Kufuma 7
7
1Yawe i lu-aamwanine Musa nangue, “Unvua twebo tundikukwana, nene nakubiika kuba nga Leza ntanzi yakua Farao, ni Haruni alikuba kabika obe. 2Ulikumwana Haruni byonse bindikukwana, ni ye alikumwana Farao etabizie Baizraeli bafume mu kyalo kyakue. 3-4#Mii 7.36Inzi nakaba kufinia mutima wakua Farao, kabili anzia kine nakaba kukila kukita tupapo twane mu kyalo kya Misri, Farao takaba kumyunvua. Ni pakako, nakaba kulanga maka ane pa kyalo kya Misri ni kufumia bantu bane, Baizraeli, mu Misri na tupapo tukata. 5Musita unakaba kulangisia tupapo twane pa kufumia Baizraeli, Bamisri i pa bakaba kumana nangue nene ndi Yawe.” 6Kupwako Musa ni Haruni bakita nga muba-aniinue na Yawe. 7Pa ozo musita ubaalandile ni Farao, Musa waali na myaka 80, ni Haruni waali na myaka 83.
Kabango kakua Haruni
8Kabili Yawe wa-anine Musa ni Haruni nangue, 9“Kine Farao akabe kumyana kukita kapapo ka kusininkizia, ukabe kumwana Haruni akabe kubuula kabango kakue ni kukapooza pansi ntanzi yakua Farao, ni ko kakaba kwaluka kizoka.” 10Musa ni Haruni i lubaingiile kuli Farao ni kukita nga muba-aniinue na Yawe. Haruni waapoozele kabango kakue pansi ntanzi yakua Farao, ni ntanzi ya babombi bakue, ni ko ka-alukile kizoka. 11Kupwako, penka papo Farao wakuuta kale bantu bakue ba mulangue ni bandozi pamo ni banghanga ba mu Misri beze bengile. Ni bo baakitile evio vyenka mu bunghanga bwabo. 12Bonse baapoozele tubango twabo pansi, ni to twa-alukile bizoka. Inzi kabango kakua Haruni kaatelekele tubango twabo. 13Anzia kyaali evio, Farao waali watwaliliile sie kufinia mutima, ni ye taabatwiliziizie nga mwaalandiile Yawe.
Bimina lyanondo byaponena mu kyalo kya Misri
Kimina kya mambo: Mulopa
14Kupwako Yawe wamwana Musa nangue, “Mutima wakua Farao ufinine, ni ye wakaana kwitabizia Baizraeli kuti baye. 15Kansi lukeele lukeelekeele, Farao pa-akaba kuya waya ku menda, ukabe kuya kwimana kumbali Mwenzi wa Nile kuti ukabe kusaakaana nakue watweme ni kabango mu minue yobe, kabango kalia kakyaluka kizoka. 16Mane ukabe kumwana nangue, ‘Yawe Leza wa Baebrania wakintuma kuli wewe kuti ubaleke Baizraeli baye ban'mpupe mu kaseeba. Inzi ni lenu kumo teunaunvue. 17#Nfy 16.4 Ni pakako, ulikumwinika nangue Yawe nani. Ndikuuma pa menda a mwenzi na kaka kabango, ni menda onse alikwaluka mulopa. 18Masabi ali mu mwenzi alikufua, mwenzi ulikununka, ni Bamisri balikwandua kumina menda a mwenzi.’”
19Kabili Yawe waamwanine Musa nangue, “Mwane Haruni nangue, ‘Buula kabango kobe ni kuolwela kuboko pa menda a mu Misri: Pa myenzi yabo, ni pa twezi twabo, ni pa biina byabo bya menda, ni pa biziba byabo byonse bya menda, ni menda alikwaluka mulopa. Ozo mulopa wakaba kuya wali mu kyalo kyonse kya Misri, mu bibaya ni mu ngeso.’”
20Ni pakako, Musa ni Haruni baakitile nga muba-aniinue na Yawe. Haruni waalendwile kabango ni kuuma pa menda a mwenzi ntanzi yakua Farao ni ntanzi ya babombi bakue. Menda onse a mwenzi a-alukile mulopa. 21Masabi aali mu mwenzi aafwile. Mwenzi waanunkile, ni Bamisri ba-andilue kumina menda a mwenzi. Mulopa waakumeene mu kyalo kyonse kya Misri. 22Inzi banghanga ba mu Misri ni bo baakitile evio vyenka mu bunghanga bwabo. Farao waatwaliliile kufinia mutima, kabili taamutwiliziizie Musa ni Haruni nga mwaalandiile Yawe. 23Farao waabweleele ku nghanda yakue pasili kupoozako maano ku bintu byaakitikile. 24Bamisri bonse i lubaimbile biina bya menda mumbali Mwenzi wa Nile evi bapate menda a kumina pantu ba-andilue kumina menda a ozo mwenzi.
25Paapitile nsiku kilooba menda a mwenzi ainoonekele na kekio kimina.
Currently Selected:
Kufuma 7: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
