Kufuma 9
9
Kimina kya busaano: Kufua kwa biteekua
1Kabili Yawe waamwanine Musa nangue, “Endo umwane Farao nangue Yawe wa Baebrania walanda evi, ‘Baleke bantu bane baye ban'mpupe. 2Pantu kine wabakakatila ni kukaana kubaleka baye, 3nakaba kukukanda na kuleeta kimina kya nfua pa biteekua byobe: Pa farasi ni pa punda, pa nghamia ni pa nghombe, pamo ni pa mikooko ni pa mbuzi. 4Inzi nakaba kulekenkania paakale pakati ka biteekua bya Baizraeli ni pakati ka biteekua bya Bamisri. Tepali nama wa pa Baizraeli wakaba kufua.’” 5Yawe waabiikile musita walanda nangue, “Lukeele i musita unakaba kukitilapo keki kintu mu Misri.”
6Ni kiine kukeele lwakue lukeelekeele Yawe waakitile mu-aalandiile. Nama yonse ya Bamisri yaafwile. Inzi pa nama ya Baizraeli tepaafwile ata umo. 7Farao i lu-aatumine babombi bakuya kukebelezia palua nama ya Baizraeli. Waizile kubwilua nangue pa nama ya Baizraeli tepaafwile ata umo. Anzia kyaali evio, Farao waali watwaliliile sie kufinia mutima ni kukaana kubaleka Baizraeli baye.
Kimina kya mutanda: Bipute
8Yawe wa-anine Musa ni Haruni nangue, “Buule mito linsue limo mu kikuka, kusyali Musa aulwile mito mu muulu ntanzi yakua Farao. 9Mito yaakaba tunkolopiilo twaakakumana pa kyalo kyonse kya Misri, ni yo yaakaaluka bipute byaakamena ku muntu ni ku nama mu kyalo kyonse kya Misri.” 10#Nfy 16.2Ni pakako, baabuulile mito ya mu kikuka kya mulilo ni kuya kwimana pa ntanzi yakua Farao. Musa waulwile mito mu muulu, ni yo ya-alukile bipute byaamenene ni kwaluka bilonda pa bantu ni pa biteekua. 11Banghanga ba-andilue kwimana pa ntanzi yakua Musa pantu ni bo baamenenue na bipute pamo ni Bamisri bonse. 12Inzi Yawe waafiniizie mutima wakua Farao, ni ye taamutwiliziizie Musa ni Haruni nga mwa-aninue Musa na Yawe.
Kimina kya kilooba: Nvula ya kibue
13Kabili Yawe waamwanine Musa nangue, “Buuka paakili lukeelekeele uye wimane pa ntanzi yakua Farao ni kumwana nangue Yawe Leza wa Baebrania walanda evi, ‘Baleke bantu bane baye ban'mpupe. 14Kine teukitile evio, lono lwendo nakaba kumikanda bonse. Wewe ni babombi bobe pamo ni bantu bobe. Upalile kumana nangue mu byalo byonse temuli unge ali nga nene. 15Pantu evi nga nsisyakukandile pamo ni bantu bobe na kimina, kabili nga teusyaloviiziwe pa kyalo. 16#Bar 9.17Inzi n'milekeleele kuba bakose pa mulandu wakuti musininkizie vili maka ane, ni Liina lyane limanike mwaya kyalo. 17Ni evi nsimwene kiulimukwitantamwina pa bantu bane pasili kubaleka baye. 18Ni pakako, lukeele pa ono wenka musita nakaba kunokia nvula ikata ya kibue isinanokepo kutula kulengua kwa kyalo kya Misri mpaka lelo. 19Kansi lenga wane babombi baye bengizie nama yobe mu nghanda, pamo ni byonse bi-uli nabio mu makaba, pantu kubalua muntu, ni nama ozo wakaba kusangililua ku makaba pasili kusungua mu nghanda, nvula ya kibue yakaba kumunoka ni kumwipaya.’” 20Mubombi wa pa babombi bakua Farao, ozo waapoozele maano ku keebo kakua Yawe, waingiziizie babombi bakue pamo ni nama yakue mu nghanda. 21Inzi olia asyaapoozele maano ku keebo kakua Yawe, waalekeleele babombi bakue ni nama yakue ku makaba.
22Kabili Yawe waamwanine Musa nangue, “Olola kuboko kobe mu muulu evi nvula ya kibue inokele mu kyalo kyonse kya Misri, pa bantu, ni pa biteekua pamo ni pa bilimbua byonse bya mu makaba.” 23Musa lu-aolwele kabango kakue mu muulu, Yawe waatumine mitukumo ni nvula ya kibue, ni nkuba yaaponeene pansi. Ni pakako, Yawe waanokiizie nvula ya kibue yakilile kubiipa mu kyalo kyonse kya Misri. 24#Nfy 8.7; 16.21Ezio nvula ikata ya kibue yaali yalimo mitukumo ni bimpenimpeni, yaali teinanokepo kutula kutendeka kwa ntundu mu kyalo kyonse kya Misri. 25Ezio nvula ya kibue yaanokele, yainoonene kubalua kantu kaali kali mu makaba a mu kyalo kyonse kya Misri ni bantu pamo ni nama. Ezio nvula yainoonene bilimbua byonse bya mu makaba ni kutyona bimuti byonse. 26Inga sie mu kyalo kya Goseni kyaali kyalimo Baizraeli, i musyaanokele nvula ya kibue.
27Pa kyamba, Farao waatumine muntu wa kuya kukuuta Musa ni Haruni. Waabaanine evi, “Lono lwendo naluvia. Yawe ni mulunghami, nene ni bantu bane tuluviizie. 28Mupaapaate Yawe pantu ezi mitukumo ni nvula ya kibue byakila. Nene ndikumileka muye evi tekuti mutwalilile kwikala mono mu Misri.”
29Musa waamwasukile nangue, “Musita undikufuma mu muzi, ndikupepa namulendwiliile Yawe maboko ane, mitukumo ni nvula ya kibue bilikupua pakuti winike nangue Yawe i mwine kyalo. 30Inzi n'manine sie nangue wewe ni babombi bobe kumunakila Yawe Leza tekunabepo.”
31(Kitani ni nghano ya shairi byainoonenue pantu shairi yaali yasyakosele, ni kitani kyasyatootele buluba. 32Inzi nghano ni binge tebyainoonenue pantu byaali tebinakule.)
33Kupwako, Musa wafuma kuli Farao ni kuya kunze ya muzi. Musa lu-aalendwile maboko akue kuli Yawe, mitukumo ni nvula ya kibue byaapwile, nvula teyaatwaliliile kabili kunoka. 34Farao lu-aamwene nangue mitukumo ni nvula ya kibue byapua, waabalile paakale ni kufinia mutima wakue, wene pamo ni babombi bakue. 35Ni pakako, Farao waafiniizie mutima ni kukaana kubaleka Baizraeli baye baya nga mwaalandiile Yawe kupitila muli Musa.
Currently Selected:
Kufuma 9: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
