Ɔzhɔnu 11
11
Lukwu Undu Ɔlazarɔ
1Onzu uwufo a pwofya o ya wu tee Ɔlazarɔ uwu kwuse ungwu Ɔbɛtani, kwuse ungwu Omeri mbala umanyiwu Omata. 2Omeri ele akwu uwu gba a ngbɛ Ɔkwu anyi umbu umbwɔ ferere mu alɛ akwɛyi a nwu yi ma mu inyi wu le, Ɔlazarɔ ele akwu umanyi uwu Omeri. 3Ɛmanyi wu eko mbɔlɛ o lɔ ɛlɔgbulɔ mbaa Ɔzhizɔsi tee lo za wu tee, <<Ɔkwu, umeza uwu idu ŋɔ e yi mu ofya ipwama.>>
4Tabɔkɔ Ɔzhizɔsi a pwa ɛlɛ, akwɛyi a zɔ tee, <<Imbwama iyi ofya mbwɔlɛ akwu lukwu undu Ɔlazarɔ mo; ɛlɛ i wo le kaa Ukpo la fya inzumbɛku le, akwɛyi aakwu ɔgwuzɛ uwu bɔkɔ Umɛ uwu Ukpo aa fya inzumbɛku le.>> 5Ɔzhizɔsi e pwu idɛnyi iyi Omata mbala umanyi wu oko mbala Ɔlazarɔ. 6Tetete, kwuyengwu bɔkɔ a pwa te Ɔlazarɔ e yi mu ofya ipwuma, a ŋɔma mɔmɔ nzhii ba afyi epo kpɔ.
7Akwɛyi a za laa Wavɔngɔkiya wu tee, <<La lu bo la ki gba la ki so mu Ozhudiya.>>
8Wa vɔngɔ kiya ba o gba wu opwu tee, <<kuye bwɛ ele gba Azhu o gyi te lo to ŋɔ ekyi le, ŋɔ gba ŋɔ gyi te la ŋɔ so mɔmɔ?>>
9Ɔzhizɔsi a gba opwu tee, <<Kwɔfyi kwu yi awa uwolepo mo re? Onzu uwu bɔkɔ a zɛma mu ɔnɔnda a lɛfyi mo, moo a ma ɛbɛ iyi kwudu kwɔlɛ. 10Akwiyi gba o zɛma mutu gba o lɛfyi , kwuwongu o yi ɛbɛ mo.>>
11Tabɔkɔ Ɔzhizɔsi a mbwa ɛlɛ isomo, akwɛyi a gba a za mba tee, <<Umɛza nzu Ɔlazarɔ e kpondo, Imi ba mi ri mi bi nyi wu eyimo.>> 12Wa vɔngɔ kiya wu o gba wu opwu tee, Ɔkwu, akwiyi gba e yi mu ondo ikpolomo, ofya wu uu bomo lo.>> 13Ɔzhizɔsi e ye mbo mu iso isomo meka iyi lukwu undu Ɔlazarɔ, umba ba o ma kyamate akwu iso iyi ondo ikpolomo bi.
14Akwɛyi Ɔzhizɔsi e so mbo iso gedegede tee, Ɔlazarɔ e kpomo-o, 15kwuwo yi Imi mi mu ɔnyɛ te mi yi mɔmɔ mo, kaa la lu kwu idu lu fulo mami.>>
16Akwɛyi Otoma (uwu o ya wu tee apiri awu) a za la Wavɔngɔkiya umba o shimo awu tee, <<Kinzu la ki kyo la ki somo mbala wu tete, ka la ki kpomo mbala wu.>>
Ɔzhizɔsi Gba E Yi Enzu Mo Mu Kwuvɔ Le; Gba Akwu Kwunyɔ Le
17Tabɔkɔ Ɔzhizɔsi e bomo, e du tee Ɔlazarɔ o kpa wu ami afyi endo-o.
18Indama iyi Ɔbɛtani mbala Ɔzhɛrusalɛ i yi mate emeli epo te, 19Azhu umbafo ba o bo mbaa Omata mbala Omeri ka lo gbo mbo idu mo kwuwongu lukwu undu umanyi mba ɔnzɔnu. 20Kwuye ungwu bɔkɔ Omata a pwa te, Ɔzhizɔsi e yi mu iŋyɔma, akwɛyi a ka te e kpolo wu, Omeri ba a ŋɔ iyawu mogba.
21Akwɛyi Omata a za la Ɔzhizɔsi tee, <<Ɔkwu, gba la ŋɔ yi munɛ, umɛnɛ mi e bo kpomo mo. 22Tetete, Imi mi yitu tee kekelele lala Ukpo ee shi ŋɔ kiya ingyinangyina ingyi bɔkɔ ŋɔ nda wu.>>
23Ɔzhizɔsi a za wu tee, <<Umɛnɛ ŋɔ ɔnzɔnu aa gba e yimo.>>
24Omata a gba opwu tee, <<Mi yitu tee aa gba e yimo mu kwɔfyi ungwu imbwambwa.>>
25Akwɛyi Ɔzhizɔsi a za wu tee, <<Imi gba mii gba lakwunyɔ mii shi enzu le, imi gba mi kwu kwunyɔ le. Onzu uwu e kwu idu lu fulo mami, gba e kpomo lala aa gba e yi kwunyɔ; 26onzu uwunawuna uwu bɔkɔ luzɛ wu akwu undu ikwu idu lu fulo ba a nyama la mi ee kpomo gbee mo. Uŋɔ ŋɔ nyama mu iso mi ɛlɛ?>>
27Omata a gba wu opwu tee, <<Ee, Ɔkwu, Imi mi nyama te uŋɔ gba ŋɔ kwu Okrasi le, Umɛ uwu Ukpo, uwu bɔkɔ e yi mu inyɔma mu kwudu kwɔlɛ awu.>>
Ɔzhizɔsi E Loga
28Tabɔkɔ a mbwa iso ɛlɛ isomo, akwɛyi a gba a kama a ka ya umanyi okokpayi Omeri ma mɛmba. A za wu tee, <<U zɔ kiya e yi munɛ, ba e yi mu kwuyo ŋɔ iyomo.>> 29Bɔkɔ Omeri a pwa ɛlɛ, e yimo kporo akwɛyi a ka bwa wu ma. 30Ɔzhizɔsi e de fye mu kusɛ kwɔngu mo bɛnɛ, e degbo mbaa bɔkɔ Omata a ke du wu awu. 31Azhu umba bɔkɔ o yi mbala Omeri mogba mu ɛyi ibyima o ma te e yimo efyefya a wɔ kwudu, akwɛyi o mbwalu wu, o ma te e sheye mu ogariwu mbaa oga ilomo mɔmɔ.
32Kwuye ungwu bɔkɔ Omeri a ka mbaa bɔkɔ Ɔzhizɔsi e yi, tabɔkɔ a ma wu akwɛyi e kwumo mu idu wu a zɔ tee, <<Ɔkwu, la ŋɔ yi munɛ, umɛnɛ ɔnzɔnu le bo kpomo mo.>>
33Tabɔkɔ Ɔzhizɔsi a ma wu mu oga ilomo, mbala Azhu umba bɔkɔ o yi mbala mba tete mu oga ilomo, akwɛyi e wo ubugyi mu kwundu akwɛyi a ma inyashi mba gyɔɔ. 34Akwɛyi e yo mbo tee, <<Lu kpa wu ami muna?>>
O gba wu opwu tee, <<Ɔkwu, bo kaa ma.>>
35Ɔzhizɔsi e loga.
36Akwɛyi Azhu o zɔ tee, <<Ɔzhizɔsi a gyi Ɔlazarɔ gyɔɔ!>>
37Umbafo mba ba o zɔ tee, <<Akwu onzu ele gba a wu upeyi eyimo le mo re? Akwu mo ba le be shi Ɔlazarɔ le kpomo mo nɛ?>>
Ɔzhizɔsi E Yi Ɔlazarɔ Ma Mu Kwuvɔ
38Ɔzhizɔsi a gba e wo ubugyi mu kwundu kpɔ, akwɛyi a ka mbaa Ogariwu. Ogariwu awu akwu kwofyo, akwɛyi o kpo kwoki ungufo mu kenzu ngwu. 39Akwɛyi Ɔzhizɔsi a zɔ tee, <<La lu pya kwoki ma!>>
Akwɛyi Omata umanyi uwu Ɔlazarɔ, a gba opwu tee, <<Ɔkwu, onzu ele aa wumbwɔɔ, moo ɔnɛ akwu afyi endo bɔkɔ o kpa wu ami le-e.>>
40Ɔzhizɔsi a za wu tee, <<Mi za ŋa tee, akwiyi gba ŋɔ kwu idu lu fulo, ŋɔ ma inzumbɛku iyi Ukpo mo re?
41Akwɛyi o pya kwoki kwɔngu ma. Akwɛyi Ɔzhizɔsi e yi eyefa moshi akwɛyi a zɔ tee, <<Ada, mi gbɛlɛ ŋɔ ɛnyi kwuwongu ŋɔ pwa mi. 42Imi mi yitu tee kwuyengwunanguna ŋɔ yemi mu ipwama, Imi ba mi so ɛlɛ kwuwongu enzu umba o ri munɛ le, kaa umba lo kwu idu lu fulo tee uŋɔ gba ŋɔ lɔ mi le.
43Tabɔkɔ a mbwa ɛlɛ isomo, Ɔzhizɔsi e to opwu uwɔkwuu a zɔ tee, <<Ɔlazarɔ, wɔ kwudu!>> 44Akwɛyi onzu uwu e kpomo le a wɔ kwudu, ewo mbala alɛ wu o wu yi mo mu okpayi uwu ukpɛzhi mbala ureyi wu.
Ɔzhizɔsi a za mba tee, <<La lu vuvu ekpayi ɛnyi ma kaa le sheyimo.>>
O Wo Okura Iyi O Ngbɛ Ɔzhizɔsi Ma
(Omatiyu 26.1-5; Omaki 14.1,2; Oluku 22.1,2)
45Kwuwo kwɔlɛ Azhu gyɔɔ umba o bo gbɛlɛ Omeri ɛnyi, bɔkɔ o ma apula iyi amɛ iyi bɔkɔ Ɔzhizɔsi e wo,akwɛyi o kwu idu fulo ma wu. 46Umbafo mba ba o ka mbaa Afarisi, ka lo ba mba eza iyi bɔkɔ Ɔzhizɔsi e wo. 47Kwuwo kwɔlɛ ebwoshi umbakɔ mbala Afarisi o kpala ɛlu. O zɔ tee, <<Kii wo te? Onzu ele e yi mu apula iyi amɛ gyɔɔ iwomo. 48Gba ki lu wu afyima , enzu lɛɛbi o kwu idu fulo ma wu, akwɛyi Asozha umba Oromu o nyɔ o shiri Ɔtɛpu nzu ma o kyo o ngbɛ ɛzhi nzu ɛdɔ ma. 49Akwɛyi ukpɛnyi meka mba, o ya wu tee Okayafasi, uwu bɔkɔ akwu obwoshi uwakɔ mu kari kanga le, e yimo a zɔ tee, <<Lunyi lu yitu iyi kiya kikpikpɛnyi te mo ndii! 50Lu fa la izɔngɔma te, i koshi kaa onzu ɛnyi le kpomo kwuwongu enzu, bɔkɔ ɛzhi lɛɛbi i bi kpɛdɔma awu.>>
51Iso ɛlɛ e so mu ekpasu wu mo, ba kwuwongu bɔkɔ akwu obwoshi uwakɔ kari kanga le, gba e kwu epa tee Ɔzhizɔsi e kpomo kwuwongu ɛzhi iyi Azhu le, 52akwu kwuwo mbo kɛɛkyi mo, ba akwu kwuwongu kaa la kpala ɛmɛ umba Ukpo umba o kpashaa munamuna ɛlu, kaa lo kwu enzu wakpɛnyi. 53Kwuwo kwɔlɛ, i na mɔnu mawu o wo ɔgwuzɛ uwu o ngbɛ wu ma.
54Kwuwo kwɔlɛ Ɔzhizɔsi e koko a zɛma gedegede meka iyi Azhu fo, uwu ba a ka mu riyi ingyi bɔkɔ ki yi kɛlɛ mbala kwokata, mu kwuse ungwu bɔkɔ o ya ngwu tee Ifiremu. A ŋɔ mɔmɔ mbala Wavɔngɔkiya wu.
55Kwuye ungwu odumudumu uwu ikalama uwu Azhu kwu ndafo, enzu riba o wɔ mu ese mbo o ka mu Ɔzhɛrusalɛ kaa lo wulu ɛmba ma dɛ kaa odumudumu uwu ikalama awu le bo. 56O kwo mu Ɔzhizɔsi igagyima, o ri mu ɔtɛpu mu esu kwuyo iyomo tee, <<Lunyi lu ma te? A ŋa nyɔ mbaa odumudumu ele mo ndii re?>> 57Eboshi umbakɔ mbala Afarisi o ta ɔkpa tee, gba onzu uwunawuna uwu bɔkɔ e yitu mbaa bɔkɔ Ɔzhizɔsi e yi, le so mbo kaa lo yi wu mo.
Currently Selected:
Ɔzhɔnu 11: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
