Matayo 7
7
Enyigirizo ziyerekeere oguchira abandi olushinja
Luuka 6.37-42
1Yeesu ashuba kuderha ntya: «Murhalemaga mwachiira abandi olushinja yi nenyu murhalemaga mwachirwa lo. 2Kwenge nk'oku muchiira abenyu olushinja ku nenyu nji babachira lo.
3«Girhumire walola ehirhi hiri omu liisho ly'owenyu, aliko orhakengereere elugulu w'omurhi guli omu ly'emwawe? 4Changwa gurhe wakagala kubwira owenyu ntya: ‹Ndeka nkuule ehirhi hikuli omu liisho, noobo omu lyawe muchiri omurhi?› 5W'endyaalya we, rhanga okuule omurhi guli omu liisho lyawe, wanaja wabona bwinja gurhe wakuula ehirhi hiri omu liisho ly'owenyu.
6«Murhalemaga mwaha embwa ebintu bitagatiifu. Bulaala zakabahindamukira n'okubashenyagula. Kandi murhakabuliraga engulube amagerha menyu magachiiro, kwenge zakamalabarhanga.»
Oguhema, ogushonda n'ogukongoorha
Luuka 11.9-13
7«Muleme mwahema yi muhaabwe, muleme mwashonda yi mubone, muleme mwakongoorha yi muchingulirwe. 8Kwenge ngasi yeeshi ohema, anahaabwa. Oshonda, anabona. N'okongoorha, anachinguulirwa. 9Nde mu mwabo, nk'omwana waage amuhemere omugati, akamuha ebaale? 10Changwa nk'amuhemere efi, k'akamuha enjoka?
11«Chiro akaba mwabo muli babi, aliko muyinji guha abaana benyu ebintu binja. Leero gurhe Yisho oli omu mpingu agafundwa guhaana ebintu binja oku bamuhemere byo?
12«Byooshi mushondere abantu babajirire, nenyu mubajirire byo. Ebyoola by'eRhegeko lya Muusa n'ebitaabu by'abaleebi biyigiriza.
Omulyango gufundereere n'ogugalihire
Luuka 13.23-24
13«Mugerere omu mulyango gufundereere. Kwenge omulyango guyerekeere ebwaguhera gugalihire, n'enjira ejire yo egalihire. N'abantu bagerera mw'eyo njira balugire. 14Aliko omulyango gujire ebw'akalamo goowe gufundereere. N'enjira eyerekeze yo nayo efundereere. N'abantu bagerera mw'eyo njira bageehere.
Abaleebi b'obubeeshi bamenyerwa oku bijiro byaabo
Luuka 6.43-44
15«Muleme mwachilanga oku baleebi b'obubeeshi. Babayinjira eyi bachijirire nka ntaama, aliko ey'omu mirhima yaabo bali banyambwe bakalihire. 16Abo baleebi, mwalema mwabamenyera oku bijiro byaabo. Kwenge abantu barhacha amalehe m'omuzabiibu changwa m'etiini oku mirhi y'emishaaki. 17Ngasi murhi mwinja gunayaana amalehe menja. Na ngasi murhi mubi gunayaana amalehe mabi. 18Omurhi mwinja gurhakayaana amalehe mabi, changwa omurhi gubi gurhakayaana amalehe menja. 19Ngasi murhi gurhayaana amalehe menja, gunachiibwa n'ogukabulwa omu muliro. 20Ntyo, n'abo baleebi b'obubeeshi mwalema mwabamenyera oku bijiro byaabo.»
Abigirizwa b'okuli ba Yeesu
Luuka 6.46; 13.25-27
21«Arhali ngasi muntu wambwira ntya: ‹Nnaweerhu! Nnaweerhu!› Nji waaja omu Bwami bw'empingu, aliko olaala yenyine onajira oku Daarha oli omu mpingu ashondere. 22Olusiku lw'ogucha olushinja, bantu banene nji bambwira ntya: ‹Nnaweerhu! Nnaweerhu! K'arhali oku ziino lyawe rhwalemaga rhwaleeba, rhwakuula abazimu rhwanajira ebisomereene binene?› 23Nji naaja nabashubiza ntya: ‹Ntashubiraga kubamenya! Muje hale naani, mwabo mwe mujira amabi!›»
Omugani gw'enju ebiri
Luuka 6.47-49
24«Ntyo ku ngasi muntu oyunva ebi binwa byaani n'okubihira omu bijiro, ashushire nk'omuntu w'obwenge wayumbakire enju yaage oku baale. 25Envula yabeere yarhoga, enyinji zayunjula, n'omuyaga munene gwahuusa n'oguchishenya kw'eyoola nju. Chiro akaba ntyo, erhahenaga, kwenge yaliyumbakirwe oku baale.
26«Aliko ngasi muntu oyunva ebinwa byaani arhanabihirire omu bijiro, ashushire nka muntu orhagwerhe obwenge wayumbakire enju yaage oku mushenyi. 27Envula yabeere yarhoga, enyinji zayunjula, omuyaga munene gwahuusa n'oguchishenya kw'eyoola nju. Ho n'aho, eyo nju yahena n'ogushandaala yooshi.»
Obuhashe bwa Yeesu
Mariko 1.22; Luuka 4.32
28Yeesu abeere ayuusa kuderha ebyoola binwa, echigusho ch'abantu basoomererwa obulyo bwage bw'okuyigiriza. 29Basoomerwaga ntyo, kwenge yeewe arhaliiri abayigiriza nka bigiriza baabo b'amarhegeko, aliko aliiri abayigiriza nka muntu ogwerhe obuhashe.
Currently Selected:
Matayo 7: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
