Ɔzhɔnu 10
10
Kwoba Ungwu U gbo Ilɔ
1Ɔzhizɔsi a zɔ tee, <<Mi so yi ongbulolo, onzu uwu bɔkɔ a zɛ mu kenzugu unga ogeza kaa le fyemo mɛmi mo, gba a yama e fyemo mɛmi mu ɔgwuzɛ owa, akwu uwɛlɔ mbala u zɛ kpɔ. 2Onzu uwu bɔkɔ a zɛ mu kenzugwu gba akwu u gbo ilɔ le. 3U gbo kwuri ba a wawu kenzugwu ma, ilɔ ba o pwa opwu wu. A ya ilɔ ma mu ɛnyi mba akwɛyi a wa mba kwudu. 4Kwuye ungwu bɔkɔ a wa mba kwudu, akwɛyi e to mbo keyi, ba ilɔ wu o mbwalu wu kwuwongu o yitu iyi opwu wu. 5Umba ba o mbwalu onzu awa mo; umba lala o renya iyamba kwuwongu o zɔngɔma opwu wu ma mo.>> 6Ɔzhizɔsi a ba mba kwoba kwɔlɛ ba o zɔngɔma gwu ma mo.
Ɔzhizɔsi Gba Akwu U Gbo Ilɔ Uwoshoshi Le
7Akwɛyi Ɔzhizɔsi a gba a za mba tee, <<Mi so yi ongbulolo Imi mi yi kyamate kenzugwu unga ilɔ te. 8Umbafo umba bɔkɔ o bo keyi la mi lɛɛbi awu akwu awɛlɔ mbala wazɛkpɔ, ilɔ ba o pwa iyamba mo. 9Imi mi yi kyamate kenzugwu te; Onzu uwunawuna uwu bɔkɔ a zɛ mami e fyemo o sa wu ma. E fyemo a wɔma ba a fya kiya ngyirimo. 10Uwɛlɔ e bo tee kaa la wɛlɔ kaa la ngbɛ kaa gba le tutu kiya ma; Imi ba mi bo te kaa la mi shi yi kwunyɔ, kwunyɔ ungwɔkpɔ.
11Ɔzhizɔsi a zɔ te<<Imi gba mi kwu u gbo ilɔ shɛ le. U gbo ilɔ aa nyama ka le kpomo kwuwongu ilɔ wu. 12Onzu u na rigbɛ ingyi ilɔ igbomo, akwu u gbo ilɔ mo ilɔ ba akwu umba wu mo, ishi gba a ma utumutu te e yi mu inyɔma, a lafya la ilɔ ba a renya ee shi ilɔ mbamba; akwɛyi utumutu e yi ilɔ ma akwɛyi a kpa mba shaa. 13Onzu awu a renya i ya wu kwuwongu o to wu iyi rigbɛ ba a bɔ eyi mu ilɔ mo.
14<<Imi gba mi kwu u gbo ilɔ shɛ le; Mi yitu iyi ilɔ mi ilɔ mi ba o yitu mi 15kyamate bɔkɔ Ada e yitu mi Imi ba mi yitu wu awu, gba mi nyama te kaa mi kpomo kwuwo ngwu ilɔ le. 16I yi ilɔ umbafo umba bɔkɔ akwu umba ogeza ele mo. Mi nya mba mɛga tete. Umba tete o pwa opwu mi, akwɛyi uzhi uwu ilɔ akwu ukpɛnyi, u gbo ilɔ ba akwu ukpɛnyi. 17<<Ada a gyi mi kwuwongu mi nyama mi to kwunyɔ mi mi tama, mii gba mi to ngwu mo.>> 18I yi onzu uwu bɔkɔ e to mi kwunyɔ ma mo, Imi gba mi gyi le gba ba mi ta ngwu mɛzhi le. Imi mi domo iyi kaa la mi ta ngwu mɛzhi kaa la mi gba ngwa la itomo. Mi na ɔkpa ele mbaa Ada.>>
19Azhu o kepo kwuwongu iso ɛlɛ kpɔ. 20Riba mba o zɔ tee, <<E yi kwundu ungwura! E kporishi! Kimbe ki shi bɔkɔ lu shi alu mbaa wu?>>
21Umbafo ba o zɔ tee, <<Ɛlɛ akwu iso iyi onzu uwu bɔkɔ e yi kwundu ungwura mo. I zɛ te bɔkɔ kwundu ungwura kwu shi ɛbɛ la enzu wapɛyi?>>
Azhu O Towo Ɔzhizɔsi Mo
22Kwuye ungwu odumudumu uwu ɔtɛpu iwuma mu Ɔzhɛrusalɛ, kwuye kwɔngu akwu kwuyengwu okpakyi, 23Ɔzhizɔsi ba e yi mu Ɔtɛpu e yi mu igɔma mu okepe uwu ɔsɔlɔmɔ. 24Azhu o lo wu kwukpo, o zɔ te, <<Nzhii ba kwuyengwuna dɛɛ bɔkɔ ŋɔ bu gba nzu opwu? Akwu uŋɔ gba ŋɔ kwu Okrasi le, ba za nzu pee.>>
25Ɔzhizɔsi a gba mba opwu tee, <Mi za yi aa ba lu kwu idu lu fulo mo. Ɛduma iyi amɛ iyi mi wo mu ɛnyi iyi Ada mi awu akwu u uzɔgɔ mi; 26ba lu kwu idu lu fulo mo kwuwongu bɔkɔ lu kwu ilɔ mi mo le. 27Ilɔ mi o pwa opwu mi; Mi yitu mbo, umba ba o mbwalu mi. 28Imi mii shi mbo kwunyɔ ungwɔkpɔ, ba o tomo gbee mo; Ɔzɛnzɛnyi te e do mbo inama mu ɔwu mi mo. 29Ada mi, uwu bɔkɔ e shi mi mbo le, a ka uwewe ma; Ɔzɛnzɛnyi te e do mbo inama mɔwu uwu Ada mi mo. 30Imi mbala Ada mi ki kwu ukpɛnyi.>>
31Akwɛyi Azhu o kwu ekyi kaa lo kpa wu kpɔ, 32Ɔzhizɔsi ba a za mba tee, mi wo ɛduma iyi amɛ gyɔɔ iyi bɔkɔ imbulama bɔkɔ Ada e shi mi te la mi wo meyi yi, iyi na bɔkɔ lu kpa mi ekyi kwuwo yi?>>
33Azhu o gba opwu te, ki kpa ŋa ekyi kwuwongu ɛduma iyeshi ikpikpɛnyi te mo, akwu kwuwongu ŋɔ pe Ukpo ari, moo uŋɔ onzu uwidɔ bi ŋɔ ya ɛŋɔ tee Ukpo.>>
34Ɔzhizɔsi a gba mba opwu tee, <<O ka yi ma mu Ɛrama yi mo re tee, <Ukpo a zɔ tee lu yi kyamate Ukpo.> 35Enzu umba bɔkɔ Ukpo a lɔma la mba le gba o ya mba tee <O yi kyamate Ukpo uwakɔ, iso iyi Ukpo ba i fomo mo. 36Imi uwu bɔkɔ Ada a ŋa mi tee la mi kwu uwawu bɔkɔ a lɔ mi e bo mu kwudu kwɔlɛ le kɔ? I wo te bɔkɔ lu se mi eyi tee mi pe Ukpo ari kwuwongu bɔkɔ mi zɔ te, mi kwu Umɛ uwu Ukpo? 37Akwiyi gba akwu ɛduma iyi Ada mi gba mi yi mu iwomo le mo, de ba la lu kwu idu lu fulo ma mi mo. 38Akwiyi gba akwu inyi gba mi yi mu iwomo le, gba lu fulo idu ma mi mo lala, la lu fulo idu mu ɛduma iyi amɛ ɛnyi, kaa la lu yitu kaa gba la lu zɔngɔma yi ma tee, Ada e yi mɛmi mi Imi gba mi yi mɛmi iyi Ada.>> 39O gyi tee lo yi wu mo kpɔ, ba a wirima e shimbo.
40Akwɛyi Ɔzhizɔsi a gba a sama a ka mu risu ingyi Ɔzhɔda mba bɔkɔ Ɔzhɔnu e koko e wo obatisima dɛ awu. Mɔmɔ gba a ka ŋɔ le 41enzu riba ba o bo munyi wu. O zɔ tee, <<Ɔzhɔnu de ewo ɛduma iyi lɔzɔ ndu amɛ mo, iyinayina iyi bɔkɔ Ɔzhɔnu e so meka iyi onzu ele akwu ongbulolo.>> 42Ba enzu ribariba o kwu idu lu fulo mu Ɔzhizɔsi mɔmɔ.
Currently Selected:
Ɔzhɔnu 10: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
