Kufuma 8
8
Kimina kya bubili: Byula
1Kabili Yawe waamwanine Musa nangue, “Endo umwane Farao nangue Yawe walanda evi, ‘Baleke bantu bane baye, evi bakabe kun'mpupa. 2Kine ulikukaana, ndikukanda kyalo kyobe kyonse na kwizuziamo byula. 3Mu Mwenzi wa Nile mulikwizula byula, ni byo bilikwingila mu nghanda yobe, ni mu muputule mu-uliwalaala, ni kusela pa bulita bobe, bilikwingila mu nghanda ya babombi bobe, ni mu kubalua nghanda ya bantu bobe, ni mu bipe biuliwa-apikilamo mikate, ni mu bipe byobe bya kukandilamo bunga. 4Byula bilikusela pali wewe, ni pa bantu bobe, pamo ni pa babombi bobe bonse.’”
5Yawe i lu-aamwanine Musa amwane Haruni nangue, “Olola kuboko kobe ni kabango kobe pa myenzi ni pa twezi, ni pa biziba, evi byula bifume ni kukumana pa kyalo kya Misri.” 6Kupwako, Haruni waolwela kuboko kwakue pa menda onse, ni byula byafuma ni kukumana pa kyalo kya Misri. 7Inzi banghanga ni bo mu bunghanga bwabo baakitile evio vyenka. Baaleetele byula pa kyalo kya Misri.
8Pa kyamba, Farao waakuutile Musa ni Haruni ni kupaapaata walanda, “Nandileko kuli Yawe afumie byula pali nene ni pa bantu bane, ni ne ndikubaleka Baizraeli baye, evi bakabe kumwelela Yawe ngelelo.”
9Musa waamwasukile Farao nangue, “Landa we mwine musita un'mpalile kukupepela wewe ni babombi bobe, ni bantu bobe, evi byula biloviiwe mu nghanda yenu, bisyalilile sie mu mwenzi!”
10Farao waamwanine nangue, “Lukeele.” Musa wa-asukile evi, “Kibe nga muwalandila, evi uye wamanine nangue tekuli unge ali nga Yawe Leza wetu. 11Byula byakaba kufuma pali wewe, ni mu nghanda yenu, ni pa babombi bobe, ni pa bantu bobe. Inzi byakaba kusyalilila sie mu Mwenzi wa Nile.” 12Kupwako, Musa ni Haruni bafuma ku kipango kyakua Farao, ni Musa wamulilila Yawe amupususie Farao pa mulandu wa kimina kya byula. 13Yawe waakitile mwaapepeele Musa. Waipaile byula byaali mu nghanda ni mu misolo pamo ni mu makaba. 14Bamisri baatuulikile byula milui milui, ni kyalo kyonse kyaanunkile. 15Inzi Farao lu-aamwene nangue bapeemako, kabili waafiniizie mutima wakue ni kukaana kutwilizia kuli Musa ni Haruni nga mwaalandiile Yawe.
Kimina kya butatu: Nda
16Yawe i lu-aamwanine Musa nangue, “Mwane Haruni aolole kabango kakue aume pa lufunko, ni lo lwaluke nda mwaya kyalo kya Misri.” 17Ni pakako, Musa ni Haruni baakitile nga muba-aniinue na Yawe. Haruni lu-aalendwile kuboko ni kuuma pa lufunko, nda yaakupile ku Bamisri ni ku biteekua byabo. Lufunko lonse lwa mu kyalo kya Misri lwa-alukile nda. 18Banghanga bakua Farao ni bo mu bunghanga bwabo baeziizie kukita evio, inzi lolo lwendo lwene ba-andilue. Ni pakako, nda yaakupile ku bonse, muntu ni nama. 19#Lk 11.20Banghanga baamwanine Farao nangue, “Maka akua Leza i akita evi.” Inzi Farao waafiniizie mutima wakue, kabili taabatwiliziizie nga mwaalandiile Yawe.
Kimina kya buna: Balunzi
20Kabili Yawe waamwanine Musa nangue, “Lukeele ukabe kubuuka paakili ukabe kuya kuli Farao pa-akaba kuya ku menda. Ukabe kumwana nangue Yawe walanda evi, ‘Baleke bantu bane baye ban'mpupe. 21Kine ukaane kubetabizia kuya, nakaba kukukanda na kukutumina bisepe bya balunzi, kabili nakaba kubituma pa babombi bobe, ni pa bantu bobe, balunzi bakaba kwingila mu nghanda yenu. Mu nghanda yonse ya Bamisri mwakaba kwizula bisepe bya balunzi pamo ni pansi ponse mu kyalo kya Misri. 22Inzi bobo busiku kyalo kya Goseni kikeelemo bantu bane nakaba kukikingilila. Momo mwene temukaba bisepe bya balunzi. Ni pakako, mwakaba kumana nangue ne Yawe ndimukubomba mu keno kyalo. 23Kabili nakaba kubiika bupusano pakati ka bantu bane ni pakati ka bantu bobe. Kaka kalangi kakaba kukitika lukeele.’” 24Ni Yawe waakitile mu-aalandiile. Bisepe bikata bya balunzi byaazoomokeele mu nghanda yakua Farao, pamo ni mu nghanda ya babombi bakue. Kyalo kyonse kya Misri kyainoonekele na bisepe bya balunzi.
25Farao waakuutile Musa ni Haruni. Waabaanine evi, “Ale endo mumwelele Leza wenu ngelelo. Inzi mumwelele sie mu keno kyenka kyalo.”
26Inzi Musa waamwasukile nangue, “Bila, tetuvinda kukita evio! Pantu kine twamwelela Yawe Leza wetu ngelelo, tulikukita mufuupula ku Bamisri, kine batumona twaelela ngelelo imwenekele yali mufuupula ku Bamisri, balikututoota mabue. 27Fwefue tupalile kuya lwendo lwa nsiku itatu mu kaseeba, kuya kumwelela Yawe Leza wetu ngelelo nga vi-akitwana.”
28Farao waalandile nangue, “Ndikumileka muye mu kaseeba kuti muye mumwelele Yawe Leza wenu ngelelo, inzi tekuye kuleepeesie. Muye mun'mpepeleko ni nene wenka.”
29Musa waamwasukile evi, “Evi vyenka vinsyali nafuma pano, ndikuya kukupepela kuli Yawe evi lukeele bisepe bya balunzi bikabe kufuma pali wewe, ni pa babombi bobe, pamo ni pa bantu bobe. Inzi we Farao nakusoka tekuti utubeepe paakale, kabili tekukaana kwitabizia bantu baye bamwelele Yawe ngelelo.”
30Kupwako, Musa wafuma mu nghanda mwa Farao, waya kumupaapaata Yawe. 31Yawe waakitile mwaapaapaatiile Musa. Waafumiizie bisepe bya balunzi pali Farao, ni pa babombi bakue, pamo ni pa bantu bakue. Tepaali ata lunzi umo waasyelepo. 32Inzi Farao waafiniizie mutima paakale ni kukaana kwitabizia kuti baye.
Currently Selected:
Kufuma 8: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
