लुकस 6
6
जिरारना-उल्ला ही उर्बास
(मत्तिस १२:१-१४; मरकुस २:२३-२८; ३:१-६)
1येसुस जिरारना-उल्ला नू गोहोम पंजका ख़ल्ल तरती मन्नुम काला लगियस। ख़ने आस ही चेलर गोहोम ही ख़न्जकन चोक्खर की ख़ेक्खा नू निलिबयर#६:१ निलिबयर व्यवस्था लेखा (व्यवस्था २३:२५) यहुदिर ख़ल्ल गुट्ठी नू मन्नुम काला लगियर होले ख़न्जकन चड़आ की मोख़ा ओंगनर अउर अदिन ख़ड़आ मला पबआ लगियर। एन्देरगेका आद अबड़र ही लेखा जिरारना-उल्ला नू नलख नन्नर बआ की मानआ लगियर। अउर अदिन मोख़ा हेल्लरर।#व्यवस्था २३:२५ 2ख़ने यहुदी बअना फरिसिर ती नेकउम मेन्जर, “निम एन्ने नलख एन्देरगे नन्दर एकदा जिरारना-उल्ला नू मोसास ही व्यवस्था नना गे मला मनो बाचका नलखन हूँ निम एन्देरगे नन्दर?”
3ख़ने येसुस बिड़दाचस की बाचस, “एन्दरा निम धरमपुथिन मला पढ़चका रअदर, आबाकी दाउदस तंग्हय गने रउर गे किड़ा लक्का बेड़ा एन्दरा नन्जस? 4आस धर्मेस ही एड़पा नू केरस की धर्मेस गे अरगका असमान मोक्खस अउर तंग्हय गने रउर गे हूँ चिच्चस, एकदा यहुदी नैगर अम्बर दोसरर ने हूँ मोख़ा पोलनर।”#१ सामु'एलस २१:१-६; लेविर २४:९
5अउर येसुस आरिन बाचस, “धर्मेस तय्यका एन आल तंगदन#६:५ धर्मेस तय्यका एन आल तंगदनयेसुस तंगनुम बअदस। जिरारना-उल्लन ता हूँ उर्बास हिकदस।”
येसुस ख़यका ख़ेक्खा मन्जका आलसिन कोड़े नन्जका
(मत्तिस १२:९-१४; मरकुस ३:१-६)
6दोसरा जिरारना-उल्ला नू येसुस यहुदिर ही सभाएड़पा भितरी केरस की सिखाबआ हेल्लरस। ख़ने असन ओन्द तिना ख़ेक्खा ख़यका आलस हूँ रहचस। 7मोसास ही व्यवस्था सिखाबउर अउर यहुदी बअना फरिसिर जिरारना-उल्ला नू हूँ येसुस नेकआनुम कोड़े नन्दस का बआ की एःरा लगियर। अबड़र बेद्दा लगियर का येसुस ती गुनहा मना नेकआ अउर आसिन दोस लगबआ ओंगा नेकआ। 8लेकिन येसुस अबड़र ही जिया ता कत्थन अख़दस की, आ ख़यका ख़ेक्खा मन्जका आलसिन बाचस, “इसन बरा अउर इजआ।” ख़ने आस चोचस की इज्जस। 9ख़ने येसुस अबड़रिन बाचस, “एन निमरिन मेन्दन, जिरारना-उल्ला नू एन्देर नलख नन्ना बेस्स र' ई दव का मलदव? संगरा नन्ना बेस्स का नोकसान नन्ना बेस्स?” 10येसुस चौगुड़ती होरमारिन इरियस की आ आलसिन बाचस, “निंग्हय ख़ेक्खन पसड़आ।” आस अन्नेम नन्जस ख़ने आस ही ख़ेक्खा कोड़े मन्जा केरा।
11लेकिन मोसास ही व्यवस्था सिखाबउर अउर यहुदी बअना फरिसिर खिंस ती निन्दयर केरर, अउर येसुसिन एन्देर ननोत बआ की ताम-ताम कच्छनखरआ हेल्लरर।
येसुस बारा गोड़े मुध चेलरिन चाजदस
(मत्तिस १०:१-४; मरकुस ३:१३-१९)
12ओन्द उल्ला येसुस परता नू गोहरारआ गे केरस, अउर धर्मेस गने गोहरारना नू भैर माख़ा बिताबाचस। 13बिज्जिया ख़ने येसुस तंग्हय चेलारिन तंग्हय गुसन मिख़ियस, अउर अबड़र मझही ती येसुस बारा गोड़ेरिन चज्जियस, अउर आर गे मुध चेलर बाचस की नामे चिच्चस। 14सिमोन, नेकन येसुस पतरुस नामे हूँ चिच्चका रहचस, अउर आस ही तंग्ड़िस अन्दिरियासस, याकुबस, युहन्नास, फिलिपस, बारथोलोमाइस, 15मत्तिस, थोमास, अल्फयस ही तंग्दस याकुबस, सिमोनस नेकन देसभक्त बआ लगियर, 16याकुबस ही तंग्दस यहुदास अउर यहुदा इस्करियोतस, ने धोखा चिऊ मन्जस।
येसुस बग्गे आलरिन कोड़े नन्जस
(मत्तिस ४:२३-२५)
17येसुस चेलर गने परता ती इत्तयस की ओन्टा सइर अड्डा नू इज्जस। आस ही चेलर ही ओन्टा कोहाँ गोहड़ा रहचा, अउर हुरमी यहुदिया प्रदेस ता, अउर यरुसलेम ता अउर समुन्दर ही गन्डा नू रहचका टुरोस अउर सिदोन सहर ता बग्गेम आलर बरचका रहचर। 18आस ही कत्था मेना गे अउर तंग्हय रोगे ती कोड़े मना गे बरचका रहचर। मलदव बोलता ती सतारका आलर हूँ कोड़े मन्जर। 19होरमा आलर आसिन ओंसड़आ बेद्दा लगियर, एन्देरगेका आस ती सवंग उरख़ा लगिया, अउर अबड़ा होरमारिन कोड़े नना लगिया।
सुखे अउर दुक्खे
(मत्तिस ५:१-१२)
20ख़ने येसुस तंग्हय चेलर तरा किर्रे इरियस की बाचस,
“निम धैन ही रअदर, ने गरिब रअदर,
एन्देरगेका धर्मेस ही राजी निम्हय दिम हिके।
21निम धैन ही रअदर ने अक्कुन किड़ा रअदर,
एन्देरगेका निम उड़तारओर।
निम धैन ही रअदर, ने अक्कुन चिंख़दर,
एन्देरगेका निम अलखोर।”
22“निम धैन ही रअदर, एकाबिरी आलर निमरिन धर्मेस तय्यका एन आल तंग्दस ही करने हिड़ओर, अउर निमन छिनडोर, अउर मलदव बओर, अउर निम्हय नामेन मलदव बओर। 23आ बेड़ा निम रिझरआ अउर खुसमारआ की डेगआ, एन्देरगेका मेर्ख़ा नू निम्हय इनाम कोहाँ मनो। एन्देरगेका आर ही पुरखर अगमजानिरिन एन्नेम नन्जका रहचर।”#२ इतिहास ३६:१६; मुध चेलर ७:५२
24“लेकिन ओहरे, निम उरुब गुट्ठी!
एन्देरगेका निम निम्हय सुखे अउर रिझ ख़क्खा ख़चकर।
25ओहरे, निम अक्कू उड़तारका र' ऊ गुट्ठी!
एन्देरगेका निम किड़ा सारओर।
ओहरे, निम अक्कू अलखुर!
एन्देरगेका निम दुक्खे सारओर अउर चिंख़ोर।”
26“ओहरे, निमरिन, एकाबिरी होरमा आलर निम्हय ओहमा ननोर! एन्देरगेका आर ही पुरखर ठकऊ अगमजानिरिन एन्नेम नन्जका रहचर।
मुदैरिन चोन्हा नना
(मत्तिस ५:३८-४२)
27“लेकिन एंग्हय कत्था मिनुरिन एन बअदन, निम्हय मुदैरिन चोन्हा नना, अउर निंगन हिंड़उरिन सोग्गे नना। 28निंगन सरपउर गे आसिस चिआ, मला बेस्स बेहवार ननुर ही खतरी गोहरारआ। 29निंगन ओन्द गल्ले नू लउरगे दोसरा गल्लेन हूँ लोआ गे चि चिआ, अउर निंग्हय बहारिन्ता झुलन हुउर गे निंग्हय भित्रिन्ता झुलन हूँ होआ गे चिआ। 30निंग्हय गने नेऊ होरमर गे चिआ, अउर निंग्हय सर-समानन हुउर गने फेर मला नेआ। 31एकन्ने आलर निम्हय गने ननोर बआ की निम बेद्ददर, निम हूँ अबड़र गने अन्नेम नना।
32“निमरिन चोन्हा ननुर गने चोन्हा नन्दर होले निमा गे एन्देर नफा मन्जा? एन्देरगेका पपहर हूँ तंगन चोन्हा ननुर गने चोन्हा नन्नर। 33ख़ने निम्हय दव ननुर गने दव नन्दर होले, निमा गे एन्देर नफा मनो? एन्देरगेका पपहर हूँ गा एन्नेम नन्नर। 34अउर निम किर्तअना असरा उइयोर की नेकआगेम रिन चिओर होले, निमा गे एन्देर नफा मनो? एन्देरगेका पपहर हूँ रिन तिरआ उंग्गू पपहरगेम रिन चिअनर। 35लेकिन निंग्हय बैरिरिन चोन्हा नना अउर अबड़र ही दव नना। अउर ख़क्खना ही असरा मला नना की रिन चिआ अउर निम कोहाँ इनाम ख़क्खोर, अउर निम हुरमी ती मइयाँ नू र' ऊ धर्मेस ही ख़द्दर लेखा मनोर, एन्देरगेका धर्मेस बेइमान अउर कुचरहर गे सोग्गे रअदस। 36निम्हय मेर्ख़ा ता बबस सोग्गे रअदस, अन्नेम निम हूँ सोग्गे मना।
दोसररिन दोस मला लगबआ
(मत्तिस ७:१-५)
37“दोसरर ही न्याय मला नना अउर निम्हय हूँ न्याय मला ननतारओ। दोसररिन दोस मला लगबआ, अउर निमा गे दोस मला लगतारओर। छेमा नना, अउर निमरिन हूँ धर्मेस छेमा ननोस। 38चिआ, अउर निमा गे हूँ चितारओ। अरबा-अरबा, नुकुच-नुकुच अउर बिजरना लेखा धर्मेस निम्हय कोइछा नू चिओस। एन्देरगेका एका नाप ती निम चिइदर, आ नाप तिम निमा गे हूँ चितारओ।”
39ख़ने आस अबड़रिन ओन्टा खिरी हूँ तिंगियस, “एन्दरा अन्धहस अन्धहासिन डहरे एदआ ओंगोस दरा? एन्दरा अबड़ा दोनो गोड़ेर गड्डी नू मला खतरओर दरा? 40चेलस तंग्हय गुरुस ती कोहाँ मला मन्दस, लेकिन पुरा सिखरओस की आस तंग्हय गुरुस लेखा मनोस।
41“निंग्ड़िस ही ख़न्न नू मन्जका खटकन निन एन्देरगे एरदय, लेकिन निंग्हय ख़न्न नू मन्जका ढिंगरन मला एरदय? 42निन निंग्हय ख़न्न नू मन्जका ढिंगरन मला एरदय होले, निंग्ड़िसिन#६:४२ निंग्ड़िसिन इद ख़ेस ही नातेदार लेका मला बुझबिई। धार्मिक गोहड़ा ता नेकआनुम हूँ जनाबिई। ‘अना भइयो, निंग्हय ख़न्न नू मन्जका खटका एंगन ओथरआ गे चिआ’ बआ की निन एकसे बआ ओंगोय? अना कपटी, पहिले निंग्हय ख़न्न ता ढिंगरन ओथरआ, ताब निन निंग्ड़िस ही ख़न्न नू मन्जका खटकन ओथरआ गे बेस्स कुना एःरा ओंग्गे।
मन्न अउर अदी ही ख़ंजपा
(मत्तिस ७:१६-२०; १२:३३-३५)
43“एकअम दव मन्न मलदव ख़ंजपा मला ख़ंजतिई, न तो मलदव मन्न दव ख़ंजपा ख़ंजतिई। 44हुरमी मन्न तंग्हय ख़ंजपा तिम चिन्हारी। एन्देरगेका झुकड़ी ती नेकउम अन्जिर मला चोख़नर, न तो अच्च झुकड़ी ती अंगुर चोख़नर। 45दव आलर तंग्हय जिया ही दव कुट्ठी ती दव कत्था दुम ओथरनर अउर मलदव आलर तंग्हय जिया ही मलदव कुट्ठी ती मलदव कत्था दुम ओथरनर। एन्देरगेका एका कत्था जिया नू निन्दरकी मनी, आलर ही बई ती आदिम उरख़ी।
दुई ठो एड़पा ही खिरी
(मत्तिस ७:२४-२७)
46“एंग्हय बाचका कत्थन मला नन्दर होले एन्देरगे एंगन ‘अना उर्बायो, अना उर्बायो,’ बअदर? 47ने एंग्हय गुसन बरनर अउर एंग्हय कत्थन मेन्नर अउर आ लेक्खआ नन्नर, आस एकन्ने आलस हिकदस, एन निमन तेंग्गोन। 48आस ओन्द एड़पा कमऊ आलस लेखा हिकदस, ने गड्डी अरख़ियस की चट्टान मइयाँ एड़पा ही जग कमचस। ख़ने एकाबिरी बड़ही बरचा ख़ने आ एड़पा नू लग्गिया, ताब आ एड़पन नुकआ पोल्ला, एन्देरगेका आ एड़पा ही बरियो जग कमचका रहचा। 49लेकिन एका ओर्तोर एंग्हय कत्थन मेन्नर अउर आ लेखा मला नन्नर, आस ओन्द एन्ने आलस हिकदस, एकसे ख़ेख़ेल मइयाँ बेगर जग ही एड़पा कमचस। ख़ने एकाबिरी बड़ही बरचा ख़ने आ एड़पा नू लग्गिया, ताब आ एड़पा तुरतेम खतरा अउर आ एड़पा ही कोहाँ सर्वनास मन्जा।”
Currently Selected:
लुकस 6: KRUX
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
