Matayo 5
5
Yeesu ayigiriza oku musozi
Luuka 6.12-13
1Yeesu abeere abona ebigusho by'abantu, azamuukira oku musozi, ayikala, n'abigirizwa baage bamuyegeera. 2Arhondera kubayigiriza ntya:
Omugisho gw'okuli
Luuka 6.20-26
3«Bagishirwe abakene omu murhima,
kwenge oBwami bw'empingu buli bwabo!
4Bagishirwe abali balira,
kwenge basiririzwa!
5Bagishirwe abagirhonda,
kwenge bahabwa egulu kuba gashambala kaabo!
6Bagishirwe abali nzara n'enyoorha y'okujira ebikwanene embere za Nnamahanga,
kwenge bayuguswa!
7Bagishirwe ababeera abandi obonjo,
kwenge nabo baberwa obonjo!
8Bagishirwe abagwerhe omurhima gucheere,
kwenge babona Nnamahanga!
9Bagishirwe abaleerha omurhuula,
kwenge bahamagalwa beene Nnamahanga!
10Bagishirwe abali balibuzwa elugulu w'okujira ebikwanene embere za Nnamahanga,
kwenge oBwami bw'empingu buli bwabo!
11«Mugishirwe amango abantu bali babadukanga, n'okubalibuza, banababeshere ngasi chinwa chibi elugulu waani. 12Muleme mwashagaluka n'oguchishinga, bulaala oluhembo lwenyu luli lunene omu mpingu. Kwenge ntyo ku balibuzaga abaleebi balamaga embere zenyu.»
Omunyu n'obumoleke bw'egulu
Mariko 9.50; Luuka 14.34-35
13«Mwabo muli munyu gw'egulu. Aliko nk'omunyu gwamahwa obununu, bichi byagashuba kugugalulira obununu bwago? Gurhagachilunga chintu, sy'aliko gwanakabulwa embuga n'okulabarhwa n'abantu.
14«Mwabo muli bumoleke bw'egulu. Egishagala chiri oku musozi girhakabishwa.
15«Ntaaye ochaana etara mpu aliyuubike kw'agarhanda, aliko alihanika oku gikondo, lyanamolekera booshi bali omu nju. 16Ntyo k'obumoleke bwenyu buleme bwamoleka embere z'abantu, yi babone ebijiro byenyu binja baleme banakuuza Yisho oli omu mpingu.»
Enyigirizo ziyerekeere eRhegeko lya Muusa
17«Murhalemaga mwakengeera mpu nayinjaga kuvuna eRhegeko lya Muusa, changwa enyigirizo z'abaleebi. Ntayinjaga gushanda, aliko nayinjire y'ebi byooshi bijirike. 18Okuli mbabwirire okw'egulu n'empingu bichiri ho, nta mparafu nguma changwa agatomo kaguma k'eRhegeko nji byakuulwa guhika byooshi bijirike. 19Mw'ama marhegeko, ngasi yeeshi nji wavuna liguma liri nka ligeeke, n'okuyigiriza abandi bantu nabo balivune, nj'aba mugeeke omu Bwami bw'empingu. Aliko olaala nji wamahira omu bijiro, n'okuyigiriza abandi bantu bamahire omu bijiro, nj'aba mukulu omu Bwami bw'empingu. 20Kwenge mbabwirire, akaba murhajirire ebikwaneene embere za Nnamahanga kulusha abigiriza b'amarhegeko n'aBafarisaayo, nji murhagafa mwajiire omu Bwami bw'empingu.»
Yeesu ayigiriza elugulu w'oburhe n'bunviikane
Mariko 11.25; Luuka 12.57-59
21«Mwayunvirhe oku bashookuluza benyu babwirwaga ntya: ‹Orhayirhaga#5.21 Osome Lubunguluko 20.13.. Omuntu wayirhire akwaneene ahanwe.›
22«Aliko nyoono, mbabwirire oku ngasi yeeshi oyunvirhe oburhe oku waabo, akwaneene ahanwe. N'olaala nji wabwira mwene waabo ntya: ‹Orhagwerhe obwenge!›, akwaneene guhirwa omu kabuga keerhu. N'olaala nji wabwira mwene waabo ntya: ‹Oli musire!›, nj'akabulwa omu muliro gw'esiku n'amango.
23«Leero, nka wagenda gurhulira Nnamahanga entuulo yaawe oku ntuuliro, n'ahoola okayibuka oku mwene wenyu akugwerhe kw'echinwa, 24leka entuulo yaawe ahoola embere z'entuuliro. Galuka oje kuyunviikana naye, n'enyuma oje gurhuula eyo entuulo yaawe.
25«Akaba hali omuntu wagusidaakire, ogihangane oyunviikane naye juba muchiri omu njira muli mwaja kuburana. Buzira ntyo, aguheeka embere z'omuzuuzi. N'omuzuuzi naye akaguhaana omu maboko m'omupoolisi, n'oyo mupoolisi anaguhira omu munyororo. 26Okuli nkubwirire, orhagarhenga omu munyororo orhanahongere olufuranga lw'obuzinda.»
Enyigirizo ziyerekeere obuhushi
Matayo 18.8-9; Mariko 9.43,47-48
27«Mwayunviirhe oku byaderhwaga ntya: ‹Orhalemaga wahusha.› 28Aliko nyoono mbabwirire ntya: ‹Ngasi yeeshi walola omukazi omu guchifiija ye, miira ahushaga naye omu murhima gwage.› 29Akonva eliisho lyaawe ly'ekulyo lyagarhuma wajira echaaha, oliyoomole onalikabule hale. Kwenge kuli kw'obulagiirire oku wooyo oguheza chirumbu chiguma chonyine ch'omubiri gwawe, ahaali h'omubiri gooshi gukabulwe omu muliro gw'esiku n'amango. 30Akonva efune yaawe y'ekulyo yagarhuma wajira echaaha, oyiche onayikabule hale, kwenge kuli kw'obulagiirire ku wooyo oguheza chirumbu chiguma chonyine ch'omubiri gwawe, ahaali h'omubiri gooshi gukabulwe omu muliro gw'esiku n'amango.»
Okuyegula omukazi
Matayo 19.7-9; Mariko 10.4-5,10-12; Luuka 16.18
31«Byaderhwaga kandi ntya: ‹Ngasi mulume yeeshi oyegwire mukaage, amuhe amaruba mw'okuyeerekana okw'amuyegwire.›#5.31 Osome Rhegeko 24.1. 32Aliko nyoono mbabwirire oku ngasi yeeshi wayeegula mukaage, nka burhali buhemusi bw'obuhushi, eyi amujirire muhushi. N'omulume washabire omukazi bayegwire, oyo mulume naye ahushire.»
Enyigirizo ziyerekeere endahiro
33«Mwayunvirhe kandi oku bashookuluza babwirwaga ntya: ‹Orhalemaga wajira endahiro z'obubeeshi, aliko oleme wakenga endahiro zaawe wajirire embere za Nnaweerhu.›#5.33 Osome Balaawi 19.12.
34«Aliko nyoono mbabwirire oku murhalemaga mwajira endahiro. Murhajiraga endahiro oku ziino ly'empingu, kwenge eri nka ntebe y'oBwami bwa Nnamahanga. 35Murhalemaga mwajira endahiro oku ziino ly'egulu, kwenge liri nka ndabarhiro Nnamahanga ahumuusiza kw'amagulu. Murhalemaga mwajira kandi endahiro oku ziino ly'eYerusaleema, kwenge chiri gishagala gikulu cha Mwami Mukulu. 36Orhalemaga wajira endahiro oku rhwe lyaawe, kwenge orhagahindamula oluviiri lwawe luguma kuba luvi changwa kuba lwiragula. 37Echinwa chenyu chibe ‹Neechi, ye na neechi›, ‹Nangwa, ye na nangwa.› Kwenge nka muyushwire ebindi binwa kw'ebiila, eyi byarhenga emwa Shetaani.»
Enyigirizo ziyerekeere okugihoolera
Luuka 6.29-30
38«Mwayunvirhe oku byaderhwaga ntya: ‹Eliisho oku liisho, n'elinyo oku linyo.›#5.38 Osome Lubunguluko 21.24; Balaawi 24.20; Rhegeko 19.21. 39Aliko nyoono mbabwirire oku akaba omuntu abajirire amabi, murhagihooleraga. Akaba omuntu agushurhire oku rhama ly'ekulyo, onamurhege ely'ekulembe. 40Nk'omuntu ashondere kugusidaaka y'akunyege esimiisi yaawe, lekera ye n'egorhe. 41Nk'omuntu aguseezeze guheeka omuzigo gwage ku chilometere chiguma, omuhisize go ku bibiri. 42Omuntu nk'aguhemere akantu, omuhe ko. N'omuntu nk'ashondere omuhoze, orhamulahiriraga.
Enyigirizo ziyerekeere abashombanyi
Luuka 6.27-28,32-36
43«Mwayunvirhe oku byaderhwaga ntya: ‹Oleme wasiima omuturanyi waawe#5.43 Osome Balaawi 19.18., aliko omwanzi waawe yeewe oleme wamushomba.›
44«Aliko nyoono mbabwirire ntya: ‹Muleme mwasiima abanzi benyu munaleme mwasaliirira ababalibuza.› 45Mukajira ntyo, mwaba baana ba Yisho oli omu mpingu, kwenge anakoleeza ezuuba lyaage oku bantu binja n'oku babi. Anarhoza envula oku bantu bakwaneene n'oku barhakwaneene. 46Akaba munasiima ababasiima bonyine, luhembo luchi mwagwarha? Abafurhiisa b'amakooli nabo banajira ntyo! 47N'akaba munalamusa beene benyu bonyine, mwaba eyi gichi mwajirire chilushire abandi? Na abarhamenyere Nnamahanga nabo, banalamusa beene baabo! 48Mujaage mwaba abakwaneene, nk'oku Yisho w'empingu anaba akwaneene.»
Currently Selected:
Matayo 5: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
