Ɔzhɔnu 12
12
O La Ɔzhizɔsi Anyi Mu Kwuse Ungwu Ɔbɛtani
(Omatiyu 26.6-13; Omaki 14.3-9)
1I shi afyi ɛrɛnyi kaa odumudumu uwu ikalama le bo, akwɛyi Ɔzhizɔsi e bo mu Ɔbɛtani kwuse ungwu bɔkɔ Ɔlazarɔ e yi, uwu bɔkɔ Ɔzhizɔsi e yi wu mo lukwu awu. 2Enzu mba mɔmɔ o wo wu kiya ingyirimo ingyi onoyo, Omata gba akwu u ka enzu kiya ingyirimo le, Ɔlazarɔ ba e kyo mbala enzu umba o ŋɔma mbala Ɔzhizɔsi mbaa kiya irimo. 3Akwɛyi Omeri e to ogya uwu anyi umba abwa umba Onadi, akwɛyi e lo mbo Ɔzhizɔsi mu alɛ, akwɛyi e nwu mba ma mu inyi wu. Akwɛyi kwogba lɛɛbi ngwu akwu umbwɔ ferere.
4Akwɛyi ukpɛnyi meka iyi Wavɔngɔkiya wu, Ozhuda Isikariyɔ - uwu bɔkɔ a ba ya kwoya wu awu - a zɔ tee, 5<<Kimbe ki shi bɔkɔ anyi mbɔlɛ o ya mba ma mu eduwo gyɔɔ kaa lo ra yi lo shi ayirewa mo ? I yi mate eduwo iyi oo shi onzu u wo ɛduma iyi kari tayi.>> 6E so iso ɛlɛ akwu kwuwongu a ma inyashi iyi ayirewa le mo, akwu kwuwongu akwu uwɛlɔ le; kwuwongu uwu gba akwu u ra la kakyɔ unga eduwo le, ba e koko aa mbwama lɛwu mu eduwo iyi bɔkɔ o ta ma nga awu. 7Ɔzhizɔsi a gba opwu tee, <<Lo shuwebi. E shi anyi mbɔlɛ rito e gbo kwɔfyi ungwu ami ikpama mi. 8Ayirewa o yi mbala yi iyɔkpɔɔ, imi ba mi yi mbala mi iyɔkpɔɔ mo.>>
O Wo Okura Iyi O Ngbɛ Ɔlazarɔ Ma
9Azhu riba o pwa te Ɔzhizɔsi e yi mu Ɔbɛtani, akwɛyi o ka mɔmɔ kaa lo ma wu mbala Ɔlazarɔ uwu bɔkɔ e yi wu mo mu lukwu awu. 10Kwuwo kwɔlɛ ebwoshi umbakɔ o ka amasa iyi o ngbɛ Ɔlazarɔ ma, 11moo kwuwo wu, Azhu riba o lu mba afyima akwɛyi o kwu idu lu fulo mu Ɔzhizɔsi ŋa.
Ɔzhizɔsi E Fye Mu Ɔzhɛrusalɛ Mate Ɔsu Tayi
(Omatiyu 21.1-11; Omaki 11.1-11; Oluku 19.28-40)
12Mu eyi i lama, enzu riba ingyi enzu umba bɔkɔ o bo mbaa odumudumu uwu ikalama awu o pwa tee Ɔzhizɔsi e yi mu inyɔma mu Ɔzhɛrusalɛ. 13Akwɛyi o kwu epederi o ka o kpolo wu, o le mu opwu itarama tee, <<Osana!>> Esheshi akwiyi uwu bɔkɔ e ngyi mu ɛnyi iyi Ɔkwu!>> Esheshi akwiyi Ɔsu uwu Izirɛ!>>
14O ka la Ɔzhizɔsi ɔgbɛbɛ uwu Ɔzɛki akwɛyi a yama mawu, mate bɔkɔ o ka mu kwokpo tee, 15Uŋɔ ki wiyi mo, kwuse ungwu Ɔzayɔ; Yese Ɔsu ŋɔ e yi mu inyɔma, mu ɔgbɛbɛ uwu Ɔzɛki .>>
16Wa vɔngɔ kiya umba Ɔzhizɔsi o zɔngɔma ɛlɛ ma kwuye kwɔngu mo; kwuyengwu ba o shi wu inzumbɛku dɛ gba o zɔngɔma tee ɛlɛ o ka mu reshi wu le, ba o wo wu apula ɛlɛ.
17Enzu riba umba bɔkɔ o yi mbala wu kwuyengwu bɔkɔ o yi Ɔlazarɔ ma mu Ogariwu awu, o koko o ba eza la enzu iyi bɔkɔ umba o ma le. 18Akwɛyi enzu mbɔlɛ o ko bwa wu ma, kwuwongu o pwa apula iyi amɛ iyi bɔkɔ e wo le. 19Akwɛyi Afarisi o za lesu tee, <<La lu ma, apula i zɛ ɔnyɛ la nzu mo. Lu ma, enzu lɛɛbi mu kwudu kwɔlɛ o ye wu mu imbwaluma!>>
Agiriki Umbafo O Yo Kwuyo Ungwu Ɔzhizɔsi
20Agiriki umbafo o yi meka iyi enzu umba bɔkɔ o ka te oo gbo Ukpo ɔya mu odumudumu awu. 21O ka mbaa Ofilipu uwu a wɔ mu kwuse ungwu Ɔbɛsayida mu Ogalili akwɛyi o za wu tee, <<Adakwogba, ki gyi te la ki ma Ɔzhizɔsi.>> 22Ofilipu a ka e ke so Anduru; Anduru mbala Ofilipu umba ba o ka o so Ɔzhizɔsi.
23Ɔzhizɔsi a gba opwu tee, <<Kwuye kwu wo-o ungwu bɔkɔ Umɛ uwu Onzu oo shi wu inzumbɛku. 24Imi mi so yi ongbulolo, onzu ee so kwuyi ungwu owiti akwɛyi kwuu vama dɛ, akwu tayi mo ba kwu ri mu kwuyi kwukpɛnyi. Akwiyi gba kwu vama, kwu wa la eyi gyɔɔ. 25Onzu uwu a gyi kwunyɔ wu, kwuu tomo, onzu uwu bɔkɔ e towo kwunyɔ wu ma mu kwudu kwɔlɛ kwuwo mi, ee shi ngwu rito kwuwongu kwunyɔ ungwɔkpɔ. 26Onzu uwu bɔkɔ a gyi te le wo kiya shi mi, mega aa mbwalu mi, kaa umɛgba mi le yi mbala mi mbaa bɔkɔ mi yi. Adami ee shi onzu uwunawuna uwu e gbo mi rinye inzumbɛku.
Ɔzhizɔsi E Siso Mɛka Iyi Lukwu Wu
27<<Kekelele ubwu mi e fomo, ba mi so te? Mii zɔ tee, <Ada, Ki nyama kaa kwuye kwɔlɛ la ku bo munyi mi mo>? Ayimo, akwu kwuwo kwɔlɛ gba mi bo le. 28Ada, shi ɛnyi ŋɔ inzumbɛku!>>
Akwɛyi opwu u wɔ moshi u zɔ tee, <<Imi mi shi ɛnyi ŋɔ inzumbɛku-o, mii gba mii shi yi kpɔ.>> 29Enzu riba umba o ri mɔmɔ o pwa ɔlɛ, akwɛyi umbafo mbo o zɔ tee, <<Ukpo a kpɛyi; umbafo ba o zɔ tee ɔlɔgbulɔ uwu Ukpo e so wu iso.
30<<Ɔzhizɔsi a za mba tee, akwu kwuwo mi gba opwu ɔlɛ u wɔ le mo, akwu kwuwo yi. 31Kekelele gba oo zɔ enzu umba kwudu kwɔlɛ ombu le; kekelele ba ɔsu uwu kwudu kwɔlɛ o ŋɔ kala wu ma mɛsu-o. 32Akwɛyi kwuyengwu bɔkɔ o yi mi mo mu lukwu, mi nya la enzu lɛɛbi munyi mi.>> 33E so ɛlɛ le te kaa la zɔ lukwu undu bɔkɔ e be kpo.
34Akwɛyi enzu riba mbamba o gba wu opwu tee, <<Ɛrama nzu i za nzu te Okrasi a ŋɔ nzhii ba iyɔkpɔɔ, kimbe ki shi bɔkɔ ŋɔ so te, <<Umɛ uwu Onzu oo yi wu mo mu lukwu mega? Uwe ba akwu Umɛ uwu onzu ele dɛ?>>
35Akwɛyi Ɔzhizɔsi a za mba tee, <<Ɛbɛ ii yi mbala yi kwuye bwɛ bɛnɛ. La lu kwo mu luzɛ kwuyengwu bɔkɔ lu degbo lu yi ɛbɛ le, kaa ipwu li bo li kpo ma yi mo. Onzu u zɛma mu ipwu e yi mbaa e sheyi mo. 36La lu shidu mu ɛbɛ ɛlɛ tabɔkɔ lu degbo lu yi mbala yi ele, kaa la lu kwu ɛmɛ umba ɛbɛ.>>
Azhu O Kwidufulo Mu Ɔzhizɔsi Mo
Mizhikembo iyi Ɔzhizɔsi e so ɛlɛ, akwɛyi a ke nvye ɛwu ma.
37Ɔzhizɔsi e wo apula iyi amɛ iyɛku mu eyi mbo lala, o kwu idu lu fulo mawu mo. 38Ɛlɛ i nyɔlɔ iso iyi anukenzu Azaya e so tee:
<<Ɔkwu, uwe a nyama la ilɔ nzu?
Uwe ba o zɔ wu ekpasu iyi Ukpo?>>
39Kwuyi ungwu kwu shi ba o kwu idu lu fulo mo le, kyamate ba Azaya a ka kpɔ mu riyi ingyifo tee: 40Ukpo e se mbo eyi mo, akwɛyi e shi egbo mbo i kɔma, kaa eyi mbo li ma ɛbɛ mo, naa lo zɔngɔma mu egbo mbo mo, naa lo bo nyama la mi akwɛyi Mii gba mba ma iyɔkpɔɔ mo.>>
41Anukenzu Azaya e siso ɛlɛ kwuwongu a ma inzumbɛku iyi Ɔzhizɔsi le akwɛyi ba a ba eza wu.
42Tetete, enzu riba meka iyi enzu umbakɔ umba Azhu lala o kwu idu o fulo ma wu. Ba kwuwongu Afarisi, o nyama te o so yi gedegede mo, moo o wiyi te oo wa mba ma mu udaba uwu ɛlu ikpalama uwu Azhu. 43Kwuwongwu o gyi ipwɔma iyi enzu i ka iyi Ukpo ma.
Iso Iyi Ɔzhizɔsi Ii Zɔ Ombwu
44Akwɛyi Ɔzhizɔsi e siso mu opwu uwɔkwu tee, <<Gba onzu a nyama la mi, akwu Imi gba a nya mi kɛɛki le mo, e kyo a nyama la onzu uwu a lɔ mi le. 45Onzu uwu a ma mi, e yi mu onzu uwu a lɔ mi imama tete. 46Mi bo mu kwudu kwɔlɛ te la mi kwangwu ɛbɛ, kaa onzu uwunawuna uwu a nyama la mi la ŋɔ mu ipwu mo.
47Gba Enzu umba bɔkɔ o mbwalu iso mi mo, akwu Imi gba mii zɔ mba ombu le mo, moo mi bo te la mi zɔ kwudu kwɔlɛ ombu mo, mi bo te la mi sa ngwu ma. 48Onzu uwu bɔkɔ e towo mi mo mbala iso mi e yi u zɔ wu ombu; iso mi ɛnyi iyi bɔkɔ mi so awu gba Ukpo e yi wu ombu ɔnuwu kwɔfyi ungwu imbwambwa ma yi le. 49Moo iso iyi bɔkɔ mi so le, Ada uwu bɔkɔ a lɔ mi awu gba e shi mi ɔkpa te la mi so le. 50Imi mi yitu te ɔkpa wu ee shi ŋɔ kwunyɔ ungwɔkpɔ. Kwuwo kwɔlɛ, iso iyinayina iyi bɔkɔ mi so yi, akwiyi bɔkɔ Ada a zɔ te la mi so le.>>
Currently Selected:
Ɔzhɔnu 12: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
