Matayo 6
6
Yeesu ayigiriza elugulu w'ogurhabaala abakene
1«Muleme mwachilanga, murhalemaga mwajira ebijiro binja embere z'abantu yi bababone. Kwenge mukajira ntyo, nta luhembo nji mwayankirira emwa Yisho oli omu mpingu.
2«Nka warhabala abakene, orhalemaga waziha omulizi nk'oku endyaalya zinajira omu sinagoogi n'omu njira y'abantu baleme bazikuuza. Okuli mbabwirire, zikola zigwerhe oluhembo lwazo. 3Aliko wooyo, nka warhabala abakene, efune yaawe y'ekulembe erhamenyaga chiro ech'efune yaawe y'ekulyo eri yajira. 4Ebyo bijiro binja, oleme wabijira omu bwibisho na Yisho onabona omu bwibisho eby'oli wajira, nj'aguhemba.»
Enyigirizo ziyerekeere ogusaliira
Luuka 11.2-4
5«Amango muli mwasaliira, murhabaaga nka ndyaalya. Kwenge zoowe, zisiima kuyimanga omu masinagoogi maazo n'omu mashanganjira yi zibonekane n'abantu. Okuli mbabwirire oku zikola zigwerhe omukamarho gwazo. 6Aliko wooyo amango oli wasaliira, ja omu busiika bwawe. Chinga omulyango onasaliire Yisho orhabonekana. Na Yisho, onabona ebijiro byaawe omu bwibisho, nj'aguhemba.
7«Amango muli mwasaliira, murhalemaga mwaderha ebinwa binene bya busha-busha nk'oku abarhali Bayaahudi banajira. Kwenge boowe, banakengera mpu Nnamahanga abashubiza elugulu w'okuluza ebinwa. 8Mwabo murhalemaga mwajira nka boowe, kwenge Yisho ayinji bichi mulagire ko chiro akaba murhaza kumuhema.
9«Tala gurhe mukwaneene gusaliira:
‹Daarha oli omu mpingu!
Eziino lyaawe likuuzwe,
10obwime bwawe buyinje,
obulonza bwawe buleme bwajirika omu gulu nk'omu mpingu.
11Oleme warhuha ebiryo byeerhu bya ngasi lusiku,
12oleme warhubabalira amabi meerhu,
nk'oku neerhu rhunababalira abarhujirire amabi.
13Orhalemaga warhuleka rhwaja omu chigeregezo,
aliko oleme warhulanga oku Shetaani.
[Kwenge oBwami, obuhashe n'obukuuze biri byaawe esiku n'amango! Bibe ntyo!]›»
14«Akonva munababalira abantu amabi maabo, Yisho w'empingu naye abababalira. 15Aliko akonva murhalemere mwababalira abantu amabi maabo, Yisho w'empingu naye arhakabababalira amabi menyu.»
Enyigirizo ziyerekeere oguchilahiza kulya
16«Amango muli mwachilahiza kulya, murhazinzaga amalanga nka ndyaalya. Zizinza amalanga yi ziyereke abantu oku zachilahiize kulya. Okuli, mbabwirire oku zikola zigwerhe oluhembo lwazo. 17Aliko wooyo, amango oli wachilahiza kulya, oleme wayooga onasanure enviiri zaawe, onayooge amalanga, 18y'orhayereka abantu oku wachilahize kulya. Aliko echo chijiro chimenyikeene na Yisho orhabonekana. N'oyoola Yisho onabona eby'ojira omu bwibisho aguhemba.»
Oguchibikira ebikulo omu mpingu
Luuka 11.33-34
19«Murhalemaga mwachibikira ebikulo omu gulu, kwenge omushwa changwa egutu binabishereza. N'ebishambo binarhula enju n'okuzimba. 20Aliko muleme mwachibikira ebikulo omu mpingu, eyoola munda y'omushwa n'egutu birhabishereza, n'ebishambo birharhula n'okuzimba. 21Kwenge ah'ebikulo byaawe biri, ahoola h'omurhima gwawe nago guli.
Eliisho liri tara ly'omubiri
Luuka 11.34-36
22«Eliisho liri tara ly'omubiri. Akonva eliisho lyaawe liri ligumaguma, omubiri gwawe gooshi gwanaba omu bumoleke. 23Aliko akonva eliisho lyaawe lilwere, omubiri gwawe gooshi gwanaba omu mwizimya. Leero akonva obumoleke buli omu kalamo kaawe bwagahindamuka mwizimya, ogoola mwizimya gwanaja gwaba munene kulusha.
Ogukolera Nnamahanga changwa ebikulo
Luuka 16.13
24«Ntaaye wakagala gukolera bannahamwabo babiri. Kwenge akagaya muguma anasiima owindi. Changwa agachishwekera ku muguma anakena n'owindi. Murhakagala gukolera Nnamahanga munakolere ebikulo.
Okulangaalira Nnamahanga
Luuka 12.22-31
25«Cho girhumire mbabwirire ntya: ‹Murhachilunzaga elugulu w'akalamo kenyu mpu bichi mwalya changwa bichi mwanywa, changwa elugulu w'omubiri gwenyu mpu bichi mwayambala.› Akalamo kali k'obulagiirire kulusha ebiryo, n'omubiri kulusha emyambalo. 26Mulole, enyunyi zirhahinga, zirhashaluula zirhanahaka emyaaka omu nguli. Aliko Yisho w'empingu aziliisa. K'arhali mwe muli babulagiirire kuzilusha?
27«Nde mu mwabo wakagala kuyushuula chiro olusiku oku kalamo kaage elugulu w'oguchilunza?
28«Leero bichi birhumire mwachilunza elugulu w'emyambalo? Mulole bwinja gurhe obwaso buyaasa. Burhakola burhanachilukira fulema, 29aliko mbabwirire oku chiro mwami Solomoono omu buchire bwage booshi, arhayambalaga efulema ekwirire kulusha ogukwira kw'obwaso buguma omu bo. 30Ebirhi by'elubala binabonekana zeene n'omuseezi byanakabulwa omu muliro. Chiro akaba ntyo, Nnamahanga anabiyambisa efulema zikwirire bweneene. Leero gurhe arhakabayambisa bwinja bweneene mwe bantu mugwerhe obwemeezi bugeeke?
31«Murhalemaga mwachilunza mpu: ‹Bichi rhwalya, changwa bichi rhwanywa, changwa kandi bichi rhwayambala!› 32Ebyoola byooshi, abarhamenyere Nnamahanga bo banachilunza omu kubishonda. Aliko mwabo Yisho w'empingu ayinji oku mubilagire ko. 33Murhange mushonde obwime bwa Nnamahanga n'ebikwaneene embere zaage, naye abayushulira ebyoola bindi byooshi.
34«Murhalemaga mwachilunza elugulu w'ebyaaba omuseezi, kwenge ebyoola byachilibukira byonyine. Ngasi lusiku lugwerhe amaage malibuko maluyeneere.»
Currently Selected:
Matayo 6: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
