Matayo 8
8
Yeesu afumya omubenzi-benzi
Mariko 1.40-45; Luuka 5.12-16
1Enyuma w'ebyoola, Yeesu ayandagala k'ogoola musozi. Okw'ali ayandagala, echigusho ch'abantu banene bamukulikira.
2Haahulukira mubenzi-benzi muguma, afukama embere za Yeesu. Amubwira ntya: «Nnaweerhu, akaba oshondere, wakancheesa.» 3Yeesu alambuula efune, amuhuma ko n'okumubwira ntya: «Nshondere, ocheeswe.» Ho n'aho oyo muntu acheeswaebibenzi byaage. 4Oku buzinda, Yeesu amurhegeka ntya: «Ochilange! Ebyo binwa orhabibwiraga chiro n'omuntu muguma! Aliko ogende guchimoleka emw'omudaahwa, onahaane entuulo gukulikirana n'okw'eRhegeko lya Muusa liderhere.»#8.4 Akaba omuntu afumizwe ebibenzi, agendaga achiyerekana emwa badaahwa oku afumire. Omuntu agendaga ajira ntyo, y'ashuba kuyemereerwa kulama haguma n'abandi bantu. Osome Balaawi 13.45-46; 14.1-32.
Obwemeezi bw'omukulu w'abasoda b'eKirooma
Luuka 7.1-10; Yohaana 4.46-54
5Yeesu abeere ali aja omu gishagala ch'eGaperinaumu, omukulu muguma w'abasoda b'eKirooma amuyegeera n'okumurhebereza ntya: 6«Nnaweerhu, omukozi waani ahunzize, analyamire omu nju kwenge ali alibuka bweneene.» 7Yeesu amushubiza ntya: «Nayinja kumufumya.» 8Oyo mukulu w'abasoda b'eKirooma ashubiza ntya: «Nnaweerhu, ntakwaneene oku oje omu mwani. Aliko oderhe chinwa chiguma chonyine, n'omukozi waani afuma! 9Kwenge naani ndi eshiishi w'oburhegesi bw'abandi bakulu. Na ngwerhe abasoda bali eshiishi y'oburhegesi bwani. Nambwira muguma ntya: ‹Genda!› Ho n'aho anagenda. Na nkabwira owindi ntya: ‹Yinja!› Ho n'aho anayinja. N'omuja waani nkamubwira ntya: ‹Jira ntya!›, anajira ntyo.» 10Yeesu abeere ayunva ebyoola binwa, asoomerwa. Abwira abalimukulikire ntya: «Okuli mbabwirire oku omu aBaisraheeli booshi, ntashubiraga kubona omuntu ogwerhe obwemeezi bunene buli nka bw'oyu Murooma. 11Mbabwirire oku bantu banene nji barhengera ebushoshookero n'ebuzikiro bw'ezuuba. Abo bantu nji basangira haguma n'Abrahaamu, Isaka na Yakobo omu Bwami bw'empingu. 12Aliko abantu balikwaneene kuja mw'obo Bwami, nji bakabulwa embuga omu mwizimya. Eyoola nji balira n'oguhekenya amenyo.»
13Yeesu aja abwira olaala mukulu w'abasoda b'eKirooma ntya: «Gendaga, okw'obwemeezi bwawe buli kubinabaage.» Na mw'ebyo bishanji, oyo mukozi waage afuma.
Yeesu afumya abalwala banene
Mariko 1.29-34; Luuka 4.38-41
14Enyuma z'ebyoola, Yeesu aja omu nju ya Petero. Abugaana mo nazaala wa Petero alyaamire eyi agwerhe eshuushira. 15Yeesu amuhuma oku fune, n'okuva afuma elyo shushira. Oyo mukazi ava ayimanga n'ogurhondera kumurheganyiza ebiryo.
16Lyabeere golo, baleerhera Yeesu bantu banene baalifarhirwe n'abazimu. Yeesu alema akula abo bazimu n'echinwa chonyine. N'abalwala booshi nabo alema abafumya.
17Ajiraga ntyo y'echiila chinwa chijirike, ech'omuleebi Isaya aderhaga ntya:
«Arhoolere obuzamba bwerhu
anarhoolere n'endwala zeerhu.»#8.17 Osome Isaya 53.4.
Obulyo bw'ogukulikira Yeesu
Luuka 9.57-60
18Yeesu abeere abona echigusho ch'abantu bamuzungulukire, arhegeka abigirizwa baage ntya: «Rhuyambukire eshiiriza w'enyanja.»
19Mwigiriza muguma w'amarhegeko ava ayinja kumubwira ntya: «Mwigiriza, ngasi hooshi walema waaja, nalema nagukulikira.» 20Yeesu naye amushubiza ntya: «Emitereri egwerhe enkunda elama mo, n'enyunyi zigwerhe enyogo, aliko Mwene oMuntu arhagwerhe ahantu h'oguhumusiza erhwe.»
21Owindi naye omu bigirizwa ba Yeesu amubwira ntya: «Nnaweerhu, onyemeerere ntange nje guhamba daarha.» 22Yeesu amubwira ntya: «Oleke abafu baleme bahamba abafu baabo, aliko wooyo onkulikire.»
Yeesu arhuleeza omulaba
Mariko 4.35-41; Luuka 8.23-25
23Enyuma w'ebyoola, Yeesu azamuukira omu chombo n'abigirizwa baage bagenda naye.
24Ho n'aho omulaba gukalihire gwasuuka omu nyanja oku bulyo amenji marhondera guchikabula omu chombo. Aliko Yeesu yeewe, aliiri alyaamire. 25Abigirizwa baja bagenda kumuchula, n'okuderha ntya: «Nnaweerhu, rhwazika, orhuchunguule!» 26Yeesu abashubiza ntya: «Bichi birhumire mwayuubaha? Okuli obwemeezi bwenyu bugehere!» Aja ayimanga, akalihira ogo muhuusi n'enyanja. N'endeera nene yaba.
27Abo bantu basoomerwa bweneene n'ogurhondera kuderha ntya: «Muntu muchi oyuula, chiro n'omuhuusi n'enyanja nabyo byamukengere?»
Yeesu afumya bantu babiri bafarhirwe n'abazimu
Mariko 5.1-20; Luuka 8.26-39
28Amango Yeesu ahikaga eshiiriza ly'enyanja, omu gihugo ch'aBageraasi, bantu babiri bafarhirwe n'abazimu barhengera ebwa shinda n'okuja emunda ali. Bali bakalihire bweneene oku bulyo nta muntu wakagerere mw'eyoola njira. 29Abo bantu bayaamira Yeesu ntya: «Ego Mwene Nnamahanga, bichi warhushonda ko? K'oyinjire hanoola gurhulibuza embere egihe gihike?»
30Hoofu n'ahoola, haliiri obuso bunene bw'engulube bwaliiri bwagishondera ebiryo. 31Abo bazimu barhebereza Yeesu ntya: «Akaba washonda gurhukuula, orhurhume mu buliira buso bw'engulube.» 32Yeesu abwira abo bazimu ntya: «Muje mo!» Abo bazimu barhenga mw'aboola bantu babiri banaja mw'ezo ngulube. Ho n'aho oboola buso bwooshi bw'engulube bwachima eyi buli bwalibirha oku musozi n'oguchiroha omu nyanja, bwazika.
33Abangere b'ezo ngulube babeere babona ebyabeere, balibirha n'okuja kubala omu gishagala chooshi ebyajirikire n'ebyabereere bala bantu balifarhirwe n'abazimu.
34Abantu booshi b'echoola gishagala baja emunda Yeesu ali. Babeere bamubona, bamurhebereza bweneene arhenge omu gihugo chaabo.
Currently Selected:
Matayo 8: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
