ngándáńg. 13Kə́ tām̄ yān tə́ ɓáa mā i bɔbə̄n, ba kə́ tām̄ yāḿ mā tə́ ɓáa ni i ngōnə̄ḿ. M-ā m-ɔ̄r̄ jīḿ gírən tə́ kɔ̄ɔ́ tītə̄ ń m-ɔ̄rəń jīḿ gír mban̄g kə́ kété noí tə́ ní alé. 14M-ā m̄-rāā kadə̄ ni a ndi ngándáńg kem kújə yāḿ tə́ ō, kem ɓē ko̰o̰ yāḿ tə́ ō, kōr̄ kāgə̄ mbang yān a ndi ngan̄g ngándáńg ō.
15Natan əda Dabid yá̰a̰ malang ń Nə́ɓā ədan kem nī ń toō tə́ ní.
Ndɔ̄ȳ yā Dabid
(Á̰a̰ī 2 Sam 7.18-29)
16Tā anī mban̄g Dabid aw̄ ndi nang tə́ ta kum Kɔ́ɔ̄ɓē tə́ ba əda na: Kɔ́ɔ̄ɓē Nə́ɓā, mā i náā ō, gír kojə yāḿ i rí kógə̄ḿ ō, tɔdɔ̄ yá̰a̰ malang ń ādə̄jí kɔ̄ɔ́ ɓá ní, jə-ndetə kadə alé. 17Banī Kɔ́ɔ̄ɓē, kə́ tām̄ yāí tə́ ɓáa nge ń noō asə aĺ ɓáý adə̄ ə̄nī míndí yā rāā yá̰a̰ tām̄ yā kojə yāḿ tə́ ɓáý. Ḭ̄ ī-rāām̄ mā i de kə́ bo ngá̰ý tə́. Kɔ́ɔ̄ɓē Nə́ɓā yāḿ, 18kɔsə ń ɔ́sə gɔnəḿ ní kə m-ə́da na i rí dɔ tə́? Tām̄ ḭ̄ ī-gerəm̄ mā nge kəla yāí. 19Kɔ́ɔ̄ɓē, ī-rāā yá̰a̰ malang kə́ majə ngá̰ý gə̄ ń noō ɔ́jəń kəla yāí kə́ bo al̄ naā gə̄ kə̄ ndágá i tām̄ táŕ kə́ ī-tárəm̄ tə́. 20Kɔ́ɔ̄ɓē, de kə́ tītīí gətóo. Kə gō yá̰a̰ malang ń j-oō kə mbījí ní, Nə́ɓā kə́ rang gətóo ba i īkɔ́ ngóy n i Nə́ɓā ní. 21Dan nápar de gə̄ malang kə́ dɔ nang tə́ ní, nápar de gə̄ kógə̄ḿ gə̄ kə́ ton̄ tītə̄ Israel gə̄ ndin̄ noó a? I nin̄ ngóy n ī-gān̄g dɔdə́ jī de kə́ Ejiptə gə̄ tə́ ba ī-rāādə́ gír deē yāí gə̄ tə́ ní aĺ a. Ḭ̄ ī-rāā yá̰á̰ kə́ to kɔr kum ngá̰ý gə̄, adə̄ i yá̰á̰ kə́ to ɓōĺ ngá̰ý gə̄, ī-tə̄ɓāń nápar de kə́ rang gə̄ kɔ̄ɔ́ no gír deē yāí gə̄ tə́ adə̄ rīí ɓār̄ ń. 22Kɔ́ɔ̄ɓē, ḭ̄ ī-rāādə́ gír deē yāí gə̄ tə́ kə́ njɔ́ḿ gə̄ tə́. Ḭ̄ ī-tél Nə́ɓā yādə́. 23Ngɔlaā ní Kɔ́ɔ̄ɓē, ī-rāā yá̰á̰ ń ə́dá ní, ādə̄ kənī míndə yāí kə́ ɔjə dɔḿ mā ō, gír kojə yāḿ ō, reē udə gírí majə ngándáńg. 24A̰á̰ā̰, ādə̄ kənī míndə́ ní reē udə gíŕí adə̄ de gə̄ tɔ̄ȳn̄neé rīí ngándáńg. A ədan̄ na Nə́ɓā yā Israel, Nə́ɓā ń i Nə́ɓā kə́ tām̄ yā Israel tə́ ní i Kɔ́ɔ̄ɓē kə́ bo kə́ tɔ́gən i ngá̰ý. Ī-rāā ādə̄ gír kojə yā nge kəla yāí to ngándáńg ta kumií tə́. 25Tɔdɔ̄ Nə́ɓā yāḿ, i īkɔ́ n ī-tām̄ mā nge kəla yāí ə́da na ā ī-rāā kújə#17.25 Kújə: Kumən na, adə̄ i de kə gír kojə yā mban̄g Dabid tə́ n na a ndi mban̄g gotən tə́ ní. yā kadə̄m̄ ní. I tām̄ najə̄ ń noō tə́ n m-ə́hɔń rɔ̄ḿ tɔgə m-ɔ̄rəń najə̄ ń toó seí ní. 26Kɔ́ɔ̄ɓē, i ḭ̄ n i Nə́ɓā ō, ə̄nī ndūí yā rāā kadə̄ m̄-ndi majə ō ní. 27Ngɔlaā ní ī-rāā majə kə gír kojə yāḿ mā nge kəla yāí, ādə̄ gír kojə yāḿ to ta kumií tə́ ngándáńg. Kɔ́ɔ̄ɓē, dan ń i ḭ̄ n ī-rāā majə seneé ní, ni a ndi majə ngándáńg.
Currently Selected:
1 YÁ̰A̰ GƏ̄ 17: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
